ಚಾಲ್ತಿಂ ಮಾಗ್ಣಿಂ
ಭುರ್ಗ್ಯಾ, ತುಂ ಮ್ಹಾಕಾ ಜಾಯ್!
ತುಜೊ ಹಾಂವ್ ಮೋಗ್ ಕರ್ತಾಂ,
ತುಂ ಮ್ಹುಜೊ ಮೋಗ್ ಕರ್!
ಪವಿತ್ರ್ ಸಭೆನ್ ಲಾತ್ಯಾ ಭಾಶೆನ್ ಶಿಕೊಂವ್ಚ್ಯಾ ಮಾಗ್ಣ್ಯಾಂಕ್ ತಾಳ್ ಪಡಶೆಂ ಆನಿ ಸಾಂಗಾತಾಚ್ ಸೊಂಪ್ಯಾ ಉತ್ರಾಂನಿ ಸಕ್ಟಾಂಕ್ ಸಮ್ಜಾ ಸರ್ಕೆಂ, ಆಮ್ಚಿಂ ದಿಸ್ಪಟಿಂ ಮಾಗ್ಣಿಂ ಮಾಂಡುನ್ ಹಾಡಿಜೆ ಮ್ಹಳ್ಳ್ಯಾ ಚಿಂತ್ಪಾನ್ ಚಾಲ್ತಿಂ ಮಾಗ್ಣಿಂ ಮ್ಹಳ್ಳ್ಯಾ ನಾಂವಾ ಖಾಲ್ ಹೆಂ ಲ್ಹಾನ್ ಪುಸ್ತಕ್ ಅಮ್ಚ್ಯಾ ಗೊವ್ಳಿಕ್ ಅಧಿಕಾರಾನ್ ಆಮಿ ಪರತ್ ಪರ್ಗಾಟ್ ಕರ್ತಾಂವ್ . ಹ್ಯಾ ಪುಸ್ತಕಾಂತ್ 2005 ವ್ಯಾ ವರ್ಸಾ ಪಾಪಾ ಬೆನೆದಿಕ್ತ್ ಸೊಳವ್ಯಾನ್ ಕಥೊಲಿಕ್ ಪವಿತ್ರ್ ಸಭೆಚೆ ಶಿಕೊವ್ಣೆಚ್ಯಾ ಸಂಕ್ಶೇಪಾಂತ್ ದಿಲ್ಲಿಂ ನವಿಂ ಭಾವಾರ್ಥಾಚೆಂ, ಭರ್ವಶ್ಯಾಚೆಂ, ಮೊಗಚೆಂ ಆನಿ ದುಖಿಚೆಂ ವಿಧಾನ್ ಮಾಗ್ಣಿಂ ಆನಿ ಕಥೊಲಿಕ್ ಶಿಕೊವ್ಣೆಚಿಂ ಸುತ್ರಾಂ ಆಟಾಪ್ಲ್ಯಾಂತ್. ಹಿಂ ಚಾಲ್ತಿ ಮಾಗ್ಣಿಂ ದೆಕುನ್ ಮಂಜೂರ್ ಮಾಗ್ಣಿ ಜಾವ್ನಾಸಾತ್. ಹಾಂತ್ಲಿಂ ಮಾಗ್ಣಿಂ ಕೊಣಾಯ್ ಹ್ಯ್ ಪುಡಾಂ ಆಪ್ಣೆ ಬರೊಂವ್ಚ್ಯಾ ಕೊಂಕ್ಣಿ ಪುಸ್ತಕಾಂನಿ ಆಟಾಪ್ಚಿಂ ಜಾಲ್ಯಾರ್, ಕಾಂಯಿಚೆ ಚಡ್ಉಣೆಂಕರಿನಾಸ್ತಾಂ ಆಸಾ ತಶಿಂಸ್ ತಿಂ ಪರ್ಗಟ್ ಕರಿಜೆ ಮ್ಹಣ್ ಆಮ್ಚಿ ತಾಕಿದ್ ಆಸಾ.ಮಾಗ್ಣಿಂ ಅರ್ಥುನ್ ಮ್ಹಣುಂಕ್ ವಾ ಸಾಂಗಾತಾ ಮ್ಹಾಣ್ತಾನಾ ಪಾಟಿಂ ಪುಡೆಂ ಜಾಯ್ನಾಶೆಂ ಉಚಾರುಂಕ್ ಸಲಿಸ್ ಜಾಂವ್ಚೆ ಖಾತಿರ್ ಮಾಗ್ಣ್ಯಾಂ ಮಧೆಂ ಥಂಯ್ ಥಂಯ್ ಉಬೆ ಗೀಟ್ ಲಾಯ್ಲ್ಯಾತ್. ತ್ಯಾ ಪರ್ಮಾಣೆಂ ಮಾಗ್ಣಿಂ ಮ್ಹಣುಂಕ್ ಸಕ್ಟಾಂಕ್ ಪ್ರತ್ಯೇಕ್ ಚತ್ರಾಯ್ ಆಸುಂದಿ. ಕುಟ್ಮಚ್ಯಾ ಸಕ್ಕಡ್ ಸಾಂದ್ಯಾಂನಿ ಹಿಂಚ್ ಮಾಗ್ಣಿಂ ವಾಪರಲ್ಲಿಂ ಬರಿಂ.
