ಉದೆಂತಿಚೆ ಜ್ಯೋತಿಶೀ
2.1-2ಜೆಜು ಜುದೇಯಾ ಪ್ರಾಂತಾಚ್ಯಾ ಬೆತ್ಲೆಹೆಮ್ ಶಹರಾಂತ್ ಜಲ್ಮಲೊ. ತವಳ್ ಹೆರೊದ್ ರಾಜ್ವಟ್ ಚಲಯ್ತಾಲೊ. ಜೆಜು ಜಲ್ಮಲ್ಯಾ ಉಪ್ರಾಂತ್ ಉದೆಂತಿ ಥಾವ್ನ್ ಥೊಡೆ ಜ್ಯೋತಿಶಿ ಜೆರುಜಲೆಮಾಕ್ ಯೇವ್ನ್ ವಿಚಾರುಂಕ್ ಲಾಗ್ಲೆ: "ಜುದೆವಾಂಚೊ ರಾಯ್ ಜಾಂವ್ಚ್ಯಾಕ್ ಜಲ್ಮಲಾ ತೊ ಭುರ್ಗೊ ಖಂಯ್ ಅಸಾ? ಉದೆಲ್ಲೆಂ ತೆಂ ತಾಚೆಂ ನೆಕೆತ್ರ್ ಆಮಿ ದೆಖ್ಲೆಂ ಆನಿ ಆಮಿ ತಾಕಾ ನಮಸ್ಕಾರ್ ಕರುಂಕ್ ಮ್ಹಣ್ ಆಯ್ಲ್ಯಾಂವ್." 3ಹೆಂ ಆಯ್ಕುನ್ ಹೆರೊದ್ ರಾಯ್ ಸಗ್ಳೊ ಘಾಬರ್ಲೊ ಆನಿ ತೇಚ್ ಪರಿಂ ಸಗ್ಳೆಂ ಜೆರುಜಲೆಮ್. 4ತವಳ್ ಹೆರೊದಿನ್ ಪ್ರಮುಖ್ ಯಾಜಕಾಂಕ್ ಆನಿ ಲೊಕಚ್ಯಾ ಶಾಸ್ತ್ರ್ಯಾಂಕ್ ಸಾಂಗಾತಾ ಆಪಯ್ಲೆ ಆನಿ ಕ್ರೀಸ್ತ್ ಖಂಯ್ ಜಲ್ಮುಂಚೊ ಆಸ್ಲೊ ತೇ ವಿಶಿಂ ತಾಂಚೇಲಾಗಿಂ ವಿಚಾರ್ ಕೆಲೊ. 5ತಾಂಣಿಂ ಸಾಂಗ್ಲೆಂ " ಜುದೇಯಚ್ಯಾ ಬೆತ್ಲೆಹೆಮ್ ಶಹರಾಂತ್, ಕಿತ್ಯಾಕ್ ಪ್ರವಾದ್ಯಾನ್ ಅಶೆಂ ಬರಯ್ ಲ್ಲೆಂ ಆಸಾ:
6"ಆನಿ ತುಂ ಜುದಾ ಪ್ರಾಂತಾಚ್ಯಾ ಬೆತ್ಲೆಹೆಮಾ,
ಜುದಾಚ್ಯಾ ಮುಖೆಲ್ಯಾಂ ಮಧೆಂ ತುಂ ಬಿಲ್ಕುಲ್ ಅತೀ ಲ್ಹಾನ್ ನ್ಹಯ್;
ಕಾರಣ್ ತುಜೇ ಥಾವ್ನ್ ಉಬ್ಜತಲೊ ಏಕ್ ಫುಡಾರಿ,
ಇಸ್ರಾಯೆಲಾಕ್ , ಮ್ಹಜೇ ಪರ್ಜೆಕ್, ಚಲಯ್ತಲೊ ಗೊವ್ಳಿ."
