ಜೆಜು ಬಾರಾ ಜಾಣಾಂಕ್ ವಿಂಚುನ್ ಕಾಡ್ತಾ
(ಮಾರ್ಕ್ 3:13-19; ಲೂಕ್ 6:14-16)
10 1 ಉಪ್ರಾಂತ್ ಜೆಜುನ್ ಆಪ್ಲ್ಯಾ ಬಾರಾ ಶಿಸಾಂಕ್ ಲಾಗಿಂ ಆಪಯ್ಲೆ ಆನಿ ದೆಂವ್ಚಾರ್ ಧಾಂವ್ಡಾಂವ್ಚೊ ಆನಿ ಸರ್ವ್ ರೋಗ್ ಆನಿ ಪಿಡಾಶಿಡಾ ಗೂಣ್ ಕರ್ಚೊ ಅಧಿಕಾರ್ ತಾಂಕಾಂ ದಿಲೊ. 2 ತ್ಯಾಅ ಬಾರಾ ಧರ್ಮ್ ದುತಾಂಚಿಂ ನಾಂವಾಂ ಹಿಂ: ಪಯ್ಲೊ ಸಿಮಾಂವ್ ಜಾಕಾ ಪೆದ್ರು ಮ್ಹಣ್ ಆಪಯ್ತಾತ್ ಆನಿ ತಾಚೊ ಭಾವ್, ಆಂದ್ರೆ. 3 ಜೆಬೆದೆವಾಚೆ ಪೂತ್, ಜಾಕೊಬ್ ಆನಿ ಜುವಾಂವ್; ಫಿಲಿಪ್ ಆನಿ ಬಾರ್ತೊಲೊಮೆವ್; ತೊಮಾಸ್ ಆನಿ ಸುಂಕಾಗಾರ್ ಮಾತೆವ್; ಆಲ್ಫೆವಾಚೊ ಪೂತ್ ಜಾಕೊಬ್ ಆನಿ ಥಾದ್ದೇವ್, 4 ದೇಶ್ ಭಕ್ತ್ ಸಿಮಾಂವ್ ಆನಿ ಜೆಜುಕ್ ಘಾತಾನ್ ಪರಾಧೀನ್ ಕೆಲ್ಲೊ ಇಸ್ಕಾರಿಯೋತ್ ಜುದಾಸ್.
ಬಾರಾ ಜಾಣಾಂಚೆಂ ಮಿಸಾಂವ್
(ಮಾರ್ಕ್ 6:7-11; ಲೂಕ್ 9:2-5, 10:3-120)
5 ಹ್ಯಾ ಬಾರಾ ಜಾಣಾಂಕ್ ಜೆಜುನ್ ಅಶೆ ರ್ದೇಶ್ ದೀವ್ನ್ ಧಾಡ್ಲೆ: " ಅನ್ಯ ಜಾತಿಂಚ್ಯಾ ಗಾಂವಾಂಕ್ ವ್ಹರ್ತಾತ್ ತ್ಯೊ ವಾಟೋ ಧರಿನಾಕಾತ್ ಆನಿ ಸಾಮಾರಿಯಾಗಾರಾಂಚ್ಯಾ ಶಹರಾಂನಿ ಪ್ರವೇಸ್ ಜಾಯ್ನಾಕಾತ್. 6 ಬಗರ್ ಇಸ್ರಾಯೆಲ್ ಕುಳಿಯೆಚ್ಯಾ ಚುಕೊನ್ ಗೆಲ್ಲ್ಯಾ ಬಕ್ರ್ಯಾಂ ಮಧೆಂ ವಚಾ. 7 ವೆತಾನಾ ’ಸರ್ಗಿಂಚೆಂ ರಾಜ್ಯ್ ಲಾಗಿಂ ಪಾವ್ಲಾಂ’ ಮ್ಹಳ್ಳೊ ಸಂದೇಶ್ ಪಾಚಾರಿತ್ ವಚಾ.8 ಪಿಡೆಸ್ತಾಂಕ್ ಗೂಣ್ ಕರಾ, ಮೆಲ್ಲ್ಯಾಂಕ್ ಜೀವ್ ಕರಾ, ಕೊಡ್ಕಾರಾಂಕ್ ನಿತಳ್ ಕರಾ, ದೆಂವ್ಚಾರ್ ಧಾಂವ್ಡಾಯಾ, ಫುಂಕ್ಯಾಕ್ ತುಮ್ಕಾಂ ಮೆಳ್ಳಾಂ, ಫುಂಕ್ಯಾಕ್ ತುಮಿ ದಿಯಾ. 