ಗೊವ್ಳಿಕ್ ನಿವಾಸ್ ಲುವಿಸ್ ಪಾವ್ಲ್ ಸೊಜ್
ಕೊಡಿಯಾಲ್ ಬೈಲ್ ಮಂಗ್ಳುರ್ಸೊ ಬಿಸ್ಪ್
01 ಮಾಯ್ 2011
ಪಯ್ಲೊ ಭಾಗ್
ಮುಳಾವಿಂ ಮಾಗ್ಣಿಂ
1. ಖುರ್ಸಾಚೊ ಘುರ್ತ್
ಬಾಪಾಚೆ ಆನಿ ಪುತಾಚೆ ಆನಿ ಪವಿತ್ರ್ ಅತ್ಮ್ಯಾಚೆ ನಾಂವಿಂ ಆಮೆನ್
2.ಸಾಂತಾ ಖುರ್ಸಾಚಿ ಕುರು
ಭಾಗೆವಂತ್ ಖುರ್ಸಾಚಿ ಕುರ್ವೆನ್ ನಿವಾರ್ ಆಮ್ಕಾಂ ಆಮ್ಚ್ಯಾ ದೆವಾ ಆಮ್ಚ್ಯಾ ದುಸ್ಮಾನಾಂತ್ಲಿಂ
ಬಾಪಾಚೆ ಆನಿ ಪುತಾಚೆ ಆನಿ ಪವಿತ್ರ್ ಆತ್ಮ್ಯಾಚೆ ನಾಂವಿಂ ಆಮೆನ್
3. ಮಹಿಮಾ ಬಾಪಾಕ್
ಮಹಿಮ ಬಾಪಾಕ್ , ಆನಿ ಪುತಾಕ್ ಆನಿ ಪವಿತ್ರ್ ಅತ್ಮ್ಯಾಕ್ ಜಶಿ ಆದಿಂ ತಶಿಚ್ ಆತಾಂ ಆನಿಂ ಸದಾಂ
ಸರ್ವದಾಂ. ಆಮೆನ್
4.ಸೊಮ್ಯಾಚೆಂ ಮಾಗ್ಣೆಂ
ಆಮ್ಚ್ಯಾಬಾಪಾ, ಸರ್ಗಿಂಚ್ಯಾ ತುಜೆಂ ನಾಂವ್ ಪವಿತ್ರ್ ಜಾಂವ್, ತುಜೆಂ ರಾಜ್ ಆಮ್ಕಾಂ ಯೆಂವ್ ,
ತುಜಿ ಖುಶಿ ಸರ್ಗಾರ್ ಜಾತಾ ತಶಿ ಸಂಸಾರಾಂತ್ ಜಾಂವ್ .
ಆಮ್ಚೊ ದಿಸ್ಪಟೊ ಗ್ರಾಸ್ ಆಜ್ ಆಮ್ಕಾಂ ದಿ ಆನಿ ಆಮಿ ಆಮ್ಚೆರ್ ಚುಕ್ಲಲ್ಯಾಂಕ್ ಭೊಗ್ಶಿತಾಂವ್,
ತಶೆಂ ಆಮ್ಚಿಂ ಪಾತ್ಕಾಂ ಭೊಗಸ್ ಆನಿ ಆಮ್ಕಾಂ ತಾಳ್ನ್ಂತ್ ಪಡುಂಕ್ ದೀಂವ್ ನಾಕಾ, ಪೂಣ್
ವಾಯ್ಟಾಂತ್ಲಿಂ ಆಮ್ಕಾಂ ನಿವಾರ್ ಆಮೆನ್
5.ಭೊಡ್ವ್ಯಾಚೊ ನಾಮಾನ್
ನಮಾನ್ ಮರಿಯೆ, ಕುರ್ಪೆನ್ ಭರಲ್ಲೆ ಸೊಮಿ ತುಜೆ ಸಾಂಗಾತಾ,
ಸ್ತ್ರಿಯಾಂ ಭಿತರ್ ತುಂ ಸದೆಂವ್ ಆನಿ ಸದೆಂವಿ ಫಳ್ ತುಜೆ ಕುಶಿಚೆಂ, ಜೆಜು.
