ಏಕ್ ದೀಸ್ ಏಕ್ ಬಾಯ್ಲ್ ಮನಿಸ್ ಯಾಜಕಾಕ್ ಭೆಟೊ೦ಕ್ ಗೆಲಿ. ತಿಕಾ ತಿಚಾ ಘೊವಾಕ್ ಭೊಗ್ಸು೦ಕ್ ಆಸಾಧ್ಯ್ ಮ್ಹಣ್ ಯಾಜಕಕಡೆ ತಿಣೆ೦ ಸಾ೦ಗ್ಲೆ೦. ಯಾಜಕ್ ದಯಾಳಾಯೆನ್ ಆನಿ ಸಮ್ಜೊಣೆನ್ ಭೊರ್‌ಲ್ಲ್ಯಾ ನಿಮ್ತಿ೦ ತಿಚಾ ಘೊವಾಕ್ ತಿಣೆ೦ ಭೊಗ್ಸು೦ಕ್, ತಾಣೆ೦ ತಿಕಾ ಕುಮೊಕ್ ಕರು೦ಕ್ ಖುಶಿ ವೆಲಿ. ತಿ೦ ಎಕಾಮೆಕಾ ಸ೦ಭಾಷಣ್ ಕರ್ತಾಸ್ತಾನಾ, ಘೊವಾನ್ ತಿಕಾ ಮಸ್ತು ದೂ:ಖ್ ದಿಲಾ೦ ಆನಿ ತಿಚೆ ಥೈ೦ ಫಾರಿಕ್ಪಣ್ ಆನಿ ದ್ವೇಷ್ ಬೊರ್ಲಾ ಮ್ಹಣ್ ಯಾಜಾಕ್ ಸಮ್ಜಲೊ. ಯಾಜಕಾನ್ ತಿಕಾ ಭುಜೊವ್ನ್, ಸಮ್ಜೊವ್ನ್ ಮಸ್ತು ಪ್ರಯತ್ನ್ ಕೆಲೆ೦. ಪೂಣ್ ತಿ ಆಪ್ಲ್ಯಾ ಘೊವಾಕ್ ಭೊಗ್ಸು೦ಕ್ ಕೆದಿ೦ಕ್‌ಚ್ ತಯಾರ್ ನಾತ್ಲಿ. ಯಾಜಾಕಾಕ್ ತಿಕಾ ಸಮ್ಜೊ೦ವ್ಕ್ ಆಸಾಧ್ಯ್ ಜಾಲೆ ಆನಿ ಘೊವಾಕಡೆಚ್ ಉಲೊ೦ವ್ಚೆ೦ ಮ್ಹಣ್ ಚಿ೦ತ್ಲೆ೦. ಯಾಜಾಕಾನ್ ಘೊವಾಕ್‌ಚ್ಚ್ ಮ್ಹಜೆಕಡೆ ಧಾಡ್ ಮ್ಹಣ್ ವಿನ೦ತಿ ಕೆಲಿ ಆನಿ ಸಾ೦ಗಾಲಾಗ್ಲೊ ತಾಣೆ೦ ತುಜೆ ಥೈ೦ ಆಧಾರ್‌ಲ್ಲಿ ಚೂಕ್ ಮ್ಹಣ್ ಹಾ೦ವ್ ತಾಕಾ ಸಮ್ಜಯ್ತಾ೦. ತೆದಾಳಾ ಬಾಯ್ಲ್ ಯಾಜಾಕಾಕ್ ಅಶೆ೦ ಮ್ಹಣಾಲಾಗ್ಲಿ "ಫಾದರ್ ತಾಕಾ ಯೇ೦ವ್ಕ್ ಸಾಧ್ಯ್ ನಾ". ಯಾಜಾಕಾನ್ ಕಿತ್ಯಾಕ್? ಮ್ಹನ್ ವಿಚಾರ್ ಕೆಲೊ. ತೆದಾಳಾ ಬಾಯ್ಲ್ ಮ್ಹಣಾಲಾಗ್ಲಿ "ಫಾದರ್ ತೊ ಮೊರೊನ್ ಸುಮಾರ್ ತೇ೦ಪ್ ಜಾಲೊ".
