"ದೆವಾನ್ ಸ೦ಸಾರಾಚೊ ಅಸೊಯೀ ಮೋಗ್ ಕೆಲೊ ಕೀ, ತಾಣೆ೦ ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಒಪುನ್ ದಿಲೊ, ತಾಕಾ ಸತ್ಮಾನ್ತಲ್ಯಾ ಕೊಣಾಚೊಚ್ ನಾಸ್ ಜಾಯ್ನಾ ಜಾ೦ವ್ಚ್ಯಾಕ್; ಬಗರ್ ತಾಕಾ ಸಾಸ್ಣಿಕ್ ಜಿವಿತ್ ಮೆಳ್ಚ್ಯಾಕ್." (ಜುವಾ೦ವ್. 3:16). "ಹಿಚ್ ತಿ ರುಜ್ವಾತ್; ದೆವಾನ್ ಆಮ್ಕಾ೦ ಸಾಸ್ಣಿಕ್ ಜಿವಿತ್ ದಿಲಾ೦; ಹೆ೦ ಜಿವಿತ್ ತಾಚ್ಯಾ ಪುತಾ ಥ೦ಯ್ ಆಸಾ. ಜ್ಯಾ ಮನ್ಶಾ ಸವೆ೦ ಪೂತ್ ಜಿಯೆತಾ ತಾಚೇ ಸವೆ೦ ಜಿವಿತ್‌ಯೀ ಆಸಾ; ಜಾಚೆ ಸವೆ೦ ಪೂತ್ ಜಿಯೆನಾ, ತಾಚೇ ಸವೆ೦ ಜಿವಿತ್‌ಯೀ ನಾ." (1 ಜುವಾ೦ವ್ 5:11-12). ಆಮ್ಚೆ೦ ಪಯ್ಕಿ ಕಿತ್ಲ್ಯಾ ಜಣಾ೦ಕ್ ಹೆ೦ ಜೀವಿತ್ ಲಾಭ್ಲಾ೦? ಜೆಜು ಸವೆ೦ ಅಸಾ೦ವ್ ತರ್ ಆಮಿ ಜಿಯೆತಾ೦ವ್. ಜೆಜುವಿಣೆ೦ ಆಮಿ ಕೇವಲ್ ಅಸಾ೦ವ್. ಜೆಜುಕ್ ಮೊರ್ನಾಚೆ೦ ಪರ್ಮಾಣ್ ದೀವ್ನ್ ಪ್ರಧಾನ್ ಯಾಜಕ್ ಆನಿ ಫಾರಿಜೆವಾ೦ಚೆ ಮುಖೆಲಿ ಖುರ್ಸಾಯ್ ತಾಕಾ ಖುರ್ಸಾಯ್ ತಾಕಾ ಮ್ಹಣ್ ಬೋಬ್ ಮಾರು೦ಕ್ ಲಾಗ್ಲೆ. "ತಾಕಾ ನಿಷ್ಟುರಾಯೆನ್ ಚಲಯ್ಲೊ, ತರೀ ತೊ ಖಾಲ್ತೊ ಜಾಲೊ, ತಾಣೆ೦ ಆಪ್ಣೆ೦ ತೋ೦ಡ್ ಉಗಡ್ಲೆ೦ ನಾ; ಮಾರು೦ಕ್ ವ್ಹರ್ತಾತ್ ತಸಲೆ ಶೆಳಿಯೆ ಪರಿ೦, ಲೋ೦ವ್ ತಾಸ್ತಲ್ಯಾ ಮುಕಾರ್ ಒಗೊಚ್ ರಾವ್ತಲ್ಯಾ ಬಕ್ರ್ಯಾ ಪರಿ೦ ತಾಣೆ೦ ಆಪ್ಲೆ೦ ತೋ೦ಡ್ ಉಗಡ್ಲೆ೦ ನಾ." (ಇಸಾಯಿಯಾ. 53:7).
