ಜೆಜು ಏಕ್ ಕೊಡ್ಕಾರಾಕ್ ಬರೊ ಕರ್ತಾ
(ಮಾರ್ಕ್ 1:40 -44 ; ಲೂಕ್ 5:12 -14)
8 1 ದೊಂಗ್ರಾರ್ ಥಾವ್ನ್ ಜೆಜು ಸಕ್ಲಾ ದೆಂವ್ತಚ್, ವ್ಹಡ್ ಲೊಕಾಜಮೆ ತಾಚ್ಯಾ ಪಾಟ್ಲ್ಯಾನ್ ಗೆಲೆ. 2 ತವಳ್ ಎಕ್ ಕೊಡ್ಕಾರ್ ಯೇವ್ನ್ ತಾಚೇ ಮುಖಾರ್ ಸರ್ಪಡ್ಲೊ ಆನಿ ಮ್ಹಣಲೊ: "ಸಾಯ್ಬಾ, ತುಕಾ ಮನ್ ಆಸ್ಲ್ಯಾರ್ ತುಜ್ಯಾನ್ ಮ್ಹಾಕಾ ನಿತಳ್ ಕರುಂಕ್ ಜಾತಾ".3 ಜೆಜುನ್ ಆಪ್ಲೊ ಹಾತ್ ವಿಸ್ತಾರುನ್ ತಾಕಾ ಆಪೊಡ್ಲೊ ಆನಿ ಮ್ಹಳೆಂ : " ಮ್ಹಾಕಾ ಮನ್ ಆಸಾ, ನಿತಳ್ ಜಾ". ತಕ್ಷಣ್ ಚ್ ತಾಚೆಂ ಕೊಡ್ ನಿತಳ್ಳೆಂ. 4 ತವಳ್ ಜೆಜುನ್ ತಾಕಾ ಸಾಂಗ್ಲೆಂ : " ಪಳೆ, ಹೆಂ ಕೊಣಾಕ್ ಯೀ ಸಾಂಗಿನಾಕಾ; ಶೀದಾ ಯಾಜಕಾಲಾಗಿಂ ವಚುನ್ ತುಕಾಚ್ ದಾಖಯ್ ; ಆನಿ ತು ನಿತಳ್ ಜಾಲಾಯ್ ಮ್ಹಣ್ ಸಮೆಸ್ತಾಂಕ್ ರುಜ್ವಾತ್ ಮೆಳ್ಚ್ಯಾಕ್ ಮೊಯ್ಜೆನ್ ಫರ್ಮಾಯ್ ಲ್ಲಿ ಕಾಣಿಕ್ ಭೆಟ್ ಯ್".
ಜೆಜು ಶತಪತಿಚ್ಯಾ ಚಾಕ್ರಾಕ್ ಬರೊ ಕರ್ತಾ
(ಲೂಕ್ 7:1- 10; ಜುವಾಂವ್ 4:46 -54)
5-6 ಉಪ್ರಾಂತ್ ಜೆಜು ಕಫಾರ್ನಂವಾಂತ್ ಭಿತರ್ ಸರ್ತಚ್, ಎಕ್ ಶತಪತಿ ತಾಚೇ ಸರ್ಶಿಂ ಆಯ್ಲೊ ಆನಿ ವಿನಂತಿ ಕರ್ನ್ ಮ್ಹಣಾಲೊ : " ಸಾಯ್ಬಾ, ಮ್ಹಜ್ಯಾ ಚಾಕ್ರಾಕ್ ಆರ್ ಮಾರ್ಲ್ಯಾ ಆನಿ ಘರಾಂತ್ ಪಡೊನ್ ತೊ ಕಠಿಣ್ ವೊಳ್ವಳ್ತಾ". 7 ಜೆಜು ತಾಕಾ ಮ್ಹಣಾಲೊ : " ಹಾಂವ್ ಯೇವ್ನ್ ತಾಕಾ ಬರೊ ಕರ್ತಾಂ." ಶತಪತಿನ್ ಜಾಪ್ ದೀವ್ನ್ ಮ್ಹಳೆಂ : " ಸಾಯ್ಬಾ , ತುಂ ಮ್ಹಜ್ಯಾ ಘರಾ ಭಿತರ್ ಸರುಂಕ್ ಹಾಂವ್ ಯೋಗ್ಯ್ ನ್ಹಯ್. ತುಂ ಏಕ್ ಉತರ್ ಸಾಂಗ್ಶಿ ಜಾಲ್ಯಾರ್ ಪುರೊ, ಮ್ಹಜೊ ಚಾಕರ್ ಬರೊ ಜಾತಲೊ. 