ಗ್ರೇಸ್ತ್ ತರ್ನಾಟೊ (ಸಾ೦.ಮಾರ್ಕ್ 10:17-27)
ಜೆಜು ಪರತ್ ವಾಟೇಕ್ ಲಾಗ್ಚ್ಯಾ ವೆಳಾರ್, ಏಕ್ ಮನಿಸ್ ತಾಚೇ ಸರ್ಶಿಂ ಧಾಂವುನ್ ಆಯ್ಲೊ ಆನಿ ತಾಚ್ಯಾ ಪಾಂಯಾಂ ಸರ್ಶಿಂ ದಿಂಬಿ ಘಾಲ್ನ್ ತಾಚೇಲಾಗಿಂ ವಿಚಾರುಂಕ್ ಲಾಗ್ಲೊ: "ಬರ್ಯಾ ಮೆಸ್ತ್ರಿ, ಸಾಸ್ಣಿಕ್ ಜಿವಿತ್ ಜೊಡುಂಕ್ ಹಾಂವೆಂ ಕಿತೆಂ ಕರಿಜಯ್?" ಜೆಜುನ್ ತಾಕಾ ಜಾಪ್ ದಿಲಿ: "ಮ್ಹಾಕಾ ಬರೊ ಕಿತ್ಯಾಕ್ ಮ್ಹಣ್ತಾಯ್? ಬರೊ ಮ್ಹಳ್ಳೊ ಎಕ್ಲೊಚ್, ದೇವ್! ಉಪದೆಸ್ ಖಂಯ್ಚೆ ತೆ ತುಂ ಜಾಣಾಂಯ್; ಜಿವೆಶಿಂ ಮಾರಿನಾಕಾ, ಪ್ರದ್ವಾರ್ ಕರಿನಾಕಾ, ಚೊರಿನಾಕಾ, ಫಟ್‌ಸಾಕ್ಸ್ ಸಾಂಗಿನಾಕಾ, ಲುಕ್ಸಾಣ್ ಕರಿನಾಕಾ, ತುಜ್ಯಾ ಅವಯ್‌ಬಾಪಾಯ್ಕ್ ಮಾನ್ ದೀ." ತೊ ಜಾಪ್ ದೀವ್ನ್ ಮ್ಹಣಾಲೊ: "ಮೆಸ್ತ್ರಿ, ಹೆಂ ಸಗ್ಳೆಂ ಮ್ಹಜ್ಯಾ ಭುರ್ಗೆಪಣಾರ್ ಥಾವ್ನ್‌ಚ್ ಹಾಂವ್ ಪಾಳ್ನ್ ಆಯ್ಲಾಂ." ತವಳ್ ಜೆಜುನ್ ತಾಚೆರ್ ಮೊಗಾನ್ ಘಾಲ್ಲಿ ದೀಷ್ಟ್ ಪಾಟಿಂ ಕಾಡಿನಾಸ್ತಾನಾ ಮ್ಹಳೆಂ: "ತುವೆಂ ಕರಿಜಯ್ ಜಾಲ್ಲೆಂ ಏಕ್ ಕಾಮ್ ಮಾತ್ರ್ ಬಾಕಿ ಆಸಾ. ವಚ್, ತುಜೆಂ ಕಿತೆಂ ಆಸಾ ತೆಂ ವೀಕ್ ಆನಿ ಮೆಳ್ಳಲೊ ದುಡು ದುರ್ಬಳ್ಯಾಂಕ್ ವಾಂಟುನ್ ದೀ, ಸರ್ಗಾರ್ ತುಕಾ ದಿರ್ವೆಂ ಆಸ್ತಲೆಂ; ಉಪ್ರಾಂತ್ ಯೆ ಆನಿ ಮ್ಹಜೊ ಪಾಟ್ಲಾವ್ ಕರ್." ಹೆಂ ಆಯ್ಕುನ್ ತಾಚೆಂ ತೊಂಡ್ ಬಾವ್ಲೆಂ ಆನಿ ಖಂತಿಷ್ಟ್ ಜಾವ್ನ್ ತೊ ಪಾಟಿಂ ಗೆಲೊ, ಕಿತ್ಯಾಕ್ ತಾಕಾ ಯಥೇಷ್ಟ್ ಆಸ್ತ್‌ಬದಿಕ್ ಆಸ್ಲೆಂ. ತವಳ್ ಆಪ್ಲೇ ಭೊಂವ್ತಣಿಂ ರಾವ್ಲಲ್ಯಾ ಶಿಸಾಂಚೆರ್ ದೀಷ್ಟ್ ಘುಂವ್ಡಾವ್ನ್ ಜೆಜು ಮ್ಹಣಾಲಾಗ್ಲೊ: "ಗ್ರೇಸ್ತಾಂಕ್ ದೆವಾಚ್ಯಾ ರಾಜ್ಯಾಂತ್ ರಿಗೊಂಕ್ ಕಿತ್ಲೆ ಕಷ್ಟ್ ಮಾರ್ತಲೆ!" ತಾಚಿಂ ಹಿಂ ಉತ್ರಾಂ ಆಯ್ಕುನ್ ಶಿಸ್ ಥಟಕ್ಕ್ ಜಾಲೆ! ಪುಣ್ ಜೆಜುನ್ ತಾಂಕಾಂ ಪರ್ತ್ಯಾನ್ ಸಾಂಗ್ಲೆಂ: "ಭುರ್ಗ್ಯಾನೊ, ದೆವಾಚ್ಯಾ ರಾಜ್ಯಾಂತ್ ರಿಗುಂಕ್ ಕಿತ್ಲೆ ಕಷ್ಟ್.
ಏಕ್ ಕರೆಂ ಪುಣ್‌ಯೀ ಸುವ್ಯೆಚ್ಯಾ ಬಿರ್ಡ್ಯಾಂತ್ಲ್ಯಾನ್ ಪಾಶಾರ್ ಜಾಯ್ತ್ ತರ್ ಯೀ, ಗ್ರೇಸ್ತ್ ಮನಿಸ್ ದೆವಾಚ್ಯಾ ರಾಜ್ಯಾಂತ್ ತಿತ್ಲೇ ಸಸಾರಾಯೆನ್ ರಿಗಸೊನಾ." ಹೆಂ ಆಯ್ಕುನ್ ತೆ ಆನಿಕ್‌ಯೀ ಚಡ್ ಆಜಾಪ್ ಜಾಲೆ ಆನಿ, "ತಶೆಂ ಜಾಲ್ಯಾರ್ ಕೊಣ್ ಬಚಾವ್ ಜಾಯ್ತ್?" ಮ್ಹಣ್ ಎಕಾಮೆಕಾಕ್ ತೆ ಮ್ಹಣಾಲೆ. ತವಳ್ ಜೆಜು ಆಪ್ಲಿ ದೀಷ್ಟ್ ತಾಂಚೆರ್ ಲಾವ್ನ್ ಮ್ಹಣಲೊ: "ಮನ್ಶಾಂಕ್ ತೆಂ ಅಸಾಧ್ಯ್ ವ್ಹಯ್, ಪುಣ್ ದೆವಾಕ್ ನ್ಹಯ್, ದೆವಾಕ್ ಸರ್ವ್ ಸಂಗ್ತಿ ಸಾಧ್ಯ್...ದೆವಾಚೆಂ ಉತಾರ್ ಹೆಂ..