ವ್ಹಯ್ ಮೊಗಾಚಾ ಭಾವಾ೦ನೊ ಆನಿ ಭಯ್ಣಿನೊ. ಆಮ್ಚ್ಯಾಯೀ ಜಿವಿತಾ೦ತ್ ಎಕಾಮೆಕಾ ಆಮಿ೦ ಭೊಗ್ಸಿನಾ ಜಾಲ್ಯಾರ್ ಅಶೆ೦ಚ್ ಘಡ್ತಾ ಆನಿ೦ ಸಗ್ಳ್ಯಾ ಆಮ್ಚ್ಯಾ ಜಿವಿತಾ೦ತ್ ನಾ-ಭೊಗ್ಸಾಣ್ಯಾಚೆ೦ ವೊಜೆ೦ ಆಮಿ೦ ವಾವೊವ್ನ್ ಆಸ್ತೆಲ್ಯಾ೦ವ್. ಸುಮಾರ್ ತೇ೦ಪಾ ಪಯ್ಲೆ೦ ದು:ಖ್ಚೆ ತಸಲೆ೦ ಘಡಿತ್ ಘಡ್ಲಾ೦ ಜಾ೦ವ್ಕ್ ಪುರೊ. ಪೂಣ್ ತೆ೦ ದೂ:ಖ್ ಅಮ್ಚ್ಯಾ ಕಾಳ್ಜಾ೦ನಿ ರೊ೦ಬೊನ್ ಆಸ್ತಾ೦ ನಾ-ಭೊಗ್ಸಾಣೆ೦, ಆಮ್ಚ್ಯಾ ಕುಡಿಚಾ, ಮತಿಚಾ, ಆತ್ಮ್ಯಾಚ್ಯಾ ಆನಿ ಸಮಾಜೆಚಾ ಪಿಡೆಕ್ ಕಾರಣ್ ಮ್ಹಣ್ ಅಮಿ ಚಿ೦ತಿನಾ೦ವ್. ಆಜ್ ಸಬಾರ್ ಜಣಾ೦ ಕುಡಿಚಾ, ಮತಿಚಾ, ಆತ್ಮ್ಯಾಚ್ಯಾ ಪಿಡೆ೦ತ್ ಆನಿ ಸಮಾಜೆ೦ತ್ ಕಷ್ಟೊವ್ನ್ ಆಸಾತ್ ಹೆ೦ ಕಿತ್ಯಾಕ್?!
ಹಾಕಾ ಕಾರಣ್ ಜಾವ್ನಾಸಾ ನಾ-ಭೊಗ್ಸಾಣೆ. ಸುಮಾರ್ ವರ್ಸಾ೦ ಪಯ್ಲೆ೦ ಏಕ್ ಭಯ್ಣ್ ತಿಚಾ ಪಾಯ್ ದುಖಿ ವರ್ವಿ೦ ಮ್ಹಜೆ ಸರ್ಶಿ೦ ಆಯ್ಲಿ. ಸುಮಾರ್ ದಾಕ್ತೆರಾಕಡೆ ವಚುನ್ ಕಿತ್ಲೆಯೀ ವಕತ್ ಕೆಲ್ಯಾರ್ ಕಿತೆ೦ಚ್ ಬೊರೆಪಣ್ ಲಾಭ್ಲೆ ನಾ೦ ಆನಿ ದೂಖ್ ಗೂಣ್ ಜಾ೦ವ್ಕ್ ನಾ. ತಿಚೆ ತಕ್ಲೆರ್ ಹಾತ್ ದವರ್ನ್ ಮಾಗ್ತಾಸ್ತಾನಾ ತಿಣೆ೦ ತಿಚಾ ಬಾಪಾಯ್ಕ್ ಆನಿ ಭಯ್ಣಿ೦ಕ್ ಭೊಗ್ಸು೦ಕ್ ನಾ ಮ್ಹಣ್ ದೆವಾ ಥಾವ್ನ್ ಮ್ಹಾಕಾ ಸ೦ದೇಶ್ ಮೆಳ್ಳೊ. ತಿಕಾ ಬಾಪಾಯ್‌ಕಡೆ ಆನಿ ಭಯ್ಣಿ೦ಕಡೆ ಬೊರೊ ಸ೦ಭ೦ದ್ ನಾ ಮ್ಹಣ್ ತಿ ತಕ್ಷಣ್‌ಚ್ ಒಪ್ವಾಲಿ. ತ್ಯಾಚ್ ದಿಸಾ ತಾ೦ಕಾ ಕಾಗಾತ್ ಬೊರೊ೦ವ್ಕ್ ತಿಣೆ೦ ನಿರ್ಧಾರ್ ಘೆತ್ಲೊ. ಆತಾ೦ ಬೊರ್ಯಾವ ಭಲಾಯ್ಕೆ೦ತ್ ತಿ ಆಸಾ. ಹೆ೦ಚ್ ಸತ್ ಜೆಜು ಆಮ್ಕಾ೦ ಸಾ೦ಗ್ತಾ. "ದೆಕುನ್ ತುಮ್ಚಿ೦ ಪಾತ್ಕಾ೦ ಎಕಾಮೆಕಾಕ್ ಉಚಾರ್ನ್ ಸಾ೦ಗಾ ಆನಿ ಎಕಾಮೆಕಾ ಪಾಸತ್ ಮಾಗಾ; ತವಳ್ ತುಮ್ಕಾ೦ ಭಲಾಯ್ಕಿ ಮೆಳ್ತಲಿ." (ಜಾಕೊಬಾಚೆ೦ ಪತ್ರ್. 5:16)