9 ಹಾಂವ್ ಜಾಲ್ಯಾರ್ ಯೀ ದುಸ್ರ್ಯಾಚ್ಯಾ ಹಾತಾಖಾಲ್ ಆಸಾಂ ಆನಿ ಮ್ಹಜೇ ಖಾಲ್ ಯೀ ಸೈನಿಕ್ ಆಸಾತ್. ಎಕ್ಲ್ಯಾಕ್ ಹಾಂವ್ ‘ವಚ್’ ಮ್ಹಣ್ತಾಂ, ತೊ ವೆತಾ; ಆನಿ ಕರ್’ ಮ್ಹಣ್ತಾಂ, ತೊ ಕರ್ತಾ." 10 ಇತ್ಲೆಂ ಆಯ್ಕುನ್ ಜೆಜು ಅಜಾಪ್ ಜಾಲೊ ಆನಿ ತಾಚೊ ಪಾಟ್ಲಾವ್ ಕರ್ನ್ ಯೆತೆಲ್ಯಾಂಕ್ ತೊ ಮ್ಹಣಾಲೊ: " ಸತ್ ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಎದೊ ವ್ಹಡ್ ಭಾವರ್ಥ್ ಇಸ್ರಾಯೆಲಾಂತ್ ಸಯ್ತ್ ಕೊಣಾಯೀ ಥಂಯ್ ಮ್ಹಾಕಾ ಮೆಳ್ಳಲೊ ನಾ. 11 ಹಾಂವ್ ತುಮ್ಕಾಂ ಆನ್ಯೇಕ್ ಸಾಂಗ್ತಾಂ: ಉದೆಂತಿ ಆನಿ ಅಸ್ತಮ್ತೇ ಥಾವ್ನ್ ಜಾಯ್ತೆ ಜಣ್ ಯೆತಲೆ ಆನಿ ಆಬ್ರಾಹಮಾ, ಇಸಾಕಾ ಆನಿ ಜಾಕೊಬಾ ಸಾಂಗಾತಾ ಸರ್ಗಿಂಚ್ಯಾ ರಾಜ್ಯಾಂತ್ ಜೆವ್ಣಾಕ್ ಬಸ್ತಲೆ. 12 ಪುಣ್ ಜಲ್ಮಾನ್ ರಾಜ್ಯಾಚೆ ಹಕ್ಕ್ ದಾರ್ ಜಾಯ್ಜಯ್ ಜಾಲ್ಲ್ಯಾಂಕ್ ಭಾಯ್ರ್ ಕಾಳೊಕಾಂತ್ ಲೊಟುನ್ ಘಾಲ್ತಲೆ. ಥಂಯ್ ಜಾತಲೆಂ ರಡ್ಣೆಂ ಆನಿ ದಾಂತ್ ಖಿರ್ಲೊಣಿ." 13 ಉಪ್ರಾಂತ್ ಜೆಜು ಶತಪತಿಕ್ ಸಾಂಗಿಲಾಗ್ಲೊ: "ತು ಆತಾಂ ಘರಾ ವಚ್ ಆನಿ ತುವೆಂ ಸತ್ಮಾನ್ ಲ್ಲೇ ಪರ್ಮಾಣೆಂ ತುಕಾ ಜಾಂವ್." ಆನಿ ತೇಚ್ ಘಡಿಯೇ ತಾಚೊ ಚಾಕರ್ ಬರೊ ಜಾಲೊ.
ಜೆಜು ಪೆದ್ರುಚೇ ಸಾಸುಮಾಯ್ಕ್ ಬರಿ ಕರ್ತಾ
(ಮರ್ಕ್ 1:29-31, ಲೂಕ್ 4:38-39)
14 ಆನಿ ಆತಾಂ ಜೆಜು ಪೆದ್ರುಚ್ಯಾ ಘರಾ ಪಾವ್ಲೊ. ಥಂಯ್ ತಾಚಿ ಸಾಸುಮಾಯ್ ತಾಪಾನ್ ನಿದುನ್ ಆಸ್ಲಲಿ ತೆಂ ತಾಣೆಂ ದೆಖ್ಲೆಂ.15 ತಾಣೆಂ ತಿಚೊ ಹಾತ್ ಧರ್ತಚ್ ತಾಪ್ ಸುಟ್ಲೊ, ಆನಿ ತಿ ಉಠೊನ್ ತಾಕಾ ಸರ್ಬಾರಾಯ್ ಕರುಂಕ್ ಲಾಗ್ಲಿ.
