ಸ್ನಾನ್ ದಾತಾರ್ ಜುವಾಂವ್ಚೆಂ ಮರಣ್
(ಮಾರ್ಕ್ 6:14-29; ಲೂಕ್ 9:7-9; ಜುವಾಂವ್ 3:19-20)
14 1 ತ್ಯಾ ವೆಳಿಂ ಜೆಜುಚಿ ಕೀರ್ತ್ ಹೆರೊದ್ ಉಪರಾಯಾಚ್ಯಾ ಕಾನಾಂತ್ ಪಡ್ಲಿ. 2 ತೊ ಆಪ್ಲ್ಯಾ ಕಾರ್ಭಾರ್ಯಾಂಲಾಗಿಂ ಮ್ಹಣಲೊ: " ಹೊ ಸ್ನಾನ್ ದಾತರ್ ಜುವಾಂವ್ ಚ್ ಜಾಯ್ಜಯ್ ! ತೊ ಮೆಲ್ಲ್ಯಾಂತ್ಲೊ ಜಿವಂತ್ ಜಾಲಾ, ದೆಕುನ್ ತಾಚೇ ಥಂಯ್ ಅಚರ್ಯಾಂ ಕರ್ಚೊ ಹ್ಯೊ ಪದ್ವ್ಯೊಯೀ ಜಿವ್ಯೊ ಜಾಲ್ಯಾತ್."
3 ಹೆರೊದಿನ್ ಆಪ್ಲ್ಯಾ ಭಾವಾ ಫಿಲಿಪಾಚೇ ಬಾಯ್ಲೇ ಹೆರೊದಿಯಾಸಾಕ್ ಲಾಗುನ್ ಜುವಾಂವ್ಕ್ ಕೈದ್ ಕರ್ನ್ ಬಂದೆಂತ್ ಘಾಲ್ಲೊ. ಕಾರಣ್: 4 " ತುವೆಂ ತಿಕಾ ದವರ್ನ್ ಘೆವ್ಚೆಂ ಸಾರ್ಕೆಂ ನ್ಹಯ್" ಮ್ಹಣುನ್ ಜುವಾಂವ್ನ್ ತಾಕಾ ಸಾಂಗ್ ಲ್ಲೆಂ . 5 ಹೆರೊದ್ ತಾಕಾ ಜಿವೆಶಿಂ ಮಾರುಂಕ್ ಸೊಧ್ತಾಲೊ . ಪುಣ್ ಲೋಕ್ ಜುವಾಂವ್ಕ್ ಏಕ್ ಪ್ರವಾದಿ ಮ್ಹಣುನ್ ಮಾನ್ತಾಲೊ ಜಾಲ್ಲ್ಯಾನ್, ತಾಂಕಾಂ ತೊ ಭಿಯೆತಾಲೊ.6-7 ಉಪ್ರಾಂತ್ ಹೆರೊದಿಚ್ಯಾ ಜಲ್ಮಾದಿಸಾ ಹೆರೊದಿಯಾಸಾಚೆ ಧುವ್ ಸೈರ್ಯಾಂ ಮುಖಾರ್ ಯೇವ್ನ್ ನಾಚ್ಲಿ. ಹೆರೊದ್ ಇತ್ಲೊ ಖುಶಿ ಜಾಲೊ ಕೀ, ಆಪ್ಣಾಲಾಗಿಂ ವಿಚಾರ್ಲಲೆಂ ಕಿತೆಂಯೀ ಜಾಂವ್, ಆಪುಣ್ ತಿಕಾ ದಿತಾಂ ಮ್ಹಣುನ್ ಸಪುತ್ ಘಾಲ್ನ್ ಸಾಂಗಿಲಾಗ್ಲೊ. 8 ಪುಣ್ ತಿ ಆಪ್ಲೇ ಆವಯ್ಚೇ ಶಿಕೊವ್ಣೆನ್ ಅಶೆಂ ಮ್ಹಣಾಲಿ: " ಸ್ನಾನ್ ದಾತಾರ್ ಜುವಾಂವ್ಚೆ ಶಿಸ್ ಏಕ್ ತಬ್ಕಾಂತ್ ಘಾಲ್ನ್ ಮ್ಹಾಕಾ ಹಾಂಗಾಸರ್ ಹಾಡ್ನ್ ದಿ." 