ಭಾಗೆವಂತಿ ಮರಿಯೆ, ದೆವಾಚೆ ಮಾಯೆ ಆಮಾ ಪಾಪಿಯಾಂ ಖಾತಿರ್ ವಿನತಿ ಕರ್
ಆತಾಂ ಆನಿ ಆಮ್ಚ್ಯಾ ಮಾರ್ನಚೆ ಕಾಳಿಂ, ಆಮೆನ್.
6.ಆಪೊಸ್ತಲಾಂಚಿಂ ಸತ್ಮಾನ್ತಾಂ
ಸತ್ಮಾನ್ತಾಂ ದೆವಾಕ್ ಸರ್ವ್ ಪದ್ವೆದಾರಾ ಬಾಪಾಕ್ ಸರ್ಗಾ ಆನಿ ಪ್ರಿತುಮಿಚ್ಯಾ ರಚ್ನಾರಾಕ್ .ಆನಿ ಜೆಜು ಕ್ರಿಸ್ತಾಕ್ ,ತಾಚ್ಯಾ ಎಕ್ಲ್ಯಾಚ್ ಪುತಾಕ್, ಆಮ್ಚ್ಯಾ ಸೊಮ್ಯಾಕ್ ತೊ ಪವಿತ್ರ್ ಅತ್ಮ್ಯಾ ವರ್ವಿಂ ಗರ್ಭಿಂ ಸಂಭವ್ಲೊ ಆಂಕ್ವಾರ್ ಮರಿಯೆ ಥಾವ್ನ್ ಜಲ್ಮಲೊ ಪೊನ್ಸ್ ಪಿಲಾತಾ ಖಾಲ್ ತಾಣೆಂ ಕಷ್ಟ್ ಸೊಸ್ಲೆ ತಾಕಾ ಖುರ್ಸಾರ್ ಜೊಡ್ಲೊ, ತೊ ಮೆಲೊ, ಆನಿ ತಾಕಾ ನಿಕೆಪಿಲೊ, ತೊ ಮೆಲ್ಲ್ಯಾಂತ್ಲೊ ಜಿವಂತ್ ಜಾಲೊ ಸರ್ಗಾರ್ ಚಡ್ಲೊ, ಸರ್ವ್ ಪದ್ವೆದಾರ್ ದೆವಾಬಾಪಾಚ್ಯಾ ಉಜ್ವ್ಯಾಕ್ ಬಸ್ಲಾ. ಥಂಯ್ ಥಾವ್ನ್ ಜಿವ್ಯಾಂ ಆನಿ ಮೆಲ್ಲ್ಯಾಂಚಿ ಮುನ್ಸುಭಿ ಕರುಂಕ್ ಯೆತಲೊ
ಸತ್ಮನ್ತಾಂ ಪವಿತ್ರ್ ಅತ್ಮ್ಯಾಕ್ ಕಥೊಲಿಕ್ ಪವಿತ್ರ್ ಸಭೆಕ್ ಭಕ್ತಾಂಚೊ ಎಕ್ತಾರ್ ಪಾತ್ಕಾಂಚೆಂ ಭೊಗ್ಸಣೆಂ ಕುಡಿಚೆಂ ಜಿವಂತ್ಪಣ್ ಸಾಸ್ಣಾಚೆಂ ಜಿವಿತ್ ಆಮೆನ್ .
