"ತುಮ್ಕಾ೦ಚ್ ತುಮಿ ಫಟಯ್ನಾಕಾತ್; ದೆವಾಲಾಗಿ೦ ಖೆಳೊ೦ಕ್ ಜಾಯ್ನಾ. ಮನಿಸ್ ಒ೦ಪ್ತಾ ತೆ೦ಚ್ ತೊ ಲು೦ವ್ತಲೊ. ಜೊ ಕೋಣ್ ಆಪ್ಲೆ ಕುಡಿ೦ತ್ ಒ೦ಪ್ತಾ ತೊ ಕುಡಿ ಥಾವ್ನ್ ಕುಸಡಾಯೆಚೆ೦ ಪೀಕ್ ಲು೦ವ್ತಲೊ. ಪೂಣ್ ಜೊ ಕೋಣ್ ಅಪ್ಲ್ಯಾ ಆತ್ಮ್ಯಾ೦ತ್ ಒ೦ಪ್ತಾ ತೊ ಸಾಸ್ಣಾಚ್ಯಾ ಜೀವಿತಾಚೆ೦ ಪೀಕ್ ಲು೦ವ್ತಲೊ" (ಗಾಲಾತ್‌ಗಾರಾ೦ಕ್. 6:7-8) ಅಶೆ೦ ಸಾ೦ಗ್‌ಲ್ಲೆ೦ ತುಮಿ ಆಯ್ಕಲಾ೦ ಜಶೆ೦ ಒ೦ಪ್ತಾಯ್ ತಶೆ೦ ಲು೦ವ್ತಾಯ್ ಜೆ೦ ಆಮಿ ಹೆರಾ೦ಕ್ ಕರ್ತಾ೦ವ್, ತೆ೦ಚ್ ಆಮ್ಕಾ೦ಯೀ ಮೆಳ್ತಾ ಮ್ಹಳ್ಳೇ೦ ಸತ್ ಆಮಿ ಸರ್ವ್ ಜಣಾ೦ವ್. ಆಮಿ ದುಸ್ರ್ಯಾ೦ಕ್ ಬರೆ೦ ಕರ್ತಾ೦ವ್ ತರ್, ಆಮ್ಕಾ೦ಯೀ ದುಸ್ರ್ಯಾ೦ ಥಾವ್ನ್ ಬರೆ೦ಚ್ ಮೆಳ್ತಾ. ಹೆರಾ೦ಕ್ ಆಮಿ ವಾಯ್ಟ್ ಕೆಲ್ಯಾರ್, ಆಮ್ಕಾ೦ಯೀ ಹೆರಾ೦ ಥಾವ್ನ್ ವಾಯ್ಟ್‌ಚ್ಚ್ ಲಾಬ್ತಾ. ಜೆಜು ಆಮ್ಕಾ೦ ಸಾ೦ಗ್ತಾ "ಹೆರಾ೦ಕ್ ದಿಯಾ, ಆನಿ ತುಮ್ಕಾ೦ಯೀ ದಿತೆಲೆ, ಭರ್ತ್ಯಾಕ ಮಾಪಾನ್, ದಾ೦ಬೂನ್, ಹಾಲೊವ್ನ್ ಆನಿ ಭರೊನ್ ವೊಮ್ತಶೆ೦ ಮೆಜುನ್ ತುಮ್ಚ್ಯಾ ಲೆಸಾ೦ತ್ ಘಾಲ್ತಲೆ. ಜ್ಯಾ ಮಾಪಾನ್ ತುಮಿ ಮೆಜುನ್ ದಿತಾತ್, ತ್ಯಾಚ್ಚ್ ಮಾಪಾನ್ ತುಮ್ಕಾ೦ಯೀ ಪಾಟಿ೦ ಮೆಜುನ್ ದಿತಲೆ" (ಲೂಕ್. 6:38) ದೆಕುನ್, ಜಿತ್ಲೆ೦ ಬೊರೆ೦ ಆಮಿ ಹೆರಾ೦ಕ್ ದಿತಾ೦ವ್, ತಿತ್ಲೆ೦ ಬೊರೆ೦ ದೇವ್ ಆಮ್ಕಾ೦ ಪಾಟಿ೦ ದಿತಾ.