9 ಭಾಂಗಾರ್, ರುಪೆಂ ವಾ ತಾಂಬೆಂ ಲೆಗುನ್ ತುಮ್ಚೇ ಪೊತಿಯೆಂತ್ ದವರಿನಾಕಾತ್. 10 ಪಯ್ಣಾಕ್ ಭುತಿ ಜಾಂವ್, ಬದ್ಲುಂಕ್ ದಗ್ಲೊ ಜಾಂವ್, ಪಾಂಯಾಂಕ್ ವ್ಹಣೊ ವಾ ಹಾತಾಂತ್ ದಾಂಡೊ ಜಾಂವ್ ಘೆನಾಕಾತ್; ಕಿತ್ಯಾಕ್ ವಾವ್ರಾಡ್ಯಾಕ್ ಆಪ್ಲಿ ಪೋಡ್ ಫಾವೊ.
11 " ಖಂಯ್ಚ್ಯಾಯೀ ಶಹರಾಂತ್ ವಾ ಹಳ್ಳೆಂತ್ ತುಮಿ ರಿಗ್ತಚ್ ಥಂಯ್ ಖುಶೇನ್ ತುಮ್ಕಾಂ ಸ್ವಾಗತ್ ದೀತ್ ತಸಲೊ ಮನಿಸ್ ಕೊಣ್ ಮ್ಹಣ್ ಸಮ್ಜುನ್ ಘೆಯಾ ಆನಿ ಥಂಯ್ಚೊ ಭಾಯ್ರ್ ಸರ್ನ್ ವಚಸರ್ ತಾಂಗೆರ್ ಚ್ ರಾವಾ. 12 ತ್ಯಾ ಘರಾಂತ್ ತುಮಿ ಭಿತರ್ ಸರ್ತಾನಾ ’ಸಮಾಧಾನ್ ಹ್ಯಾ ಘರಾಕ್’ ಮ್ಹಣುನ್ ವಂದನ್ ಕರಾ. 13 ತ್ಯಾ ಘರ್ಚಿಂ ತುಮ್ಕಾಂ ಸ್ವಾಗತ್ ದಿತಿತ್ ಜಾಲ್ಯಾರ್, ತುಮಿ ಮಾಗ್ಲಲೆಂ ಸಮಾಧಾನ್ ತಾಂಚೇ ಸವೆಂ ರಾವುಂ; ಪುಣ್ ತೆ ತುಮ್ಕಾಂ ಸ್ವಾಗತ್ ದಿನಾತ್ ಜಾಲ್ಯಾರ್, ತುಮ್ಚೆಂ ಸಮಧಾನ್ ತುಮ್ಕಾಂಚ್ ಪಾಟಿಂ ಯೇಂವ್. 14 ಕೋಣ್ ಯೀ ತುಮ್ಕಾಂ ಘೆನಾ ಜಾಯ್ತ್ ಜಾಲ್ಯಾರ್ ವಾ ತುಮ್ಚಿ ಶಿಕೊವ್ಣ್ ಆಯ್ಕಾನಾ ಜಾಯ್ತ್ ಜಾಲ್ಯಾರ್, ತ್ಯಾ ಘರಾಂತ್ಲೆ ಆನಿ ಶಹರಾಂತ್ಲೆ ಪಾಂಯಾಂಚಿ ಧುಳ್ ಫಾಪುಡ್ನ್ ಭಾಯ್ರ್ ಚಲ 15 ಸತ್ ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಝುಡ್ತೆಚ್ಯಾ ದಿಸಾ ಸೊದೊಮ್ ಆನಿ ಗೊಮೊರಾಗಾರಾಂಕ್ ಮೆಳತ್ ತಿ ಕಾಕುಳ್ತ್ ತ್ಯಾ ಶಹರಾಚ್ಯಾ ಲೊಕಾಕ್ ಮೆಳ್ಚಿನಾ."
