ಪೆಲ್ಯಾಚಿ ಝಡ್ತಿ
(ಲೂಕ್ 6:37-38, 41-42)
7 1 " ಹೆರಾಂಚಿ ಝಡ್ತಿ ಕರುಂಕ್ ವಚನಾಕಾತ್: ತೆದಳಾ ತುಮ್ಚಿಯೀ ಝಡ್ತಿ ಜಾವ್ಚಿನಾ. 2 ಕಿತ್ಯಾಕ್ ಜೇ ಪರಿಂ ತುಮಿ ಹೆರಾಂಚಿ ಝಡ್ತಿ ಕರ್ತಾತ್ , ತೇ ಪರಿಂ ತುಮ್ಚಿಯೀ ಜಡ್ತಿ ದೇವ್ ಕರ್ತಲೊ; ಆನಿ ಜ್ಯಾ ಮಾಪಾನ್ ತುಮಿ ಹೆರಾಂಕ್ ಮಾಪ್ತಾತ್, ತ್ಯಾಚ್ ಮಾಪಾನ್ ತುಮ್ಕಾಂ ತೊ ಮಾಪ್ತಲೊ.3 ತುಜ್ಯಾ ಭಾವಾಚ್ಯಾ ದೊಳ್ಯಾಂತ್ ಆಸಾ ತೆಂ ಆಡೆಂ ತುಕಾ ದಿಸಾನಾ ಕಿತ್ಯಾಕ್? 4 ಆನಿ ತುಜ್ಯಾಚ್ ದೊಳ್ಯಾಂತ್ ಏಕ್ ಆಡೆಂ ಆಸ್ತಾಂ ತುಜ್ಯಾ ಭಾವಾಕ್ ‘ತುಜ್ಯಾ ದೊಳ್ಯಾಂತ್ಲೆ ಕಿಸರ್ ಕಾಡುಂಕ್ ಮ್ಹಾಕಾ ಸೊಡ್’ ಮ್ಹಣುನ್ ತುವೆಂ ಸಾಂಗ್ಚೆಂ ಕಶೆಂ? 5 ಕಪಟ್ಯಾ, ತುಜ್ಯಾ ದೊಳ್ಯಾಂತ್ಲೆಂ ಆಡೆಂ ಪಯ್ಲೆಂ ಕಾಡ್, ಆನಿ ಮಾಗಿರ್ ತುಜ್ಯಾ ಭಾವಾಚ್ಯಾ ದೊಳ್ಯಾಂತ್ಲೆಂ ಕಿಸರ್ ಕಾಡುಂಕ್ ತುಕಾ ಸ್ವಷ್ಟ್ ದಿಸ್ತಲೆಂ .
ದುಕ್ರಾಂ ಮುಖಾರ್ ಮೊತಿಯಾಂ
6 " ಪವಿತ್ರ್ ಮ್ಹಣ್ ಲೆಖ್ತಾತ್ ತೆಂ ಕಾಡ್ನ್ ಸುಣ್ಯಾಂಕ್ ಘಾಲಿನಾಕಾತ್; ತುಮ್ಚಿಂ ಮೊತಿಯಾಂ ದುಕ್ರಾಂ ಮುಖಾರ್ ಉಡಯ್ನಾಕಾತ್; ಕಿತ್ಯಾಕ್ ತೆ ಆಪ್ಲ್ಯಾ ಪಾಂಯಾಂ ಪಂದಾ ತಿಂ ಮಸ್ತಿತಿತ್ ಆನಿ ಪಾಟಿಂ ಪರ್ತೊನ್ ತುಮ್ಕಾಂ ಫಾಪ್ಸಿತಿತ್.