9 ಹೆಂ ಆಯ್ಕುನ್ ರಾಯ್ ಖಂತೀಷ್ಟ್ ಜಾಲೊ.ಪುಣ್ ಆಪ್ಲೆಂ ಘಾಲ್ಲ್ಯಾ ಸಪುತಾಕ್ ಲಾಗುನ್ ಆನಿ ಜೆವ್ಣಾಕ್ ಬಸ್ಲಲ್ಯಾ ಸೈರ್ಯಾಂ ಮುಖಾರ್ ದಾಕ್ಷೆಣೆಕ್ ಪಡುನ್, ತಿಣೆಂ ಮಗ್ ಲ್ಲೆಂ ದೀಜಯ್ ಮ್ಹಣೊನ್ ತಾಣೆಂ ಫರ್ಮಾಯ್ಲೆಂ. 10 ಆನಿ ಜಣ್ ಧಾಡ್ನ್ ಬಂದೆಂತ್ ಆಸ್ ಲ್ಲ್ಯಾ ಜುವಾಂವ್ಚೆಂ ಶಿಸ್ ಕಾಪಯ್ಲೆಂ . 11ಆನಿ ತೆಂ ಏಕ್ ತಬ್ಕಾಂತ್ ಘಾಲ್ನ್ ಚಲೆಯೆಕ್ ಹಾಡ್ನ್ ದಿಲೆಂ; ತಿಣೆಂ ತೆಂ ಆಪ್ಲೇ ಆವಯ್ಕ್ ವ್ಹರ್ನ್ ದಿಲೆಂ. 12 ಉಪ್ರಾಂತ್ ಜುವಾಂವ್ಚ್ಯಾ ಶಿಸಾಂನಿ ವಚುನ್ ತಾಚಿ ಕೂಡ್ ಮಾತ್ಯೆಕ್ ಪಾಯ್ಲಿ ಆನಿ ಯೇವ್ನ್ ಜೆಜುಕ್ ತಿ ಖಬರ್ ದಿಲಿ.
ಜೆಜು ಪಾಂಚ್ ಹಜಾರ್ ಲೊಕಾಕ್ ಜೆವಣ್ ದಿತಾ
(ಮಾರ್ಕ್ 6:30-44; ಲೂಕ್ 9:10-17; ಜುವಾಂವ್ 6:1-15)
13 ಹಿ ಖಬರ್ ಆಯ್ಕತಚ್, ಜೆಜು ಥಂಯ್ಚೊ ಭಾಯ್ರ್ ಸರ್ಲೊ ಆನಿ ಏಕ್ ದೊಣಿರ್ ಬಸುನ್ ಏಕ್ ವ್ಹೊರೆವಿಂಗಡ್ ಸುವಾತೆಕ್ ಗೆಲೊ. ಪುಣ್ ತಿ ಖಬರ್ ಮೆಳ್ತಚ್ ಲೋಕ್ ಶಹರಾಂ ಥಾವ್ನ್ ಪಾಂಯ್ ವಾಟೇನ್ ಹಾರಿಂ ಹಾರಿಂನಿ ತಾಚಿ ಪಾಟ್ ಧರ್ನ್ ಗೆಲೊ. 14 ಅಶೆಂ ತೊ ದೊಣಿ ವಯ್ಲೊ ಸಕ್ಲಾ ದೆಂವ್ತಾನಾ ಥಂಯ್ ಎಕ್ಟಾಂಯ್ ಜಾಲ್ಲೊ ವ್ಹಡ್ ಲೊಕಾ ಜಮೊ ದೆಖ್ತಚ್ ತಾಚೆಂ ಕಾಳಿಜ್ ಕಳ್ವಳ್ಳೆಂ ಆನಿ ತಾಂಚ್ಯಾ ಪಿಡೆಸ್ತಾಂಕ್ ತಾಣೆಂ ಗೂಣ್ ಕೆಲಿಂ.
