ಫಾರಿಜೆವ್ ಋಣಾ ಮಾಗ್ತಾತ್
(ಮಾತೆವ್ 12:38-39; ಮಾರ್ಕ್ 8:11-13; ಲೂಕ್ 11:16,29 12 :54-56)
1 ತಶೆಂ ಆಸ್ತಾಂ ಥೊಡೆ ಫಾರಿಜೆವ್ ಆನಿ ಸಾದುಸೆವ್ ಜೆಜು ಸರ್ಶಿಂ ಆಯ್ಲೆ ಆನಿ ತಾಕಾ ಪಾರ್ಕುನ್ ಪಳೆಂವ್ಚೇ ಖಾತಿರ್ ಏಕ್ ದೈವಿಕ್ ಋಣಾ ಆಪ್ಣಾಂಕ್ ದಾಖಯ್ಜಯ್ ಮ್ಹಣ್ ಮಾಗುಂಕ್ ಲಾಗ್ಲೆ. ಪುಣ್ ತಾಣೆಂ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ: " ಸುರ್ಯೋ ಬುಡೊಂಕ್ ಜಾತಾನಾ ತುಮಿ ಮ್ಹಣ್ತಾತ್: ‘ಮಳಬ್ ತಾಂಬ್ಶೆಂ ಆಸಾ, ಬರೊ ಆಸೊರ್ ಆಸ್ತಲೊ;’ ಸುರ್ಯೊ ಉದೆವ್ನ್ ಯೆತಾನಾ ತುಮಿ ಮ್ಹಣ್ತಾತ್ : ‘ಮಳ್ಬ್ ತಾಂಬ್ಶೆಂ ಜಾಲಾಂ ಆನಿ ಮೊಡಾಂನಿ ಧಾಂಪ್ಲಾಂ; ಆಜ್ ಝಡ್ ಪಾವ್ಸ್ ಆಸ್ತಲೊ.’ ಅಶೆಂ ಮಳ್ಬಾಚೆಂ ಲಕ್ಷಣ್ ಪಾರ್ಕುಂಕ್ ತುಮಿ ಜಾಣಾತ್, ಪುಣ್ ಹ್ಯಾ ಕಾಳಾಚೆ ಗುರ್ತ್ ಪಾರ್ಕುಂಕ್ ತುಮ್ಕಾಂ ಕಳಾನಾ ! ಖೊಟಿ ಆನಿ ವಿಸ್ವಾಸ್ ಭಂಗ್ಲಲಿ ಸಂತತ್ ಋಣಾ ಮಾಗ್ತಾ ! ಪುಣ್ ಯೊನಾ ಪ್ರವಾದ್ಯಾಚೇ ಋಣೇ ಶಿವಾಯ್ ದುಸ್ರಿ ಋಣಾ ತಿಕಾ ಮೆಳ್ಚಿನಾ." ಇತ್ಲೆಂ ಸಾಂಗುನ್ ತಾಂಕಾಂ ಸೊಡ್ನ್ ತೊ ಚಲ್ತಚ್ ರಾವ್ಲೊ.