ಯೆಂವ್ಚ್ಯೊ ಆಸಾತ್ ತ್ಯೊ ದಗ್ದಣ್ಯೊ
(ಮಾರ್ಕ್ 13:9-13; ಲೂಕ್ 12:12-19)
16 " ಪಳೆಯಾ, ಹಾಂವ್ ತುಮ್ಕಾಂ ವಾಗ್ಟಾಂ ಮಧೆಂ ಬಕ್ರೆ ಕಶೆ ಧಾಡ್ತಾಂ. ದೆಕುನ್ ಸರ್ಪಾಂಬರಿ ಚತುರ್ ಆನಿ ಪರ್ವ್ಯಾಂಬರಿ ಸಾಧೆಭೊಳೆ ಜಾಯಾ. 17 ಮನ್ಶಾಂಲಾಗಿಂ ಚತ್ರಾಯೆನ್ ಚಲಾ, ಕಿತ್ಯಾಕ್ ತೆ ತುಮ್ಕಾಂ ಜೆರ್ಬಾಂದ್ ಮಾರ್ತಲೆ. 18 ಮ್ಹಜೇ ಪಾಸತ್ ತುಮ್ಕಾಂ ರಾಯಾಂ ಆನಿ ಅಧಿಪತಿಂ ಮುಖಾರ್ ಝುಡ್ತೆಕ್ ರಾವಯ್ತಲೆ. ಪುಣ್ ತಾಂಕಾಂ ಆನಿ ಹೆರ್ ಜಾತಿಂಚ್ಯಾಂಕ್ ಯೀ ತುಮಿ ಸಾಕ್ಷಿ ಜಾತಲ್ಯಾತ್. 19 ತುಮ್ಚಿ ಝಡ್ತಿ ಜಾಂವ್ಚ್ಯಾ ವಳಾರ್ ಕಶೆಂ ಆನಿ ಕಿತೆಂ ಉಲೊಂವ್ಚೆಂ ಮ್ಹಣ್ ಚಿಂತಾ ಕರಿನಾಕಾತ್; ಕಿತೆಂ ಉಲೊಂವ್ಚೆಂ ಮ್ಹಣ್ ತೇ ಘಡಿಯೇ ತುಮ್ಕಾಂ ಕಳಿತ್ ಜಾತಲೆಂ. 20 ಕಿತ್ಯಾಕ್ ಉಲಯ್ತಲೆ ತೆ ತುಮಿ ನ್ಹಯ್ ಬಗರ್ ತುಮ್ಚ್ಯಾ ಬಾಪಾಚೊ ಪ್ರೇರಕ್ ಅತ್ಮೊಚ್ ತುಮ್ಚೇ ಉದೆಶಿಂ ಉಲಯ್ತಲೊ."
21 " ಭಾವ್ ಭಾವಾಕ್, ಆನಿ ಬಾಪುಯ್ ಆಪ್ಲ್ಯಾ ಭುರ್ಗ್ಯಾಂಕ್ ಜಿವೆಶಿಂ ಮಾರ್ಚ್ಯಾಕ್ ಧರ್ನ್ ದಿತಲೊ. ಭುರ್ಗಿಂ ಆಪ್ಲ್ಯಾ ಮಾಯ್ ಬಾಪಾಚೆರ್ ಉಪ್ರಟ್ತಲಿಂ ಆನಿ ತಾಂಚೊ ಜೀವ್ ಕಾಡಯ್ತಲಿಂ. 22 ಆನಿ ತುಮಿ ಮ್ಹಜೆ ಪಾಟ್ಲಾವ್ದಾರ್ ಮ್ಹಳ್ಳೆ ಖಾತಿರ್ ಸಮೆಸ್ತ್ ತುಮ್ಚೊ ದ್ವೇಷ್ ಕರ್ತಲೆ.ಪುಣ್ ಶೆವೊಟ್ ಪರ್ಯಾನ್ ಥಿರ್ ರಾವ್ತಾ ತೊ ಬಚಾವ್ ಜಾತಲೊ. 23 ಏಕ್ ಶಹರಾಂತ್ ತುಮ್ಕಾಂ ದಗ್ಧಿತಾನಾ, ಆನ್ಯೇಕ್ ಶಹರಾಕ್ ಪೋಳ್ನ್ ವಚಾ. ಖರೆಂಚ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಮನ್ಶಾಪೂತ್ ಯೆಂವ್ಚೇ ಆದಿಂ ಇಸ್ರಾಯೆಲಾಚಿಂ ಶಹರಾಂ ತುಮಿ ಭೊಂವುನ್ ಕಾಬಾರ್ ಕರ್ಚೆನಾತ್."