ಮಾಗಾ, ಸೊಧಾ ಆನಿ ಬಾಡಯಾ
(ಲೂಕ್ 11:9-13)
7"ಮಾಗಾ ಆನಿ ತುಮಿ ಘೆತಲ್ಯಾತ್; ಸೊಧಾ, ಆನಿ ತುಮ್ಕಾಂ ಮೆಳ್ತಲೆಂ; ಬಡಯಾ, ಆನಿ ತುಮ್ಕಾಂ ಉಗ್ತೆಂ ಜಾತಲೆಂ. 8 ನಿಜಾಕ್ ಯೀ ಜೊ ಕೋಣ್ ಮಾಗ್ತಾ ತೊ ಘೆತಾ, ಸೊಧ್ತಾಲ್ಯಾಕ್ ಮೆಳ್ತಾ ಆನಿ ಬಡಯ್ತಲ್ಯಾಕ್ ಉಗ್ತೆಂ ಜಾತಾ. 9 ತುಮ್ಚೇ ಭಿತರ್ಲೊ ಕೊಣ್ ತೊ ಬಾಪುಯ್ ಉಂಡೊ ಮಾಗ್ತಲ್ಯಾ ಆಪ್ಲ್ಯಾ ಪುತಾಕ್ ಫಾತರ್ ದೀತ್? 10 ವಾ ಮಾಸ್ಳಿ ಮಾಗ್ತಲ್ಯಾಕ್ ಜಿವ್ದಾಳ್ ದೀತ್ ? 11 ತುಮಿ ಖೊಟೆ ಜರ್ ತುಮ್ಚ್ಯಾ ಭುರ್ಗ್ಯಾಂಕ್ ಬರ್ಯೊ ವಸ್ತು ದಿಂವ್ಕ್ ಜಾಣಾತ್, ತರ್ ತುಮ್ಚೊ ಸರ್ಗಿಂಚೊ ಬಾಪ್ ಆಪ್ಣಾಲಾಗಿಂ ಮಾಗ್ತಲ್ಯಾಂಕ್ ಕಿತ್ಲ್ಯೊ ಚಡ್ ಬರ್ಯೊ ವಸ್ತು ದೀನಾ ಜಾಯ್ತ್! "
ಧರ್ಮಾಚೊ ಸಾರ್
(ಲೂಕ್ 6:31)
12 " ದೆಕುನ್, ಜೆಂ ಕಿತೆಂ ಹೆರಾಂನಿ ತುಮ್ಕಾಂ ಕರಿಜಯ್ ಮ್ಹಣ್ ತುಮಿ ಅಪೇಕ್ಷಿತಾತ್, ತೆಂಚ್ ತುಮಿಯೀ ತಾಂಕಾಂ ಕರಾ; ಹೊಚ್ ಸಾರ್ ನಿಯಮ್ ಶಾಸ್ತ್ರಾಸೊ ಆನಿ ಪ್ರವಾದ್ಯಾಂಚ್ಯಾ ಉತ್ರಾಂಚೊ.
ಅಶಿರ್ ದಾರ್ವಟೊ
(ಲೂಕ್ 113:23-24)
13 ಅಶಿರ್ ದಾರ್ವಾಟ್ಯಾಂತ್ಲ್ಯಾನ್ ಭಿತರ್ ಸರಾ; ಕಿತ್ಯಾಕ್ , ನಾಸಾಕ್ ವ್ಹರ್ತಾ ತೊ ದಾರ್ವಟೊ ರೂಂದ್; ತೊ ಮಾರಗ್ ಇಸ್ಕಳ್ ಆನಿ ತಾಂತ್ಲ್ಯಾನ್ ಪಯ್ಣ್ ಕರ್ತಲೆ ಪುಶ್ಕಳ್. 14 ಪುಣ್ ಜಿವಿತಾಕ್ ವ್ಹರ್ತಾ ತೊ ದಾರ್ವಟೊ ಲ್ಹಾನ್, ತಿ ವಾಟ್ ಆಶಿರ್ ಆನಿ ಮೆಳ್ಚಿಯೀ ಥೊಡ್ಯಾಂಕ್ ಚ್.