ಫಾರಿಜೆವಾಂಛೆಂ ಆನಿ ಸಾದುಸೆವಾಂಚೆಂ ಖಮಿರ್
(ಮಾರ್ಕ್ 8:14-21; ಲೂಕ್ 12:1-6)
5 ಶಿಸ್ ಸರೋವರಾಚೇ ಪಲೇ ತಡಿಕ್ ಉತರ್ತಾನಾ ಉಂಡೆ ಹಾಡುಂಕ್ ವಿಸರ್ಲಲೆ. 6 ಜೆಜುನ್ ತಾಂಕಾಂ ಸಾಂಗ್ಲೆಂ : " ಜಾಗ್ರುತ್ ರಾವಾ , ಫಾರಿಜೆವಾಂಚ್ಯಾ ಆನಿ ಸಾದುಸೆವಾಂಚ್ಯಾ ಖಮಿರಾಚಿ ಚತ್ರಾಯ್ ಗೆಯಾ ." 7 ಹೆಂ ಆಯ್ಕುನ್, " ಆಮಿ ಉಂಡೆ ಹಾಡುಂಕ್ ನಾತ್ ದೆಕುನ್, ತೊ ಅಶೆಂ ಮ್ಹಣ್ತಾ ಜಯ್ಜಯ್" ಮ್ಹಣ್ ಆಪ್ಣಾ ಇತ್ಲ್ಯಾಕ್ ತೆ ಮ್ಹಣುಂಕ್ ಲಾಗ್ಲೆ. 8 ಪುಣ್ ಜೆಜು ಹೆಂ ಜಾಣಾಜಾವ್ನ್ ತಾಂಚೇಲಾಗಿಂ ಮ್ಹಣಾಲೊ : " ಉಣ್ಯಾ ಭಾವಾರ್ಥಾಚ್ಯಾಂನೋ, ಉಂಡೆ ನಾತ್ ಮ್ಹಣುನ್ ತುಮಿ ತುಮ್ಚೇ ಇತ್ಲ್ಯಾಕ್ ಕಿತ್ಯಾಕ್ ಹುಸ್ಕೆತಾತ್? 9 ಆಜೂನ್ ಯೀ ತುಮ್ಕಾಂ ಸಮ್ಜನಾ? ಪಾಂಚ್ ಉಂಡೆ ಪಾಂಚ್ ಹಜರಾಂಕ್ ವಾಂಟುನ್ ದಿಲ್ಲೆ ಆನಿ ಉಪ್ರಾಂತ್ ಕಿತ್ಲಿಂ ದಾಲಿಂ ತುಮಿ ಭರ್ನ್ ಕಾಡ್ ಲ್ಲಿಂ ಹಾಚಿ ತುಮ್ಕಾಂ
ವಿಸಾರ್ ಪಡ್ಲಿವೆ? 10 ವಾ ಸಾತ್ ಉಂಡೆ ಚಾರ್ ಹಜರಾಂಕ್ ವಾಂಟುನ್ ದಿಲ್ಲೆ ಆನಿ ಉಪ್ರಾಂತ್ ಕಿತ್ಲಿಂ ದಾಲಿಂ ತುಮಿ ಭರ್ನ್ ಕಾಡ್ ಲ್ಲಿಂ - ಹಾಚೋಯೀ ತುಮ್ಕಾಂ ಉಡಾಸ್ ನಾವೇ? 11 ತರ್ ಹಾಂವ್ ತುಮ್ಚೇಲಾಗಿಂ ಉಂಡ್ಯಾ ವಿಶ್ಯಾಂತ್ ಉಲಯ್ಲೊಂ ನ್ಹಯ್ ಮ್ಹಣ್ ತುಮ್ಕಾಣ್ ಸಮ್ಜನಾ ಕಿತ್ಯಾಕ್ ? ಫಾರಿಜೆವಾಂಚ್ಯಾ ಆನಿ ಸಾದುಸೆವಾಂಚ್ಯಾ ಖಮಿರಾಚಿ ಚತ್ರಾಯ್ ಘೆಯಾ ಮ್ಹಣ್ ಹಾಂವೆಂ ಮ್ಹಳ್ಳೆಂ." 12 ಉಂಡ್ಯಾಕ್ ಘಾಲ್ತಾತ್ ತ್ಯಾ ಖಮಿರಾ ವಿಶ್ಯಾಂತ್ ನ್ಹಯ್ , ಬಗರ್ ಫಾರಿಜೆವಾಂಚೇ ಆನಿ ಸಾದುಸೆವಾಂಚೇ ಶಿಕೊವ್ಣೇ ವಿಶ್ಯಾಂತ್ ತಾಣೆಂ ಚತ್ರಾಯ್ ದಿಲ್ಲಿ ಮ್ಹಣ್ ತವಳ್ ಶಿಸಾಂಕ್ ಸಮ್ಜಲೆಂ .