"ಸ೦ಯ್ಭಾನ್ ತೊ ದೇವ್. ತರ್‌ಯೀ ತ್ಯಾ ಸಮಸಮ್‌ಪಣಾಕ್ ತೊ ಲಬ್ದೊನ್ ರಾವ್ಲೊ ನಾ. ಬಗರ್ ಮನ್ಶಾಸಾರ್ಕೊ ಜಾವ್ನ್, ಗುಲಾಮಾಚೆ೦ ರೂಪ್ ಘೆವ್ನ್ ತಾಣೆ೦ ಆಪ್ಣಾಕ್‌ಚ್ ಪೂರ್ಣ್‌ಪಣಿ೦ ಖಾಲಿ ಕೆಲೊ." (ಫಿಲಿಪ್ಪಿಗಾರಾ೦ಕ್. 2:6-8). ಜೆಜುನ್ ಸರ್ವ್ ಸೊಸುನ್ ವೆಲೆ೦, ದೆವಾಚಿ ಖುಶಿ ಪಾಳು೦ಕ್. ಹ್ಯಾ ಆಧುನಿಕ್ ಕಾಳಾರ್‌ಯೀ ದೆವಾನ್ ತಾಚಿ ಖುಶಿ ಕರು೦ಕ್, ತಾಚಿ೦ ಮಹಾನ್ ಕೃತ್ಯಾ೦ ವರ್ಣು೦ಕ್, ಆನಿ ತಾಚಾ ರಾಜಾ ಖಾತಿರ್ ವಾವ್ರು೦ಕ್ ವಿ೦ಚುನ್ ಕಾಡ್ಲ್ಯಾ೦ಕ್ ಜಾಯ್ತೆ೦ ಸೊಸು೦ಕ್ ಮೆಳ್ತಾ. "ಕಿತ್ಯಾಕ್ ಭಾ೦ಗಾರ್ ಉಜ್ಯಾ೦ತ್ ಘಾಲುನ್ ತಪಾಸ್ತಾತ್ ಆನಿ ದೆವಾಕ್ ಮಾನ್ವತಲ್ಯಾ ಮನ್ಶಾ೦ಕ್ ಕಷ್ಟಾ೦ಚ್ಯಾ ಆಗ್ಟ್ಯಾ೦ತ್." (ಸಿರಾಖ್. 2:5). "ಮೊಗಾಚ್ಯಾ೦ನೋ, ತುಮ್ಕಾ೦ ವರೊವ್ನ್ ಪಳೆ೦ವ್ಚೇ ಖಾತಿರ್ ತುಮ್ಚೇ ವಯ್ರ್ ಆತಾ೦ ಆಯ್ಲ್ಯಾ ತಿ ಉಜ್ಯಾ ಪರೀಕ್ಷಾ ಪಳೆವ್ನ್ ತುಮಿ ಘಡ್ಬಡ್ನಾಕಾತ್. ಹಾ೦ತು೦ ವಿಶೇಷ್ ಕಾ೦ಯ್ ತುಮ್ಕಾ೦ ಘಡ್ತಾ ಮ್ಹಣ್ ತುಮಿ ಚಿ೦ತ್ಚೆ೦ ನಾಕಾ. ಕ್ರಿಸ್ತಾಚ್ಯಾ ಕಷ್ಟಾ೦ನಿ ತುಮಿ ವಾ೦ಟೆಲಿ ಜಾಲ್ಯಾತ್ ದೆಕುನ್ ತುಮಿ ಉಲ್ಲಾಸ್ ಪಾವಜಯ್." (1 ಪೆದ್ರು 4:12-13). ದೆಕುನ್ ಜೆಜುನ್ ತಾಚಾ ಹರ್ಯೆಕಾ ಶಿಕೊವ್ಣೆ೦ತ್ ಆಮ್ಕಾ೦ ಸಾ೦ಗ್ಲಾ೦ "ಜೊ ಕೊಣ್ ಆಪ್ಲೊ ಖುರಿಸ್ ವ್ಹಾವೊವ್ನ್ ಮ್ಹಜ್ಯಾ ಪಾಟ್ಲ್ಯಾನ್ ಯೇನ, ತಾಚ್ಯಾನ್ ಮ್ಹಜೊ ಶಿಸ್ ಜಾ೦ವ್ಕ್ ನಜೊ." (ಲೂಕ್. 14:27)