ರೂಕ್ ಆನಿ ತಾಚೆಂ ಫೊಳ್
(ಮಾತೆವ್ 12:33; ಲೂಕ್ 6:43-44)
15 " ಫಟ್ಕಿರ್ಯಾ ಪ್ರವಾದ್ಯಾಂ ವಿಶ್ಯಾಂತ್ ಚತ್ರಾಯ್ ಘೆಯಾ; ತೆ ತುಮ್ಚೇಶಿಂ ಬಕ್ರ್ಯಾಂಚ್ಯಾ ವೆಸಾನ್ ಯೆತಾತ್. ಪುಣ್ ಭಿತರ್ಲ್ಯಾನ್ ತೆ ಗ್ರಾಸುಂಚಿಂ ವಾಗ್ಟಾಂ. 16 ತಾಂಚ್ಯಾ ಫೊಳಾಂನಿ ತುಮಿ ತಾಂಚಿ ಒಳಕ್ ಧರ್ತಲ್ಯಾತ್. ಕಾಂಟೆರಿಂತ್ ದಾಖೊ ಖುಂಟುಂಕ್ ಮೆಳನಾತ್ ವಾ ಸರಾಂಟ್ಯಾರ್ ಅಂಜುರಾಂ ಕಾಡುಂಕ್ ಯೀ ಮೆಳನಾತ್. 17 ತೇಚ್ ಪರಿಂ ಹರ್ಯೇಕ್ ಬರೊ ರೂಕ್ ಬರೆಂ ಫೊಳ್ ದಿತಾ ಆನಿ ಪಾಡ್ ರೂಕ್ ಪಾಡ್ ಫೊಳ್ ದಿತಾ. 18 ಬರ್ಯಾ ರುಕಾನ್ ಪಾಡ್ ಫೊಳ್ ದಿಂವ್ಚೇಬರಿ ನಾ ಆನಿ ಪಾಡ್ ರುಕಾನ್ ಬರೆಂ ಫೊಳ್ ದಿಂವ್ಚೇಬರಿ ನಾ.19 ಬರೆಂ ಫೊಳ್ ದೀನಾ ತೊ ಹರ್ಯೇಕ್ ರೂಕ್ ಕಾತರ್ನ್ ಉಜ್ಯಾಂತ್ ಲಾಸ್ತಾತ್. 20 ದೆಕುನ್ ತಾಂಚ್ಯಾ ಫೊಳಾಂನಿ ತುಮಿ ತಾಂಚಿ ಒಳಕ್ ಧರ್ತಲ್ಯಾತ್.
ಹಾಂವ್ ತುಮ್ಕಾಂ ಒಳ್ಕನಾಂ
(ಲೂಕ್ 6:46, 13:27)
21 " ಮ್ಹಾಕಾ ‘ಸೊಮಿಯಾ, ಸೊಮಿಯಾ’ ಮ್ಹಣುನ್ ಉಲೊ ಮಾರ್ತಾ ತೊ ಹರ್ಯೇಕ್ಲೊ ಸರ್ಗಿಂಚ್ಯಾ ರಾಜ್ಯಾಂತ್ ರಿಗಸೊನಾ; ಬಗರ್ ಜೊ ಕೊಣ್ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾಚಿ ಖುಶಿ ಕರ್ತಾ, ತೊ ಸರ್ಗಿಂಚ್ಯಾ ರಾಜ್ಯಾಂತ್ ರಿಗ್ತಲೊ. 22 ಸಬಾರ್ ಜಣ್ ತ್ಯಾ ದಿಸಾ ಮ್ಹಜೆ ಲಾಗಿಂ ಮ್ಹಣ್ತಲೆ: ‘ಸೊಮಿಯಾ, ಸೊಮಿಯಾ, ತುಜೇ ನಾಂವಿಂ ಆಮಿ ಪ್ರವಾದ್ ಕೆಲಾ ನ್ಹಯ್ ? ತುಜೆ ನಾಂವಿಂ ಆಮಿ ಆಚರ್ಯಾಂ ಕೆಲ್ಯಾಂತ್ ನ್ಹಯ್?’ 23 ತವಳ್ ಹಾಂವ್ ತಾಂಚ್ಯಾ ತೊಂಡಾರ್ ಸಾಂಗ್ತಲೊಂ: ’ ಹಾಂವ್ ತುಮ್ಕಾಂ ಒಳ್ಕನಾಂ, ಖೊಟೆಪಣಾಕ್ ಲಬ್ಧಲ್ಲ್ಯಾಂನೋ, ಮ್ಹಜೆ ಥಾವ್ನ್ ಪಯ್ಸ್ ಸರಾ’.
