ಸಾಬ್ಬಾತಾ ವಿಶ್ಯಾಂತ್ಲೆಂ ಸವಾಲ್
(ಮಾರ್ಕ್ 2:23-28; ಲೂಕ್ 6:1-5)
12 1 ತ್ಯಾ ದಿಸಾಂನಿ ಏಕ್ ಸಾಬ್ಬಾತಾ ದಿಸಾ, ಜೆಜು ಗೊಂವಾಚ್ಯಾ ಶೆತಾಂ ಮಧ್ಲ್ಯಾನ್ ಚಮ್ಕತಾಲೊ. ತಾಚ್ಯಾ ಶಿಸಾಂಕ್ ಭುಕ್ ಲಾಗ್ ಲ್ಲಿ, ದೆಕುನ್ ತೆ ಕಣ್ಶೋ ಮೋಡ್ನ್ ಖಾಂವ್ಕ್ ಲಾಗ್ಲೆ. 2 ಫಾರಿಜೆವಾಂನಿ ಹೆಂ ಪಳೆವ್ನ್ ಜೆಜುಲಾಗಿಂ ಮ್ಹಳೆಂ : " ಪಳೆ ತುಜೆ ಶಿಸ್ ಸಾಬ್ಬಾತಾಚ್ಯಾ ದಿಸಾ ಕರುಂಕ್ ಆಡ್ವಾರ್ ಲ್ಲೆಂ ಕರ್ತಾತ್! " 3 ಪುಣ್ ಜೆಜುನ್ ತಾಂಕಾಂ ಜಾಪ್ ದಿಲಿ: "ದಾವಿದಾನ್, ಆಪ್ಣಾಕ್ ಆನಿ ಆಪ್ಲ್ಯಾ ಸಾಂಗಾತ್ಯಾಂಕ್ ಭುಕ್ ಲಾಗ್ ಲ್ಲ್ಯಾ ವೆಳಾರ್ ಕಿತೆಂ ಕೆಲ್ಲೆಂ ಮ್ಹಣ್ ತುಮಿ ವಾಚುನ್ ನೆಣಾತ್? 4 ದೆವಾಚ್ಯಾ ಘರಾಂತ್ ಭಿತರ್ ಸರುನ್, ಫಕತ್ ಯಾಜಕಾಂಕ್ ಶಿವಾಯ್, ತಾಕಾ ಜಾಂವ್ ತಾಚ್ಯಾ ಸಾಂಗಾತ್ಯಾಂಕ್ ಜಾಂವ್, ಖಾಂವ್ಕ್ ಆಡ್ವಾರ್ ಲ್ಲೆ ಸಮರ್ಪಿತ್ ಉಂಡೆ ತಾಂಣಿಂ ಖೆಲೆನಾಂತ್ ವೇ? 5 ಹರ್ಯೇಕ್ ಸಬ್ಬಾತಾಚ್ಯಾ ದಿಸಾ ದೆವಾಳಾಂತ್ ಯಾಜಕ್ ಸಾಬ್ಬಾತಾಚೊ ವಿಶೆವ್ ಮೊಡ್ತಾತ್ ತರ್ ಯೀ ತೆ ಗುನ್ಯಾಂವ್ಕಾರ್ ಜಾಯ್ನತ್- ಮ್ಹಣ್ ಮ್ಹಳಾಂ ತೆಂ ನಿಯಮ್ ಶಾಸ್ತ್ರಾಂತ್ ತುಮಿ ವಾಚುನ್ ನೆಣಾಂತ್ ? 6 ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: "ದೆವಾಳಾ ಪ್ರಾಸ್ ವರ್ತೊ ಹಾಂಗಾ ಆಸಾ. 7 ಮ್ಹಾಕಾ ಜಾಯ್ ದಯಾ, ಬಲಿದಾನ್ ನ್ಹಯ್’ -ಹ್ಯಾ ಉತ್ರಾಂಚೊ ಅರ್ಥ್ ತುಮ್ಕಾಂ ಕಳಿತ್ ಆಸ್ ಲ್ಲೊ ಜಾಲ್ಯಾರ್, ನಿರಪ್ರಾಧ್ಯಾಂಕ್ ತುಮಿ ಕೆದಿಂಸ್ ಅಪ್ರಾದಿ ಕರ್ತೆನಾಂತ್. ತರ್ ಮನ್ಶಾಪೂತ್ ಸಾಬ್ಬಾತಾಚೊ ಧನಿ."