24 " ಮೆಸ್ತ್ರಿ ಪ್ರಾಸ್ ಶಿಸ್ ವರ್ತೊ ನ್ಹಯ್, ಆನಿ ಧನಿಯಾ ಪ್ರಾಸ್ ಚಾಕರ್ ವರ್ತೊ ನ್ಹಯ್. 25 " ಶಿಸ್ ಆಪ್ಲ್ಯಾ ಮೆಸ್ತ್ರಿ ಸಾರ್ಕೊ ಆನಿ ಚಾಕರ್ ಆಪ್ಲ್ಯಾ ಧನಿಯಾ ಸಾರ್ಕೊ ಜಾಲ್ಯಾರ್ ಪುರೊ! ಘರ್ಚ್ಯಾ ಯಜ್ಮಾನ್ಯಾಕ್ ಚ್ ಬೆಎಲ್ಜೆಬುಲ್ ಮ್ಹಳ್ಳೆಂ ಜಾಲ್ಯಾರ್ ತಾಚ್ಯಾ ಘರ್ಚ್ಯಾಂಕ್ ಆನಿಕ್ ಕಿತೆಂ ಮ್ಹಣ್ಚೆನಾತ್!"
ಕೊಣಾಕ್ ಭಿಯೆಜಯ್ ?
(ಲೂಕ್ 12:2-9)
26 " ದೆಕುನ್ ಮನ್ಶಾಂಕ್ ಭಿಯೆನಾಕಾತ್. ಧಾಂಪುನ್ ಆಸಾ ತೆಂ ಸಕ್ಕಡ್ ಉಗ್ತೆಂ ಜಾತಲೆಂ ಆನಿ ಗುಪಿತ್ ಆಸಾ ತೆಂ ಸಕ್ಕಡ್ ಪರ್ಗಟ್ ಜಾತಲೆಂ. 27 ಹಾಂವ್ ತುಮ್ಕಾಂ ಕಿತೆಂ ಕಾಳೊಕಾಂತ್ ಸಾಂಗ್ತಾಂ ತೆಂ ತುಮಿ ಉಜ್ವಾಡಾಂತ್ ಸಾಂಗಾ, ಆನಿ ತುಮ್ಕಾಂ ಗುಟಾನ್ ಸಾಂಗ್ಲಾಂ ತೆಂ ತುಮಿ ಪಾಕ್ಯಾರ್ ಥಾವ್ನ್ ಗಾಜಯಾ. 28 ಕುಡಿಚೊ ಜೀವ್ ಕಾಡ್ತಲ್ಯಾಂಕ್ ಭಿಯೆನಾಕಾತ್, ಕಿತ್ಯಾಕ್ ತೆ ಅತ್ಮ್ಯಾಚೊ ಜೀವ್ ಕಾಡುಂಕ್ ಸಕ್ಚೆನಾತ್. ಬಗರ್ ಕೂಡ್ ಆನಿ ಅತ್ಮೊ ದೊನ್ ಯೀ ಯಮ್ಕೊಂಡಾಂತ್ ನಾಸ್ ಕರುಂಕ್ ಸಕ್ತಲ್ಯಾಕ್ ಭಿಯೆಯಾ. 29 ಗಿರ್ಬುಜ್ಯೊ ಪೈಶಾಕ್ ದೋನ್ ವಿಕ್ತಾತ್ ನ್ಹಯ್? ತರಿಪುಣ್ ತಾಂಚೇ ಭಿತರ್ ಎಕ್ ಚ್ ಏಕ್ ತುಮ್ಚ್ಯಾ ಬಾಪಾಚೇ ಕಬ್ಲಾತೇವಿಣೆಂ ಭುಂಯ್ ಪಡನಾ. 