ಮರಿಯೆ ಮುಖಾ೦ತ್ರ್ ಪವಿತ್ರ್ ಆತ್ಮ್ಯಾಚಾ ಸಕ್ತೆನ್ ಸಬ್ದ್ ಆಸ್‌ಲ್ಲೊ ಮನಿಸ್ ಜಾಲೊ. ದೇವ್‌ದೂತಾನ್ ತಿಕಾ ಜಾಪ್ ದಿಲಿ "ಪವಿತ್ರ್ ಆತ್ಮೊ ತುಜೆರ್ ಯೆತಲೊ ಆನಿ ಪರಮೋನ್ನತಾಚಿ ಸಕತ್ ತುಜೆರ್ ಸಾವ್ಳಿ ಘಾಲ್ತಲಿ. ದೆಕುನ್ ತುಜೇ ಥಾವ್ನ್ ಜಲ್ಮು೦ಚಾ ಭುರ್ಗ್ಯಾಕ್ ಭಾಗೆವ೦ತ್ ದೆವಾಚೊ ಪೂತ್ ಮ್ಹಣ್ತಲೆ." (ಲೂಕ್. 1:35). "ಏಕ್ ಅ೦ಕ್ವಾರ್ ಚಲಿ ಗರ್ಭೆಸ್ತ್ ಜಾತಲಿ ಆನಿ ಎಕಾ ಪುತಾಕ್ ಪ್ರಸೂತ್ ಜಾತಲಿ ಆನಿ ತಾಕಾ 'ಇಮ್ಮಾನುವೆಲ್' ಮ್ಹಣೊನ್ ಆಪಯ್ತೆಲೆ. ಇಮ್ಮಾನುವೆಲ್ ಮ್ಹಳ್ಯಾರ್ 'ದೇವ್ ಆಮ್ಚೇ ಸಾ೦ಗಾತಾ' ಮ್ಹಣ್ ಅರ್ಥ್" (ಮಾತೆವ್. 1:23).
"ತಿ ಆಪ್ಲ್ಯಾ ಪ್ರಥಮ್ ಭುರ್ಗ್ಯಾಕ್ ಎಕಾ ಪುತಾಕ್ ಪ್ರಸೂತ್ ಜಾಲಿ. ತಾಕಾ ತಿಣೆ೦ ಫಾಳಿಯಾ೦ನಿ ಗುಟ್ಲಾವ್ನ್ ಎಕಾ ಖಾ೦ವ್ಣೆ೦ತ್ ನಿದಾಯ್ಲೊ, ಕಿತ್ಯಾಕ್ ಛಾತ್ರಾ೦ತ್ ತಾ೦ಕಾ ಜಾಗೊ ಮೆಳೊ೦ಕ್ ನಾತ್ಲೊ" (ಲೂಕ್. 2:7). ಬೆತ್ಲೆಹೆಮಾ೦ತ್ಲ್ಯಾ ಲೊಕಾನ್ ಜೆಜುಕ್ ಸ್ವೀಕಾರ್ ಕರು೦ಕ್ ನಾ ಜಾಲ್ಯಾರೀ ತಾಕಾ ಮರಿಯೆಚಾ, ಜುಜೆಚಾ, ಗೊವ್ಳ್ಯಾ೦ಚಾ ಆನಿ ತೆಗಾ೦ ರಾಯಾ೦ಚಾ ಕಾಳ್ಜಾ೦ನಿ ಜಾಗೊ ಮೆಳ್ಳೊ. ದೇವ್‌ದೂತ್ ಗೊವ್ಳ್ಯಾ೦ಕ್ ಮ್ಹಣಾಲೊ "ಭಿಯೆನಾಕಾತ್, ಪಳೆಯಾ ಸಗ್ಳೇ ಪರ್ಜೆಕ್ ವ್ಹಡ್ ಸ೦ತೋಸಾಚಿ ಬರಿ ಖಬರ್ ಹಾ೦ವ್ ತುಮ್ಕಾ೦ ಹಾಡ್ನ್ ಆಯ್ಲಾ೦ ಆಯ್ಚೇ ರಾತಿ೦ ದಾವಿದಾಚೇ ನಗರಿ೦ ತುಮ್ಕಾ೦ ಏಕ್ ತಾರಕ್ ಜಲ್ಮಲಾ, ತೊಚ್ಚ್ ಕ್ರೀಸ್ತ್ ಸೊಮಿ" (ಲೂಕ್. 2:10-11). ಗೊವ್ಳ್ಯಾ೦ನಿ ತಕ್ಷಣ್‌ಚ್ಚ್ ಹೊ ಸ೦ದೇಶ್ ಸ್ವೀಕಾರ್ ಕೆಲೊ ಆನಿ ಧಾ೦ವಾ ಧಾ೦ವಿ ವಚುನ್ ಮರಿಯೆಕ್, ಜುಜೆಕ್ ಆನಿ ಖಾ೦ವ್ಣೆ೦ತ್ ನಿದಾಯಿಲ್ಲ್ಯಾ ಬಾಳ್ಶಾಕ್ ತಾಣಿ೦ ದೆಕ್ಲೊ. (ಲೂಕ್. 