ಆಕುಡ್ಲಲ್ಯಾ ಹಾತಾಚೊ ಮನಿಸ್
(ಮಾರ್ಕ್ 3:1-6; ಲೂಕ್ 6:6-11)
9 ಉಪ್ರಾಂತ್ ಜೆಜು ಥಂಯ್ ಥಾವ್ನ್ ಮುಖಾರ್ ವಚುನ್ ತಾಂಚ್ಯಾ ಸಿನಾಗೊಗಾಂತ್ ರಿಗ್ಲೊ. 10 ಥಂಯ್ ಆಕುಡ್ಲಲ್ಯಾ ಹಾತಾಚೊ ಏಕ್ ಮನಿಸ್ ಆಸ್ಲೊ. ದೆಕುನ್ ಥಂಯ್ ಆಸ್ಲಾಲ್ಯಾ ಥೊಡ್ಯಾಂನಿ ಜೆಜುಕ್ ಗುನ್ಯಾಂವ್ಕಾರ್ ಕರ್ಚ್ಯಾ ಇರಾದ್ಯಾನ್ ಸವಾಲ್ ಕೆಲೆಂ: "ಸಾಬ್ಬಾತಾಚ್ಯಾ ದಿಸಾ ಗೂಣ್ ಕರ್ಚೆಂ ಕಾಯ್ದ್ಯಾ ಪರ್ಮಾಣೆಂ ಸಾರ್ಕೆಂವೆ?" 11 ಪುಣ್ ಜೆಜುನ್ ತಾಂಕಾಂ ಜಾಪ್ ದಿಲಿ: " ಕೊಣ್ ತೊ ತುಮ್ಚೆ ಭಿತರ್ಲೊ, ಆಪ್ಣಾಕ್ ಆಸಾ ತೊ ಎಕಚ್ ಬಕ್ರೊ ಸಾಬ್ಬಾತಾ ದಿಸಾ ಫೊಂಡಾಂತ್ ಪಡತ್ ಜಾಲ್ಯಾರ್, ತಾಕಾ ಧರ್ನ್ ವಯ್ರ್ ಕಾಡಿಸೊನಾ? 12 ತರ್ ಮನಿಸ್ ಬಕ್ರ್ಯಾ ಪ್ರಾಸ್ ಕಿತ್ಲ್ಯಾಕ್ ಯೀ ಚಡ್ ಮೊಲಾಚೊ ನ್ಹಯ್ ? ದೆಕುನ್ ಸಾಬ್ಬಾತಾ ದಿಸಾ ದಯಾಳ್ ಕರ್ನಿ ಕರ್ಚಿ ಕಾಯ್ದ್ಯಾ ಪ್ರಕಾರ್ ಮ್ಹಣಜಯ್." 13 ತಿತ್ಲ್ಯಾರ್ ಆಕುಡ್ಲಲ್ಯಾ ಹಾತಾಚ್ಯಾಕ್ ಪಳೆವ್ನ್, "ತುಜೊ ಹಾತ್ ಲಾಂಬ್ ಸೊಡ್" ಮ್ಹಳೆಂ ತಾಣೆಂ. ತ್ಯಾ ಮನ್ಶಾನ್ ತೊ ಲಾಂಬ್ ಸೊಡ್ಲೊ. ತೆದ್ವಾಂ ತೊ ಹಾತ್ ತಾಚ್ಯಾ ದುಸ್ರ್ಯಾ ಹಾತಾಬರಿಚ್ ಸಾಫ್ ಸಾರ್ಕೊ ಜಾಲೊ. 14 ತಿತ್ಲ್ಯಾರ್ ಫಾರಿಜೆವ್ ಸಿನಾಗೊಗಾಂತ್ಲೆ ಭಾಯ್ರ್ ಗೆಲೆ ಆನಿ ಜೆಜುಕ್ ಕಸೊ ಲಗಾಡ್ ಕಾಡ್ಚೊಗಾಯ್ ಮ್ಹಣುನ್ ಮತ್ಲಬ್ ಕರುಂಕ್ ಲಾಗ್ಲೆ.
ದೆವಾನ್ ವಿಂಚುನ್ ಕಾಡ್ ಲ್ಲೊ ಚಾಕರ್
15 ಜೆಜು ತೆಂ ಜಾಣಾಜಾವ್ನ್ ಥಂಯ್ಚೊ ಗೆಲೊ. ತರಿಪುಣ್ ಸಬಾರ್ ಜಣ್ ತಾಚ್ಯಾ ಪಾಟ್ಲ್ಯಾನ್ ಗೆಲೆ ಆನಿ ತಾಂಚ್ಯಾ ಸರ್ವ್ ಪಿಡೆಸ್ತಾಂಕ್ ತಾಣೆಂ ಗೂಣ್ ಕೆಲಿಂ. 16 ಆಪ್ಣಾಚೆಂ ನಾಂವ್ ಪರ್ಗಟ್ ಕರಿನಯೆ ಮ್ಹಣುನ್ ತಾಣೆಂ ತಾಂಕಾಂ ಖಡಕ್ಕ್ ತಾಕಿದ್ ದಿಲಿ. 17 ಆಶೆಂ ಸಿದ್ಧ್ ಜಾಂವ್ಕ್ ಪಾವ್ಲೆಂ ಇಸಾಯಿಯಾ ಪ್ರವಾದ್ಯಾನ್ ಸಾಂಗ್ ಲ್ಲೆಂ ತೆಂ:
18 ಪಳೆಯಾ ಮ್ಹಜೊ ಸೆವಕ್, ಹಾಂವೆಂ ವಿಂಚುನ್ ಕಾಡ್ಲಲೊ.
ಮ್ಹಜೊ ಮೊಗಾಚೊ, ಮ್ಹಾಕಾ ಭೋವ್ ಮಾನ್ವಲ್ಲೊ;
ತಾಚೆರ್ ಮ್ಹಜೊ ಪ್ರೇರಕ್ ಅತ್ಮೊ ಹಾಂವ್ ಧಾಡ್ತಲೊಂ,
ಆನಿ ತೊ ಮ್ಹಜೆಂ ತೀರ್ಪ್ ಸರ್ವ್ ಪರ್ಜಾಂಕ್ ಪಾಚಾರ್ತಾಲೊ.
19 ತೊ ಝಗಡ್ಚೊನಾ ವಾ ಬೊಬಾಟ್ ಮಾರಿಸೊನಾ,
ರಸ್ತ್ಯಾಂನಿ ವ್ಹಡ್ಲ್ಯಾನ್ ಭಾಶಣಾಂ ಕರ್ಚೊನಾ,
20 ನುರ್ಗೊನ್ ಗೆಲ್ಲೊ ಚಿವೊ ತೊ ಮಡ್ಚೊನಾ,
ಮಿಣ್ಕುಂಚಿ ವಾತ್ ಪಾಲ್ವೊಂವ್ಚೊನಾ;
ನಿತಿಕ್ ಜಯ್ತ್ ಲಾಭಸರ್ ತೊ ಅಸೊ ಚಲ್ತಲೊ
21 ತಾಚ್ಯಾ ನಾಂವಾಚೆರ್ ರಾಷ್ಟ್ರಾಂ ಠೆವ್ತಲಿಂ ಭರ್ವಸೊ."