15 ಸಾಂಜ್ ಜಾವ್ನ್ ಯೆತಾನಾ, ತಾಚೆ ಶಿಸ್ ತಾಚೇ ಸರ್ಶಿಂ ಯೇವ್ನ್ ಮ್ಹಣಾಲೆ: "ಹಿ ಏಕ್ ಎಕ್ಸುರಿ ಸುವಾತ್ ಆನಿ ವೇಳ್ ಯೀ ಉತರ್ಲೊ. ಲೊಕಾಕ್ ಧಾಡ್ನ್ ಸೊಡ್. ಹಳ್ಳ್ಯಾಂನಿ ವಚುನ್ ಜೆಂವ್ಕ್ ಖಾಂವ್ಕ್ ಕಾಂಯ್ ಮೆಳ್ತಾ ಜಾಲ್ಯಾರ್ ತಿಂ ಮೊಲಾಕ್ ಘೆಂವ್ದಿ." 16 ಪುಣ್ ಜೆಜುನ್ ತಾಂಕಾಂ ಜಾಪ್ ದಿಲಿ: " ತಾಂಣಿಂ ವೆಚಿ ಗರ್ಜ್ ನಾ. ತುಮಿಚ್ ತಾಂಕಾಂ ಕಾಂಯ್ ಪುಣ್ ಯೀ ಖಾಂವ್ಕ್ ದಿಯಾ." 17 ತೆ ತಾಚೇಲಾಗಿಂ ಮ್ಹಣಾಲೆ: " ಆಮ್ಚೇಲಾಗಿಂ ಹಾಂಗಾ ಕಾಂಯ್ಚ್ ನಾ; ಆಸಾತ್ ಮ್ಹಳ್ಯಾರ್ ಫಕತ್ ಪಾಂಚ್ ಉಂಡೆ ಆನಿ ದೋನ್ ಮಾಸ್ಳ್ಯೊ." 18 ಜೆಜು ತಾಂಕಾಂ ಮ್ಹಣಲೊ : " ತೆ ಮ್ಹಕಾ ಹಾಂಗಾ ಹಾಡ್ನ್ ದಿಯಾ." 19 ಆನಿ ಲೊಕಾಕ್ ತಣಾರ್ ಬಸೊಂವ್ಕ್ ತಾಣೆಂ ತಾಕಿದ್ ದಿಲಿ. ಉಪ್ರಾಂತ್ ತಾಣೆಂ ತೆ ಪಾಂಚ್ ಉಂಡೆ ಆನಿ ದೋನ್ ಮಾಸ್ಳ್ಯೊ ಹಾತಿಂ ಘೆತ್ಲ್ಯೊ. ಸರ್ಗಾಕ್ ದೀಷ್ಟ್ ಲಾವ್ನ್ ಅರ್ಗಾಂ ದಿಲಿಂ ಆನಿ ಉಂಡೆ ಮೋಡ್ನ್ ಶಿಸಾಂಕ್ ದಿಲೆ. ಶಿಸಾಂನಿ ಲೊಕಾಕ್ ವಾಂಟ್ಲೆ. 20 ಸಮೆಸ್ತ್ ಜೇವ್ನ್ ಧಾದೊಶಿ ಜಾಲೆ. ಉರ್ಲಲ್ಯಾ ಕುಡ್ಕ್ಯಾಂನಿ ಬಾರಾ ದಾಲಿಂ ಭರ್ನ್ ಕಾಡ್ಲಿಂ 24 ಸ್ತ್ರಿಯೋ ಆನಿ ಭುರ್ಗಿಂ ಸೊಡ್ಲ್ಯಾರ್, ಜೆವ್ಲಲೆ ದಾದ್ಲೆ ಮನಿಸ್ ಪಾಂಚ್ ಹಜಾರ್ ಜಾತಿತ್.
