ದಾನ್ ಧರ್ಮಾ ವಿಶ್ಯಾಂತ್ ಶಿಕೊವ್ಣ್
6 1" ತುಮ್ಚ್ಯೊ ಭಕ್ತಿಚ್ಯೊ ಕರ್ನ್ಯೊ ಮನ್ಶಾಂ ಮುಖಾರ್, ತಾಂಣಿಂ ತ್ಯೊ ಪಳೆಂವ್ಚೇ ಖಾತಿರ್ ತುಮಿ ಆಧಾರಿನಾಶೆಂ ಚತ್ರಾಯ್ ಘೆಯಾ. ನಾ ಜಾಲ್ಯರ್ ತುಮ್ಚ್ಯಾ ಸರ್ಗಿಂಚ್ಯಾ ಬಾಪಾಲಾಗ್ಚೊ ಕಸಲೊಚ್ ಪ್ರತಿಫಳ್ ತುಮ್ಕಾಂ ಲಾಭಸೊನಾ
2 " ದೆಕುನ್ ತುಂ ದಾನ್ ಧರ್ಮ್ ತುಜ್ಯಾ ಮುಖ್ಲ್ಯಾನ್ ಕೋಂಬ್ ವಾಜಯ್ ನಾಕಾ. ಕಪಟಿ ಸಿನಾಗೊಗಾಂನಿ ಆನಿ ರಸ್ತ್ಯಾಂನಿ ಹೆರಾಂ ಥಾವ್ನ್ ಶಾಭಾಸ್ಗಿ ಜೊಡ್ಚೇ ಖಾತಿರ್ ತಶೆಂ ಕರ್ತಾತ್. ಖರೆಂಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತಾಂಕಾಂ ಆಪ್ಲೊ ಪ್ರತಿಫಳ್ ಎದೊಳ್ ಚ್ ಮೆಳೊನ್ ಜಾಲಾ. 3 ಪುಣ್ ತುಂ ದಾನ್ ಧರ್ಮ್ ಕರ್ತಾನಾ ತುಜೊ ಉಜ್ವೊ ಹಾತ್ ಕಿತೆಂ ಕರ್ತಾ ತೆಂ ತುಜ್ಯಾ ದಾವ್ಯಾ ಹಾತಾಕ್ ಕಳನಾ ಜಾಂವ್. ಅಶೆಂ ತುಜೆಂ ದಾನ್ ಧರ್ಮ್ ಗುಟಾನ್ ಜಾಂವ್ ಆನಿ ಗುಟಾನ್ ಕೆಲ್ಲೆಂ ಪಳೆಲ್ಲೊ ತುಜೆ ಬಾಪ್ ತುಕಾ ಪ್ರತಿಫಳ್ ದಿತಾಲೊ.
ಮಾಗ್ಣ್ಯಾ ವಿಶ್ಯಾಂತ್ ಶಿಕೊವ್ಣ್
5"ತುಮಿ ಮಾಗ್ತಾನಾ ಕಪಟ್ಯಾಂ ಸಾರ್ಕಿಂ ಜಾಯ್ನಾಕಾತ್. ಆಪ್ಣಾಂಕ್ ಮನ್ಶಾಂನಿ ಪಳೆಂವ್ಚೇ ಖಾತಿರ್ ಸಿನಾಗೊಗಾಂನಿ ಆನಿ ರಸ್ತ್ಯಾಂಚ್ಯಾ ಕೊನ್ಶಾಂನಿ ಉಬೆ ರಾವುನ್ ಮಾಗುಂಕ್ ತಾಂಕಾಂ ಚಡ್ ಖುಶಿ. ಖರೆಂಚ್ ಹಾಂವ್ ತುಮ್ಕಾಂ ಸಾಂಗ್ತಾಂ ತಾಂಕಾಂ ತಾಂಚೊ ಪ್ರತಿಫಳ್ ಎದೊಳಚ್ ಮೆಳೊನ್ ಜಾಲಾ. 