ಜೆಜು ಆನಿ ಬೆಎಲ್ಜೆಬುಲ್
(ಮಾರ್ಕ್ 3:20-30; ಲೂಕ್ 11:14-23 , 12:10)
22 ತವಳ್ ದೆಂವ್ಚಾರ್ ಲಾಗ್ ಲ್ಲ್ಯಾ ಎಕ್ಲ್ಯಾ ಕುರ್ಡ್ಯಾ ಮೊನ್ಯಾಕ್ ಜೆಜು ಸರ್ಶಿಂ ಹಾಡ್ಲೊ ಆನಿ ಜೆಜುನ್ ತಾಕಾ ಬರೊ ಕೆಲೊ; ಆನಿ ದೆಂವ್ಚಾರ್ ಲಾಗ್ ಲ್ಲೊ ತೊ ಮನಿಸ್ ಆತಾಂ ಉಲೊಂವ್ಕ್ ಆನಿ ಪಳೆಂವ್ಕ್ ಸಕ್ಲೊ. 23 ಲೋಕ್ ಸಗ್ಳೆ ವಿಜ್ಮಿತ್! "ಹೊ ಕಾಂಯ್ ದಾವಿದಾಚೊ ಪೂತ್ ಜಾವ್ಯೆತ್ ಗಾಯ್?" ಮ್ಹಣುನ್ ತೆ ವಿಚಾರಿ, 24 ಪುಣ್ ಫಾರಿಜೆವ್ ತೆಂ ಆಯ್ಕುನ್ ಮ್ಹಣಾಲೆ: "ದೆಂವ್ಚಾರಾಂಚ್ಯಾ ಮುಖಿ ಬೆಎಲ್ಜೆಬುಲಾಚೇ ಶಾತೆನ್ ತೊ ದೆಂವ್ಚಾರ್ ಸೊಡಯ್ತಾ." 25 ತಾಂಚೇ ಮತಿಂತ್ಲಿಂ ಚಿಂತ್ನಾಂ ಸಮ್ಜುನ್ ಜೆಜು ತಾಂಕಾಂ ಮ್ಹಣಲೊ: " ಖಂಯ್ಚೆಯೀ ರಾಜ್ಯ್ ಅಂತರ್ ಝಗ್ಡ್ಯಾಂನಿ ವಾಂಟೆ ಫಾಂಟೆ ಜಾಯ್ತ್ ಜಾಲ್ಯಾರ್, ತೆಂ ವಿಬಾಡ್ ಜಾಯ್ನಾಸ್ತಾಂ ಉರಾನಾ; ತಶೆಂಚ್ ಆಪ್ಲೇಚ್ ಭಿತರ್ ಪಂಗಡ್ ವಿಂಗಡ್ ಜಾಲ್ಲೆಂ ಹರ್ಯೇಕ್ ಶಹರ್ ಜಾಂವ್ ಘರ್ ಜಾಂವ್, ದೆಸ್ವಾಟ್ ಜಾಲ್ಯಾ ಶಿವಾಯ್ ರಾವಾನಾ. 26 ದೆಕುನ್ ಸೈತಾನ್ ಚ್ ಜರ್ ಸೈತಾನಾಕ್ ಧಾಂವ್ಡಾಯ್ತಾ ತರ್ ಆಪ್ಣಾಚೇಚ್ ವಿರೋಧ್ ತೊ ಝಜ್ತಾ ಮ್ಹಣ್ ಜಾಲೆಂ. ತರ್ ತಾಚೆಂ ರಾಜ್ಯ್ ಉರ್ಚೆಂ ಮ್ಹಳ್ಯಾರ್ ಯೀ ಕಶೆಂ? 27 ಹಾಂವ್ ಬೆಎಲ್ಜೆಬುಲ್ ಸಕ್ತೆನ್ ದೆಂವ್ಚಾರ್ ಧಾಂವ್ಡಾಯ್ತಾ ಜಾಲ್ಯಾರ್, ತುಮ್ಚೆ ಶಿಸ್ ಕೊಣಾಚೇ ಸಕ್ತೆನ್ ಧಾಂವ್ಡಾಯ್ತಾತ್ ? ಆಶೆಂ ತೆಚ್ ತುಮಿ ಅಪ್ರಾದಿ ಮ್ಹಣ್ ದಾಖಯ್ತಾತ್. 28 ಪುಣ್ ದೆವಾಚ್ಯಾ ಅತ್ಮ್ಯಾ ಉದೆಶಿಂ ಹಾಂವ್ ದೆಂವ್ಚಾರ್ ಧಾಂವ್ಡಾಯ್ತಾಂ ಜಾಲ್ಯಾರ್, ದೆವಾಚೆಂ ರಾಜ್ಯ್ ತುಮ್ಚೇ ಥಂಯ್ ಯೇವ್ನ್ ಜಾಲಾಂ ಮ್ಹಣ್ಚ್ಯಾಕ್ ದುಬಾವ್ ನಾ.