'ಜನತಾ ಸೇವೆಯೇ ಜನಾರ್ದನಾ ಸೇವೆ' ಮ್ಹಳ್ಳಿ ಸಾ೦ಗ್ಣಿ ಅಸಾ. ಆಮಿ೦ ಆಮ್ಚ್ಯಾ ಭಾವಾ ಭಯ್ಣಿ೦ಚಿ ಸೆವಾ ಕರ್ತಾನಾ, ದೆವಾಚಿಚ್ಚ್ ಸೆವಾ ಕರ್ತಾ೦ವ್. ಜೆಜು ಆಮ್ಕಾ೦ ಸಾ೦ಗ್ತಾ "ಜೆ೦ ಕಿತೆ೦ ತುಮಿ ಹ್ಯಾ ಮ್ಹಜಾ ಆತೀ ಲ್ಹಾನಾ೦ ಭಾವಾ೦ ಮದ್ಲ್ಯಾ ಎಕ್ಲ್ಯಾಕ್ ಕೆಲೆ೦, ತೆ೦ ಮ್ಹಾಕಾಚ್ಚ್ ತುಮಿ ಕೆಲೆ೦" (ಮಾತೆವ್. 25:40) ತೆ೦ಚ್ ಮದರ್ ತೆರೆಜಾನ್ ಕೆಲಾ೦, ಕೊಡ್ಕಾರಾ೦ಚಿ ಸೆವಾ, ದುಬ್ಳ್ಯಾ ದಾಕ್ಟ್ಯಾ೦ಚಿ ಸೆವಾ ತಿಣೆ೦ ಕರ್ನ್ ಹೆರಾ೦ ಥ೦ಯ್ ಜೆಜುಕ್ ತಿಣೆ೦ ಪಳೆಲಾ೦. ಸಗ್ಳಿ ತಿಚಿ ಜಿಣಿ೦ ತಿ ಹೆರಾ೦ ಖಾತಿರ್ ಜಿಯೆಲಿ ದೆಕುನ್ ತಿಚೆ೦ ನಾ೦ವ್ ಅಮರ್ ಉರ್ಲಾ೦, ದೆವಾಚಿ ಆಶಿರ್ವಾದಾ೦ ತಿಣೆ೦ ಜೊಡ್ಲ್ಯಾ೦ತ್. "ದೆಕುನ್ ಲೊಕಾಕ್ ಮಾನ್ವೊ೦ಚೆ ಖಾತಿರ್, ದೊಳ್ಯಾ೦ಚೆ ದೆಕಿಕ್ ಮಾತ್ರ್ ಕರ್ಚೆ ತಸಲಿ ಚಾಕ್ರಿ ತುಮಿ ಕರಿನಾಕಾತ್; ಬಗಾರ್ ಕ್ರೀಸ್ತಾಚಾ ಗುಲಾಮಾ೦ ಬರಿ ದೆವಾಚಿ ಖುಶಿ ಸಗ್ಳ್ಯಾ ಮ್ಹನಾನ್ ತುಮಿ ಕರಾ, ತುಮಿ ಸೊಮ್ಯಾಚಿಚ್ಚ್ ಸೆವಾ ಕರ್ತಾತ್ ಮ್ಹಣ್ ಲೆಖುನ್, ಹಾಸ್ತ್ಯಾ ಮುಖಾನ್ ತುಮಿ ಕಾಮ್ ಕರಾ. ಹಿ ಮ್ಹನ್ಯಾಚಿ ಸೆವಾ ಮ್ಹಣ್ ತುಮಿ ಬಿಲ್ಕುಲ್ ಲೆಖ್ಚೆ೦ ನಾಕಾ" (ಎಫೆಜ್‌ಗಾರಾ೦ಕ್. 6:6-7)
ಜರ್, ದೆವಾಚೆ೦ ಆಮಿ ದೆವಾಕ್ ದಿತಾ೦ವ್, ದೆವಾಚೊ ಬರ್ಪೂರ್ ಆಶಿರ್ವಾದ್ ಆಮಿ ಜೊಡ್ತಾ೦ವ್. ಸರ್ವೆಸ್ಪರ್ ದೇವ್ ಮ್ಹಣ್ತಾ "ಮ್ಹಜಾ ಮ೦ದಿರಾ೦ತ್ ಖಾಣ್ ಆಸ್ಚೆ ಖಾತಿರ್, ತುಮ್ಚೆ೦ ಪುರ್ತೊ ದಶಮಾ೦ಶ್ ಭ೦ಡಾರಾಕ್ ಹಾಡಾ; ಹೆ ಪರಿ೦ ಆತಾ೦ ಮ್ಹಜಿ ಪರೀಕ್ಷಾ ಕರಾ; ಹಾ೦ವ್ ತುಮ್ಚೆ೦ ಪಾಸತ್, ಮಳ್ಬಾಚೆ೦ ದಾರಾ೦ ಉಗ್ಡುನ್ ತುಮ್ಚೆರ್ ಬರ್ಪೂರ್ ಆಶಿರ್ವಾದ್ ವತ್ತಲೊ೦ ಕಿ ನಾ೦ ಪಳೆಯಾ" (ಮಾಲಾಕಿ. 3:10) ದೆಕುನ್ ದೆವಾ ಥಾವ್ನ್ ಬರ್ಪೂರ್ ಆಶಿರ್ವಾದ್ ಜೊಡು೦ಕ್, ಆಮಿ ಆಮ್ಚ್ಯಾ೦ ಸಾ೦ಬಾಳಾ೦ತ್ಲೊ, ವೆಳಾ೦ತ್ಲೊ, ದೆಣ್ಯಾ೦ತ್ಲೊ, ಸಮ್ಜೊಣೆ೦ತ್ಲೊ ಆನಿ ಸರ್ವ್ ಥರಾ೦ಚಾ ಫಳಾ೦ತ್ಲೊ ದಶಮಾ೦ಶ್ ದೆವಾಕ್ ದಿಜೈ.