6 ಪುಣ್ ತುಂ ಮಾಗ್ತಾನಾ ತುಜ್ಯಾ ಗುಪಿತ್ ಕುಡಾ ಭಿತರ್ ರೀಗ್, ದಾರ್ ಧಾಂಪ್, ಆನಿ ಥಂಯ್ ಗುಪಿತ್ ಆಸಾ ತ್ಯಾ ತುಜ್ಯಾ ಬಾಪಾಲಾಗಿಂ ಮಾಗ್. ಆನಿ ತುವೆಂ ಗುಟಾನ್ ಕೆಲ್ಲೆಂ ಪಳೆಲ್ಲೊ ತುಜೊ ಬಾಪ್ ತುಕಾ ಪ್ರತಿಫಳ್ ದಿತಲೊ. 7 ತ್ಯಾ ಶಿವಾಯ್ ತುಮಿ ಮಾಗ್ತಾನಾ ಅನ್ಬಾವಾರ್ಥ್ಯಾಂಬರಿ ಜಾಯ್ತೆಂ ಭಡ್ಪಡ್ನಾಕಾತ್. ಯಥೇಷ್ಟ್ ಮ್ಹಣ್ಮುಣುನ್ ಮಾಗ್ಣಿಂ ಕೆಲ್ಯಾರ್ ದೇವ್ ತಿಂ ಆಯ್ಕತಲೊ ಮ್ಹಣ್ ತೆ ಚಿಂತ್ತಾತ್. 8 ತುಮಿ ತಾಂಚೇಬರಿ ಕರಿನಾಕಾತ್. ಕಿತ್ಯಾಕ್ ಆಪ್ಣಾಲಾಗಿಂ ಮಾಗ್ಚೇ ಆದಿಂಚ್ ಖಂಯ್ಚ್ಯಾ ವಸ್ತುಂಚಿ ತುಮ್ಕಾಂ ಗರ್ಜಾ ಆಸಾ ತೆಂ ತುಮ್ಚೊ ಬಾಪ್ ಜಾಣಾ.
"ಆಮ್ಚ್ಯಾ ಬಾಪಾ"
(ಲೂಕ್ 11:2-4)
9 ತರ್ ತುಮಿ ಅಶೆಂ ಮಾಗಾ:
" ಆಮ್ಚ್ಯಾ ಬಾಪಾ, ಸರ್ಗಿಂಚ್ಯಾ,
ಜಶೆಂ ಸರ್ಗಿಂ ತಶೆಂ ಭುಮಿ,
10 ಪವಿತ್ರ್ ಜಾಂವ್ ತುಜೆಂ ನಾಂವ್,
ತುಜೆ ರಾಜ್ಯ್ ಯೇಂವ್,
ತುಜಿ ಖುಶಿ ಜಾಂವ್.
11 ಆಮ್ಚೊ ದಿಸ್ಪಡ್ತೊ ಗ್ರಾಸ್ ಆಜ್ ಆಮ್ಕಾಂ ದೀ,
12 ಜಶೆಂ ಆಮ್ಚೆರ್ ಚುಕ್ಲಲ್ಯಾಂಕ್ ಆಮಿ ಬೊಗ್ಶಿತಾಂವ್,
ತಶೆಂ ಆಮ್ಚಿಂ ಪಾತ್ಕಾಂ ಬೊಗ್ಶಿ;
13 ಆಮ್ಕಾಂ ತಾಳ್ನೆಂತ್ ವ್ಹರಿನಾಕಾ,ಆನಿ ಖೊಟ್ಯಾ ಥಾವ್ನ್ ಆಮ್ಕಾಂ ರಾಕ್.
14ಜರ್ ತುಮಿ ಹೆರಾಂಕ್ ತಾಂಚೆ ಗುನ್ಯಾಂವ್ ಬೊಗ್ಶಿತಾತ್, ತರ್ ತುಮ್ಚೊ ಸರ್ಗಿಂಚೊ ಬಾಪ್ ಯೀ ತುಮ್ಚೆ ಗುನ್ಯಾಂವ್ ತುಮ್ಕಾಂ ಬೊಗ್ಶಿತಲೊ. 15ಪುಣ್ ಹೆರಾಂಕ್ ತುಮಿ ಬೊಗ್ಶಿನಾಂತ್ ಜಾಲ್ಯಾರ್ ತುಮ್ಚೊ ಬಾಪ್ ಯೀ ತುಮ್ಚೆ ಗುನ್ಯಾಂವ್ ಬೊಗ್ಸುಂಚೊನಾ.