29 " ಏಕ್ ಬಳ್ವಂತ್ ಮನ್ಶಾಕ್ ಪಯ್ಲೊ ಬಾಂಧುನ್ ಘಲ್ಯಾ ಶಿವಾಯ್, ಕೊಣೆಂಯೀ ತಾಚ್ಯಾ ಘರಾಂತ್ ಭಿತರ್ ಸರುನ್, ತಾಚಿ ಜಿಂದ್ಗಿ ಲುಟ್ಚಿ ಕಶಿ? ತಾಕಾ ಬಾಂಧುನ್ ಘಾಲ್ಯಾ ಉಪ್ರಾಂತ್ ಮಾತ್ರ್ ತಾಚೆಂ ಘರ್ ಲುಟುಂಕ್ ಜಾತಾ. 30 ಜೊ ಕೊಣ್ ಮ್ಹಜೇ ಪಕ್ಷೆಕ್ ನಾ, ತೊ ಮ್ಹಜೇ ವಿರೋಧ್ ಚ್ ಸಯ್! ಆನಿ ಜೊ ಕೊಣ್ ಮ್ಹಜೇ ಸವೆಂ ಪುಂಜಾಯ್ನಾ, ತೊ ನಿಜಾಕ್ ಯೀ ಶಿಂಪ್ಡಾಯ್ತಾ. 31 ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ: ಮನ್ಶಾನ್ ಆಧಾರ್ಲಲ್ಯಾ ಹರ್ಯೇಕ್ ಪಾತ್ಕಾಕ್ ಆನಿ ಉಚಾರ್ಲಲೇ ಹರ್ಯೇಕ್ ನಿಂದೆಕ್ ಬೊಗ್ಸಣೆಂ ಮೆಳತ್, ಪುಣ್ ಪವಿತ್ರ್ ಅತ್ಮ್ಯಾಚೇ ವಿರೋಧ್ ಉಚಾರ್ಲಲೇ ನಿಂದೆಕ್ ಬೊಗ್ಸಣೆಂಚ್ ನಾ. 32 ಮನ್ಶಾ ಪುತಾಚೆರ್ ವಿರೋಧ್ ಕೊಣ್ ಯೀ ಉಲಯ್ತ್ ಜಾಲ್ಯಾರ್, ತಾಕಾ ಬೊಗ್ಸಣೆಂ ಮೆಳತ್; ಪುಣ್ ಪವಿತ್ರ್ ಆತ್ಮ್ಯಾ ವಿರೋಧ್ ಉಲಯ್ತಲ್ಯಾಕ್ , ಜಾಂವ್ ಹ್ಯಾ ಸಂಸಾರಾಂತ್, ಜಾಂವ್ ಫುಡ್ಲ್ಯಾ ಸಂಸಾರಾಂತ್, ಬೊಗ್ಸಣೆಂಚ್ ಮೆಳ್ಚೆಂನಾ.
ರೂಕ್ ಆನಿ ತಾಚೆಂ ಫೊಳ್
(ಮಾತೆವ್ 7:16-17; ಲೂಕ್ 6:44-45)
33 " ಏಕ್ ರೂಕ್ ಬರೊ ಮ್ಹಣಾ, ತಾಚೆಂ ಫೊಳ್ ಯೀ ಬರೆಂ; ಏಕ್ ರೂಕ್ ಪಾಡ್ ಮ್ಹಣಾ, ತಾಚೆಂ ಫೊಳ್ ಯೀ ಸುಮಾರ್. ಫೊಳಾ ಥಾವ್ನ್ ನ್ಹಯ್ ಗಿ ರೂಕ್ ಪಾರ್ಕೊಂಚೊ? 34 ಹತ್ತ್ ಆಗ್ಗ್ಯಾಚ್ಯಾ ಲಾಂನೋ! ತುಮಿ ಖೊಟೆ ಮ್ಹಣ್ತಚ್ ಬರೆಂ ಕಶೆಂ ಉಲಯ್ತಲ್ಯಾತ್? ಕಾಳ್ಜಾಂತ್ ಭರೊನ್ ಆಸಾ ತೆಂಚ್ ನ್ಹಯ್ ವೆ ಮನಿಸ್ ತೊಂಡಾನ್ ಉಚರ್ತಾ? 