7ತವಳ್ ಹೆರೊದಿನ್ ತ್ಯಾ ಜ್ಯೋತಿಶ್ಯಾಂಕ್ ಕುಶಿನ್ ಆಪಯ್ಲೆ ಆನಿ ತೆಂ ನೆಕೆತ್ರ್ ತಾಂಕಾ ದಿಷ್ಟಿ ಪಡ್ ಲ್ಲಿ ವೇಳ್ ಘಡಿ ತಾಂಚೇ ಥಾವ್ನ್ ಸಮ್ಜುನ್ ಘೆತ್ಲಿ. 8ಉಪ್ರಾಂತ್ ತಾಣೆಂ ತಾಂಕಾಂ ಬೆತ್ಲೆಹೆಮಾಕ್ ಧಾಡ್ಲೆ ಮ್ಹಣುನ್ : "ವಚಾ ಆನಿ ಬಾಳ್ಕಾಚಿ ಚತ್ರಾಯೆನ್ ಸೊಧ್ನಾ ಕರಾ, ತೊ ತುಮ್ಕಾಂ ಮೆಳ್ತಚ್ ಹಾಂಗಾ ಯೇವ್ನ್ ಮ್ಹಾಕಾ ಖಬರ್ ದಿಯಾ; ಹಾಂವೆಂಯೀ ವಚುನ್ ತಾಕಾ ನಮಸ್ಕಾರ್ ಕರಿಜಯ್ ."
9ರಾಯಾಚೆಂ ಉತರ್ ಆಯ್ಕುನ್ ತೆ ಭಾಯ್ರ್ ಸರ್ನ್ ಗೆಲೆ. ತೆದ್ವಾಂ, ಉದೆತಾನಾ ತಾಂಣಿಂ ಪಳೆಲ್ಲೆಂ ನೆಕೆತ್ರ್ ಪರ್ತ್ಯಾನ್ ತಾಂಚೇ ಮುಖ್ಲ್ಯಾನ್ ವೆತಾಲೆಂ ತೆಂ ಆನಿ ಶೆಕಿಂ ಬಾಳಕ್ ಆಸ್ಲೊ ತ್ಯಾ ಜಾಗ್ಯಾ ವಯ್ರ್ ವಚುನ್ ರಾವ್ಲೆಂ ತೆಂ ತಾಂಕಾಂ ದಿಸ್ಲೆಂ. 10 ನೆಕೆತ್ರ್ ಪಳೆವ್ನ್ ತೆ ಭೋವ್ ಚಡ್ ಸಂತೊಸ್ ಪಾವ್ಲೆ. 11 ಥಂಯ್ ಘರಾಂತ್ ಭಿತರ್ ಸರುನ್ ತಾಂಣಿಂ ಬಾಳ್ಕಾಕ್ ತಾಚೆ ಅವಯ್ ಮರೀಯೆ ಸಾಂಗಾತಾ ದೆಖ್ಲೊ ಆನಿ ಸರ್ಪೊಡನ್ ತಾಕಾ ನಮಸ್ಕಾರ್ ಕೆಲೊ. ಉಪ್ರಾಂತ್ ಆಪ್ಲಿಂ ದಿರ್ವ್ಯಾಂಚಿಂ ಚಿಲಾಂ ಉಗ್ತಿಂ ಕೆರ್ನ್ ತಾಂಣಿಂ ತಾಕಾ ಅರ್ಪಿಲ್ಯೊ ಕಾಣಿಕೊ: ಭಾಂಗಾರ್, ಧುಂಪ್ ಆನಿ ರಗ್ತಾಬೋಳ್.
12 ಪುಣ್ ಹೆರೊದಿ ಸರ್ಶಿಂ ತಾಂಣಿಂ ಪಾಟಿಂ ವಚನಯೆ ಮ್ಹಣ್ ದೆವಾನ್ ತಾಂಕಾಂ ಸೊಪ್ಣಾಂತ್ ತಾಕಿದ್ ದಿಲ್ಲ್ಯಾನ್, ದುಸ್ರಿಚ್ ವಾಟ್ ಧರ್ನ್ ಆಪ್ಲ್ಯಾ ಗಾಂವಾಕ್ ತೆ ಪಾಟಿಂ ಗೆಲೆ.