ಉಪಾಸಾ ವಿಶ್ಯಾಂತ್ ಶಿಕೊವ್ಣ್
16 "ತುಮಿ ಉಪಾಸ್ ಕರ್ತಾನಾಯೀ ಕಪಟ್ಯಾಂಬರಿ ತುಮ್ಚಿಂ ಮುಖಾಂ ಬಾವಯ್ನಾಕಾತ್. ತೆ, ಆಪುಣ್ ಉಪಾಸ್ ಕರ್ತಾತ್ ಮ್ಹಣ್ ಲೊಕಾಕ್ ದಾಕಂವ್ಕ್ ಆಪ್ಲೆಂ ಸಾರ್ಕೆಂಚ್ ಭಂಗಯ್ತಾತ್. ಖರೆಂಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತಾಂಕಾಂ ತಾಂಚೊ ಪ್ರತಿಫಳ್ ಎದೊಳ್ ಚ್ ಮೆಳೊನ್ ಜಾಲಾ. 17 ಪುಣ್ ತುಂ ಉಪಾಸ್ ಕರ್ತಾನಾ ತುಜ್ಯಾ ಮತ್ಯಾಕ್ ತೇಲ್ ಮಾಖ್ ಆನಿ ತುಜೆಂ ಮುಖಮಳ್ ಧೂ. 18ಅಶೆಂ ತುಂ ಉಪಾಸ್ ಕರ್ತಾಯ್ ಮ್ಹಣ್ ಗುಪ್ತಿಂ ಆಸ್ಲಲ್ಯಾ ತುಜ್ಯಾ ಬಾಪಾಕ್ ಶಿವಾಯ್ ಹೆರಾಂಕ್ ತೆಂ ಕಳನಾ ಜಾಂವ್. ತುವೆಂ ಗುಟಾನ್ ಕೆಲ್ಲೆಂ ಪಳೆತಾ ತೊ ತುಜೊ ಬಾಪ್ ತುಕಾ ಪ್ರತಿಫಳ್ ದಿತಲೊ.
ಸರ್ಗಾರ್ ಪುಂಜಾಂವ್ಚಿಂ ದಿರ್ವಿಂ
(ಲೂಕ್ 12:33-34)
19 " ಸಂಸಾರಾಂತ್ ತುಮ್ಕಾಂ ದಿರ್ವಿಂ ಪುಜಾಯ್ನಾಕಾತ್; ಹಾಂಗಾ ಕಲಂಬ್ ಮಾಂಡ್ತಾ ಆನಿ ಕೀಡ್ ಖಾತಾ ಆನಿ ಚೋರ್ ಕನ್ನಾ ಘಾಲ್ನ್ ನಾಗಯ್ತಾತ್. 20 ಪುಣ್ ದಿರ್ವಿಂ ಪುಂಜಾಯಾ ಸರ್ಗಾರ್; ಥಂಯ್ ಕಲಂಬ್ ಮಾಂಡನಾ, ಕೀಡ್ ಖಾಯ್ನಾ ಆನಿ ಚೋರ್ ಕನ್ನಾ ಘಾಲ್ನ್ ನಾಗಯ್ನಾತ್. 21 ಕಿತ್ಯಾಕ್ ಜಂಯ್ ತುಜೆಂ ದಿರ್ವೆಂ ಆಸಾ ಥಂಯ್ ತುಜೆಂ ಕಾಳಿಜ್ ಯೀ ಆಸ್ತಲೆಂ .