7. ಭಾವಾರ್ಥಾಚೆಂ ವಿಧಾನ್
ಸರ್ವೆಸ್ಪರಾ ದೆವಾ, ತುಂ ಎಕ್ ಚ್ ದೇವ್ ಆನಿ ಎಕಾ ದೆವಾ ಥಂಯ್ ತೇಗ್ ಜಣ್, ಬಾಪ್ ಪೂತ್ ಆನಿ ಪವಿತ್ರ್ ಅತ್ಮೊ ಮ್ಹಣ್ ಹಾಂವ್ ಥಿರ್ ಸತ್ಮಾನ್ತಾಂ. ತುಜೊ ದೈವಿಕ್ ಪೂತ್ ಮನಿಸ್ ಜಾಲೊ ಆನಿ ಆಮ್ಚ್ಯಾ ಪಾತ್ಕಾಂ ಖಾತಿರ್ ಮೆಲೊ ಆನಿ ಜಿವ್ಯಾಂಚಿ ಆನಿ ಮೆಲ್ಲ್ಯಾಂಚಿ ಮನ್ಸುಬಿ ಕರುಂಕ್ ಯೆತಲೊ ಮ್ಹಣ್ ಹಾಂವ್ ಸತ್ಮಾನ್ತಾಂ. ಹಿಂ ಸತಾಂ ಅನಿ ಕಥೊಲಿಕ್ ಪವಿತ್ರ್ ಸಭಾ ಶಿಕಯ್ತಾ ತಿಂ ಸರ್ವ್ ಸತಾಂ ಹಾಂವ್ ಸತ್ಮಾನ್ತಾಂ ಆನಿ ಉಚಾರ್ತಾಂ ಕಿತ್ಯಾಕ್ ತುಂ ಸಾಸ್ಣಿಕ್ ಸತ್ ಆನಿ ಜಾಣ್ವಾಯ್ ಆನಿ ತುವೆಂ ತಿಂ ಉಗ್ಡಾಪಿಂ ಕೆಲ್ಯಾಂತ್; ತುಂ ಫಟಯ್ನಾಂಯ್ ವಾ ಫಟ್ವೊನ್ ಪಡನಾಂಯ್. ಹ್ಯಾ ಭಾವಾರ್ಥಾಂತ್ ಜಿಯೆಂವ್ಕ್ ಆನಿ ಮರುಂಕ್ ಹಾಂವ್ ಖುಶಿ ವ್ಹರ್ತಾ . ಆಮೆನ್
8.ಭರ್ವಶ್ಯಾಚೆಂ ವಿಧಾನ್
ಸರ್ವೆಸ್ಪರಾ ದೆವಾ ತುಜೆ ಕುರ್ಪೆನ್ ಸರ್ವ್ ಮಜ್ಯಾ ಪಾತ್ಕಾಂಚೆಂ ಭೊಗ್ಸಣೆಂ ಆನಿ ಹೆ ಜಿಣಿಯೆ ಉಪ್ರಾಂತ್ ಸಾಸ್ಣಿಕ್ ಸುಖ್ ಜೊಡ್ತಲೊಂ/ಲಿಂ ಮ್ಹಣ್ ಹಾಂವ್ ಭರ್ವಸ್ತಾಂ, ಕಿತ್ಯಾಕ್ ತುಂ ಸರ್ವ್ ಪದ್ವೆದಾರ್, ವಿಶ್ವಾಶಿ, ದಯಾಳ್ ಆನಿ ಕಾಕುಳ್ದಾರ್ ಆನಿ ತುವೆಂ ತೆಂ ಭಾಸಾಯ್ಲಾಂ. ಹ್ಯಾ ಭರ್ವಶ್ಯಾಂತ್ ಜಿಯೆಂವ್ಕ್ ಆನಿ ಮರುಂಕ್ ಹಾಂವ್ ಖುಶಿ ವ್ಹರ್ತಾಂ ಆಮೆನ್.
9.ಮೊಗಾಚೆಂ ವಿಧಾನ್
ಸರ್ವೆಸ್ಪರಾ ದೆವಾ, ಸರ್ವ್ ವಸ್ತುಂ ಪ್ರಾಸ್ ಚಡ್ ಹಾಂವ್ ತುಜೊ ಮೋಗ್ ಕರ್ತಾಂ ಆನಿ ತುಜೆ ಪಾಸತ್ ಮ್ಹಜ್ಯಾ ಪೆಲ್ಯಾಚೊ ಹಾಂವ್ ಮೋಗ್ ಕರ್ತಾಂ ಕಿತ್ಯಾಕ್ ತುಂ ವರ್ತೊ, ಆಪರಿಮಿತ್ ಆನಿ ಸರ್ವ್ ಬರೊ ಆನಿ ಸರ್ವ್ ಮೋಗ್ ತುಕಾ ಫಾವೊ. ಹ್ಯಾ ಮೊಗಾಂತ್ ಜಿಯೆಂವ್ಕ್ ಆನಿ ಮರುಂಕ್ ಹಾಂವ್ ಖುಶಿ ವ್ಹರ್ತಾಂ ಆಮೆನ್.
