ಮಾತೆವ್ ಪರ್ಮಾಣೆಂ ಸುವಾರ್ತಾ
ಪ್ರಾಸ್ತಾವನ್
ಸುಂಕಾಗಾರಾಂಕ್ ಜುದೆವ್ ಲೋಕ್ ಕಾಂಠಾಳ್ತಾಲೊ.ಜುದೆವ್ ಕುಳಿಯೆಚೆಚ್ ಮನಿಸ್ ತಿರ್ವೊ ವಸೂಲ್ ಕರ್ನ್ ಪರ್ಕಿ ರಾಯಾಂಚಿ ಸೆವಾ ಕರ್ತಾತ್ ಆನಿ ದುರ್ಬಳ್ಯಾಂ ಧಾಕ್ಟ್ಯಾಂಕ್ ಲುಟನ್ ತಾಂಚೊ ದುಡು ಭಿತರ್ ಘಾಲ್ತಾತ್ - ಅಸಲ್ಯಾಂ ಆರೋಪಂಚೆರ್ ಸುಂಕಾಗಾರಾಂಕ್ ನಾಗರಿಕಾಂ ಮಧೆಂ ಸ್ಥಾನ್ ಮಾನ್ ನಾತ್ ಲ್ಲೊ. ಜುದೆವಾಂನಿ ಅಸಲ್ಯಾಂಕ್ ಪಾತ್ಕಿ ಮ್ಹಣುನ್
ಒಲಾಯ್ ಲ್ಲೆಂ . ದೆಕುನ್ ಚ್ ಮತೆವಾಚ್ಯಾ ಘರಾ ಜೆಜು ಜೆವ್ಣಾಕ್ ಗೆಲ್ಲ್ಯಾಕ್ ‘ತೊ ಪಾತ್ಕ್ಯಾಂ ಸಾಂಗಾತಾ ಖಾತಾ ಜೆವ್ತಾ’ ಮ್ಹಳ್ಳೆಂ ದುರ್ಸೊಣೆಂ ತಾಕಾ ಆಯ್ಕುಂಕ್ ಮೆಳ್ ಲ್ಲೆಂ .
ಮಾತೆವಾಚೇ ಧರ್ಮ್ ಪ್ರಚಾರಿಕ್ ಜಿಣಿಯೇ ವಿಶ್ಯಾಂತ್ ಆಮ್ಕಾಂ ಚಡಿತ್ ಕಾಂಯ್ ಕಳಿತ್ ನಾ. ಜೆಜುಚ್ಯಾ ಸ್ವರ್ಗಾರೋಹಣಾ ಉಪ್ರಾಂತ್ ಪಾಲೆಸ್ತಿನಾಂತ್ಲ್ಯಾ ಜುದೆವಾಂ ಮಧೆಂ ತೊ ವಾವುರ್ಲೊ ಮ್ಹಣ್ತಾತ್.ತಾಣೆಂ ಜೆಜು ಕ್ರಿಸ್ತಾಚಿ ಸುವಾರ್ತಾ ಚಡುಣೆ ಕ್ರಿ.ಶ.70, ಮ್ಹಣ್ಜೆ ಜೆರುಜಲೆಮಾಚಿ ದೆಸ್ವಾಟ್ ಜಾಲ್ಯಾ ಉಪ್ರಾಂತ್, ಬರಯ್ ಲ್ಲಿ ಮ್ಹಳ್ಳೊ ಅಂದಾಜ್ ಅಸಾ.