ಕುಡಿಚೊ ಉಜ್ವಾಡ್
(ಲೂಕ್ 11:34-36)
22 ‘ದೊಳೊ ಕುಡಿಚೊ ದಿವೊ. ತುಜೆ ದೊಳೆ ಸರ್ಕೆ ಆಸಾತ್ ಜಾಲ್ಯಾರ್, ಸಗ್ಳೇ ತುಜೇ ಕುಡಿಂತ್ ಉಜ್ವಾಡ್ ಆಸ್ತಲೊ. 23 ಪುಣ್ ತುಜೆ ದೊಳೆ ಪಾಡ್ ಜತಿತ್ ಜಾಲ್ಯಾರ್ ಸಗ್ಳೇ ತುಜೇ ಕುಡಿಂತ್ ಕಾಳೊಕ್ ಪಡ್ತಲೊ. ತುಜೇ ಭಿತರ್ ಆಸ್ಲಲೊ ಉಜ್ವಾಡ್ ಚ್ ಕಾಳೊಕ್ ಜಾಯ್ತ್ ಜಾಲ್ಯಾರ್, ಕಾಳೊಕ್ ಚ್ ಭಿರಾಂಕುಳ್ ಜಾಯ್ನಯೆ?"
ದೇವ್ ಆನಿ ಗ್ರೇಸ್ತ್ ಕಾಯ್
(ಲೂಕ್ 16:13)
24 " ಕೊಣಾಕ್ ಚ್ ದೋಗ್ ಧನಿಯಾಂಚಿ ಚಾಕ್ರಿ ಕರುಂಕ್ ಸಾಧ್ಯ್ ನಾ. ಕಾರಣ್, ಎಕ್ ಚ್ ತೊ ಎಕ್ಲ್ಯಾಚೊ ದ್ವೇಶ್ ಕರ್ತಲೊ ಆನಿ ದುಸ್ರ್ಯಾಚೊ ಮೋಗ್ ಕರ್ತಲೊ; ವಾ ತೊ ಪಯ್ಲ್ಯಾಕ್ ಲಬ್ಧತಲೊ ಆನಿ ದುಸ್ರ್ಯಾಚಿ ಬೆಪರ್ವಾ ಕರ್ತಲೊ. ತುಮ್ಚ್ಯಾನ್ ದೆವಾಚಿಯೀ ದುಡ್ವಾಚಿಯೀ ಚಾಕ್ರಿ ಕರುಂಕ್ ಜಾಯ್ನಾ."
ಲೆಖಾವರ್ತೊ ಹುಸ್ಕೊ
(ಲೂಕ್ 12:22-31)
25 " ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮ್ಚ್ಯಾಜಿವಾಕ್ ಕಿತೆಂ ಖಾಂವ್ಚೆಂ ಜೆಂವ್ಚೆಂ ಆನಿ ತುಮ್ಚೆ ಕುಡಿಕ್ ಕಿತೆಂ ನ್ಹೆಸ್ಚೆಂ ಪಾಂಗರ್ಚೆಂ ಮ್ಹಣುನ್ ಲೆಖಾವರ್ತೊ ಹುಸ್ಕೊ ತುಮ್ಕಾಂ ನಾಕಾ. ಖಾಣಾ ಪ್ರಾಸ್ ಜೀವ್ ವರ್ತೊ ಆನಿ ನ್ಹೆಸ್ಣಾ ಪ್ರಾಸ್ ಕೂಡ್ ವರ್ತಿ ನ್ಹಯ್ ? 26 ಪಳೆಯಾ ಅಂತ್ರಾಳಾಚಿಂ ಸುಕ್ಣಿಂ. ತಿಂ ವೊಂಪಿನಾತ್, ಲುವಿನಾಂತ್ ವಾ ತುಂಪ್ಯಾನಿ ಪುಂಜಾಯ್ನಾತ್. ತರಿಪುಣ್ ತುಮ್ಚೊ ಸರ್ಗಿಂಚೊ ಬಾಪ್ ತಾಂಕಾಂ ಪೊಸ್ತಾ. ತುಮಿ ತಾಂಚೇ ಪ್ರಾಸ್ ಕಿತ್ಲ್ಯಾಕ್ ಯೀ ಉತೀಮ್ ನ್ಹಯ್ ? 