ದುಖಿಚೆಂ ವಿಧಾನ್
ಮ್ಹಜ್ಯಾ ದೆವಾ, ಸಗ್ಳ್ಯಾ ಮ್ಹಜ್ಯಾ ಕಾಳ್ಜಾನ್ ಸರ್ವ್ ಮ್ಹಜ್ಯಾ ಪಾತ್ಕಾಂಚಿ ಹಾಂವ್ ದುಖ್ ಧರ್ತಾಂ ಆನಿ ತಿಂ ಕಾಂಟಾಳ್ತಾಂ, ಕಿತ್ಯಾಕ್ ತಾಂಚೆ ವರ್ವಿ ತುಜಿ ನಿತಿಚಿ ಶಿಕ್ಶಾ ಮ್ಹಾಕಾ ಫಾವೊ ಜಾಲಿ, ಪೂಣ್ ಚಡ್ ಕರುನ್ ತುಕಾ ಭೊವ್ ಬರ್ಯ ಆನಿ ಸರ್ವ್ ವಸ್ತುಂ ಪ್ರಾಸ್ ಚಡ್ ಮೋಗ್
ಫಾವೊ ಜಾಲ್ಲ್ಯಾ ದೆವಾಕ್ ಹಾಂವೆಂ ಅಕ್ಮಾನ್ ಕೆಲೊ. ದೆಕುನ್ ತುಜೆ ಕುರ್ಪೆಚ್ಯಾ ಆಧಾರಾನ್ ಆನಿ ಮುಕಾರ್ ಪಾತಕ್ ಕರಿನಾಂ ಮ್ಹಣ್ ಆನಿ ಪಾತ್ಕಾಚೆ ಸಮಯೆ ಚುಕಯ್ತಲೊಂ/ಲಿಂ ಮ್ಹಣ್ ಥಿರ್ ನಿಚೆವ್ ಕರ್ತಾಂ. ಆಮೆನ್.
11.ಆವ್ಮರಿ
ಸೊಮ್ಯಾಚ್ಯಾ ಭೊಡ್ವ್ಯಾನ್ ಮರಿಯೆಕ್ ಬರಿ ಖಬರ್ ಹಾಡ್ಲಿ
ಆನಿ ಪವಿತ್ರ್ ಅತ್ಮ್ಯಾ ವರ್ವಿಂ ತಿ ಗರ್ಭೆಸ್ತ್ ಜಾಲಿ.
ನಮಾನ್ ಮರಿಯೆ.....
ಅಬ್ಳೆ ! ಸೊಮ್ಯಾಚಿ ಚಾಕರ್ನ್,
ತುಜ್ಯಾ ಸಬ್ದಾ ಪರ್ಮಾಣೆಂ ಮ್ಹಜೆ ಥಂಯ್ ಜಾಂವ್.
ನಮಾನ್ ಮರಿಯೆ......
ಆನಿ ದೆವಾಚೊ ಪೂತ್ ಮನಿಸ್ ಜಾಲೊ,
ಆನಿ ಆಮ್ಚೆ ಮಧೆಂ ಜಿಯೆಲೊ.
ನಮಾನ್ ಮರಿಯೆ......
ಭಾಗೆವಂತಿ ದೆವಾಚೆ ಮಾಯೆ ಆಮಾ ಪಾಸತ್ ವಿನತಿ ಕರ್
ಕ್ರಿಸ್ತಾಚ್ಯಾ ಭಾಸಾವ್ಣ್ಯಾಂಕ್ ಆಮಿ ಫಾವೊ ಜಾಂವ್ಚೆ ಖಾತಿರ್.
ಪ್ರಾರ್ಥುಂಯಾ
ಯೆ ಸೊಮ್ಯಾ, ಭೊಡ್ವ್ಯನ್ ಬರಿ ಖಬರ್ ದಿಲ್ಲೆ ವರ್ವಿಂ ತುಜ್ಯಾ ಪುತಾನ್, ಕ್ರಿಸ್ತಾನ್ ಮನ್ಶಾಪಣ್ ಘೆತಲ್ಲೆಂ ಆಮಿ ಜಾಣಾ ಜಾಲ್ಯಾಂವ್: ತಾಚ್ಯಾ ಕಷ್ಟಾಂ ಆನಿ ಖುರ್ಸಾ ವರ್ವಿಂ ಜಿವಂತ್ಪಣಾಚ್ಯಾ ಆನಂದಾಕ್ ಆಮಿ ಪಾವಶೆಂ ತುಜಿ ಕುರ್ಪಾ ಆಮ್ಚ್ಯಾ ಅಂತಸ್ಕರ್ನಾನಿ ವೋತ್ ಮ್ಹಣ್ ಆಮಿ ಮಾಗ್ತಾಂವ್. ತ್ಯಾಚ್ ಕ್ರಿಸ್ತಾ ಆಮ್ಚ್ಯಾ ಸೊಮ್ಯಾ ಮಾರಿಫತ್. ಆಮೆನ್.