'ಭೊಗ್ಸಾಣೆ' ಆಮ್ಚ್ಯಾ ಸರ್ವ್ ಪಿಡೆ೦ಕ್ ಆನಿ ಕಷ್ಟಾ೦ಕ್ ವಕತ್ ಜಾವ್ನಾಸಾ. ಅಮಿ೦ ಎಕಾಮೆಕಾ ಭೊಗ್ಸಿಲ್ಲ್ಯಾ ವೆಳಾರ್ ಆಮ್ಚೊ ಸರ್ಗಿ೦ಚೊ ಬಾಪ್ ಆಮ್ಚಿ೦ ಪಾತ್ಕಾ೦ ಭೊಗ್ಸಿತಾ ಮಾತ್ರ್ ನಹಿ೦, ಆಮ್ಚ್ಯಾ ಪಿಡೆ ಥಾವ್ನ್, ಕಷ್ಟಾ೦ ಥಾವ್ನ್, ಖ೦ತಿ-ಬೆಜಾರಾಯೆ ಥಾವ್ನ್ ಆಮ್ಕಾ೦ ಸುಟ್ಕಾ ಮೆಳ್ತಾ. ಭೊಗ್ಸಾಣ್ಯಾಚೆ೦ ಕಾಳಿಜ್ ಕೆದಾಳಾಯೀ ಶಾ೦ತಿ-ಸಮಾಧಾನೆ೦ತ್ ಆಸ್ತಾ. ಪೂಣ್ ನಾ-ಭೊಗ್ಸಾಣ್ಯಾಚೆ೦ ಕಾಳಿಜ್ ಏಕ್ ವ್ಹಡ್ ವೊಜೆ೦ ಕಾಳ್ಜಾ೦ತ್ ದವರ್ನ್ ಜಿಯೆತಾ. ದೆವಾಚೆ೦ ಉತಾರ್ ಆಮ್ಕಾ೦ ಜಾಗ್ವಣ್ ದಿತಾ. "ಜರ್ ತುಮಿ ಹೆರಾ೦ಕ್ ತಾ೦ಚೆ ಗುನ್ಯಾ೦ವ್ ಬೊಗ್ಶಿತಾತ್, ತರ್ ತುಮ್ಚೊ ಸರ್ಗಿ೦ಚೊ ಬಾಪ್‌ಯೀ ತುಮ್ಚೆ ಗುನ್ಯಾ೦ವ್ ತುಮ್ಕಾ೦ ಬೊಗ್ಶಿತಲೊ. ಪುಣ್ ಹೆರಾ೦ಕ್ ತುಮಿ ಬೊಗ್ಶಿನಾ೦ತ್ ಜಾಲ್ಯಾರ್ ತುಮ್ಚೊ ಬಾಪ್‌ಯೀ ತುಮ್ಚೆ ಗುನ್ಯಾ೦ವ್ ಬೊಗ್ಸು೦ಚೊನಾ" (ಮಾತೆವ್. 6:14-15). ಹಾ೦ವ್ ಏಕ್ ನರ್ಸಿ೦ಗ್ ಇಸ್ಕೊಲಾ೦ತ್ ರೆತಿರ್ ದೀವ್ನ್ ಆಸ್‌ಲ್ಲೊ೦. ಏಕ್ ನರ್ಸ್ ಮ್ಹಜೆಕಡೆ ಅಶೆ೦ ಮ್ಹಣಾಲೆ೦ "ಫಾದರ್ ಮ್ಹಜಾ ಎಕಾ ಇಷ್ಟಿಣೆನ್ ಮ್ಹಜೆ೦ ನಾ೦ವ್ ಪಾಡ್ ಕೆಲಾ೦ ಆನಿ ಹಾ೦ವ್ ತಾಕಾ ಕೆದಿ೦ಚ್ ಭೊಗ್ಸು೦ಚಿನಾ೦". ಹಾ೦ವೆ೦ ತಾಕಾ ಸಮ್ಜಾಯ್ಲೆ೦ ಆನಿ ಸಾ೦ಗ್ಲೆ೦ ಜರ್ತರ್ ತು೦ ತಾಕಾ ಭೊಗ್ಸಿನಾ೦ಯ್ ತುಜಿ ಪಿಡಾ ಗೂಣ್ ಜಾ೦ವ್ಚಿನಾ೦. ರಾಗಾನ್ ತೆ೦ ಮ್ಹಣಾಲಾಗ್ಲೆ೦ "ಫಾದರ್ ತುಮಿ ಆನಿ ದೇವ್ ತಾಕಾ ಭೊಗ್ಸು೦ಕ್ ಪುರೊ ಪೂಣ್ ಹಾ೦ವ್ ತಾಕಾ ಕೆದಿ೦ಕ್‌ಚ್ ಭೊಗ್ಸು೦ಚಿನಾ೦". ದೆವಾನ್ ತುಜಿ೦ ಪಾತ್ಕಾ೦ ಭೊಗ್ಸು೦ಕ್ ತು೦ ಖುಶಿ ವರ್ತಾಯ್‌ಗೀ ಮ್ಹಣ್ ಹಾ೦ವೆ ತಾಕಾ ಸವಾಲ್ ಘಾಲೆ೦. ತಾಕಾ ತಾಚಿ ಜಾಪ್ "ಖ೦ಡಿತ್ ಫಾದರ್". ಹಾ೦ವೆ ತಾಕಾ "ಆಮ್ಚ್ಯಾ ಬಾಪಾ" ಮಾಗ್ಣೆ೦ ವ್ಹಡ್ಲ್ಯಾನ್ ಮ್ಹಣೊ೦ಕ್ ಸಾ೦ಗ್ಲೆ೦. "ಆಮ್ಚೆರ್ ಚುಕ್‌ಲ್ಲ್ಯಾ೦ಕ್ ಆಮಿ೦ ಭೊಗ್ಸಿತಾ೦ವ್, ತಶೆ೦ ಆಮ್ಚಿ೦ ಪಾತ್ಕಾ೦ ಭೊಗೊಸ್..." ಮ್ಹಣ್ತಾಸ್ತಾನಾ ಹಾ೦ವೆ ತಾಕಾ ರಾವೊನ್ ಆನಿ ದೋನ್ ಪಾವ್ಟಿ೦ಕ್ ಪರ್ತುನ್ ಮ್ಹಣೊ೦ಕ್ ಸಾ೦ಗ್ಲೆ೦. ತಾಚಿ ಪಾತ್ಕಾ೦ ಭೊಗ್ಸು೦ಕ್ ದೆವಾಕ್ ಶರ್ತ್ ಘಾಲ್ತಾ ಮ್ಹಣ್ ಕಳ್‌ಲ್ಲೆ೦ಚ್ ತೆ೦ ರಡ್ಲೆ೦ ಆನಿ ಮ್ಹಣಾಲೆ೦ "ವ್ಹಯ್ ಫಾದರ್ ಆಜ್‌ಚ್ಚ್ ಹಾ೦ವ್ ತಾಕಾ ಭೊಗ್ಸಿತಾ೦, ಮ್ಹಜಾ ಪಾತ್ಕಾ೦ಚೆ ಮ್ಹಾಕಾ ಭೊಗ್ಸಾಣೆ೦ ಮೆಳ್ಚಾ ಖಾತಿರ್". ಹೆ೦ಚ್ ನರ್ಸ್ ಆತಾ೦ ಆಪ್ಲ್ಯಾ ಇಷ್ಟಿಣೆ ಸಾ೦ಗಾತಾ ಸ೦ತೊಸಾನ್ ಜಿಯೆವ್ನ್ ದೆವಾಚಾ ಮೊಗಾ೦ತ್ ವಾಡೊನ್೦ಚ್ ಆಸಾ. ದೆವಾಕ್ ಜಾ೦ವ್ ಮಹಿಮಾ!
ಆಮಿ೦ ಎಕಾಮೆಕಾ ಭೊಗ್ಸಿನಾ ಜಾಲ್ಯಾರ್ ಆಮ್ಚೆ೦ ಮಾಗ್ಣೆ೦ ದೇವ್ ಆಯ್ಕಾನಾ. ಪವಿತ್ರ್ ಪುಸ್ತಕ್ ಆಮ್ಕಾ೦ ಸಾ೦ಗ್ತಾ. "ಮಾಗ್ಣ್ಯಾಕ್ ತುಮಿ ಉಬೆ ರಾವ್ತಾನಾ ಕೊಣಾಚೆರ್‌ಯೀ ತುಮ್ಕಾ೦ ಕಾ೦ಯ್ ಪುಣ್‌ಯೀ ವಿರೋಧ್ ಆಸ್ಲ್ಯಾರ್ ತೆ೦ ಬೊಗ್ಶಿಯಾ; ತವಳ್ ಸರ್ಗಿ೦ಚೊ ತುಮ್ಚೊ ಬಾಪ್‌ಯೀ ತುಮ್ಚಿ೦ ಪಾತ್ಕಾ೦ ಬೊಗ್ಶಿತಲೊ." (ಮಾರ್ಕ್. 11:25). ದೇವ್, ಭೊಗ್ಸು೦ಕ್ ತಯಾರ್ ನಾತ್‌ಲ್ಲ್ಯಾ ಚಾಕ್ರಾಚೆ೦ ಮಾಗ್ಣೆ೦ ಆಯ್ಕನಾ. ಹ್ಯಾ ಚಾಕ್ರಾಚಿ ವೊಪಾರ್ ಆಮಿ೦ ವಾಚ್ತಾ೦ವ್ (ಮಾತೆವ್. 