ಜೆಜು ಸಬಾರಾಂಕ್ ಬರಿಂ ಕರ್ತಾ
(ಮಾರ್ಕ್ 32-34, ಲೂಕ್ 4:40-41)
16 ಸಾಂಜ್ ಜಾತಚ್ ಜಾಯ್ತ್ಯಾ ದೆಂವ್ಚಾರ್ ಲಾಗ್ ಲ್ಲ್ಯಾ ಜಣಾಂಕ್ ಲೊಕಾನ್ ಜಾಚೇ ಸರ್ಶಿ ಹಾಡ್ಲಿಂ . ಆಪ್ಲ್ಯಾ ಎಕಚ್ ಉತ್ರಾನ್ ತಾಣೆಂ ದೆಂವ್ಚಾರಾಂಕ್ ಧಾಂವ್ಡಾಯ್ಲೆ ಆನಿ ಪಿಡೆಸ್ತಾಂಕ್ ಸಕ್ಟಾಂಕ್ ಗೂಣ್ ಕೆಲಿಂ. 17 ಅಶೆಂ ಪೂರ್ಣ್ ಜಾಲೆಂ ಇಸಾಯಿಯಾ ಪ್ರವಾದ್ಯಾನ್ ಸಾಂಗ್ ಲ್ಲೆಂ ತೆಂ: " ಆಮ್ಚೆ ರೋಗ್ ತಾಣೆಂ ಆಪ್ಣಾಚೆರ್ ಘೆತ್ಲೆ ಆನಿ ಆಮ್ಚಿ ಪಿಡಾಶಿಡಾ ತಾಣೆಂ ವ್ಹಾವಯ್ಲಿ."
ಜೆಜುಚೆ ಪಾಟ್ಲಾವ್ದಾರ್ ಜಾಂವ್ಕ್ ಉರ್ಬೆಲ್ಲೆ
(ಲೂಕ್ 9:57-60)
18ಆಪ್ಣಾ ಭೊಂವ್ತಣಿಂ ವೆಡೊ ಘಾಲ್ಲೆ ಲೊಕಾಜಮೆ ಪಳೆವ್ನ್, ಜೆಜುನ್ ಸರೋವರಾಚೇ ಪೆಲೇ ತಡಿಕ್ ವಚುಂಕ್ ಫರ್ಮಾಯ್ಲೆಂ. 19 ತೆದ್ವಾಂ ಏಕ್ ಶಾಸ್ತ್ರಿ ಪುಡೆಂ ಸರುನ್ ಜೆಜುಲಾಗಿಂ ಮ್ಹಣಾಲೊ: "ಮೆಸ್ತ್ರಿ, ತುಂ ವತಾಯ್ ಥಂಯ್ ಹಾಂವ್ ತುಜೊ ಪಾಟ್ಲಾವ್ ಕರಿತ್ ಯೆತಾಂ." 20 ಜೆಜುನ್ ತಾಕಾ ಜಾಪ್ ದಿಲಿ: " ಕೊಲ್ಯಾಂಕ್ ಮಾಟಿಂ ಆಸಾತ್, ಸುಕ್ಣ್ಯಾಂಕ್ ಘೊಂಟೆರ್ ಆಸಾತ್; ಪುಣ್ ಮನ್ಶಾಪುತಾಕ್ ಮಾತೆಂ ತೆಂಕುಂಕ್ ಸಯ್ತ್ ಸುವಾತ್ ನಾ."ತಾಚ್ಯಾ ಶಿಸಾಂ ಮಧ್ಲೊ ಆನ್ಯೆಕ್ಲೊ ಮ್ಹಣಲೊ: " ಸಾಯ್ಭಾ, ಪಯ್ಲೆಂ ವಚುನ್ ಮ್ಹಜ್ಯಾ ಬಾಪಾಯ್ಕ್ ಮಾತ್ಯೆಕ್ ಪಾಂವ್ಕ್ ಪುಣಿಂಯೀ ಮ್ಹಾಕಾ ಸೊಡ್." 22 ಪುಣ್ ಜೆಜುನ್ ತಾಕಾ ಜಾಪ್ ದಿಲಿ: "ತುಂ ಮ್ಹಜೊ ಪಾಟ್ಲಾವ್ ಕರ್; ಮೆಲ್ಲ್ಯಾಂಕ್ ಮೆಲ್ಲೆಚ್ ಮಾತ್ಯೆಕ್ ಪಾಂವ್ದಿತ್."