ಎಜಿಪ್ತಾಕ್ ಪಲಾಯನ್
13 ತೆ ಗೆಲ್ಯಾ ಉಪ್ರಾಂತ್ ಸರ್ವೆಸ್ಪರಾಚೊ ಏಕ್ ದೂತ್ ಜುಜೆಕ್ ಸೊಪ್ಣಾಂತ್ ದಿಷ್ಟಿ ಪಡುನ್ ಮ್ಹಣೊಲೊ: "ಊಠ್, ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆ, ಆನಿ ಎಜಿಪ್ತಾಕ್ ಪೊಳ್ನ್ ವಚ್. ಪರ್ತ್ಯಾನ್ ಹಾಂವ್ ತುಕಾ ಸಾಂಗ್ತಲೊಂ ತ್ಯಾ ಪರ್ಯಾನ್ ಥಂಯ್ಚ್ ರಾವ್. ಬಾಳ್ಕಾಚೊ ಜೀವ್ ಕಾಡ್ಚೇ ಖಾತಿರ್ ಹೆರೊದ್ ತಾಚಿ ಸೊಧ್ನಾ ಕರ್ಚ್ಯಾರ್ ಅಸಾ." 14 ಜುಜೆ ತಕ್ಷಣ್ ಉಠ್ಲೊ, ಆವಯ್ ಭುರ್ಗ್ಯಾಕ್ ಘೆವ್ನ್ ರಾತಾರಾತಿಂ ಎಜಿಪ್ತಾಕ್ ಭಾಯ್ರ್ ಸರ್ನ್ ಗೆಲೊ ಆನಿ ಹೆರೊದಿಚ್ಯಾ ಮರಣಾ ಪರ್ಯಾನ್ ಥಂಯ್ಚ್ ರಾವ್ಲೊ. 15ಆಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಸರ್ವೆಸ್ಪರಾನ್ ಮ್ಹಳೆಂ ತೆಂ:
"ಎಜಿಪ್ತಾ ಥಾವ್ನ್ ಮ್ಹಜ್ಯಾ ಪುತಾಕ್ ಹಾಂವೆಂ ಆಪೊವ್ನ್ ಹಾಡ್ಲೊ."
ಬಾಳ್ಕಾಂಚೊ ಸಂಹಾರ್
16ತ್ಯಾ ಜ್ಯೋತಿಶ್ಯಾಂನಿ ಆಪ್ಣಾಕ್ ಠಕಯ್ಲೊ ಮ್ಹಣ್ ಸಮ್ಜತಚ್, ಹೆರೊದ್ ಸಗ್ಳೊಸ್ ರಾಗಾನ್ ಕಡ್ಕಡ್ಲೊ. ಜ್ಯೋತಿಶಾಂ ಥಾವ್ನ್ ನಿಘಂಟ್ ಕರ್ನ್ ಘೆತ್ ಲ್ಲ್ಯಾ ವೆಳಾಕ್ ಸರಿ ಜಾವ್ನ್ ಬೆತ್ಲೆಹೆಮಾಂತ್ ಆನಿ ಭೊಂವ್ತಣಿಂ ಅಸ್ ಲ್ಲ್ಯಾ ಚಡುಣೆಂ ದೋನ್ ವರ್ಸಾಂಚ್ಯಾ ಸಮೆಸ್ತ್ ಚೆರ್ಕ್ಯಾ ಭುರ್ಗ್ಯಾಂಕ್ ತಾಣೆಂ ಜಣ್ ಧಾಡ್ನ್ ಜಿವೆಶಿಂ ಮಾರಯ್ಲೆ. ತವಳ್ ಪುರ್ಣ್ ಜಾಲೆಂ ಯೆರೆಮಿಯಾ ಪ್ರವಾದ್ಯಾ ಮಾರಿಫಾತ್ ಮ್ಹಳ್ಳೆಂ ತೆಂ:
18" ರಾಮಾಂತ್ ಆಯ್ಕಲಿ ಏಕ್ ಜಾದ್ ಬೊಬ್:
ರುದಾನ್ ಆನಿ ಕಠಿಣ್ ವಿಳಾಪ್;
ರಾಖೆಲ್ ಆಪ್ಲ್ಯಾ ಭುರ್ಗ್ಯಾಂ ಪಾಸತ್ ರಡ್ತಾಲಿ;
ತಿಂ ಆಂತರ್ಲಿಂ ದೆಕುನ್ ಬುಜ್ವಣ್ ಘೆಂವ್ಕ್ ತಿ ಆಯ್ಕನಾ ಜಾಲಿ."