18:23-35). ದೆವಾನ್ ಕಿತೆ೦ ಕೆಲೆ೦? ಚಾಕ್ರಾಕ್ ತಾಣೆ ಆಪಯ್ಲೆ೦ ಆನಿ೦ ಮ್ಹಳೆ೦: "ನಷ್ಟ್ಯಾ ಚಾಕ್ರಾ, ತುವೆ೦ ಮ್ಹಜೇಲಾಗಿ೦ ಪರಾತ್ಲೆ೦ಯ್ ದೆಕುನ್ ಹಾ೦ವೆ೦ ತುಕಾ ಸಗ್ಳೆ೦ ರೀಣ್ ಮಾಫಿ ಕೆಲೆ೦. ತರ್ ಹಾ೦ವೆ೦ ತುಜಿ ದಯಾ ಕೆಲ್ಲೇಬರಿ, ತುವೆ೦ಯೀ ತುಜ್ಯಾ ಸಾ೦ಗಾತಿ ಚಾಕ್ರಾಚಿ ದಯಾ ಕರಿಜಯ್ ಆಸ್ಲಿ ನ್ಹಯ್? ಧನಿ ಇತ್ಲೊ ರಾಗಾನ್ ಪೆಟ್ಲೊ ಕೀ, ಆಪ್ಣಾಕ್ ದೆವೆ೦ ಆಸ್ಲಲೆ೦ ತೆ೦ ಸಗ್ಳೆ೦ ಫಾರಿಕ್ ಕರ್ತಾ ಮ್ಹಣಸರ್ ತ್ಯಾ ಚಾಕ್ರಾಕ್ ತಾಣೆ೦ ಕಸಬ್ಯಾ೦ಚೇ ಆಧೀನ್ ಕೆಲೊ. ಆನಿ ತುಮಿಯೀ ಹರ್ಯೆಕ್ಲೊ ತುಮ್ಚ್ಯಾ ಭಾವಾಕ್ ಕಾಳ್ಜಾ೦ತ್ ಥಾವ್ನ್ ಭೊಗ್ಶಿನಾತ್ ಜಾಲ್ಯಾರ್, ಮ್ಹಜೊ ಸರ್ಗಿ೦ಚೊ ಬಾಪ್ ತುಮ್ಕಾ೦ಯೀ ತಶೆ೦ಚ್ ಕರ್ತಲೊ" (ಮಾತೆವ್. 18:32-35). ಜರ್ತರ್ ತುಜೆ೦ ಕಾಳಿಜ್ ದ್ವೇಷಾನ್, ರಾಗಾನ್, ಫಾರಿಕ್ಪಣಾನ್ ಆನಿ ನಾ-ಭೊಗ್ಸಾಣೆ೦ತ್ ಭೊರ್ಲಾ5೦ ಜಾಲ್ಯಾರ್ ತುಜಾ ಭೆಟವ್ಣೆಕ್ ಕಾಯಿ೦ಚ್ ಮೋಲ್ ನಾ. ಜೆಜು ಆಮ್ಕಾ೦ ಸಾ೦ಗ್ತಾ "ದೆಕುನ್ ತು೦ ವೇದಿ ಮುಖಾರ್ ತುಜಿ ಕಾಣಿಕ್ ಭೆಟೊ೦ವ್ಕ್ ವೆತಾನಾ, ಜರ್ ತುಜ್ಯಾ ಭಾವಾಕ್ ತುಜೇ ವಿರೋಧ್ ಕಾ೦ಯ್ ಆಸಾ ಮ್ಹಣ್ ತುಕಾ ಉಗ್ಡಾಸ್ ಯೆತ್, ತರ್ ತಿ ತುಜಿ ಕಾಣಿಕ್ ಥ೦ಯ್ಚ್ ವೇದಿ ಮುಖಾರ್ ಸೊಡ್. ಪಯ್ಲೆ೦ ವಚ್ ಆನಿ ತುಜ್ಯಾ ಭಾವಾಕಡೆ ರಾಜಿ ಜಾ; ಉಪ್ರಾ೦ತ್, ಪಾಟಿ೦ ಯೇವ್ನ್ ತುಜಿ ಕಾಣಿಕ್ ಭೆಟಯ್" (ಮಾತೆವ್. 5:23-24). ಕಿತ್ಲೆಶೆ ಪಾವ್ಟಿ೦ ಆಮಿ೦ ಆಮ್ಕಾ೦ ದು:ಖಯ್ಲ್ಯಾ೦ಚೊ ದ್ವೇಷ್ ಕಾಳ್ಜಾ೦ತ್ ದವರ್ನ್ ಮಿಸಾಚಾ ಬಲಿದಾನಾ೦ತ್ ಆಮಿ ಭಾಗಿದಾರ್ ಜಾಲ್ಯಾ೦ವ್. ದೆವಾನ್ ಹೆ೦ ತುಜೆ೦ ಬಲಿದಾನ್ ಸ್ವೀಕಾರ್ ಕೆಲಾ೦ ಮ್ಹಣ್ ತು೦ ಚಿ೦ತ್ತಾಯ್ಗೀ?. ಜಾಕೊಬಾಚಾ ಪತ್ರಾ೦ತ್ ಆಮಿ೦ ವಾಚ್ತಾ೦ವ್ "ಕಿತ್ಯಾಕ್ ಜಾಣೆ೦ ದಯಾ ದಾಖೊ೦ವ್ಕ್ ನಾ, ತಾಚಿ ದಯೇವಿಣೆ೦ ನೀತ್ ಜಾತಲಿ; ದಯಾಳಾಯ್ ದಾಖಯ್ಲಲ್ಯಾ೦ನಿ ನಿತಿಕ್ ಭಿಯೆಜಯ್ ಮ್ಹಣ್ ನಾ!" (ಜಾಕೊಬಾಚೆ೦ ಪತ್ರ್. 2:13)
ಭೊಗ್ಸು೦ಚೆ೦ ದೈವಿಕ್ ಜಾವ್ನಾಸಾ. ಭೊಗ್ಸುಚೆ೦ ಮೊಗಾಚೆ೦ ದೆಣೆ೦ ಜಾವ್ನಾಸಾ. ಜೆಜುಚೆರ್ ದೀಷ್ಟ್ ಖ೦ಚುಯಾ೦. ತಾಚಾ ಭೊಗ್ಸಾಣ್ಯಾಚಾ ಮೊಗಾವರ್ವಿ೦ ಸಗ್ಳ್ಯಾ ಮನ್ಶಾಕುಳಾಕ್ ತಾಣೆ೦ ಬಚಾವ್ ಕೆಲೆ೦. ಜೆಜುನ್ ಆರಿಗಾರಾಕ್ ತಾಚಿ೦ ಪಾತ್ಕಾ೦ ಭೊಗ್ಸಿಲ್ಲ್ಯಾ ವೆಳಾರ್ ತೊ ಆಪ್ಲೆ೦ ಹಾ೦ತುಳ್ನ್ ಘೆವ್ನ್, ಸಕ್ಡಾ೦ ಹುಜಿರ್ ಉಬೊ ರಾವೊನ್ ಭಾಯ್ರ್ ಸರ್ನ್ ಗೆಲೊ. (ಮಾರ್ಕ್. 2:11-12). ಜೆಜುಚಾ ಭೊಗ್ಸಾಣ್ಯಾಚಾ ಮೊಗಾ ವರ್ವಿ೦ ಮರಿ-ಮಾಗ್ದೆಲಿನ್ ಸಾಲ್ವಾರ್ ಜಾಲಿ. ಜಾಕೆವಾಕ್ ಆನಿ ಖುರ್ಸಾರ್ ಜೆಜು ಸಾ೦ಗಾತಾ ಖಿಳಾಯಿಲ್ಲ್ಯಾ ಚೊರಾಕ್ ಸಾಲ್ವಾಸಾ೦ವ್ ಲಾಭ್ಲೆ೦. (ಜುವಾ೦ವ್. 8:11; ಲೂಕ್. 19:9; ಲೂಕ್. 23:42-43). ಆಮಿ೦ ದುಸ್ರ್ಯಾ೦ಕ್ ಭೊಗ್ಸಿತಾನಾ ಆಮ್ಚಿ೦ ಪಾತ್ಕಾ೦ ಭೊಗ್ಸುನ್ ಆಮಿ೦ ಬಚಾವ್ ಜಾತಾ೦ವ್ ಮಾತ್ರ್ ನಹಿ೦ ಆಮಿ ಕೋಣಾಕ್ ಭೊಗ್ಸಿಲಾ೦ಗಿ ತಿ೦ಯೀ ಬಚಾವ್ ಜಾತಾತ್. ದಾಖ್ಲ್ಯಾಕ್: ಅಲೆಕ್ಸಾ೦ಡರಾಕ್ ಇನ್ಕಾರ್ ಕೆಲ್ಲ್ಯಾ ವೆಳಾರ್ ತಾಣೆ೦ ಮರಿಯಾ ಗೊರೆಟ್ಟಿಕ್ ಸುರಿ ಘಾಲಿ. ಪೂಣ್ ಮರಿಯಾ ಗೊರೆಟ್ಟಿನ್ ಮೊರ್ನಾಚಾ ತಣಿರ್ ಆಸ್ತಾನಾ ಅಲೆ೦ಕ್ಸಾಡಾರಾಚಾ ಆತ್ಮ್ಯಾ ಖಾತಿರ್ ಮಾಗ್ಲೆ೦ ಆನಿ ತಾಕಾ ಭೊಗ್ಸಿಲೆ೦. ಅಲೆಕ್ಸಾ೦ಡರಾನ್ ತಾಚಿ ಚೂಕ್ ವಳ್ಕೊನ್ ದೆವಾಕಡೆ ಭೊಗ್ಸಾಣೆ೦ ಮಾಗ್ಲೆ೦ ಆನಿ ದೆವಾನ್ ತಾಕಾ ಬಚಾವ್ ಕೆಲೆ೦.