ಮಾತೆವನ್ ಕ್ರಿಸ್ತಾಚಿ ಸುವರ್ತಾ ಏಕ್ ಪ್ರತ್ಯೇಕ್ ಉದ್ದೇಶ್ ದವರ್ನ್ ಬರಯ್ ಲ್ಲಿ. ಜೆಜು ಕ್ರೀಸ್ತ್ ಖರೊಚ್ ಇಸ್ರಾಯೆಲಾಚೊ ಭಾಸಾಯ್ ಲ್ಲೊ ಸೊಡ್ವಣ್ದಾರ್ ಆನಿ ರಾಯ್ ಮ್ಹಣ್ ರುಜು ಕರ್ನ್ ದಾಖೊಂವ್ಚೊಚ್ ತಾಚೊ ಶೆವೂಟ್. ಹ್ಯಾ ಖಾತಿರ್ ಪರ್ನ್ಯಾ ಸೊಲ್ಲ್ಯಾಂತ್ ಸೊಡ್ವಣ್ದಾರಾ ವಿಶ್ಯಾಂತ್ ಬರೊವ್ನ್ ಆಸ್ ಲ್ಲೆ ಸಬಾರ್ ಪ್ರವಾದ್ ಆನಿ ಸಾಂಗ್ಣ್ಯೊ ತೊ ಆಪ್ಲೇ ಸುವಾರ್ತೇಂತ್ ಮುಖಾರ್ ಹಾಡ್ತಾ ಆನಿ ಜೆಜುಚ್ ಕ್ರೀಸ್ತ್ ಮ್ಹಣ್ಜೆ ಸೊಡ್ವಣ್ದಾರ್, ಮ್ಹಣ್ ದಾಖೊವ್ನ್ ದಿತಾ. ಜೆಜು ಕ್ರಿಸ್ತಾಚ್ಯಾ ಉತ್ರಾಂ ಆನಿ ಕರ್ನ್ಯಾ ಮಾರಿಫತ್ ದೆವಾನ್ ಆಪ್ಣಾಚೆಂ ರಾಜ್ಯ್ ಮನ್ಶಾಂ ಮಧೆಂ ಸ್ಥಾಪಿತ್ ಕೆಲಾಂ , ಆನಿ ಜಶೆಂ ಜುದೆವಾಂಕ್ ತಶೆ ಅನ್ಯ ಜಾತಿಂಚ್ಯಾಂಕ್ ಭಾವಾರ್ಥಾಖಾಲ್ ಹ್ಯಾ ರಾಜ್ಯಾಂತ್ ಭಿತರ್ ಸರುಂಕ್ ಆಪೊವ್ಣೆಂ ದಿಲಾಂ ಮ್ಹಣ್ ತೊ ದಾಖಯ್ತಾ.
ಮಾತೆವಾಚೆ ಸುವಾರ್ತೆ ಪರ್ಮಾಣೆಂ ಜೆಜು ನವ್ಯಾ ಇಸ್ರಾಯೆಲ್ ಗಾರಾಂಚೊ ನವೊ ಮೊಯ್ಜೆ. ಆಪ್ಲ್ಯಾ ದೊಂಗ್ರಾ ವಯ್ಲ್ಯಾ ಪ್ರಸಂಗಾ ಮಾರಿಫತ್ ತಾಣೆಂ ನವೊ ಕಾಯ್ದೊ ಪರ್ಗಟ್ ಕೆಲಾ. ದೆಕುನ್ ಜೆಜು ಕ್ರಿಸ್ತಾಚಿ ಸುವರ್ತಾ ಮಾತೆವಾನ್ ಪಾಂಚ್ ಪುಸ್ತಕಾಂ ರುಪಾರ್ ಮಾಂಡುನ್ ಹಾಡ್ಲ್ಯಾ:
ಆದಿವಚನ್ : ಜೆಜು ಕ್ರಿಸ್ತಾಚಿ ವಂಶಾವಳ್ ಆನಿ ತಾಚೆಂ ಬಾಳ್ ಪಣ್ (1:1-2:23)
1.ಸರ್ಗಿಂಚ್ಯಾ ರಾಜ್ಯಾಚಿ ಬರಿ ಖಬರ್ (3:1-7:29).
2.ಗಾಲಿಲೆಯಾಂತ್ ಮಿಸಾಂವ್ ವಾವ್ರ್ (8:1 - 11:1).
3.ಒಪಾರಿಂನಿ ಶಿಕೊವ್ಣ್ (11:2 - 13:52).
4.ಧರ್ಮ್ ದುತಾಂಚಿ ತರ್ಬೆತಿ (13:53 - 18:35)
5.ಜುದೆಯಾಂತ್ ಆನಿ ಜೆರುಜಲೆಮಾಂತ್ ಮಿಸಾಂವ್ (19:1 - 25:46).