ಜೆಜು ವಿಶ್ಯಾಂತ್ ಪೆದ್ರುಚಿ ಸಾಕ್ಸ್
(ಮಾರ್ಕ್ 8:27-30; ಲೂಕ್ 9:18-21)
13 ಉಪ್ರಾಂತ್ ಸೆಜಾರೇಯಾ ಫಿಲಿಪ್ಪಿ ನಾಂವಾಚ್ಯಾ ಪ್ರಾಂತಾಂತ್ ಯೇವ್ನ್ ಪಾವ್ ಲ್ಲ್ಯಾ ವೆಳಾರ್, ಜೆಜುನ್ ಆಪ್ಲ್ಯಾ ಶಿಸಾಂಲಾಗಿಂ ವಿಚಾರ್ಲೆಂ : " ಮನ್ಶಾಪುತಾಕ್ ಲೋಕ್ ಕೊಣ್ ಮ್ಹಣ್ ಮ್ಹಣ್ತಾತ್ ? " 14 ತಾಂಣಿಂ ಜಾಪ್ ದಿಲಿ: ಥೊಡೆ ತೊ ಸ್ನಾನ್ ದಾತಾರ್ ಜುವಾಂವ್ ಮ್ಹಣ್ತಾತ್, ಹೆರ್ ಥೊಡೆ ತೊ ಎಲಿಯಾ ಮ್ಹಣ್ತಾತ್, ಆನಿ ಹೆರ್ ತೊ ಯೆರೆಮಿಯಾ ವಾ ಪ್ರವಾದ್ಯಾಂ ಪೈಕಿ ಎಕ್ಲೊ ಮ್ಹಣ್ತಾತ್ . " 15 ತವಳ್ ಜೆಜು ತಾಂಕಾಂ ವಿಚಾರಿ: " ಪುಣ್ ತುಮಿ , ಹಾಂವ್ ಕೊಣ್ ಮ್ಹಣ್ ಮ್ಹಣ್ತಾತ್ ? " 16 ಸಿಮಾಂವ್ ಪೆದ್ರುನ್ ಜಾಪ್ ದೀವ್ನ್ ಮ್ಹಳೆಂ: " ತುಂ ಕ್ರೀಸ್ತ್, ಜಿವ್ಯಾ ದೆವಾಚೊ ಪೂತ್." 17 ತವಳ್ ಜೆಜು ಪೆದ್ರುಕ್ ಮ್ಹಣಾಲೊ : " ಭಾಗಿ ತುಂ ಸಿಮಾಂವ್ , ಯೊನಾಚ್ಯಾ ಪುತಾ! ಕಿತ್ಯಾಕ್ ಹೆಂ ತುಕಾ ಉಗ್ಡಾಪೆಂ ಕೆಲೆಂ ಕೊಣ್ ಯೀ ಮನ್ಶಾನ್ ನ್ಹಯ್, ಬಗರ್ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾನ್. 18 ಹಾಂವ್ ತುಕಾ ಸಾಂಗ್ತಾಂ: ‘ತುಂ ಪೆದ್ರು ಮ್ಹಣ್ಜೇ ಖಡಪ್; ಆನಿ ಹ್ಯಾ ಖಡ್ಪಾಚೆರ್ ಮ್ಹಜಿ ಧರ್ಮ್ ಸಭಾ ಹಾಂವ್ ಬಾಂಧ್ತಲೊಂ ಆನಿ ಪಾತಾಳಾಚೆ ದಾರ್ವಟೆ ತಿಚೆರ್ ಜಯ್ತ್ ವ್ಹರುಂಕ್ ಸಕ್ಚೆನಾತ್. 19 ಹಾಂವ್ ತುಕಾ ಸರ್ಗಿಂಚ್ಯಾ ರಾಜ್ಯಾಚ್ಯೊ ಚಾವಿಯೋ ದಿತಾಲೊಂ . ಜೆಂ ಕಿತೆಂ ಸಂಸಾರಿಂ ತುಂ ಆಡ್ವಾರ್ತಲೊಯ್, ತೆಂ ಸರ್ಗಿಂಯೀ ಆಡ್ವಾರ್ಲಲೆಂ ಜಾತಲೆಂ; ಆನಿ ಜೆಂ ಕಿತೆಂ ಸಂಸಾರಿಂ ತುಂ ಸೊಡೊಯ್ತಲೊಯ್, ತೆಂ ಸರ್ಗಿಂಯೀ ಸೊಡಯ್ಲಲೆಂ ಜಾತಲೆಂ’." 20 ಉಪ್ರಾಂತ್ ಆಪುಣ್ ಕ್ರೀಸ್ತ್ ಮ್ಹಣ್ ಕೊಣಾಕ್ ಯೀ ಸಾಂಗಿನಯೆ ಮ್ಹಣುನ್ ತಾಣೆಂ ಆಪ್ಲ್ಯಾ ಶಿಸಾಂಕ್ ಕಠಿಣ್ ತಾಕಿದ್ ದಿಲಿ.