ಮಹಿಮಾ ಬಾಪಾಕ್..........................(ತೀನ್ ಪಾವ್ಟಿಂ)
12. ಸರ್ಗಾಚೆ ರಾಣಿಯೆ
(ಪಾಸ್ಖಾಂಚ್ಯಾ ವೆಳಾರ್ ಆವ್ಮರಿ ಬದ್ಲಾಕ್)
ಸರ್ಗಾಚೆ ರಾಣಿಯೆ, ಉಲ್ಲಾಸ್ ಪಾವ್,
ಸರ್ವೆಸ್ಪರಾಕ್ ಜೈ ಜೈ! (ಅಲ್ಲೆಲೂಯ)
ಕಿತ್ಯಾಕ್ ಜಾಕಾ ತುಂ ವ್ಹಾವೊಂವ್ಕ್ ಫಾವೊ ಜಾಲ್ಲಿಯ್,
ಸರ್ವೆಸ್ಪರಾಕ್ ಜೈ ಜೈ! (ಅಲ್ಲೆಲೂಯ)
ತೊ ಆಪ್ಣೆ ಸಾಂಗ್ ಲ್ಲೆ ಬರಿಂ ಜಿವಂತ್ ಜಾಲಾ,
ಸರ್ವೆಸ್ಪರಾಕ್ ಜೈ ಜೈ! (ಅಲ್ಲೆಲೂಯ)
ಆಮಾ ಪಾಸತ್ ದೆವಾ ಲಾಗಿಂ ಮಾಗ್
ಸರ್ವೆಸ್ಪರಾಕ್ ಜೈ ಜೈ! (ಅಲ್ಲೆಲೂಯ)
ಸಂತೊಸ್ ಆನಿ ಉಲ್ಲಾಸ್ ಪಾವ್, ಆಂಕ್ವಾರಿ ಮರಿಯೆ,
ಸರ್ವೆಸ್ಪರಾಕ್ ಜೈ ಜೈ! (ಅಲ್ಲೆಲೂಯ)
ಕಿತ್ಯಾಕ್ ಸೊಮಿ ಖರೊಚ್ ಜಿವಂತ್ ಜಾಲಾ,
ಸರ್ವೆಸ್ಪರಾಕ್ ಜೈ ಜೈ! (ಅಲ್ಲೆಲೂಯ)
ಪ್ರಾರ್ಥುಂಯಾ
ಏ ದೆವಾ, ತುಜ್ಯಾ ಪುತಾ ಆಮ್ಚ್ಯಾ ಸೊಮ್ಯಾ ಜೆಜು ಕ್ರಿಸ್ತಾಚ್ಯಾ ಜಿವಂತ್ಪಣಾ ವರ್ವಿಂ ಸಂಸಾರ್ ಸಂತೊಸಾಂವ್ಕ್ ತುವೆಂ ದಯಾ ಕೆಲಿ; ತಾಚೆ ಮಾಯೆ ಆಂಕ್ವಾರ್ ಮರಿಯೆ ಮಾರಿಫತ್ ಸಾಸ್ಣಾಚೆ ಜಿಣಿಯೆಚೊ ಸಂತೊಸ್ ಆಮ್ಕಾಂ ಲಾಬಸೊ ಕರ್ ಮ್ಹಣ್ ಆಮಿ ಮಾಗ್ತಾಂವ್. ತ್ಯಾಚ್ ಕ್ರಿಸ್ತಾ, ಆಮ್ಚ್ಯಾ ಸೊಮ್ಯಾ ಮಾರಿಫತ್. ಆಮೆನ್
ರಾಕಣ್ ಭೊಡ್ವ್ಯಾ,ಕಡೆ ಮಾಗ್ಣೆಂ
ದೆವಾಗೆಲ್ಯಾ ಭೊಡ್ವ್ಯಾ, ಮ್ಹಜ್ಯಾ ರಾಕ್ಣ್ಯಾ ಸರ್ಗಿಂಚೆ ದಯೆನ್ ಮಃಕಾ ದಿಲಾ ತುಜೆ ತಾಬೆನ್ ಮ್ಹಜಿ ಮತ್ ಉಜ್ವಾಡಾಯ್ ಮ್ಹಾಕಾ ರಾಕ್ ಸಾಂಬಾಳ್ ಆನಿ ಚಲಯ್. ಆಮೆನ್.