ಸುರ್ವಿಲ್ಲ್ಯಾ ಕ್ರೀಸ್ತಾವಾ೦ನಿ ಜೆಜು ಖಾತಿರ್, ಜಾಯ್ತಿ ನಿ೦ದಾ, ಆಕ್ಮಾನ್, ಬ೦ಧಡ್ ಆನಿ ಕಷ್ಟ್ ಧಗ್ದೊವ್ಣಿ ಸೊಸುನ್ ವೆಲ್ಯಾ. "ಪುಣ್ ಜೆಜುಚ್ಯಾ ನಾ೦ವಾ ಖಾತಿರ್ ಅವ್ಮರ್ಯಾದ್ ಭೊಗ್ಚೆ೦ ಭಾಗ್ ಆಪ್ಣಾ೦ಕ್ ಮೆಳ್ಳೆ೦ ಮ್ಹಣ್ ಲೆಖುನ್ ಧರ್ಮ್‌ದೂತ್ ಸ೦ತೊಸಾನ್ ಭರೊನ್ ನಿತಿಸಭೇ ಥಾವ್ನ್ ಪಾಟಿ೦ ಪರ್ತಲೆ. ಆನಿ ದಿಸಾನ್‌ದೀಸ್ ದೆವಾಳಾ೦ತ್ ಆನಿ ಘರಾನ್‌ಘರ್ ವಚುನ್ ಜೆಜುಚ್ ಕ್ರೀಸ್ತ್ ಮ್ಹಳ್ಳಿ ಬರಿ ಖಬರ್ ಪರ್ಗಟ್ ಕರ್ಚೆ೦ ಕಾಮ್ ತೆ ಕರಿತ್ ರಾವ್ಲೆ." (ಧರ್ಮ್‌ದುತಾ೦ಚಿ ಕೃತ್ಯಾ೦. 5:41-42). ದೆಕುನ್, ಕೋಣ್ ದೆವಾ ಖಾತಿರ್ ಆನಿ ತಾಚಾ ರಾಜಾ ಖಾತಿರ್ ವಾವ್ರು೦ಕ್ ಖುಶಿ ವರ್ತಾತ್, ತೆ ನಿಜಾಯ್ಕಿ ಭಾಗಿ. ಕಿತ್ಯಾಕ್ "ಆಪಯ್‌ಲ್ಲೆ ಸಬಾರ್ ಆಸಾತ್, ಪುಣ್ ವಿ೦ಚುನ್ ಕಾಡ್‌ಲ್ಲೆ ಥೊಡೆಚ್." (ಮಾತೆವ್. 22:14). ತುಮ್ಕಾ೦ ದೆವಾನ್ ವಿ೦ಚುನ್ ಕಾಡ್ಲಾ೦ ದೆಕುನ್ ತುಮಿ ನಿಜಾಯ್ಕಿ ಭಾಗಿ. "ತುಮ್ಚೇ ಥ೦ಯ್ ಆಸ್ಲಲ್ಯಾ ಭರ್ವಶಾಚೆ೦ ಕಾರಣ್ ವಿಚಾರ್ತ್ಲ್ಯಾ ಹರ್ಯೆಕ್ಲ್ಯಾಕ್ ಜಾಪ್ ದಿ೦ವ್ಕ್ ತುಮಿ ಸದಾ೦ಚ್ ತಯಾರ್ ಆಸು೦ಕ್ ಜಾಯ್, ತರಿಪುಣ್ ಹೆ೦ ಕಾಮ್ ನಮ್ರತೆನ್ ಆನಿ ಮರ್ಯಾದ್ ದೀವ್ನ್ ಕರಾ." (1 ಪೆದ್ರು 3:15-16). "ನೆಣಾರ್ಪ.ಣಿ೦ ವಿರೋಧ್ ಉಲಯ್ತಲ್ಯಾ ಬೂದ್ ನಾತ್ಲಲ್ಯಾ೦ಚಿ೦ ತೊ೦ಡಾ೦ ತುಮ್ಚೇ ಶೆಗುಣಿ ಜಿಣಿಯೇ ವರ್ವಿ೦ ತುಮಿ ಧಾ೦ಪಾ-ಹಿಚ್ ದೆವಾಚಿ ಖುಶಿ." (1 ಪೆದ್ರು 2:15). ಪೂಣ್ ಆಮಿ೦ಚ್ ಚೂಕ್ ಆಧಾರ್ತಾ೦ವ್ ತರ್ ಅಮ್ಚೆ೦ ಕೊಶೆಡ್ದ್ ಆಮ್ಕಾ೦ ಕಾ೦ತಯ್ತಾ. ಆನಿ ಜರ್ ಕಾ೦ತಯ್ನಾ, ತರ್ ಆಮ್ಕಾ೦ ಕೊಶೆಡ್ದ್ ನಾ೦ ಮ್ಹಣ್ ಜಾಲೆ೦. ದೆಕುನ್ ಕಿತೆ೦ ಸರ್ಕೆ೦ ಆನಿ ದೆವಾಕ್ ಮಾನ್ವಾತಾ, ತೆ೦ ಕರು೦ಕ್ ಪಾಟಿ೦ ಸರ್ಚೆಣ೦ ನ೦ಯ್. "ತುಮ್ಕಾ೦ ಆಪವ್ಣೆ೦ ಮೆಳ್ಳಾ೦ ಹ್ಯಾಚ್ ಖಾತಿರ್. ಕಾರಣ್, ತುಮ್ಚೇ ಪಾಸತ್ ಪಯ್ಲೆ೦ ಕ್ರಿಸ್ತಾನ್ ಕಷ್ಟ್ ಸೊಸ್ಲ್ಯಾತ್; ತಾಚ್ಯಾ ಮೆಟಾ೦ನಿ ತುಮಿ ಚಲ್ಚ್ಯಾಕ್ ತಾಣೆ೦ಚ್ ತುಮ್ಕಾ೦ ದೇಖ್ ದಿಲ್ಯಾ" (1 ಪೆದ್ರು 2:21). "ತಾಕಾ ಸೊವ್‌ಲ್ಲ್ಯಾ ವೆಳಾರ್ ತಾಣೆ೦ ಪಾಟಿ೦ ಸೊವ್ಲೆ೦ನಾ; ತಾಕಾ ಕಷ್ಟಾಯ್ತಾನಾ ತಾಣೆ೦ ಭೆಷ್ಟಾಯ್ಲೆ೦ನಾ; ಬಗರ್ ನಿತಿ ಪ್ರಕಾರ್ ಝಡ್ತಿ ಕರ್ತಲ್ಯಾಚೇ ಜತ್ನೆಕ್ ಆಪ್ಣಾಕ್‌ಚ್ ತಾಣೆ೦ ಒಪುನ್ ದಿಲೊ." (1 ಪೆದ್ರು 2:23). ದೆಕುನ್ ತುಮಿ ಎಕಾಮೆಕಾ ದುರ್ಸಾನಾಕಾತ್ ವ ಖೊಡಿ ಕಾಡಿನಾಕಾತ್ ವ ಹೆರಾ೦ಚಿ ಝಡ್ತಿ ಕರಿನಾಕಾತ್. ತೆದ್ನಾ೦ ತುಮ್ಚಿ೦ ಝಡ್ತಿ ಜಾ೦ವ್ಚಿ೦ ನಾ೦. "ಹೆ ಮನಿಸ್ ತ೦ಡ್ ಪ೦ಗಡ್ ಕರ್ತಲೆ. ಆಪ್ಲ್ಯಾ ಸ೦ಯ್ಭಿಕ್ ವೊಡ್ಣ್ಯಾ೦ ಪರ್ಮಾಣೆ೦ ಚಲ್ತಲೆ ಆನಿ ಆತ್ಮೀಕ್ ಸಮ್ಜಣೆ ನಾಸ್ತಾನಾ ಜಿಯೆತಲೆ. ಪುಣ್ ತುಮಿ, ಮೊಗಾಚ್ಯಾ೦ನೋ, ತುಮ್ಚ್ಯಾ ಭೋವ್ ಪವಿತ್ರ್ ಭಾವಾರ್ಥಾಚೆರ್ ತುಮ್ಚೆ೦ ಜಿವಿತ್ ಬಾ೦ಧುನ್ ಹಾಡಾ. ಪವಿತ್ರ್ ಅತ್ಮ್ಯಾಚ್ಯಾ ಬಳಾನ್ ಪ್ರಾರ್ಥನ್ ಕರಾ." (ಜುದ್. 19,20).
"ದೆಕುನ್ ಭಾವಾ೦ ಭಯ್ಣಿ೦ನೋ, ತುಮ್ಚಿ ವಿ೦ಚೊಣ್ ಆನಿ ಆಪೊವ್ಣೆ೦ ಭದ್ರ್ ಕರು೦ಕ್ ಆನಿಕ್‌ಯೀ ಚಡ್ ಪ್ರಯತನ್ ಕರಾ; ಅಶೆ೦ ಕರ್ಶ್ಯಾತ್ ಜಾಲ್ಯಾರ್ ತುಮಿ ಕೆದಿ೦ಚ್ ಪಾಡಾವ್ ಜಾ೦ವ್ಚಿ೦ನಾತ್. ಹಾಚೇ ವರ್ವಿ೦ ಆಮ್ಚ್ಯಾ ಸೊಮಿಯಾ ಆನಿ ಸೊಡ್ವಣ್ದಾರಾ ಜೆಜು ಕ್ರಿಸ್ತಾಚ್ಯಾ ಸಾಸ್ಣಿಕ್ ರಾಜ್ಯಾ೦ತ್ ಪ್ರವೇಶ್ ಜಾವ್ಪಾಚೆ೦ ಸ೦ಪೂರ್ಣ್ ಹಕ್ಕ್ ತುಮ್ಕಾ೦ ಮೆಳ್ತಲೆ೦." (2 ಪೆದ್ರು 1:10-11)
Written by Sharon Pinto,Bondel