ಎಜಿಪ್ತಾ ಥಾವ್ನ್ ಪಾಟಿಂ ಪರ್ತೊಣೆಂ
19-20 ಹೆರೊದ್ ಮೊರ್ತಚ್ ಸರ್ವೆಸ್ಪರಾಚೊ ದೂತ್ ಎಜಿಪ್ತಾಂತ್ ಜುಜೆಕ್ ಸೊಪ್ಣಾಂತ್ ದಿಷ್ಟಿ ಪಡುನ್ ಸಾಂಗಿಲಾಗ್ಲೊ: " ಊಠ್, ಬಾಳ್ಕಾಕ್ ಆನಿ ತಾಚೇ ಆವಯ್ಕ್ ಘೆ ಆನಿ ಇಸ್ರಾಯೆಲಾಚ್ಯಾ ಗಾಂವಾಕ್ ಪಾಟಿಂ ವಚ್, ಕಿತ್ಯಾಕ್ ಭುರ್ಗ್ಯಾಚೊ ಜೀವ್ ಕಾಡುಂಕ್ ಸೊಧ್ತಾಲೆ ತೆ ಆತಾಂ ಮೊರ್ನ್ ಪಾವ್ಲ್ಯಾತ್". 21 ಜುಜೆ ಉಠ್ಲೊ ಆನಿ ಬಾಳ್ಕಾಕ್ ಆನಿ ತಾಚೆ ಆವ್ಯ್ಕ್ ಘೆವ್ನ್ ಇಸ್ರಾಯೆಲಾಚ್ಯಾ ಗಾಂವಾಕ್ ಪಾಟಿಂ ಆಯ್ಲೊ 22-23 ಪುಣ್ ಹೆರೊದಿ ಉಪ್ರಾಂತ್ ತಾಚೊ ಪೂತ್ ಆರ್ಖೆಲಾವ್ ಜುದೇಯಾಚೊ ರಾಯ್ ಜಾಲಾ ಮ್ಹಣ್ ಆಯ್ಕುನ್, ಥಂಯ್ ವಚುಂಕ್ ತೊ ಭಿಯೆಲೊ. ಆನಿ ಏಕ್ ಸೊಪ್ಣಾಂತ್ ತಾಕಾ ಕಳಿತ್ ಕೆಲ್ಲೇ ಪರ್ಮಾಣೆಂ ತೊ ಗಾಲಿಲೆಯಾ ಪ್ರಾಂತಾಕ್ ಗೆಲೊ ಆನಿ ಥಂಯ್ ನಜರೆತ್ ನಾಂವಾಚ್ಯಾ ಶಹರಾಂತ್ ವಚುನ್ ರಾವ್ಲೊ. ಆಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಮ್ಹಳ್ಳೆಂ ತೆಂ: " ತಾಕಾ ನಜರೆತ್ ಗಾರ್ ಮ್ಹಣ್ ಆಪಯ್ತಲೆ."