14.ಸರ್ ಲ್ಲ್ಯಾ ಭಾವಾರ್ಥ್ಯ್ಂ ಪಾಸತ್ ಮಾಗ್ಣೆಂ
ಸಾಸ್ಣಾಚೊ ವಿಶೆವ್ ದಿ ತಾಂಕಾಂ ಏ ಸೊಮ್ಯಾ ಆನಿ ನಿರಂತರ್ ಪ್ರಕಾಸ್ ತಾಂಚೆರ್ ಫಾಂಕುಂದಿ ಸಮಾಧಾನಾಂತ್ ತೆ ವಿಶೆವ್ ಘೆಂವ್ದಿತ್. ಆಮೆನ್.
15. ಮ್ಹಜ್ಯಾ ದೆವಾ
ಸಕಾಳಿಂಚೆಂ ಆನಿ ಸಾಂಜೆಚೆಂ ಮಾಗ್ಣೆಂ
ಮ್ಹಜ್ಯಾ ದೆವಾ, ಮ್ಹಜ್ಯಾ ಸಾಯ್ಬಾ, ಹಾಂವ್ ತುಜ್ಯಾ ಪಾಂಯಾಂಕ್ ಪಡ್ತಾಂ ಹಾಂವ್ ತುಕಾ ಅರ್ಗಾಂ ದಿತಾಂ. ಅಂತಸ್ಕರ್ನಿ ನಮಸ್ಕಾರ್ ಕರ್ತಾಂ ವ್ಹಡ್ ತುಜೊ ಉಪ್ಕಾರ್ ಮನ್ತಾಂ ಕಿತ್ಯಾಕ್ ತುವೆಂ ಮ್ಹಕಾ ರಸ್ಲೊ ಮ್ಹಣ್ ನೀಜ್ ಕ್ರಿಸ್ತಾಂವ್ ಕೆಲೊ ಮ್ಹಣ್ ಆಜ್ ಪರ್ಯಾನ್ ಸಾಂಬಾಳ್ಳೊ ಮ್ಹಣ್.ಜಶಿ ಬರಿ ರಾತ್ ದಿಲಿ ತಸೊ ಬರೊ ದೀಸ್ ದಿ ಸಾಯ್ಬಾ(ಜಸೊ ಬರೊ ದೀಸ್ ದಿಲೊ, ತಶಿ ಬರಿ ರಾತ್ ದಿ ಸಾಯ್ಬಾ) ಮ್ಹಜೊ ಅತ್ಮೊ, ಮ್ಹಜಿ ಕೂಡ್, ತುಜ್ಯಾ ಹಾತಾಂತ್ ದಿತಾಂ.ಮ್ಹಜಿ ಚಿಂತ್ನಾಂ, ಮ್ಹಜೆ ಸಬ್ದ್, ಮ್ಹಜೆ ಆಯ್ಚ್ಯಾ ದಿಸಾಚೆ (ರಾತಿಚೆ) ಕಷ್ಟ್ ಆನಿ ಕರ್ನ್ಯೊ, ತುಕಾ ಸಮರ್ಪಿತಾಂ ತುಜ್ಯಾ ವ್ಹಡಾ ಮಾನಾಕ್ ಮ್ಹಜ್ಯಾ ಪಾತ್ಕಾಂಚ್ಯಾ ಫಾರಿಕ್ಪಾಣಾಕ್.
ಮ್ಹಜ್ಯಾ ಜೆಜು ತುಜ್ಯಾ ಖುರ್ಸಾಚ್ಯಾ ಕಷ್ಟಾಂಚ್ಯಾ ಆನಿ ಮರ್ಣಾಚ್ಯಾ ಪುನ್ಯಾಂ ಪಾಸತ್ ಭೊಗ್ಶಿ ಮ್ಹಜಿ ಸಮೆಸ್ತ್ ಪಾತ್ಕ್ ಮ್ಹಜಿ ಪಾತ್ಕ್ಯಾಚಿ ಕಾಕುಳ್ತ್ ಕರ್.ದೆವಾ, ಪವಿತ್ರ್ ಅತ್ಮ್ಯಾ ದಿ ಸಾಯ್ಬಾ, ತುಜಿ ಕುರ್ಪಾ ಆಯ್ಚ್ಯಾ ದಿಸಾ(ರಾತಿಂ) ಪಾತ್ಕಾಂತ್ ಹಾಂವೆಂ ಪಡನಾ ಜಾಂವ್ಚ್ಯಾಕ್ ತುಜೆ ಉಪದೇಸ್ ಸಾಂಬಾಳುಂಕ್, ಮ್ಹಜೆ ಕಾಯ್ದೆ ಪಾಳುಂಕ್ ಮ್ಹಜಿ ಪಾತ್ಕ್ಯಾಚಿ ಕಾಕುಳ್ತ್ ಕರ್ ಮ್ಹಕಾ ಪಾತ್ಕ್ಯಾಕ್ ಭೊಗ್ಶಿ.
