11 1 ಜೆಜು ಆಪ್ಲ್ಯಾ ಬಾರಾ ಜಾಣಾಂ ಶಿಸಾಂಕ್ ಹಿ ಶಿಕೊವ್ಣ್ ದೀವ್ನ್ ಜಾತಚ್, ಭೊಂವ್ತಣಿಂಚ್ಯಾ ಶಹರಾಂನಿ ಶಿಕೊಂವ್ಕ್ ಆನಿ ಪ್ರಸಂಗ್ ಕರುಂಕ್ ಥಂಯ್ಚೊ ಭಾಯ್ರ್ ಸರ್ನ್ ಗೆಲೊ.
ಸ್ನಾನ್ -ದಾತಾರ್ ಜುವಾಂವ್ನ್ ಧಾಡ್ಲಲೆ ದೂತ್
(ಲೂಕ್ 7:18-35)
2-3 ತವಳ್ ಕ್ರಿಸ್ತಾಚ್ಯಾ ಕೃತ್ಯಾಂ ವಿಶ್ಯಾಂತ್ಲಿ ಖಬರ್ ಬಂದೆಂತ್ ಆಸಲ್ಲ್ಯಾ ಜುವಾಂವ್ಚ್ಯಾ ಕಾನಾಂತ್ ಪಡ್ಲಿ ಆಸ್ತಾಂ,ತಾಣೆಂ ಆಪ್ಲ್ಯಾ ಶಿಸಾಂಕ್ ಧಾಡ್ನ್ ಜೆಜುಲಾಗಿಂ ಅಶೆಂ ವಿಚಾರುಂಕ್ ಲಾಯ್ಲೆಂ: " ಯೆಂವ್ಚೊ ಆಸಾ ತೊ ತೊಂಚ್, ವಾ ಆಮಿ ಆನ್ಯಕ್ಲ್ಯಾಚಿ ವಾಟ್ ಪಳೆಜಯ್?" 4-5 ಜೆಜುನ್ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ : " ಪಾಟಿಂ ವಾಚಾ, ಆನಿ ತುಮಿಚ್ ಆಯ್ಕಲಾಂ ಆನಿ ಪಳೆಲಾಂ ತೆಂ ಜುವಾಂವ್ಕ್ ಸಾಂಗಾ: ಕುರ್ಡೆ ಪಳೆತಾತ್, ಥೊಂಟೆ ಚಲ್ತಾತ್, ಕೊಡ್ಕಾರ್ ನಿತಳ್ ಜಾತಾತ್, ಕೆಪ್ಪೆ ಆಯ್ಕತಾತ್, ಮೆಲ್ಲೆ ಜೀವ್ ಜಾತಾತ್ ಆನಿ ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ ಜಾತಾ. 6 ಮ್ಹಜೇ ವಿಶ್ಯಾಂತ್ ಜಾಚೊ ಭಾವಾರ್ಥ್ ಧಂಡಳ್ನಾ ತೊ ಭಾಗಿ!"
7 ಜುವಾಂವ್ಚೆ ಶಿಸ್ ಪಾಟ್ ಕರ್ನ್ ಗೆಲ್ಲೆಚ್, ಜೆಜು ಲೊಕಾಚ್ಯಾ ಜಮ್ಯಾಲಾಗಿಂ ಜುವಾಂವ್ ವಿಶ್ಯಾಂತ್ ಉಲೊಂವ್ಕ್ ಲಾಗ್ಲೊ: " ತುಮಿ ಕಿತೆಂ ಪಳೆಂವ್ಕ್ ಮ್ಹಣ್ ಅರಣ್ಯಾಕ್ ಗೆಲ್ಲ್ಯಾತ್?ವಾರ್ಯಾಕ್ ಧಲ್ಚೊ ಚಿವೊಗಾಯ್?