ಕಷ್ಟ್ ಮರಣ್ (26:1 - 27: 66)
ಪುನರ್ ಜಿವಂತ್ಪಣ್ ಆನಿ ಸ್ವರ್ಗಾರೋಹಣ್ (26:1 - 28:20).
ಜೆಜು ಕ್ರಿಸ್ತಾಚಿ ವಂಶಾವಳ್
(ಲೂಕ್ 3:23 -38)
1.1ಜೆಜು ಕ್ರಿಸ್ತಾಚಿ ವಂಶವಾಳ್ ಹಿ : ತೊ ಪೂತ್ ದಾವಿದಾಚೊ, ತೊ ಪೂತ್ ಆಬ್ರಾಹಾಮಾಚೊ.2 ಆಬ್ರಾಹಾಮ್ ಇಸಾಕಚೊ ಬಾಪುಯ್, ಇಸಾಕ್ ಜಾಕೊಬಾಚೊ ಆನಿ ಜಾಕೊಬ್ ಜುದಾಚೊ ಆನಿ ತಾಚ್ಯಾ ಭಾವಾಂಚೊ ಬಾಪೊಯ್. 3ಜುದಾ ಫೆರೆಸಾಚೊ ಆನಿ ಜೆರಾಚೊ ಬಾಪೊಯ್ (ತಾಮಾರ್ ತಾಂಚಿ ಅವಯ್); ಫೆರೆಸ್ ಹೆಸ್ರೊನಾಚೊ ಆನಿ ಹೆಸ್ರೊನ್ ಆರಾಮಾಚೊ ಬಾಪುಯ್.
4ಆರಾಮ್ ಆಮಿನದಾಬಾಚೊ ಆನಿ ಆಮಿನದಾಬ್ ನಾಆಸೊನಾಚೊ ಆನಿ ನಾಆಸೊನ್ ಸಾಲ್ಮೊನಾಚೊ ಬಾಪುಯ್. 5ಸಾಲ್ಮೊನ್ ಆಜಾಚೊ ಬಾಪುಯ್, ( ರಾಹಾಬ್ ತಾಚಿ ಆವಯ್); ಬೊಆಜ್ ವೆದಾಚೊ ಬಾಪುಯ್, (ರೂತ್ ತಾಚಿ ಆವಯ್); ಓವೆದ್ ಯೆಸ್ಸೆಚೊ ಆನಿ ಯೆಸ್ಸೆ ದಾವಿದ್ ರಾಯೆಚೊ ಬಾಪುಯ್.
6ದಾವಿದ್ ಸಾಲ್ಮಾಂವ್ಚೊ ಬಾಪುಯ್ (ಉರಿಯಾಚಿ ಬಾಯ್ಲ್ ಸಾಲ್ಮಾಂವ್ಚಿ ಆವಯ್). 7ಸಾಲ್ಮಾಂವ್, ರೆಹೊಬೊಆಮಾಚೊ, ರೆಹೊಬೊಆಮ್ ಆಬಿಯಾಚೊ, ಆನಿ ಆಬಿಯಾ ಆಸಾಚೊ ಬಾಪುಯ್. 8ಆಸಾ ಯೊಸಾಫಾತಾಚೊ, ಯೊಸಾಫಾತ್ ಯೊರಮಾಚೊ, ಆನಿ ಯೊರಾಮ್ ಓಸಿಯಾಚೊ ಬಾಪುಯ್. 9ಓಸಿಯ ಯೊತೆಮಾಚೊ, ಯೊತಾಮ್ ಆಖಾಜಾಚೊ ಆನಿ ಆಖಾಜ್ ಹಿಜ್ ಕಿಯಾಚೊ ಬಾಪುಯ್. 10ಹಿಜ್ ಕಿಯಾ ಮಾನಾಸ್ಸೆಚೊ, ಮಾನಾಸ್ಸೆ ಆಮೊಸಾಚೊ, ಆನಿ ಆಮೊಸ್ ಯೊಸಿಯಾಚೊ ಬಾಪುಯ್. 11ಯೊಸಿಯಾ ಯೆಕೊನಿಯಾಚೊ ಆನಿ ತಾಚಾ ಭಾವಾಂಚೊ
ಬಾಪುಯ್ - ಹಾಂಚ್ಯಾ ಕಾಳಾರ್ ಇಸ್ರಾಯೆಲ್ ಪರ್ಜೆಕ್ ಬಾಬಿಲೊನಾಚ್ಯಾ ಗಾಂವಾಕ್ ಗುಲಾಮ್ ಕರ್ನ್ ವ್ಹೆಲ್ಲಿ.