ಸ್ತೆಫಾನಾಕ್ ಪಾತ್ರಾ೦ವ್ಚೆ೦, ಧರ್ಮ್‌ದುತಾ೦ಚಾ ಕೃತ್ಯಾ೦ತ್ ಆಮಿ೦ ವಾಚ್ತಾ೦ವ್. ಪೂಣ್ ಸ್ತೆಫಾನ್ ತಾಚಾ ದುಸ್ಮಾನಾ೦ ಖಾತಿರ್ ದಿ೦ಬಿಯಾನಿ೦ ಪಡುನ್ ವ್ಹಡ್ಲ್ಯಾ ತಾಳ್ಯಾನ್ ಅಶೆ೦ ಮಾಗ್ತಾ: "ಸೊಮಿಯಾ, ಹೆ೦ ಪಾತಕ್ ತಾ೦ಚೆರ್ ಮಾ೦ಡಿನಾಕಾ." (ಧರ್ಮ್‌ದುತಾ೦ಚಿ೦ ಕೃತ್ಯಾ೦. 7:60) ಅಶೆ೦ ಮ್ಹಣೊನ್ ತಾಣೆ೦ ಪ್ರಾಣ್ ಕೆಲೊ. ಸಾವ್ಲ್ ಆಸ್‌ಲ್ಲೊ ಪಾವ್ಲ್ ಜಾ೦ವ್ಕ್ ಕುರ್ಪಾ ಸ್ತೆಫಾನಾಚಾ ಮಾಗ್ಣ್ಯಾ ವರ್ವಿ೦ ಜಾವ್ಯೆತ್. ಜುವಾ೦ವ್ ಪಾವ್ಲ್ ದುಸ್ರೊ ಆಮ್ಚೊ ಆದ್ಲೊ ಪಾಪ್‌ಸಾಯ್ಬ್, ದೆವಾಚಾ ಭೊಗ್ಸಾಣ್ಯಾ೦ಚಾ ಮೊಗಾಚಿ ಏಕ್ ಸಾಕ್ಸ್ ಜಾವ್ನಾಸಾ. ಥೊಡ್ಯಾ ವರ್ಸಾ೦ ಪಯ್ಲೆ೦ ತಾಕಾ ಎಕಾ ಮುಸ್ಲಿಮ್ ಚೆಡ್ಯಾನ್ ಗುಳೊ ಮಾರ್‌ಲ್ಲ್ಯಾ ವೆಳಾರ್ ಆಮ್ಚ್ಯಾ ಪಾಪ್‌ಸಾಯ್ಬಾನ್ ಆಸ್ಪತ್ರೆ ಥಾವ್ನ್ ಭಾಯ್ರ್ ಯೇವ್ನ್, ಪಯ್ಲೆ೦ ತ್ಯಾ ಮುಸ್ಲಿಮ್ ಭಾವಾ ಸರ್ಶಿನ್ ವಚೊನ್ ತಾಕಾ ಪೊಟ್ಲುನ್ ಧರ್ನ್ ತಾಚೊ ಗುನ್ಯಾ೦ವ್ ಭೊಗ್ಸಿಲೊ. ಕಿತ್ಲ್ಯಾ ಅಪುರ್ಬಾಯೆಚೊ ಹೊ ಭೊಗ್ಸಾಣ್ಯಾಚೊ ಮೋಗ್!!
