ಜೆಜು ಉದ್ಕಾಚೆರ್ ಚಲ್ತಾ (ಸಾ೦. ಮಾತೆವ್ 14:22-36)
ಉಪ್ರಾ೦ತ್ ಜೆಜುನ್ ಶಿಸಾ೦ಕ್ ದೊಣಿರ್ ಚಡಶೆ೦ ಅನಿ ಅಪ್ಣಾ ಫುಡೆ೦ ಪಲ್ತಡಿ ವಚಶೆ೦ ತಾಕಿದ್ ದೀವ್ನ್ ಲೊಕಾಕ್ ದಾಡ್ನ್ ಸೊಡ್ಲೊ. ಲೊಕಾಕ್ ದಾಡ್ನ್ ಜಾತಚ್, ತೊ ಎಕ್ಲೊಚ್ ಮಾಗ್ಣೆ೦ ಕರು೦ಕ್ ಮ್ಹಣ್ ದೊ೦ಗ್ರಾಕ್ ಗೆಲೊ. ಕಾಳೊಕ್ ಪಡ್ತಾನಾ ಥ೦ಯ್ ತೊ ಎಕ್ಲೊಚ್ ಅಸ್ಲೊ. ಹೆಣೆ೦ ದೋಣ್ ತಡಿ ಥಾವ್ನ್ ಸುಮಾರ್ ಪಯ್ಸ್ ಪಾವ್|ಲ್ಲಿ. ಪುಣ್ ವಾರೆ೦ ವಿರೋದ್ ವ್ಹಾಳ್ತಾಲೆ೦ ಜಾಲ್ಯಾನ್, ಲ್ಹಾರಾ೦ಕ್ ತಿ ವಯ್ರ್ ಸಕ್ಲಾ ಜಾ೦ವ್ಕ್ ಲಾಗ್ಲಿ. ಫಾ೦ತ್ಯಾಚಿ೦ ತೀನ್ ವೊರಾ೦ ಉತರ್ಲಲಿ೦ ಜಾತಿತ್, ಜೆಜು ಉದ್ಕಾಚೆರ್ ಚಲುನ್ ತಾ೦ಚೇ ಸರ್ಶಿ೦ ಅಯ್ಲೊ. ಉದ್ಕಾಚೆರ್ ತೊ ಚಲುನ್ ಯೆತಾಲೊ ತೆ೦ ಪಳೆವ್ನ್ ತೆ ಇತ್ಲೆ ಘಾಬರ್ಲೆ ಕೀ, "ತೆ೦ ಮೆಲ್ಲೆ೦!" ಮ್ಹಣುನ್ ತಾ೦ಣಿ೦ ಭಿಯಾನ್ ಬೊಬ್ ಮಾರ್ಲಿ. ಪುಣ್ ತೇಚ್ ಘಡಿಯೇ ಜೆಜು ತಾ೦ಚೇಲಾಗಿ೦ ಉಲೊವ್ನ್ ಮ್ಹಣಾಲೊ:"ಧೈರ್ ಘೆಯಾ, ಹಾ೦ವ್ ತೊ, ಭಿಯೆನಾಕಾತ್!" ತಿತ್ಲ್ಯಾರ್ ಪೆದ್ರು ಜಾಪ್ ದೀವ್ನ್ ಮ್ಹಣಾಲೊ:"ಸೊಮಿಯಾ, ತು೦ಚ್ ತೊ ಜಾಲ್ಯಾರ್ , ಮ್ಹಾಕಾ ಉದ್ಕಾ ವಯ್ಲ್ಯಾನ್ ತುಜೇ ಸರ್ಶಿ೦ ಯೇ೦ವ್ಕ್ ಫರ್ಮಾಯ್." "ಯೆ" ಮ್ಹಣಾಲೊ ಜೆಜು ತಾಕಾ. ತವಳ್ ಪೆದ್ರು ದೊಣಿ ವಯ್ಲೊ ದೆ೦ವುನ್ ಜೆಜು ಸರ್ಶಿ೦ ವಚು೦ಕ್ ಉದ್ಕಾಚೆರ್ ಚಲು೦ಕ್ ಲಾಗ್ಲೊ.ಪುಣ್ ವಾರೆ೦ ಜೊರಾನ್ ವ್ಹಾಳ್ತಲೆ೦ ತೆ೦ ಪಳೆವ್ನ್ ತೊ ಭಿಯೆಲೊ ಅನಿ ಬುಡೊ೦ವ್ಕ್ ಲಾಗ್ಲೊ. ತಿತ್ಲ್ಯಾರ್ , "ಸೊಮಿಯಾ, ಮ್ಹಾಕಾ ಬಚಾವ್ ಕರ್" ಮ್ಹಣುನ್ ತಾಣೆ೦ ಬೋಬ್ ಮಾರ್ಲಿ. ತಕ್ಸಣ್ ಜೆಜುನ್ ಹಾತ್ ದೀವ್ನ್ ತಾಕಾ ದರ್ಲೊ ಅನಿ ಮ್ಹಳೆ೦:"ಉಣ್ಯಾ ಭಾವಾರ್ಥಾಚ್ಯಾ, ಕಿತ್ಯಾಕ್ ತು೦ ದುಬಾವ್ಲೊಯ್?" ಉಪ್ರಾ೦ತ್ ತೆ ದೋಗ್ ದೊಣಿರ್ ಚಡ್ತಚ್ ವಾರೆ೦ ರಾವ್ಲೆ೦. ತವಳ್ ದೊಣಿರ್ ಅಸ್ಲಲೆ ಜೆಜುಚ್ಯಾ ಪಾ೦ಯಾ೦ಕ್ ಪಡುನ್ ಮ್ಹಣಾಲೆ:"ನಿಜಾಕ್‍ಯೀ ದೆವಾಚೊ ಪೂತ್ ತು೦!" ದೆವಾಚೆಂ ಉತಾರ್ ಹೆಂ.