2:16). ಉದೆ೦ತಿಚಾ ತೆಗಾ ರಾಯಾ೦ನಿ ಉದೆಲ್ಲೆ೦ "ನೆಕೆತ್ರ್ ಪಳೆವ್ನ್ ಸ೦ದೇಶ್ ಸ್ವೀಕಾರ್ ಕೆಲೊ. ನೆಕೆತ್ರ್ ಪಳೆವ್ನ್ ತೆ ಭೋವ್ ಚಡ್ ಸ೦ತೋಸ್ ಪಾವ್ಲೆ. ಥ೦ಯ್ ಘರಾ೦ತ್ ಭಿತರ್ ಸರುನ್ ತಾ೦ಣಿ೦ ಬಾಳ್ಶಾಕ್ ತಾಚೇ ಅವಯ್ ಮರಿಯೆ ಸಾ೦ಗಾತಾ ದೆಖ್ಲೆ೦ ಆನಿ ಸರ್ಪಡೊನ್ ತಾಕಾ ನಮಾಸ್ಕಾರ್ ಕೆಲೊ. ಉಪ್ರಾ೦ತ್ ಆಪ್ಲ್ಯಾ ದಿರ್ವ್ಯಾ೦ಚಿ ಚಿಲಾ೦ ಉಗ್ತಿ೦ ಕರ್ನ್ ತಾಣಿ೦ ತಾಕಾ ಅರ್ಪಿಲ್ಯೊ ಕಾಣಿಕೊ, ಭಾ೦ಗಾರ್, ಧು೦ಪ್ ಆನಿ ರಗ್ತಾಬೋಳ್" (ಮಾತೆವ್. 2:10-11)
ದೆವಾಚೊ ಸ೦ದೇಶ್ (ಬರಿ ಖಬರ್) ಸ್ವೀಕಾರ್ ಕರುನ್ ಜೆಜು ಬಾಳ್ಕಾಕ್ ಆಮ್ಚ್ಯಾ ಕಾಳ್ಜಾ೦ನಿ ಜಲ್ಮ್ ಘೆ೦ವ್ಕ್ ಆಮಿ ಜಾಗೊ ದಿತಾ೦ವ್‌ಗೀ? ವ ಆಮಿ ತಾಕಾ ಇನ್ಕಾರ್ ಕರ್ತಾ೦ವ್?......! ದೆವಾಚಾ ಉತ್ರಾ೦ಕ್ ಕಾನ್ ದಿತೆಲ್ಯಾ೦ಕ್ ಹಿ ಬರಿ ಖಬರ್, ಹೊ ಸ೦ದೇಶ್ ಸ೦ತೋಸ್ ದೀ೦ವ್ಕ್ ಸಕ್ತಾ. ಹಿ ಬರಿ ಖಬರ್ ಜಾ೦ವ್ಕ್ ಪುರೊ ದುಬ್ಳ್ಯಾ೦ಕ್, ಭುಕೆಲ್ಲ್ಯಾ೦ಕ್, ರಡ್ತೆಲ್ಯಾ೦ಕ್, ಪಾತ್ಕ್ಯಾ೦ಕ್, ಪಿಡೆಸ್ತಾ೦ಕ್, ದೆ೦ವ್ಚಾರಾಚಾ ಬ೦ದಡೆ೦ತ್ ಆಸ್‌ಲ್ಲ್ಯಾ೦ಕ್ ಯಾ ಭೊಗ್ಸಾಣೆಚೊ ಸ್ಪಿರಿತ್ ನಾತ್‌ಲ್ಲ್ಯಾ೦ಕ್. ಜೆಜು ಉಜ್ವಾಡಾಚಾ ರುಪಾರ್ ಹ್ಯಾ ಸ೦ಸಾರಾರ್ ಆಯಿಲ್ಲೊ. ಹಜಾರಾ೦ನಿ ಸಗ್ಳ್ಯಾ ಸ೦ಸಾರಾಚೊ ಲೋಕ್ ಜೆಜುಚಾ ಉತ್ರಾ೦ಚೊ ಹ್ಯಾ ಉಜ್ವಾಡಾಚೊ ಅನ್ಭೋಗ್ ಜೊಡ್ತಾತ್.
ಮೊಗಾಚಾ ಭಾವಾ೦ನೊ ಆನಿ ಭಯ್ಣಿ೦ನೊ, ಆಮ್ಚ್ಯಾ ಜಿವಿತಾಚಾ ಹರ್ಯೆಕಾ ಘಡಿಯೆ ಜೀವ್ ದಿ೦ವ್ಚೆ೦ ದೆವಾಚೆ೦ ಉತಾರ್ ಆಮ್ಚ್ಯಾ ಕಾಳ್ಜಾ೦ತ್ ಆಮಿ ಆಟ೦ವ್ಯಾ ಆನಿ ತೆ೦ಚ್ ಜಾ೦ವ್ದಿ ಆಮ್ಚೆ೦ ಆರಾಧನ್ ಆನಿ ಇನಾಮ್ ಆಮ್ಚ್ಯಾ ಜೆಜು ಬಾಳ್ಕಾಕ್, ರಾಯಾ೦ಚಾ ರಾಯಾಕ್.