ಆನಿ ಜರ್ ತರ್ ಆಮಿ೦ ಆಮ್ಚೆ೦ ಬರೆ೦ಪಣ್ ದಾಕ೦ವ್ಚ್ಯಾ ಬದ್ಲಾಕ್, ವಾಯ್ಟ್ ಆಧಾರ್ತಾ೦ವ್ ತರ್, ಆಮ್ಕಾ೦ ವಾಯ್ಟ್‌ಚ್ಚ್ ಘಡ್ತೆಲೆ೦. "ಜೊ ಕೋಣ್ ತಲ್ವಾರ್ ಘೆತಾತ್, ತೆ ತಲ್ವಾರಿನ್ ನಾಸ್ ಜಾತೆಲೆ ಮ್ಹಣ್ತಾ ಜೆಜು. (ಮಾತೆವ್. 26:52) ಜಾಕಾ ತಲ್ವಾರಿನ್ ಮರು೦ಕ್ ನಿರ್ಮಿಲಾ೦, ತಾಕಾ ತಲ್ವಾರಿನ್ ಮರು೦ಕ್ ಆಸ್ತೆಲೆ೦" (ಉಗ್ಡಾಪಣ್. 13:10) "ಜೊ ಕೋಣ್ ಎಕಾ ಮನ್ಶಾಚೆ೦ ರಗಾತ್ ವಾರಯ್ತಾ, ತಾಚೆ೦ಯ್ ರಗಾತ್ ವಾರಯ್ತಾಲೆ" (ಉತ್ಪತ್ತಿ. 9:6) "ಜೆ೦ ತುವೆ೦ ಕೆಲಾ೦ಯ್, ತೆ೦ ತುಕಾಯ್ ಕರ್ತೆಲೆ, ತುಜಿ೦ ಕರ್ತುವಾ೦ ತುಜಾ ಮಾತ್ಯಾರ್ ಪಡ್ತಾಲಿ೦" (ಒಬದೀಯಾ. 1:15) ದೆಕುನ್ "ಜ್ಯಾ ಮಾಪಾನ್ ಆಮಿ ದಿತಾ೦ವ್, ತ್ಯಾ ಮಾಪಾನ್ ಆಮಿ ಘೆತಾ೦ವ್" (ಲೂಕ್. 6:38b)
ತರ್, ಹ್ಯಾ ಸ೦ಸಾರಾ೦ತ್ ಆಮಿ ಜಿಯೆತಾ ಪರ್ಯಾ೦ತ್, ಜರ್ ತುಮಿ ತರ್ನಟಿ೦ ಪ್ರಾಯ್ವ೦ತಾಕ್ ಮರ್ಯಾದ್ ದಿಯಾ, ಜರ್ ತುಮಿ ಬಳ್ವ೦ತ್ ತರ್ ಅಸ್ಕತ್ಯಾ೦ಕ್ ಆಧಾರ್ ದಿಯಾ, ತುಮ್ಕಾ೦ ವಾಯ್ಟ್ ಕೆಲ್ಲ್ಯಾ೦ಕ್ ಭೊಗ್ಸಿಯಾ, ಕಿತ್ಯಾಕ್ ಏಕ್ ದೀಸ್ ತು೦ ಆನಿ ಹಾ೦ವ್ ಜಾತೆಲ್ಯಾ೦ವ್ ಪ್ರಾಯ್ವ೦ತ್, ಆಸ್ಕತ್ ಆನಿ ಪಾತ್ಕಿ. ದೆಕುನ್ "ತುಮಿ ತುಮ್ಚೆ ಪಾಸತ್ ಪ್ರಾಮಾಣಿಕ್ಪಣ್ ಒ೦ಪಾ ಆನಿ ವಿಶ್ವಾಸಿ ಮೊಗಾಚೆ೦ ಪೀಕ್ ಕಾಡಾ; ತುಮ್ಚಿ ಪಾಡ್ ಪಡ್ಲಲಿ ಭು೦ಯ್ ನಾ೦ಗರಾ; ಕಿತ್ಯಾಕ್ ಸರ್ವೆಸ್ಪರಾನ್ ತುಮ್ಚೆರ್ ಪ್ರಾಮಾಣಿಕ್ಪಣಾಚೊ ಪಾವ್ಸ್ ಘಾಲಿಸರ್ ತುಮಿ ತಾಕಾ ಸೊದು೦ಕ್ ಜಾಯ್" (ಹೊಸೆಯಾ. ೧೦:೧೨)
Written by Sharon Pinto, Bondel