ದೋಗ್ ಘರ್ ಬಾಂಧ್ಪಿ
(ಲೂಕ್ 6:47-49)
24 " ದೆಕುನ್, ಜೊ ಕೋಣ್ ಹಿಂ ಮ್ಹಜಿಂ ಉತ್ರಾಂ ಆಯ್ಕತಾ ಆನಿ ಪಾಳ್ತಾ ತೊ ಆಪ್ಲೆಂ ಘರ್ ಖಡ್ಪರ್ ಬಾಂಧ್ಲಲ್ಯಾ ಏಕ್ ಬುದ್ವಂತ್ ಮನ್ಶಾಬರಿ. 25 ಪಾವ್ಸ್ ವೊತ್ಲೊ, ಆವ್ರ್ ಚಡ್ಲೆಂ, ಝಡ್ ವಾರೆಂಯೀ ವ್ಹಾಳ್ಳೆಂ ಆನಿ ತ್ಯಾ ಘರಾಕ್ ಮಾರ್ಲೆಂ; ತರ್ ಯೀ ತೆಂ ಕೊಸ್ಳೊನ್ ಪಡೊಂಕ್ ನಾ; ಕಿತ್ಯಾಕ್ ತಾಚಿ ಬುನ್ಯಾದ್ ಖಡ್ಪಾರ್ ಘಾಲ್ಲಿ. 26 ಜೊ ಕೊಣ್ ಹಿಂ ಮ್ಹಜಿಂ ಉತ್ರಾಂ ಆಯ್ಕತಾ ಪುಣ್ ತಿಂ ಪಾಳಿನಾ, ತೊ ಆಪ್ಲೆಂ ಘರ್ ರೆಂವೆರ್ ಬಾಂಧ್ಲಲ್ಯಾ ಎಕ್ ಹೆಡ್ಡಾಬರಿ. 27 ಪಾವ್ಸ್ ವೊತ್ಲೊ, ಆವ್ರ್ ಚಡ್ಲೆಂ, ಝಡ್ ವಾರೆಂಯೀ ವ್ಹಾಳ್ಳೆಂ ಆನಿ ತ್ಯಾ ಘರಾಕ್ ಮಾರ್ಲೆಂ, ಆನಿ ತೆಂ ಕೊಸ್ಳೊನ್ ಪಡ್ಲೆಂ, ಅಶೆಂ ಸಗ್ಳೆಂ ಸತ್ತ್ಯಾನಾಸ್ ಜಾಲೆಂ!"
ಜೆಜುಚೊ ಅಧಿಕಾರ್
(ಮಾರ್ಕ್ 1:22, ಲೂಕ್ 4:32)
28 ಜೆಜುನ್ ಹಿಂ ಉತ್ರಾಂ ಉಲೊವ್ನ್ ಜಾತಾನಾ, ಲೋಕ್ ತಾಚಿ ಶಿಕೊವ್ಣ್ ಆಯ್ಕುನ್ ವಿಜ್ಮಿತ್ ಜಾಲೊ. ಕಿತ್ಯಾಕ್ ತೊ ಅಧಿಕಾರ್ ಆಸ್ಲಲ್ಯಾ ಮನ್ಶಾಬರಿ ಶಿಕಯ್ತಾಲೊ; ತಾಂಚ್ಯಾ ಶಾಸ್ತ್ರ್ಯಾಂಬರಿ ಶಿಕಯ್ನತ್ಲೊ.