16.ಹಾಂವ್ ಪಾತ್ಕಿ
ಹಾಂವ್ ಪಾತ್ಕಿ ಸರ್ವ್ ಪದ್ವೆದಾರ್ ದೆವಾಕ್, ಆನಿ ತುಮ್ಕಾಂ ಭಾವಾಂ- ಭಯ್ಣಿಂನೊ, ಮ್ಹಜೊ ಗುನ್ಯಾಂವ್ ಉಚಾರುನ್ ಸಾಂಗ್ತಾಂ ಮನಾನ್ ಚಿಂತುನ್ ಆನಿ ತೊಂಡಾನ್ ಉಚಾರುನ್ ವಾಯ್ಟ್ ಆಧಾರುನ್ ಆನಿ ಬರೆಂ ಸೊಡುನ್ ಹಾಂವೆಂ ಜಾಯ್ತಿಂ ಪಾತ್ಕಾಂ ಕೆಲ್ಯಾಂತ್. (ಆನಿ ಹರ್ದ್ಯಾಕ್ ಮಾರುನ್) ಹೊ ಮ್ಹಜೊ ಅಪ್ರಾದ್,ಹೊ ಮ್ಹಜೊ ಅಪ್ರಾದ್, ಹೊ ಮ್ಹಜೊ ಭೋವ್ ವ್ಹಡ್ ಅಪ್ರಾದ್. ಹ್ಯಾ ಪಾಸತ್ ಭಾಗೆವಂತ್ ಸದಾಂಚ್ ಆಂಕ್ವಾರ್ ಮರಿಯೆಕ್ ಸಗ್ಳ್ಯಾಂ ದೇವ್ ದುತಾಂಕ್ ಆನಿ ಭಕ್ತಾಂಕ್ ಆನಿ ತುಮ್ಕಾಂ ಭಾವಾಂ-ಭಯ್ಣಿಂನೊ, ಮ್ಹಜೆ ಖಾತಿರ್ ಆಮ್ಚ್ಯಾ ಸರ್ವೇಸ್ಪರಾ ದೆವಾ ಲಾಗಿಂ ವಿನತಿ ಕರಾತ್ ಮ್ಹಣ್ ಪ್ರಾರ್ಥುನ್ ಮಾಗ್ತಾಂ.
17.ನಮಾನ್ ರಾಣಿಯ್
ನಮಾನ್ ರಾಣಿಯ್ ಕಾಕುಳ್ತಿಚೆ ಮಾಯೆ ; ನಮಾನ್ ಆಮ್ಚ್ಯಾ ಜಿವಾ, ಅಮ್ರತಾ ಆನಿ ಭರ್ವಶ್ಯಾ ತುಕಾ ಆಮಿ ಉಲೊ ಮಾರ್ತಾಂವ್ ಆಮಿ ಪರ್ದೆಶಿ ಎವೆಚಿಂ ಬಾಳ್ಕಾಂ.ಹ್ಯಾ ದುಖಾಚ್ಯಾ ಕೊಂಡಾಂತ್ ಆಸ್ತಾಂ ಅಸ್ಕಾರ್-ಹುಸ್ಕಾರ್ ಸೊಡ್ನ್ ಆಮಿ ತುಕಾ ರುದಾನ್ ಕರ್ತಾಂವ್ ತರ್ ತುಂ, ಆಮ್ಚ್ಯೆ ಶೆಕಾಯೆ ತೆ ತುಜೆ ಕಾಕುಳ್ತಿಚೆ ದೊಳೆ ಆಮ್ಚೆ ವಯ್ರ್
ಪರ್ತಿ. ಆನಿ ಹ್ಯಾ ಪರ್ದೆಶಾ ಉಪ್ರಾಂತ್ ತುಜೆ ಕುಶಿಚೆ ಸದೆಂವಿ ಫಳ್ ಜೆಜುಕ್ ಆಮ್ಕಾ ದಾಕಯ್. ಯೆ ದಯಾಳಿ, ಯೆ ಮೊಗಾಳಿ, ಯೆ ದುಲಬಿ ಆಂಕ್ವಾರಿ ಮರಿಯೆ.
ಭಾಗೆವಂತಿ ದೆವಾಚೆ ಮಾಯೆ ಆಮಾ ಪಾಸತ್ ವಿನತಿ ಕರ್
ಕ್ರಿಸ್ತಾಚ್ಯಾ ಭಾಸಾವ್ಣ್ಯಾಂಕ್ ಆಮಿ ಫಾವೊ ಜಾಂವ್ಚೆ ಖಾತಿರ್.