ಸಂಸಾರಾಚಿ ಇಷ್ಟಾಗತ್

ಜಾಕೊಬಾಚೆಂ ಪತ್ರ್ 4 : 1 - 10

ತುಮ್ಚೆ ಮಧೆಂ ಲಡಾಯ್ ಆನಿ ಜಗ್ಡೆಂ ಖಂಯ್ ಥಾವ್ನ್ ಉಬ್ಜತಾ ? ತುಮ್ಚ್ಯಾ ಕುಡಿವಿಸ್ವ್ಯಾಂ ಭಿತರ್ ಜುಜ್ ಮಾಂಡ್ತಲ್ಯಾ ಖೊಟ್ಯಾ ವೊಡ್ಣ್ಯಾಂ ಥಾವ್ನ್ ನ್ಹಯ್ ವೆ? ತುಮಿ ಅಶೆತಾತ್ ತಿ ವಸ್ತ್ ತುಮ್ಕಾಂ ಮೆಳನಾ ದೆಕುನ್ ಖುನಿ ಕರುಂಕ್ ಸಯ್ತ್ ತುಮಿ ತಯಾರ್. ತುಮ್ಕಾಂ ಕಟಿನ್ ಆಶಾ ಭೊಗ್ತಾ, ತರಿಪುಣ್ ತುಮಿ ಆಶೆತಾತ್ ತೆಂ ತುಮ್ಕಾಂ ಮೆಳನಾ; ತ್ಯಾ ಪಾಸತ್ ತುಮಿ ಜಗಡ್ತಾತ್ ಆನಿ ಲಡಾಯ್ ಕರ್ತಾತ್. ತುಮಿ ಆಶೆತಾತ್ ತೆಂ ತುಮ್ಕಾಂ ಮೆಳನಾ , ಕಿತ್ಯಾಕ್ ತುಮಿ ಮಾಗಿನಾತ್. ವಾ ತುಮಿ ಮಾಗ್ತಾತ್ ಜಾವ್ಯೆತ್, ಪುಣ್ ತುಮ್ಕಾಂ ಮೆಳನಾ, ಕಿತ್ಯಾಕ್ ತುಮ್ಚ್ಯಾ ಖುಶಲಾಯಾoಕ್ ಲಾಗುನ್ ಪಾದ್ ಇರಾದ್ಯಾನ್ ತುಮಿ ಮಾಗ್ತಾತ್. ಅವಿಶ್ವಾಸ್ಯಾoನೋ, ಹ್ಯಾ ಸಂಸಾರಾಚಿ ಇಷ್ಟಾಗತ್ ಕರ್ಚಿ ಮ್ಹಳ್ಯಾರ್ ದೆವಾಚಿ ದುಸ್ಮಾನ್ ಜಾವ್ಚೆಂ ಮ್ಹಣ್ ತುಮಿ ನೆಣಾತ್ ಗಾಯ್? ತ್ಯಾ ಪಾಸತ್ ಜೊ ಕೊಣ್ ಹ್ಯಾ ಸಂಸಾರಾಚೊ ಈಷ್ಟ್ ಜಾoವ್ಕ್ ಅಪೇಕ್ಸಿತಾ, ತೊ ದೆವಾಚೊ ವಿರೋಧಿ ಜಾತಾ. ವಾ ''ತುಮ್ಚೆ ಥಂಯ್ ಬಿಡಾರ್ ಕರುಂಕ್ ಮ್ಹಣ್ ದೆವಾನ್ ಘಾಲ್ಲೊ ಅತ್ಮೊ ಮಸ್ರಾನ್ ಪೆಟ್ತಾ'' ಮ್ಹಣುನ್ ಪವಿತ್ರ್ ಪುಸ್ತಕ್ ಸಾಂಗ್ತಾ ತೆಂ ಚೂಕ್ ಮ್ಹಣ್ತಾತ್ ವೆ? ಪುಣ್ ತೊ ದಿತಾ ತಿ ಕುರ್ಪಾ ಆನಿಕ್ ಯೀ ವರ್ತಿ. ಹ್ಯಾ ಪಾಸತ್ ಪವಿತ್ರ್ ಪುಸ್ತಕಿಂ ಚ್ ಮ್ಹಳಾಂ : ''ದೇವ್ ಗರ್ವ್ಯಾಂಕ್ ಮುಖಾರ್ ರಾವ್ತಾ. ಪುಣ್ ಖಾಲ್ತ್ಯಾoಕ್ ಕುರ್ಪಾ ದಿತಾ.'' ದೆಕುನ್ ದೆವಾಕ್ ತುಮಿ ಖಾಲ್ ಜಾಯಾ, ದೆoವ್ಚಾರಾಕ್ ಆಡ್ ರಾವಾ, ಆನಿ ತೊ ತುಮ್ಚೆ ಥಾವ್ನ್ ಪೊಳ್ತಲೊ. ದೆವಾಕ್ ತುಮಿ ಲಾಗಿಂ ಸರಾ ಆನಿ ತೊ ತುಮ್ಕಾಂ ಲಾಗಿಂ ಸರ್ತಲೊ.ತುಮಿ ಪಾತ್ಕ್ಯಾoನೋ, ತುಮ್ಚೆ ಹಾತ್ ಧುಯಾ; ತುಮಿ ದೊಡ್ಯಾ ಮನಾಚ್ಯಾoನೋ, ತುಮ್ಚೆಂ ಅಂತಸ್ಕರ್ನ್ ನಿತಳ್ ಕರಾ. ಖಂತ್ ಕರಾ,ದುಖೆಸ್ತ್ ಜಾಯಾ ಆನಿ ರಾಡಾ. ತುಮ್ಚೊ ಹಾಸೊ ದುಖಾಂತ್ ಆನಿ ತುಮ್ಚಿ ಖುಶಾಲಾಯ್ ಖಂತಿಂತ್ ಬದ್ಲೊಂ. ಸೊಮಿಯಾ ಸಮೊರ್ ತುಮ್ಕಾಂಚ್ ಖಾಲ್ತಿಂ ಕರಾ. ಆನಿ ತೊ ತುಮ್ಕಾಂ ಊಂಚ್ ಉಬಾರ್ತಲೊ.

-ದೆವಾಚೆಂ ಉತಾರ್ ಹೆಂ