30 ತಿತ್ಲೆಂಚ್ ವೇ? ತುಮ್ಚ್ಯಾ ಮಾತ್ಯಾಚೆ ಕೇಸ್ ಲೆಗುನ್ ಸಕ್ಕಡ್ ಮೆಜುನ್ ದವರ್ಲ್ಯಾತ್. 31 ದೆಕುನ್ ತುಮಿ ಭಿಯೆನಾಕಾತ್; ಜಾಯ್ತ್ಯಾ ಗಿರ್ಬುಜ್ಯಾಂ ಪ್ರಾಸ್ ಕಿತ್ಲ್ಯಾಕ್ ಯೀ ಚಡ್ ಮೊಲಾಚೆ ತುಮಿ!"
ಕ್ರಿಸ್ತಾಕ್ ಉಗ್ತ್ಯಾನ್ ಮಾನುನ್ ಘೆವ್ಚೊ
(ಲೂಕ್ 12:8-9)
32 " ದೆಕುನ್ ಮನ್ಶಾಂ ಹುಜಿರ್ ಜೊ ಕೊಣ್ ಆಪುಣ್ ಮ್ಹಜೊ ಪಾಟ್ಲಾವ್ದಾರ್ ಮ್ಹಣುನ್ ಪರ್ಗಟ್ತಾ, ತಾಕಾ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾ ಹುಜಿರ್ ಮ್ಹಜೊ ಮ್ಹಣುನ್ ಹಾಂವ್ ಪರ್ಗಟ್ತಲೊಂ. 33 ಪುಣ್ ಮನ್ಶಾಂ ಹುಜಿರ್ ಜೊ ಕೊಣ್ ಮ್ಹಾಕಾ ನಾಕಾರ್ತಾ ,ತಾಕಾ ಸರ್ಗಿಂಚ್ಯಾ ಮ್ಹಜ್ಯಾ ಬಾಪಾ ಹುಜಿರ್ ಹಾಂವ್ ಯೀ ನಾಕಾರ್ತಲೊಂ."
ಸಮಾಧಾನ್ ನ್ಹಯ್, ಬಗರ್ ತಲ್ವಾರ್
(ಲೂಕ್ 12:51-53)
34 " ಹಾಂವ್ ಸಂಸಾರಾರ್ ಸಮಧಾನ್ ಹಾಡುಂಕ್ ಆಯ್ಲಾಂ ಮ್ಹಣ್ ಚಿಂತಿನಾಕಾತ್; ಸಮಾಧಾನ್ ನ್ಹಯ್, ಬಗರ್ ತಲ್ವಾರ್ ಹಾಡುಂಕ್ ಆಯ್ಲಾಂ. 35 ಪುತಾಕ್ ಆಪ್ಲ್ಯಾ ಬಾಪಾಯ್ಚೆರ್, ಧುವೆಕ್ ಆಪ್ಲೇ ಆವಯ್ಚೆರ್, ಸುನೆಕ್ ಆಪ್ಲೇ ಮಾಯ್ಚೆರ್ ವಿರೋಧ್ ಕರುಂಕ್ ಮ್ಹಣ್ ಹಾಂವ್ ಆಯ್ಲಾಂ. 36 ಅಶೆಂ ಎಕ್ಲ್ಯಾಕ್ ಆಪ್ಲ್ಯಾ ಘರ್ಚೆಚ್ ಮನಿಸ್ ದುಸ್ಮಾನ್ ಜಾಂವ್ಕ್ ಪಾವ್ತಲೆ."