ಜೆಜು ಉದ್ಕಾಚೆರ್ ಚಲ್ತಾ
(ಮಾರ್ಕಾ 6:45-52; ಜುವಾಂವ್ 6:16-21)
22 ಉಪ್ರಾಂತ್ ಜೆಜುನ್ ಶಿಸಾಂಕ್ ದೊಣಿರ್ ಚಡಶೆಂ ಆನಿ ಆಪ್ಣಾ ಫುಡೆಂ ಪಲ್ತಡಿ ವಚಶೆಂ ತಾಕಿದ್ ದೀವ್ನ್ ಲೊಕಾಕ್ ಧಾಡ್ನ್ ಸೊಡ್ಲೊ. 23 ಲೊಕಾಕ್ ಧಾಡ್ನ್ ಜಾತಚ್, ತೊ ಎಕ್ಲೊಚ್ ಮಾಗ್ಣೆಂ ಕರುಂಕ್ ಮ್ಹಣ್ ದೊಂಗ್ರಾಕ್ ಗೆಲೊ. ಕಾಳೊಕ್ ಪಡ್ತಾನಾ ಥಂಯ್ ತೊ ಎಕ್ಲೊಚ್ ಆಸ್ಲೊ .24 ಹೆಣೆಂ ದೋಣ್ ತಡಿ ಥಾವ್ನ್ ಸುಮಾರ್ ಪಯ್ಸ್ ಪಾವ್ ಲ್ಲಿ, ಪುಣ್ ವಾರೆಂ ವಿರೋಧ್ ವ್ಹಾಳ್ತಾಲೆಂ ಜಾಲ್ಲ್ಯಾನ್, ಲ್ಹಾರಾಂಕ್ ತಿ ವಯ್ರ್ ಸಕ್ಲಾ ಜಾಂವ್ಕ್ ಲಾಗ್ಲಿ. 25 ಫಾಂತ್ಯಾಚಿಂ ತೀನ್ ವೊರಾಂ ಉತರ್ಲಲಿಂ ಜಾತಿತ್ , ಜೆಜು ಉದ್ಕಾಚೆರ್ ಚಲುನ್ ತಾಂಚೇ ಸರ್ಶಿಂ ಆಯ್ಲೊ. 26 ಉದ್ಕಾಚೆರ್ ತೊ ಚಲುನ್ ಯೆತಾಲೊ ತೆಂ ಪಳೆವ್ನ್ ತೆ ಇತ್ಲೆ ಘಾಬರ್ಲೆ ಕೀ, " ತೆಂ ಮೆಲ್ಲೆಂ !" ಮ್ಹಣುನ್ ತಾಂಣಿಂ ಭಿಯಾನ್ ಬೊಬ್ ಮಾರ್ಲಿ. 27ಪುಣ್ ತೇಚ್ ಘಡಿಯೇ ಜೆಜು ತಾಂಚೇಲಾಗಿಂ ಉಲೊವ್ನ್ ಮ್ಹಣಾಲೊ : "ಧೈರ್ ಘೆಯಾ , ಹಾಂವ್ ತೊ, ಭಿಯೆನಾಕಾತ್ ! " 28 ತಿತ್ಲ್ಯಾರ್ ಪೆದ್ರು ಜಾಪ್ ದೀವ್ನ್ ಮ್ಹಣಲೊ: " ಸೊಮಿಯಾ, ತುಂಚ್ ತೊ ಜಾಲ್ಯಾರ್, ಮ್ಹಕಾ ಉದ್ಕಾ ವಯ್ಲ್ಯಾನ್ ತುಜೇ ಸರ್ಶಿಂ ಯೇಂವ್ಕ್ ಫರ್ಮಾಯ್." 