ನ್ಹಯ್ ತರ್ , ಕಿತೆಂ ಪಳೆಂವ್ಕ್ ಗೆಲ್ಲ್ಯಾತ್ ? ನಾಜೂಕ್ ವಸ್ತುರಾಂ ನ್ಹೆಸ್ಲಲೊ ಮನಿಸ್ ಗಾಯ್? ನಾಜೂಕ್ ವಸ್ತುರಾಂ ನ್ಹೆಸ್ತಾತ್ ತೆ ರಾವ್ಳೆರಾಂನಿ ಪಳೆಂವ್ಕ್ ಮೆಳ್ತಾತ್. 9 ಕಿತೆಂ ತರ್ ತುಮಿ ಪಳೆಂವ್ಕ್ ಗೆಲ್ಲ್ಯಾತ್? ಏಕ್ ಪ್ರವಾದಿ? ವ್ಹಯ್, ಹಾಂವ್ ತುಮ್ಕಾಂ ಸಾಂಗ್ತಾಂ, ಪ್ರವಾದ್ಯಾ ಪ್ರಾಸ್ ವರ್ತ್ಯಾಕ್. 10ತಾಚೇಚ್ ವಿಶ್ಯಾಂತ್ ಪವಿತ್ರ್ ಪುಸ್ತಕಿಂ ಆಶೆಂ ಬರೊವ್ನ್ ಆಸಾ:
‘ಪಳೆ, ಮ್ಹಜ್ಯಾ ದುತಾಕ್, ತುಜ್ಯಾ ಫುಡ್ಲ್ಯಾನ್ ಧಾಡ್ತಾಂ,
ತೊ ತುಜ್ಯಾ ಯೆಣ್ಯಾಕ್ ತುಜಿ ವಾಟ್ ತಯಾರ್ ಕರ್ತಲೊ’
11 ಸತ್ ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ : ಮನಿಸ್ ಜಾವ್ನ್ ಜಲ್ಮಲ್ಲ್ಯಾಂ ಮಧೆಂ ಸ್ನಾನ್ ದಾತಾರ್ ಜುವಾಂವ್ ಪ್ರಾಸ್ ವರ್ತೊ ದುಸ್ರೊ ನಾ; ತರಿಪುಣ್ ಸರ್ಗಿಂಚ್ಯಾ ರಾಜ್ಯಾಂತ್ ಕನಿಷ್ಟ್ ಆಸ್ಲಲೊ ಸಯ್ತ್ ತಾಚೇ ಪ್ರಾಸ್ ವ್ಹರ್ತೊ. 12 ಸ್ನಾನ್ ದಾತಾರ್ ಜುವಾಂವ್ ಆಯ್ಲಲ್ಯಾ ಕಾಳಾ ಥಾವ್ನ್ ಆಜ್ ಪರ್ಯಾನ್ ಸರ್ಗಿಂಚ್ಯಾ ರಾಜ್ಯಚೆರ್ ಜುಲುಮ್ ಚಲ್ತಾ ಆನಿ ಜುಲುಮ್ ಕರ್ಪಿ ಬಲತ್ಕಾರಾನ್ ತೆಂ ಸ್ವಾಧೀನ್ ಕರುಂಕ್ ಪಳೆತಾತ್. 13 ಜುವಾಂವ್ಚ್ಯಾ ಕಾಳಾ ಪರ್ಯಾನ್ ಘಡೊಂಕ್ ಆಸ್ ಲ್ಲೆಂ ತೆಂ ಸರ್ವ್ ಪ್ರವಾದ್ಯಾಂನಿ ಆನಿ ನಿಯಮ್ ಶಾಸ್ತ್ರಾನ್ ಪಯ್ಲೆಂಚ್ ಸಾಂಗುನ್ ದಿಲ್ಲೆಂ. 14 ಆನಿ ಹೆಂ ತುಮಿ ಮಾನುನ್ ಘೆಂವ್ಕ್ ತಯಾರ್ ಆಸಾತ್ ಜಾಲ್ಯಾರ್- ತೊಚ್ ತೊ ಯೆಂವ್ಚೊ ಆಸ್ಲಲೊ ಎಲಿಯಾ. 15 ತುಮ್ಕಾಂ ಕಾನ್ ಆಸಾತ್ ಜಾಲ್ಯಾರ್ ಆಯ್ಕಾ!