35 ಬರೊ ಮನಿಸ್ ಆಪ್ಲ್ಯಾ ಬರ್ಯಾ ಭಂಡಾರಾಂತ್ಲ್ಯೊ ಬರ್ಯೊ ವಸ್ತು ಭಾಯ್ರ್ ಕಾಡ್ತಾ; ಆನಿ ಖೊಟೊ ಮನಿಸ್ ಆಪ್ಲ್ಯಾ ಖೊಟ್ಯಾ ಭಂಡಾರಾಂತ್ಲ್ಯೊ ಖೊಟ್ಯೊ ವಸ್ತು ಭಯ್ರ್ ಕಾಡ್ತಾ. 36 ದೆಕುನ್ ಹಾಂವ್ ತುಮ್ಕಾಂ ಸಾಂಗ್ತಾಂ : ಮನ್ಶಾಂನಿ ಉಲಯ್ಲಲ್ಯಾ ಉಪ್ಕಾರಾ ಪಡನಾತ್ಲಲ್ಯಾ ಹರ್ಯೇಕ್ ಉತ್ರಾಚೆಂ ಲೆಖ್ ಝಡ್ತೆಚ್ಯಾ ದಿಸಾ ದಿಂವ್ಚೆಂ ಪಡ್ತಲೆಂ. 37 ಅಶೆಂ ತುಜ್ಯಾಚ್ ಉತ್ರಾಂ ವರ್ವಿಂ ತುಂ ಅಪ್ರಾಧಿ ವಾ ನಿರಪ್ರಾಧಿ ಮ್ಹಣುನ್ ತೀರ್ಪ್ ಜಾತಲೆಂ."
ಯೊನಾಚಿ ಋಣಾ
(ಮಾತೆವ್ 16:1-4 ; ಮಾರ್ಕ್ 8:11-12; ಲೂಕ್ 11:16,29-32)
38 ತವಳ್ ಶಾಸ್ತ್ರ್ಯಾಂ ಆನಿ ಫಾರಿಜೆವಾಂ ಭಿತರ್ಲ್ಯಾ ಥೊಡ್ಯಾಂನಿ ತಾಚೇಲಾಗಿಂ ಉಲೊವ್ನ್ ಮ್ಹಳೆಂ: ಮೆಸ್ತ್ರಿ, ತುಜಿ ಏಕ್ ಋಣಾ ಆಮ್ಕಾಂ ಪಳೆಜಯ್". 39 ಪುಣ್ ಜೆಜುನ್ ತಾಂಕಾಂ ಜಾಪ್ ದಿಲಿ: " ಖೊಟಿ ಆನಿ ವಿಶ್ವಾಸ್ ಭಂಗ್ ಲ್ಲಿ ಸಂತತ್ ಮಾತ್ರ್ ಋಣಾ ಮಗ್ತಾ ! ಯೊನಾ ಪ್ರವಾದ್ಯಾಚೇ ಋಣೇ ಶಿವಾಯ್ ದುಸ್ರಿ ಋಣಾ ತುಮ್ಕಾಂ ಮೆಳ್ಚಿನಾ. 40 ಜಶೆಂ ಯೊನಾ ಪ್ರವಾದಿ ತೀನ್ ದೀಸ್ ಆನಿ ತೀನ್ ರಾತಿ ಮಾಶಾಚ್ಯಾ ಪೊಟಾಂತ್ ಆಸ್ ಲ್ಲೊ, ತಶೆಂ ಮನ್ಶಾಪೂತ್ ತೀನ್ ದೀಸ್ ಆನಿ ತೀನ್ ರಾತಿ ಭಿಮಿಚ್ಯಾ ಗರ್ಭಾಂತ್ ಅಸ್ತಲೊ. 41 ಝಡ್ತೆಚ್ಯಾ ದಿಸಾ ನಿನಿವೆಚೊ ಲೋಕ್ ಹೇ ಸಂತತಿ ಸವೆಂ ಉಬೊ ರಾವ್ತಲೊ ಆನಿ ತಿಕಾ ಗುನ್ಯಾಂವ್ಕಾರಿಣ್ ಕರ್ತಲೊ. ಕಿತ್ಯಾಕ್ ಯೊನಾಚಿ ಶಿಕೊವ್ಣ್ ಆಯ್ಕುನ್ ತಾಂಣಿಂ ಆಪ್ಲಿ ಜಿಣಿ ಬದಲ್ಲಿ. ಪುಣ್ ಯೊನಾ ಪ್ರಾಸ್ ವರ್ತೊ ಹಾಂಗಾ ಆಸಾ ! 