29 "ಯೆ" ಮ್ಹಣಲೊ ಜೆಜು ತಾಕಾ. ತವಳ್ ಪೆದ್ರು ದೊಣಿ ವಯ್ಲೊ ದೆಂವುನ್ ಜೆಜು ಸರ್ಶಿಂ ವಚುಂಕ್ ಉದ್ಕಾಚೆರ್ ಚಲುಂಕ್ ಲಾಗ್ಲೊ. 30 ಪುಣ್ ವಾರೆಂ ಜೊರಾನ್ ವ್ಹಾಳ್ತಾಲೆಂ, ತೆಂ ಪಳೆವ್ನ್ ತೊ ಭಿಯೆಲೊ ಆನಿ ಬುಡೊಂಕ್ ಲಾಗ್ಲೊ. ತಿತ್ಲ್ಯಾರ್, " ಸೊಮಿಯಾ, ಮ್ಹಾಕಾ ಬಾಚಾವ್ ಕರ್" ಮ್ಹಣುನ್ ತಾಣೆಂ ಬೋಬ್ ಮಾರ್ಲಿ. 31 ತಕ್ಷಣ್ ಜೆಜುನ್ ಹಾತ್ ದೀವ್ನ್ ತಾಕಾ ಧರ್ಲೊ ಆನಿ ಮ್ಹಳೆಂ: " ಉಣ್ಯಾ ಭಾವಾರ್ಥಾಚ್ಯಾ, ಕಿತ್ಯಾಕ್ ತುಂ ದುಬಾವ್ಲೊಯ್ ? " 32 ಉಪ್ರಾಂತ್ ತೆ ದೋಗ್ ದೊಣಿರ್ ಚಡ್ತಚ್ ವಾರೆಂ ರಾವ್ಲೆಂ. 33 ತವಳ್ ದೊಣಿರ್ ಆಸ್ಲಲೆ ಜೆಜುಚ್ಯಾ ಪಾಂಯಾಂಕ್ ಪಡುನ್ ಮ್ಹಣಾಲೆ: " ನಿಜಾಕ್ ಯೀ ದೆವಾಚೊ ಪೂತ್ ತುಂ!"
ಜೆಜು ಗೆನೆಜರೆತಾಂತ್ಲ್ಯಾ ಪಿಡೆಸ್ತಾಂಕ್ ಗೂಣ್ ಕರ್ತಾ
(ಮಾರ್ಕ್ 6:53-56)
34 ಪೆಲೇ ತಡಿಕ್ ಉತರ್ತಚ್, ತೆ ಗೆನೆಜರೆತ್ ಗಾಂವಾಕ್ ಪಾವ್ಲೆ. 35-36 ಥಂಯ್ಚ್ಯಾ ಲೊಕಾನ್ ಜೆಜುಚಿ ಒಳಕ್ ಧರ್ತಚ್ ಚಾರ್ ಯೀ ಕುಶಿಂನಿ ಸಾಂಗುನ್ ಧಾಡ್ಲೆಂ. ಲೋಕ್ ಆಪ್ಲ್ಯಾ ಪಿಡೆಸ್ತಾಂಕ್ ತಾಚೇ ಸರ್ಶಿಂ ಹಾಡಿಲಾಗ್ಲೊ ಆನಿ ತಾಚ್ಯಾ ಆಂಗ್ ವಸ್ತುರಾಚೇ ದೆಗೇಕ್ ಪುಣ್ ಯೀ ಹಾತ್ ಲಾಂವ್ಕ್ ಪಿಡೆಸ್ತಾಂಕ್ ಸೊಡ್ ಮ್ಹಣುನ್ ತಾಚೇಲಾಗಿಂ ಉಪ್ಕಾರ್ ಮಾಗಿಲಾಗ್ಲೊ; ಆನಿ ಆಪಡ್ಲಲಿಂ ಸಮೆಸ್ತಾಂ ಬರಿಂ ಜಾತಾಲಿಂ .