ಜೆಜು ಆಪ್ಲ್ಯಾ ಮರಣಾ ಆನಿ ಜಿವಂತ್ಪಣಾ ವಿಶ್ಯಾಂತ್ ಉಲಯ್ತಾ
(ಮಾರ್ಕ್ 8:31-33; ಲೂಕ್ 9:22)
21 ತವಳ್ ಥಾವ್ನ್ ಜೆಜು ಆಪ್ಣೆಂ ಜೆರುಜಲೆಮಾಕ್ ವೆಚಿ ಗರ್ಜ್ ಮ್ಹಣ್ ಆಪ್ಲ್ಯಾ ಶಿಸಾಂಕ್ ಸಾಂಗುಂಕ್ ಲಾಗ್ಲೊ. ಥಂಯ್ ಮಾಲ್ಗಡ್ಯಾಂ, ಶಾಸ್ತ್ರ್ಯಾಂ ಆನಿ ಪ್ರಧಾನ್ ಯಾಜಕಾಂಚ್ಯಾ ಹಾತಾಂತ್ ಆಪ್ಣಾಕ್ ಜಾಯ್ತೆಂ ಸೊಸುಂಕ್ ಆಸ್ತಲೆಂ, ಆಪುಣ್ ಮರಣ್ ಪಾವ್ತಲೊಂ ಆನಿ ತಿಸ್ರ್ಯಾ ದಿಸಾ ದೇವ್ ಆಪ್ಣಾಕ್ ಜಿವಂತ್ ಉಠಯ್ತಲೊ ಮ್ಹಣುನ್ ತಾಣೆಂ ತಾಂಕಾಂ ಸ್ವಷ್ಟ್ ಕಳಿತ್ ಕೆಲೆಂ. 22 ತೆದ್ವಾಂ ಪೆದ್ರು ತಾಕಾ ಕುಶಿನ್ ಆಪೊವ್ನ್, "ದೇವ್ ತೆಂ ನಿರ್ಮಿನಾ ಜಾಂವ್, ಸೊಮಿಯಾ! ತಾಕಾ ತೆಂ ಕೆದಿಂಚ್ ಘಡ್ಚೆಂ ನಾಕಾ ! " ಮ್ಹಣುನ್ ಭೆಷ್ಟಾಂವ್ಕ್ ಲಾಗ್ಲೊ. 23 ತಿತ್ಲ್ಯಾರ್ ಜೆಜು ಪೆದ್ರು ಥಂಯ್ ಘುಂವೊನ್ ಮ್ಹಣಲಾಗ್ಲೊ : " ಮ್ಹಜೇ ಸರ್ಶಿಲೊ ಪಯ್ಸ್ ಸರ್, ಸೈತಾನಾ ! ಮ್ಹಜೇ ವಾಟೇರ್ ಆಡ್ಕಳ್ತಾ ತೊ ಫಾತರ್ ತುಂ! ಕಿತ್ಯಾಕ್ ದೇವ್ ಚಿಂತ್ತಾ ತಶೆಂ ತುಂ ಚಿಂತಿನಾಂಯ್, ಮನಿಸ್ ಚಿಂತ್ತಾ ತಶೆಂ ತುಂ ಚಿಂತ್ತಾಯ್."