27 ತುಮ್ಚೆ ಮಧೆಂ ಕೊಣ್ ಚಿಂತಾ ಕರ್ನ್ ಆಪ್ಲೆಂ ಆವ್ಕ್ ಥೊಡ್ಯಾ ವೆಳಾಕ್ ಪುಣ್ ಯೀ ಚಡೊಂವ್ಕ್ ಸಕತ್? 28 ಆನಿ ನ್ಹೆಸ್ಣಾ ವಿಶ್ಯಾಂತ್ ತುಮಿ ಕಿತ್ಯಾಕ್ ಖಂತ್ ಕರ್ಚಿ? ಶೆತಾಂತ್ಲಿಂ ತಿಂ ಕಾಟ್ ಫುಲಾಂ ಕಶಿಂ ವಾಡ್ತಾತ್ ತೆಂ ಪಳೆಯಾ. ತಿಂ ಘೊಳನಾತ್ ವಾ ವೊಳಿನಾತ್. 29 ತರಿಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ : ಸಾಲ್ಮಾಂವ್ ರಾಯ್ ಲೆಗುನ್ ಆಪ್ಲ್ಯಾ ಸಗ್ಲ್ಯಾ ವೈಭವಾಂತ್ ತಾಂತ್ಲ್ಯಾ ಏಕ್ ಫುಲಾಸಾರ್ಕೊ ನ್ಹೆಸ್ ಲ್ಲೊ ನಾ. 30 ಆಜ್ ಆಸಾ ಆನಿ ಫಾಲ್ಯಾ ರಾಂದ್ನಿಂತ್ ಲಾಸ್ತಾತ್ ತ್ಯಾ ಶೆತಾಂತ್ಲೆಂ ತಣ್ ಸಯ್ತ್ ಜರ್ ದೇವ್ ಹೇ ಪರಿಂ ನ್ಹೆಸಯ್ತಾ, ತರ್ ಕಿತ್ಲ್ಯಾ ವರ್ತ್ಯಾ ಥರಾನ್ ತುಮ್ಕಾಂ ತೊ ನ್ಹೆಸೊಂವ್ಚೊ ನಾ? ಉಣ್ಯಾ ಭಾವಾರ್ಥಾಚ್ಯಾಂನೊ! 31 ದೆಕುನ್ ಕಿತೆಂ ಖಾಂವ್ಚೆಂ ಆನಿ ಕಿತೆಂ ಪಿಯೆಂವ್ಚೆಂ ಆನಿ ಕಿತೆಂ ನ್ಹೆಸ್ಚೆಂ ? - ಅಶೆ ಮುಣನ್ ತುಮಿ ಖಂತ್ ಕರಿನಾಕಾತ್. ಹೆಂ ಸಗ್ಳೆಂ ಸೊಧ್ಚೆಂ ಅನ್ಭಾವಾಥ್ಯಾಂನಿ. 32 ಹ್ಯಾ ಸರ್ವಾಂಚಿ ತುಮ್ಕಾಂ ಗರ್ಜ್ ಆಸಾ ಮ್ಹಣ್ ಸರ್ಗಿಂ ಆಸ್ಲಲೊ ತುಮ್ಚೊ ಬಾಪ್ ಜಾಣಾ. 33 ದೆಕುನ್ ಸೊಧಾ ತುಮಿ ಪಯ್ಲೆಂ ದೆವಾಚೆಂ ರಾಜ್ಯ್ ಆನಿ ತಾಚಿ ಖುಶಿ; ಆನಿ ಹ್ಯೊ ಸರ್ವ್ ವಸ್ತುಯೀ ತೊ ತುಮ್ಕಾಂ ದಿತಲೊ. 34 ಫಲ್ಯಾಂಚೆಂ ಚಿಂತುನ್ ಖಂತ್ ಕರಿನಾಕಾತ್. ಫಲ್ಯಾಚಿ ಖಂತ್ ಫಲ್ಯಾಕ್, ಆಯ್ಚಿ ಖಂತ್ ಆಜಿಕ್ ಪುರೊ.