12ಬಾಬಿಲೊನಾಚೇ ಬಂಧಡೇ ಉಪ್ರಾಂತ್ : ಯೆಕೊನಿಯಾ ಶಅಲ್ತಿಯೆಲಾಚೊ ಆನಿ ಶಅಲ್ತಿಯೆಲ್ ಯೆರುಬಾಬೆಲಾಚೊ ಬಾಪುಯ್. 13ಯೆರುಬಾಬೆಲ್ ಆಬಿಯುದಾಚೊ, ಆಬಿಯುದ್ ಎಲಿಯಾಕಿಮಾಚೊ, ಆನಿ ಎಲಿಯಾಕಿಮ್ ಆಜೊರಾಚೊ ಬಾಪುಯ್. 14ಆಜೊರ್ ಸಾದೊಕಾಚೊ, ಆನಿ ಸಾದೊಕ್ ಆಖಿಮಾಚೊ ಆನಿ ಆಖಿಮ್ ಎಲಿಯುದಚೊ ಬಾಪುಯ್. 15ಎಲಿಯುದ್ ಎಲೆಯಾಜಾರಾಚೊ, ಎಲಿಯಾಜಾರ್ ಮಾಥಾನಚೊ ಆನಿ ಮಾಥಾನ್ ಜಾಕೊಬಾಚೊ ಬಾಪುಯ್. 16ಜಾಕೊಬ್ ಜುಜೆಚೊ ಬಾಪುಯ್. ಜುಜೆಚಿ ಪತಿಣ್ ಮರಿ ಆನಿ ಮರಿಯೇ ಥಾವ್ನ್ ಜಲ್ಮಲೊ ಜೆಜು, ಜಾಕಾ ಮ್ಹಣ್ತಾತ್ ಕ್ರೀಸ್ತ್.
17ಅಶೆಂ ಸರ್ವ್ ಮೆಜುನ್, ಅಬ್ರಾಹಾಮಾ ಥಾವ್ನ್ ದಾವಿದ್ ಪರ್ಯಾನ್ ಚೊವ್ದಾ ತಕ್ಲ್ಯೊ: ದಾವಿದಾ ಥಾವ್ನ್ ಬಾಬಿಲೊನಾಚೇ ಬಂಧಡೇ ಪರ್ಯಾನ್ ಚೊವ್ದಾ ತಕ್ಲ್ಯೊ.
ಜೆಜುಚೆಂ ಜನನ್
(ಲೂಕ್ 2:1-7)
18ಕ್ರೀಸ್ತಾಚೆಂ ಜನನ್ ಹೆ ಪರಿಂ ಜಾಲೆಂ: ತಾಚ್ಯೆ ಮಾತೆ ಮರಿಯೆಕ್ ಜುಜೆಲಾಗಿಂ ಕರಾರ್ ಜಾಲ್ಲೆಂ. ಪುಣ್ ತಾಂಚ್ಯಾ ಲಗ್ನಾ ಪಯ್ಲೆಂ ತಿ ಪವಿತ್ರ್ ಅತ್ಮ್ಯಾ ವರ್ವಿಂ ಗರ್ಭೆಸ್ತ್ ಜಾಲಿ. 19ತಿಚೊ ಪತಿ ಜುಜೆ ನಿತಿವಂತ್ ಮನಿಸ್. ತರ್ ಯಿ ಮರಿಯೆಕ್ ಅಪಕೀರ್ತ್ ಹಾಡುಂಕ್ ತಾಕಾ ಖುಶಿ ನಾತ್ಲಿ. ದೆಕುನ್ ತಾಣೆಂ ತಿಕಾ ಗುಪ್ತಿಂ ಸೊಡ್ಜಿ ಮ್ಹಣುನ್ ಚಿಂತ್ಲೆಂ. 20ಪುಣ್ ತಾಣೆಂ ಅಶಿ ಆಲೋಚನ್ ಕೆಲಿ ತಿತ್ಲಿಸ್, ತಾಕಾ ಸೊಪ್ಣಾಂತ್ ಸರ್ವೆಸ್ಪರಾಚೊ ಏಕ್ ದೂತ್ ದಿಷ್ಟಿ ಪಡ್ಲೊ ಆನಿ ಮ್ಹಣಾಲೊ : " ಜುಜೆ, ದಾವಿದಾಚ್ಯಾ ಪುತಾ, ಮರಿಯೆಕ್ ತುಜಿ ಪತಿಣ್ ಮ್ಹಣ್ ತುಜ್ಯಾ ಘರಾ ಹಾಡುಂಕ್ ಭಿಯೆನಾಕಾ,ಕಿತ್ಯಾಕ್ ತಿಚೆ ಥಂಯ್ ಗರ್ಭ್ ಸಂಭವ್ ಪವಿತ್ರ್ ಅತ್ಮ್ಯಾ ವರ್ವಿಂ ಜಾಲಾ. 21ತಿ ಏಕ್ ಪುತಾಕ್ ಪ್ರಸುತ್ ಜಾತಲಿ; ತುವೆಂ ತಾಕಾ ಜೆಜು ಮ್ಹಣ್ ನಾಂವ್ ದವರುಂಕ್ ಜಾಯ್; ಕಿತ್ಯಾಕ್ ತೊ ಆಪ್ಲೇ ಪರ್ಜೆಕ್ ತಿಚ್ಯಾ ಪಾತ್ಕಾಂತ್ಲಿ ಸೊಡಯ್ತಲೊ."
22ಹೆಂ ಸಗ್ಳೆಂ ಘಡ್ಲೆಂ ಪೂರ್ಣ್ ಜಾಂವ್ಚ್ಯಾಕ್ ಪ್ರವಾದ್ಯಾ ಮಾರಿಫಾತ್ ಸರ್ವೆಸ್ಪಾರನ್ ಮ್ಹಳ್ಳೆಂ ತೆಂ: 23"ಏಕ್ ಆಂಕ್ವಾರ್ ಚಲಿ ಗರ್ಭೆಸ್ತ್ ಜಾತಲಿ ಆನಿ ಏಕ್ ಪುತಾಕ್ ಪ್ರಸುತ್ ಜಾತಲಿ ಆನಿ ತಾಕಾ ‘ಇಮ್ಮಾನುಎಲ್ ’ ಮ್ಹಣುನ್ ಆಪಯ್ತಲೆಂ."
‘ಇಮ್ಮಾನುಎಲ್’ ಮ್ಹಳ್ಯಾರ್, ‘ದೇವ್ ಆಮ್ಚೇ ಸಾಂಗಾತಾ’ ಮ್ಹಣ್ ಅರ್ಥ್. 24ಜುಜೆನ್ ನಿಂದೆಂತ್ಲೊ ಉಠ್ತಚ್, ಸರ್ವೆಸ್ಪರಾಚ್ಯಾ ದುತಾನ್ ಫರ್ಮಾಯ್ ಲ್ಲೇ ಪರ್ಮಾಣೆಂ ಕೆಲೆಂ. ಮರಿಯೆಕ್ ಆಪ್ಲಿ ಪತಿಣ್ ಮ್ಹಣ್ ತಾಣೆಂ ಆಪ್ಲ್ಯಾ ಘರಾ ಹಾಡ್ಲಿ. 25ಪುಣ್ ತಿ ಆಪ್ಲ್ಯಾ ಪುತಾಕ್ ಪ್ರಸುತ್ ಜಾಯ್ಸರ್ ತಾಣೆಂ ತಿಚೇಲಾಗಿಂ ಸಂಭೋಗ್ ಕೆಲೊನಾ.ಆನಿ ಬಾಳ್ಕಾಕ್ ತಾಣೆಂ ‘ಜೆಜು’ ಮ್ಹಣ್ ನಾಂವ್ ದಿಲೆಂ.