ಹ್ಯಾ ಭಾಗೆವ೦ತ್ ಮನ್ಶಾ೦ಕ್ ಪಳೆತಾಸ್ತಾನಾ ಆಮ್ಕಾ೦ ತಾ೦ಚಾ ಪ್ರಾಸ್ ಚಡ್ ಕೋಣೆ೦ಯೀ ದು:ಖಯ್ಲಾ೦ ಮ್ಹಣ್ ಭೊಗ್ತಾ? ಕೊಣೆ೦ಯೀ ಮ್ಹಾಕಾ ಖುರ್ಸಾಯ್ಲೊ? ಜೆರ್ಬಾ೦ದಾನಿ೦ ಮಾರ್ಲಾ೦? ಕಾ೦ಟ್ಯಾಚೊ೦ ಮುಕುಟ್ ಸಾಣ್ಸಿಲಾ? ಕೋಣೆ೦ಯೀ ಮ್ಹಾಕಾ ಫಾತ್ರಾಯ್ಲೊ? ಯಾ ಗುಳೊ ಮಾರ್ಲಾನ? ಯಾ ಮಾನ್ ಕಾಡ್ನ್ ಮ್ಹಾಕಾ ನಾಸ್ ಕೆಲಾ? ಆಜ್ ಆಮಿ೦ ದೆವಾಚಾ ಭಾಗೆವ೦ತ್ ಮನ್ಶಾ೦ಚೆರ್ ದೀಷ್ಟ್ ಲಾವ್ಯಾ೦ ಆನಿ ತಾ೦ಚೆ ಥಾವ್ನ್, ಕಸಲೆ೦ಚ್ ಶರ್ತ್ ನಾಸ್ತಾನಾ ಆಮ್ಕಾ೦ ದು:ಖಯ್ಲ್ಯಾ೦ಕ್ ಭೊಗ್ಸು೦ಕ್ ಆಮಿ ಶಿಕೊ೦ವ್ಯಾ. ಶರ್ತ್ ನಾತ್‌ಲ್ಲೊ ಮೋಗ್ ಎಕಾ ಬಾಪಾಯ್ಚೊ. ಆಪ್ಲ್ಯಾ ವೆಚಿಕ್ ಪುತಾ ಥೈ೦ ಆಮಿ ಪಳೆ೦ವ್ಯಾ೦. ಶರ್ತ್ ನಾಸ್ತಾನಾ ಆಮಿ ದುಸ್ರ್ಯಾ೦ಕ್ ಭೊಗ್ಸಿತಾನಾ ದೇವ್ ತ್ಯಾಚ್ ರೀತಿನ್ ಆಮ್ಚಿ೦ ಪಾತ್ಕಾ೦ ಭೊಗ್ಸಿತೊಲೊ. ಜೆಜುಚಿ೦ ಉತ್ರಾ೦ ಆಮ್ಚ್ಯಾ ಮತಿಕ್ ಹಾಡು೦ಯಾ. ಪೆದ್ರುನ್ ಜೆಜುಕ್ ವಿಚಾರ್ಲೆ೦ "ಪವಿತ್ರ್ ಸಭೆಚೊ ಅನ್ಯೇಕ್ಲೊ ಸಾ೦ದೊ ಮ್ಹಜೆ ವಿರೋಧ್ ಪಾತಕ್ ಕರ್ತಾನಾ ಕಿತ್ಲೆ೦ ಪಾವ್ಟಿ೦ ಹಾ೦ವೆ ತಾಕಾ ಭೊಗ್ಸಿಜಾಯ್? ಸಾತ್ ಪಾವ್ಟಿ೦?". ಜೆಜುನ್ ಜಾಪ್ ದೀವ್ನ್ ಮ್ಹಳೆ೦ "ಸಾತ್ ಪಾವ್ಟೀ೦ ನ್ಹಯ್, ಬಗಾರ್ ಸಾತಾ೦ಚೆ ಸತ್ತರ್ ಪಾವ್ಟಿ೦"
ಮೊಗಾಚಾ ಭಾವಾ೦ನೊ ಆನಿ ಭಯ್ಣಿನೊ೦, ತುಮ್ಚ್ಯಾ ಕುಡಿಚಿ ಪಿಡಾ ಗೂಣ್ ಜಾಯ್ಜಾಯ್ ಮ್ಹಣ್ ತು೦ ಆಶೆತಾಯ್ ಜಾಲ್ಯಾರ್ ದುಸ್ರ್ಯಾ೦ಕ್ ಭೊಗ್ಸಿ. ತುಜಾ ಮತಿ೦ತ್ ಗುಸ್ಪಡ್-ಗೊ೦ದೊಳ್ ಆಸಾ ತರ್ ತುಜಾ ಪೆಲ್ಯಾಕ್ ಭೊಗ್ಸಿ ಆನಿ ತುಜಾ ದುಸ್ಮಾನಾ೦ ಖಾತಿರ್ ಮಾಗ್. ತುಜಾ ಮೊಗಾಚ್ಯಾ೦ಚೊ ಸ೦ಭ೦ಧ್ ತುಟ್ಲಾ ಜಾಲ್ಯಾರ್ ತಾ೦ಕಾ ಶರ್ತ್ ನಾಸ್ತಾನಾ ಭೊಗ್ಸಿ. ಭಕ್ತಿಪಣಾ೦ತ್ ಜಿಯೆ೦ವ್ಕ್ ಜಾಯ್ನಾ ತರ್ ತುಕಾ ದು:ಖಯ್ಲ್ಯಾ೦ಕ್ ಭೊಗ್ಸಿ. ವಿಸ್ಮಿತಾ೦ ತುಜಾ ಜಿವಿತಾ೦ತ್ ತು೦ ದೆಖ್ತಲೊಯ್. ಜೆಜುಚಾ ಮುಖಾಮಳಾಚೊ ಪರ್ಜಳ್ ತು೦ ಪಳೆತಲೊಯ್ ಆನಿ ಜೆಜುಚಾ ಕಾಕುಳ್ತಿಚೊ ಮೋಗ್ ತು೦ ಭೊಗ್ತಲೊಯ್.
Written by Fr.Jerry Sequeira