ಜೆಜುಚೊ ಪಾಟ್ಲಾವ್ ಕರುಂಕ್ ಸ್ವತ್ಯಾಗ್
(ಮಾರ್ಕ್ 8:34-35; ಲೂಕ್ 14:26-27 , 9:23-24)
37 ‘ ಮ್ಹಜೇ ವರ್ನ್ ಚಡ್ ಆಪ್ಲ್ಯಾ ಬಾಪಾಯ್ಚೊ ವಾ ಆವಯ್ಚೊ ಮೋಗ್ ಕರ್ತಾ ತೊ ಮ್ಹಜೊ ಶಿಸ್ ಜಾಂವ್ಕ್ ಯೋಗ್ಯ್ ನ್ಹಯ್; ಮ್ಹಜೇ ವರ್ನ್ ಚಡ್ ಆಪ್ಲ್ಯಾ ಪುತಾಚೊ ವಾ ಧುವೆಚೊ ಮೋಗ್ ಕರ್ತಾ ತೊ ಮ್ಹಜೊ ಶಿಸ್ ಜಾಂವ್ಕ್ ಯೋಗ್ಯ್ ನ್ಹಯ್. 38 ಆಪ್ಲೊ ಖುರಿಸ್ ಘೆವ್ನ್ ಮ್ಹಜ್ಯಾ ಮೆಟಾಂನಿ ಚಲನಾ ತೊ ಮ್ಹಜೊ ಶಿಸ್ ಜಾಂವ್ಕ್ ಯೋಗ್ಯ್ ನ್ಹಯ್. 39 ಆಪ್ಲೊ ಜೀವ್ ವಾಂಚೊಂವ್ಕ್ ಸೊಧ್ತಾ ತೊ ಆಪ್ಲೊ ಜೀವ್ ಹೊಗ್ಡಾಯ್ತಾ; ಆನಿ ಮ್ಹಜೇ ಪಾಸತ್ ಆಪ್ಲೊ ಜೀವ್ ಹೊಗ್ಡಾಯ್ತಾ ತೊ ಆಪ್ಲೊ ಜೀವ್ ವಾಟಾಯ್ತಾ."
ಪ್ರತಿಫಳ್
(ಮಾರ್ಕ್ 9:37-41; ಲೂಕ್ 9:48,10:16; ಜುವಾಂವ್ 13:20)
40 " ತುಮ್ಕಾಂ ಸ್ವಾಗತ್ ದಿತಾ ತೊ ಮ್ಹಕಾ ಸ್ವಾಗತ್ ದಿತಾ, ಆನಿ ಮ್ಹಾಕಾ ಸ್ವಾಗತ್ ದಿತಾ ತೊ ಮ್ಹಾಕಾ ಧಾಡ್ಲಲ್ಯಾಕ್ ಸ್ವಾಗತ್ ದಿತಾ .41 ಪ್ರವಾದ್ಯಾಕ್,ತೊ ಪ್ರವಾದಿ ದೆಕುನ್ ಸ್ವಾಗತ್ ದಿತಾ ತಾಕಾ, ಪ್ರವಾದ್ಯಾಚೊ ಪ್ರತಿಫಳ್ ಮೆಳ್ತಲೊ; ಆನಿ ನಿತಿವಂತಾಚೊ ಪ್ರತಿಫಳ್ ಲಭ್ತಾಲೊ. 42 ಆನಿ ಜೊ ಕೊಣ್ ಮ್ಹಜ್ಯಾ ಅತೀ ಲ್ಹಾನಾಂತ್ಲ್ಯಾಎಕ್ಲ್ಯಾಕ್, ತೊ ಮ್ಹಜೊ ಪಾಟ್ಲಾವ್ದಾರ್ ದೆಕುನ್, ಏಕ್ ಕೊಪ್ ಶೆಳೆಂ ಉದಕ್ ಲೆಗುನ್ ದಿತಾ ಸತ್ ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ, ತಾಚೊ ಪ್ರತೆಫಳ್ ತಾಕಾ ಚುಕಾಸೊನಾ."