ಜೆಜುಚೊ ಪಾಟ್ಲಾವ್ ಕರುಂಕ್ ಶರ್ತಾಂ
(ಮಾರ್ಕ್ 8:34-91; ಲೂಕ್ 9:23-27)
24 ಉಪ್ರಾಂತ್ ಜೆಜು ಆಪ್ಲ್ಯಾ ಶಿಸಾಂಕ್ ಮ್ಹಣಾಲೊ: " ಕೊಣಾಕ್ ಜರ್ ಮ್ಹಜೊ ಪಾಟ್ಲಾವ್ ಕರುಂಕ್ ಖುಶಿ ಆಸಾ, ತರ್ ಆಪ್ಣಾಕ್ ಚ್ ತೊ ಇನ್ಕಾರ್ ಕರುಂದಿ, ಆಪ್ಲೊ ಖುರಿಸ್ ಉಕೊಲ್ನ್ ಘೆಂವ್ದಿ ಆನಿ ಮ್ಹಜ್ಯಾ ಪಾಟ್ಲ್ಯಾನ್ ಯೆಂವ್ದಿ. 25 ಜೊ ಕೊಣ್ ಆಪ್ಲೊ ಜೀವ್ ವಾಂಚೊಂವ್ಕ್ ಸೊಧ್ತಾ, ತೊ ಆಪ್ಲೊ ಜೀವ್ ಹೊಗ್ಡಾಯ್ತಾ; ಪುಣ್ ಜೊ ಕೊಣ್ ಮ್ಹಜೇ ಪಾಸತ್ ಆಪ್ಲೊ ಜೀವ್ ಹೊಗ್ಡಾಯ್ತಾ, ತೊ ಆಪ್ಲೊ ಜೀವ್ ನಿಜಾಕ್ ಯೀ ವಾಟಾಯ್ತಾ. 26 ಮನ್ಶಾನ್ ಆಪ್ಲೊ ಜೀವ್ ಹೊಗ್ಡಾವ್ನ್ ಸಗ್ಳೊ ಸಂಸಾರ್ ಜೊಡ್ಲೊಚ್ ಮ್ಹಣ್ಯಾಂ ತರ್ ಹಾಂತುಂ ತಾಕಾ ಕಿತೆಂ ಫಾಯ್ದೊ ? ವಾ ಆಪ್ಲೊ ಜೀವ್ ಪಾಟಿಂ ಘೆಂವ್ಕ್ ಮನ್ಶಾನ್ ದುಸ್ರೆಂ ಕಿತೆಂ ದಿವ್ಯೆತ್ ? 27 ಮನ್ಶಾಪೂತ್ ಆಪ್ಲ್ಯಾ ಬಾಪಾಚೇ ಮಹಿಮೆನ್ ಆಪ್ಲ್ಯಾ ದುತಾಂ ಸವೆಂ ಯೆತಲೊ; ಆನಿ ತೇ ವೆಳಿಂ ಹರ್ಯೆಕ್ಲ್ಯಾಕ್ ತಾಚ್ಯಾ ತಾಚ್ಯಾ ಕರ್ನ್ಯಾಂ ಪರ್ಮಾಣೆಂ ಪ್ರತಿಫಳ್ ದಿತಾಲೊ. 28 ಸತ್ ಚ್ ಹಾಂವ್ ಸಂಗ್ತಾಂ: ಹಾಂಗಾ ಉಬೆ ಆಸಾತ್ ತಾಂಚೇ ಮಧ್ಲೆ ಥೊಡೆ ಜಣ್ ಮನ್ಶಾಪುತಾಕ್ ಆಪ್ಲ್ಯಾ ರಾಜ್ಯಾಂತ್ ಆಯ್ಲಲೊ ಪಳೆಸರ್ ಮರುಂಕ್ ಪಾವ್ಚೆನಾತ್."