16 " ತರ್ ಹಿ ಸಂತತ್ ಕೊಣಾಕ್ ಮ್ಹಣ್ ಹಾಂವ್ ಸರಿ ಕರುಂ ? ರಸ್ತ್ಯಾ ದೆಗೇರ್ ಬಸುನ್ ಆಪ್ಲ್ಯಾ ಸಾಂಗಾತ್ಯಾಂಕ್ ಬೊಬ್ ಮಾರ್ನ್ ಸಾಂಗ್ತಲ್ಯಾ ಭುರ್ಗ್ಯಾಂಕ್ ಸರಿ ತಿ:
17" ತುಮ್ಕಾಂ ಖುಶಾಲ್ ಕರುಂಕ್ ಆಮಿ ವಾಜ್ಲೆಂ, ತರ್ ಯೀ ತುಮಿ ನಾಚುಂಕ್ ನಾಂತ್; ತುಮ್ಕಾಂ ದುಖೇಸ್ತ್ ಕರುಂಕ್ ಆಮಿ ಗಾಯ್ಲೆಂ,ತರ್ ಯೀ ತುಮಿ ರಡುಂಕ್ ನಾಂತ್’
18 ಜುವಾಂವ್ ಖಾಣ್ ಪೀವನ್ ನಾಸ್ತಾನಾ ಆಯ್ಲೊ; ಆನಿ ಲೋಕ್ ‘ತಾಕಾ ದೆಂವ್ಚಾರ್ ಲಾಗ್ಲಾ’ ಮ್ಹಣಾಲೊ. 19 ಮನ್ಶಾಪೂತ್ ಆಯ್ಲಾ, ಖಾತಾ ಆನಿ ಪಿಯೆತಾ; ಆನಿ ಲೋಕ್ ‘ಪಳೆಯಾ, ಏಕ್ ಪೊಟಾರಿ ಆನಿ ಪಿವ್ಣೊ; ಸುಂಕಾಗಾರಾಂಚೊ ಆನಿ ಪಾತ್ಕ್ಯಾಂಚೊ ಈಷ್ಟ್!’ ಮ್ಹಣ್ತಾ. ಜಾಲ್ಯಾರ್ ಯೀ ದೈವಿಕ್ ಜಾಣ್ವಾಯ್ ಚೂಕ್ ನಾತ್ಲಲಿ ಮ್ಹಣ್ ತಿಚ್ಯಾಚ್ ಕರ್ನ್ಯಾಂನಿ ರುಜು ಜಾತಾ."
ಅವಿಶ್ವಾಸಿ ಶಹರಾಂ
(ಮಾತೆವ್ 10:15; ಲೂಕ್ 10:2-15)_
20 ಉಪ್ರಾಂತ್ ತಾಣೆಂ ಜಾಯ್ತಿಂ ಅಚರ್ಯಾಂ ಕೆಲ್ಲಿಂ ತ್ಯಾ ಶಹರಾಂಕ್ ವಚುನ್, ದೆವಾ ಥಂಯ್ ತಿಂ ಪಾಟಿಂ ಪರ್ತೊಂಕ್ ನಾಂತ್ ದೆಕುನ್ ತಾಂಕಾಂ ತೊ ಭೆಷ್ಟಾಂವ್ಕ್ ಲಾಗ್ಲೊ. 21 " ಹಾ, ಕಿತ್ಲಿ ಭಿರಾಂಕುಳ್ ಜಾತಲಿ ತುಜಿ ಸ್ಥಿತಿ, ಏ ಖೊರಾಜಿನಾ! ಹಾಯ್ ತುಕಾ, ಏ ಬೆಥ್ಸಾಯ್ದಾ! ತುಮ್ಚೇ ಮಧೆಂ ಕೆಲ್ಲಿಂ ತಿಂ ಅಚರ್ಯಾಂ ತೀರ್ ಆನಿ ಸಿದೋನ್ ಶಹರಾಂನಿ ಕೆಲ್ಲಿಂ ಜಾಲ್ಯಾರ್, ಥಂಯ್ಚೊ ಲೋಕ್ ಖಂಯ್ಚ್ಯಾ ಕಾಳಾ ಗೋಣಿವಸ್ತುರ್ ನ್ಹೆಸುನ್ ಆನಿ ಆಂಗಾರ್ ಗೊಬರ್ ಘಾಲ್ನ್ ಆಪ್ಲಿ ಜಿಣಿ ಬದಲ್ತೊ! 22 ದೆಕುನ್, ಹಾಂವ್ ತುಮ್ಕಾಂ ಸಾಂಗ್ತಾಂ: ‘ಝಡ್ತೆಚ್ಯಾ ದಿಸಾ ತೀರ್ ಆನಿ ಸಿದೊನಾಚ್ಯಾ ಲೊಕಾಕ್ ತುಮ್ಚೇ ಪ್ರಾಸ್ ಚಡ್ ಕಾಕುಳ್ತ್ ಲಾಭ್ತಲಿ. 23 ಆನಿ ತುಂ ಕಫರ್ನಂವ್, ಆಕಾಸಾಕ್ ಚಡ್ತಲೆಂಯ್ ಮ್ಹಣ್ ಚಿಂತ್ತಾಯ್ ಕಿತೆಂ? ಪಾತಾಳಾಕ್ ತುಂ ಶೆವ್ಟತಲೆಂಯ್! ಕಿತ್ಯಾಕ್ ತುಜೇ ಥಂಯ್ ಕೆಲ್ಯಾಂತ್ ತಿಂ ಅಚರ್ಯಾಂ ಸೊದೊಮಾಂತ್ ಕೆಲ್ಲಿಂ ಜಾಲ್ಯಾರ್ ಆಜೂನ್ ಯೀ ತೆಂ ಉಬೆಂ ಆಸ್ತೆಂ! 24 ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ :ಝಡ್ತೆಚ್ಯಾ ದಿಸಾ ಸೊದೊಮಾಚ್ಯಾ ಗಾಂವಾಕ್ ತುಜೇ ವರ್ನ್ ಕಾಕುಳ್ತ್ ಲಾಭ್ತಲಿ.’
