ತಿಮೊಥಿಕ್ ದುಸ್ರೆಂ ಪತ್ರ್ 3 : 1 - 9
ಇತ್ಲೆಂ ಸದಾಂಚ್ ಉಗ್ಡಾಸ್ ದವರಾ: ಶೆವೊಟಿಂಚ್ಯಾ ಕಾಳಾರ್ ವಿಶೇಸ್ ಕಷ್ಟ್ ಆನಿ ಅದ್ಚಣೆಚೆ ದೀಸ್ ಯೆತಲೆ. ತವಳ್ ಮನಿಸ್ ಜಾತಲೆ ಸ್ವಾರ್ಥಿ ಆನಿ ದುಡ್ವಾಕ್ ಲಬ್ಧಲ್ಲೆ, ಗರ್ವಿ, ಹಂಕಾರಿ ಆನಿ ಹೆರಾಂಚಿ ನಿಂದಾ ಕರ್ತಲೆ; ಆವಯ್ ಬಾಪಾಯ್ಕ್ ಅವಿಧೇಯ್, ಅನುಪ್ಕಾರಿ, ಅಧರ್ಮಿ; ಮೋಗ್ ಮಾಯ್ಪಾಸ್ ನಾಸ್ಲಲೆ, ಅಸಮಾಧಾನಿ, ನಿಷ್ಕುಚಾರಿ, ಭಾಸ್ಕಳ್, ಹರಾಮಿ ಆನಿ ಸರ್ವ್ ಬರೆಪಣಾಚೆ ವಿರೋಧಿ; ಘಾತ್ಕಿ, ಅಕ್ಕಲ್ ನಾಸ್ಲಲೆ ಆನಿ ಗರ್ವಾನ್ ಫುಗ್ ಲ್ಲೆ; ದೆವಾಚ್ಯಾ ಮೊಗಾ ಬದ್ಲಾಕ್ ಆಪ್ಲ್ಯಾಚ್ ಖುಶಾಲಾಯಾಂಕ್ ಲಬ್ಧಲ್ಲೆ; ಸಮಡ್ತಿಚೆಂ ಸರ್ಲ್ ಘೆವ್ನ್ ಭಿತರ್ಲೊ ಸಾರ್ ಇನ್ಕಾರ್ ಕರ್ತಲೆ. ತಸಲ್ಯಾಂಚಿ ಸಳಾವಳ್ ತುಕಾ ನಾಕಾ. ಹಾಂಚೆಚ್ ಭಿತರ್ಲೆ ತೆ ಘರಾಂಘರಾಂನಿ ವಚುನ್ ಅಸ್ಕತ್ ಸ್ತ್ರಿಯಾಂಕ್ ಭುಲಯ್ತಲೆ; ಪಾತ್ಕಾಂಚ್ಯಾ ಭೊರ್ಯಾ ಪಂದಾ ಅಡ್ಚತಲ್ಯಾ ಆನಿ ಖೊಟ್ಯಾ ವೊಡ್ನ್ಯಾಂಚ್ಯಾ ಲ್ಹಾರಾಂಚೆರ್ ದಲ್ತಲ್ಯಾ ಸ್ತ್ರಿಯಾಂಕ್ ತೆ ಸಸಾರಾಯೆನ್ ಆಪ್ಲೆ ಮುಟಿ ಭಿತರ್ ಧರ್ತಾತ್. ಹ್ಯೊ ಸ್ತ್ರಿಯೊ ಕೊಣಾ ಥಾವ್ನ್ ಯೀ ಶಿಕುಂಕ್ ತಯಾರ್ ಅಸಾತ್. ತರಿಪುಣ್ ಸತಾಚಿ ಪುರ್ತಿ ಸಮ್ಜಣಿ ಘೇಂವ್ಕ್ ಬಿಲ್ಕುಲ್ ಸಕನಾತ್. ಜಾನ್ನೆಸ್ ಆನಿ ಜಾಂಬ್ರೆಸ್ ಮೊಯ್ಜೆ ವಿರೋಧ್ ರಾವ್ಲಲೆಬರಿ ಹೆ ಮನಿಸ್ ಯೀ ಸತಾ ವಿರೋಧ್ ರಾವ್ತಾತ್; ಹೆ ಕುಸ್ಡ್ಯಾ ಮನಾಚೆ ಆನಿ ಭಾವಾರ್ಥಾಚೆ ಪಾರ್ಖಣೆoತ್ ಸಲ್ವಲ್ಲೆ. ಪುಣ್ ಹಾಂಚೆo ಕಾಂಯ್ ಚಡ್ ಕಾಳ್ ಚಲ್ಚೆಂನಾ; ಕಿತ್ಯಾಕ್ ತ್ಯಾ ದೊಗಾಂಚಿ ಪಿಸಾಯ್ ಸಕ್ಟಾಂಕ್ ಕಳೊನ್ ಆಯ್ ಲ್ಲಿ ತಶಿ ಹಾಂಚಿಯೀ ಸಕ್ಟಾಂಕ್ ಕಳ್ತಲಿ