ಜೆಜು ವಾದಳ್ ಥಂಡ್ ಕರ್ತಾ
(ಮಾರ್ಕ್ 4:31-41; ಲೂಕ್ 8:23-25)
23 ಉಪ್ರಾಂತ್ ಜೆಜು ದೊಣಿರ್ ಚಡ್ಲೊ. ತಾಚೆ ಶಿಸ್ ಯೀ ತಾಚೇ ಸಾಂಗಾತಾ ಗೆಲೆ. 24 ಅಶೆಂ ಆಸ್ತಾಂ, ಸರೋವರಾಂತ್ ಎಕಾಚ್ಚಾಣೆ ಏಕ್ ವ್ಹಡ್ ವಾದಳ್ ಉಠ್ಲೆಂ; ದೊಣಿವಯ್ರ್ ಸಯ್ತ್ ಲ್ಹಾರಾಂ ಮಾರುಂಕ್ ಲಾಗ್ಲಿಂ. ಪುಣ್ ಜೆಜು ನೀದ್ ಕಾಡ್ತಾಲೊ.25 ತವಳ್ ತಾಚೆ ಶಿಸ್ ತಾಚೇ ಸರ್ಶಿಂ ವಚುನ್ ತಾಕಾ ಜಾಗೊವ್ನ್ ಮ್ಹಣಾಲೆ: " ಸೊಮಿಯಾ, ಆಮ್ಕಾಂ ಬಚಾವ್ ಕರ್, ಆಮಿ ಬುಡ್ತಾಂವ್!" 26 ಜೆಜು ತಾಂಕಾಂ ಮ್ಹಣೊಲೊ: " ತುಮಿ ಇತ್ಲೆ ಭಿಜುಡ್ ಕಿತ್ಯಾಕ್? ಕಿತ್ಲೊ ಉಣೊ ಭಾವಾರ್ಥ್ ತುಮ್ಚೊ!’ ಆನಿ ಉಠೊನ್ ವಾರ್ಯಾಕ್ ಆನಿ ಲ್ಹಾರಾಂಕ್ ತಾಣೆಂ ಫರ್ಮಾಯ್ಲೆಂ ಆನಿ ಸಕ್ಕಡ್ ಶಾಂತ್ ಜಾಲೆಂ. 27 ಹೆಂ ಪಳೆಲ್ಲೆ ಮನಿಸ್ ವಿಜ್ಮಿತ್ ಜಾವ್ನ್ ಮ್ಹಣಲಾಗ್ಲೆ: " ಕಸಲೊ ಮನಿಸ್ ಹೊ? ವಾರೆಂ ಆನಿ ದರ್ಯೊ ಲೆಗುನ್ ತಾಚೆಂ ಉತರ್ ಆಯ್ಕತಾತ್!"