ಬಾಪ್ ಆನಿ ಪೂತ್
(ಲೂಕ್ 10:21-22)
25 ತ್ಯಾ ವೆಳಿಂ ಜೆಜು ಮ್ಹಣಾಲೊ : "ಬಾಪಾ, ಸರ್ಗಾ ಸಂಸಾರಾಚ್ಯಾ ಧನಿಯಾ, ಜಾಣ್ತ್ಯಾಂ ಆನಿ ಬುದ್ವಂತಾಂ ಥಾವ್ನ್ ಲಿಪೊವ್ನ್ ದವರ್ ಲ್ಲೊ ಹ್ಯೊ ಸಂಗ್ತಿ ಲ್ಹಾನಾಂಕ್ ತುವೆಂ ಉಗ್ಡಾಪ್ಯೊ ಕೆಲ್ಲೇ ಖಾತಿರ್ ಹಾಂವ್ ತುಕಾ ಅರ್ಗಾಂ ದಿತಾಂ. 26 ವ್ಹಯ್ ಬಾಪಾ ತಶೆಂ ಕರುಂಕ್ ತುಕಾ ಬರೆಂ ದಿಸ್ಲೆಂ." 27 ಮ್ಹಜ್ಯಾ ಬಾಪಾನ್ ಸರ್ವ್ ವಸ್ತು ಮ್ಹಜೇ ಆಧೀನ್ ದಿಲ್ಯಾತ್. ಪುಣ್ ಬಾಪಾ ಶಿವಾಯ್ ಪುತಾಕ್ ಕೊಣ್ ಚ್ ಒಳ್ಕನಾ, ಆನಿ ಪುತಾ ಶಿವಾಯ್, ಆನಿ ಜಾಕಾ ಪುತಾನ್ ಉಗ್ಡಪೆಂ ಕರುಂಕ್ ಖುಶಿ ವ್ಹೆಲ್ಯಾ ತಾಚೇ ಶಿವಾಯ್, ಬಾಪಾಕ್ ಯೀ ಕೊಣ್ ಚ್ ಒಳ್ಕನಾ.
ಮ್ಹಜೆಂ ಜೂಂ ಘೆಯಾ
28 " ಯೆಯಾ ಮ್ಹಜೆ ಸರ್ಶಿಂ ಸಗ್ಸ್ದ್ಮೆಸ್ತ್ ತುಮಿ ಕಷ್ಟತಲ್ಯಾಂನೋ ಆನಿ ವಜನ್ ವ್ಹಾವಯ್ತಲ್ಯಾಂನೋ, ಆನಿ ಹಾಂವ್ ತುಮ್ಕಾಂ ವಿಶೆವ್ ದಿತಲೊಂ. 29 ಮ್ಹಜೆಂ ಜೂಂ ತುಮ್ಚ್ಯಾ ಖಾಂದಾರ್ ಘೆಯಾ ಆನಿ ಮ್ಹಜೆಲಾಗ್ಚೆಂ ಶಿಕಾ, ಕಿತ್ಯಾಕ್ ಹಾಂವ್ ಭೊಳ್ಯಾ ಆನಿ ಖಾಲ್ತ್ಯಾ ಕಾಳ್ಜಾಚೊ; ಆನಿ ತುಮ್ಕಾಂ ಸಮಾಧಾನ್ ಮೆಳ್ತಲೆಂ. 30 ಕಿತ್ಯಾಕ್ ಮ್ಹಜೆಂ ಜೂಂ ವ್ಹಾವೊಂವ್ಕ್ ಸುಲಭ್; ಮ್ಹಜೆಂ ವೊಜೆಂ ಹಳು."