ಗಾದಾರೆನ್ ಗಾಂವಾಂತ್ ದೆಂವ್ಚಾರ್ ಸುಟಯ್ತಾ
(ಮಾರ್ಕ್ 5:1-20; ಲೂಕ್ 8:26-39)
28 ಉಪ್ರಾಂತ್ ತೊ ಪೆಲೇ ತಡಿಕ್ ಉತ್ರೊನ್ ಗಾದಾರೆನ್ ಗಾರಾಂಚ್ಯಾ ಗಾಂವಾಕ್ ಪಾವ್ಲೊ. ಥಂಯ್ ದೆಂವ್ಚಾರ್ ಲಾಗ್ ಲ್ಲೆ ದೊಗ್ ಜಣ್ ಸಮಾಧಿಂತ್ಲೆ ಭಾಯ್ರ್ ಸರುನ್ ತಾಚೇ ಮುಖಾರ್ ಆಯ್ಲೆ. ತೆ ಇತ್ಲೆ ಭಿರಾಂಕುಳ್ ಆಸ್ ಲ್ಲೆ ಕೀ, ತೇ ವಾಟೇನ್ ವಚುಂಕ್ ಕೊಣ್ ಚ್ ಧೈರ್ ಘೆನಾತ್ ಲ್ಲೊ.29 ಆನಿ ತೆ ಬೊಬ್ ಮರ್ನ್ ಮ್ಹಣಲೆ: " ಜೆಜು ದೆವಾಚ್ಯಾ ಪುತಾ, ಆಮ್ಚೇ ಖಬ್ರೆಕ್ ತುಂ ಕಿತ್ಯಾಕ್ ಆಯ್ಲಾಯ್? ಠರಾಯ್ ಲ್ಲ್ಯಾ ವೆಳಾ ಆದಿಂಚ್ ತುಂ ಆಮ್ಕಾಂ ದಗ್ಧುಂಕ್ ಆಯ್ಲಾಯ್ ಕಿತೆಂ ?" 30 ಥಂಯ್ಚ್ ಲಾಗ್ಸಾರ್ ಸಬಾರ್ ದುಕ್ರಾಂಚೊ ಏಕ್ ಹಿಂಡ್ ಚರ್ತಾಲೊ. 31 ದೆಂವ್ಚಾರ್ ಜೆಜುಲಾಗಿಂ ಅಶೆಂ ಪರಾತುಂಕ್ ಲಾಗ್ಲೆ: ಹಾಂಗಾ ಥಾವ್ನ್ ತುಂ ಆಮ್ಕಾಂ ಭಾಯ್ರ್ ಧಾಂವ್ಡಾಯ್ತಾಯ್ ಜಾಲ್ಯಾರ್, ಆಮ್ಕಾಂ ತ್ಯಾ ದುಕ್ರಾಂಚ್ಯಾ ಹಿಂಡಾಂತ್ ಧಾಡ್." 32 ಜೆಜುನ್ ತಾಂಕಾಂ ಮ್ಹಳೆಂ : "ವಚಾ". ತಕ್ಷಣ್ ತೆ ಭಾಯ್ರ್ ಸರುನ್ ದುಕ್ರಾಂ ಥಂಯ್ ಪ್ರವೇಸ್ ಜಾಲೆ, ಆನಿ ಸಗ್ಳೊ ಹಿಂಡ್ ಧಾವುನ್ ವಚುನ್, ಕಡ್ಶ್ಯಾ ವಯ್ಲ್ಯಾನ್ ಸರೋವರಾಕ್ ಉಡೊನ್ ಉದ್ಕಾಂತ್ ಬುಡೊನ್ ಮೆಲೊ. 33 ತಿತ್ಲ್ಯಾರ್ ದುಕ್ರಾಂಚೆ ಚರೊವ್ಪಿ ಪೊಳ್ಳೆ; ಆನಿ ಶಹರಾಂತ್ ವಚುನ್ ಹಿ ಸಗ್ಳಿ ಗಜಾಲ್ ಆನಿ, ಪ್ರತ್ಯೇಕ್ ಜಾವ್ನ್ ದೆಂವ್ಚಾರ್ ಲಾಗ್ಲಲ್ಯಾಂಕ್ ಕಿತೆಂ ಘಡ್ ಲ್ಲೆಂ ತೆಂ ಸಗ್ಳೆಂ ಥಂಯ್ ತಾಂಣಿಂ ಸಾಂಗ್ಲೆಂ. 34 ಹೆಂ ಆಯ್ಕುನ್ ಶಹರಾಚೊ ಸಕ್ಕಡ್ ಲೋಕ್ ಜೆಜುಕ್ ಮೆಳುಂಕ್ ಭಾಯ್ರ್ ಸರ್ನ್ ಆಯ್ಲೊ; ಆನಿ ತಾಕಾ ಪಳೆತಚ್ ತಾಂಚ್ಯಾ ಗಾಂವಾಂತ್ಲೊ ತಾಣೆಂ ವಚಜಯ್ ಮ್ಹಣುನ್ ತಾಚೇಲಾಗಿಂ ಪರಾತುಂಕ್ ಲಾಗ್ಲೊ.