42 ಝಡ್ತೆಚ್ಯಾ ದಿಸಾ ದಕ್ಷಿಣೆಚಿ ರಾಣಿ ಹೇ ಸಂತತಿ ಸವೆಂ ಉಬಿ ರಾವ್ತಲಿ ಆನಿ ತಿಕಾ ಗುನ್ಯಾಂವ್ಕಾರಿಣ್ ಕರ್ತಲಿ, ಕಿತ್ಯಾಕ್ ಸಾಲ್ಮಾಂವ್ಚ್ಯಾ ಜಾಣ್ವಾಯೆಚಿಂ ಉತ್ರಾಂ ಆಯ್ಕುಂಚೇ ಖಾತಿರ್ ತಿ ಸಂಸಾರ್ ಪಯ್ಣ್ ಕರ್ನ್ ಆಯ್ ಲ್ಲಿ. ಪುಣ್ ಸಾಲ್ಮಾಂವ್ ಪ್ರಾಸ್ ವರ್ತೊ ಹಾಂಗಾ ಆಸಾ! "
ದೆಂವ್ಚಾರ್ ಪಾಟಿಂ ಯೆತಾ
(ಲೂಕ್ 11:24-26)
43-44 ಏಕ್ ಮನ್ಶಾಕ್ ಲಾಗ್ ಲ್ಲೊ ದೆಂವ್ಚಾರ್ ತಾಚೇ ಥಾವ್ನ್ ಭಾಯ್ರ್ ಗೆಲ್ಯಾ ಉಪ್ರಾಂತ್ ಆಸ್ರೊ ಸೊಧುನ್ ಆರಣ್ಯಾಂತ್ ಭೊಂವ್ತಾ; ಪುಣ್ ಥಂಯ್ ತಾಕಾ ಆಸ್ರೊ ಮೆಳನಾ ಜಾಲ್ಯಾರ್, ’ ಹಾಂವ್ ಭಾಯ್ರ್ ಸರ್ನ್ ಆಯ್ ಲ್ಲ್ಯಾ ಘರಾಚ್ ಪಾಟಿಂ ವೆತಾಂ’ ಮ್ಹಣ್ತಾ ತೊ. ಅಶೆಂ ಪಾಟಿಂ ಯೆತಚ್ ತೆಂ ಘರ್ ರಿತೆಂ ಆಸ್ಲಲೆಂ, ಝಡ್ಲಲೆಂ ಆನಿ ನಿತಳ್ ದವರ್ಲಲೆಂ ತೊ ಪಳೆತಾ. 15 ತಿತ್ಲ್ಯಾರ್ ತೊ ಭಾಯ್ರ್ ವೆತಾ ಆನಿ ಆಪ್ಣಾ ಪ್ರಾಸ್ ಚಡ್ ನಷ್ಟೆ ಹೆರ್ ಸಾತ್ ದೆಂವ್ಚಾರ್ ಸಾಂಗಾತಾ ಆಪೊವ್ನ್ ಹಾಡ್ತಾ. ತೆ ಸರ್ವ್ ಭಿತರ್ ರಿಗುನ್ ಥಂಯ್ ಆಪ್ಲೆಂ ಠಾಣೆಂ ಕರ್ತಾತ್; ಆನಿ ತ್ಯಾ ಮನ್ಶಾಚಿ ನಿಮಾಣಿ ಗತ್ ಪಯ್ಲೇ ಪ್ರಾಸ್ ಪಾಸ್ಟ್ ಜಾತಾ. ತಶೆಂಚ್ ಘಡ್ತಲೆಂ ಹೇ ಖೊಟೇ ಸಂತತಿಕ್ ! "
ಜೆಜುಚಿ ಆವಯ್ ಆನಿ ಭಾವ್ ಭಯ್ಣಿ
(ಮಾರ್ಕ್ 3:31-35; ಲೂಕ್ 8:19-21)
46 ಆಶೆಂ ಲೊಕಾಚ್ಯಾ ಜಮ್ಯಲಾಗಿಂ ಆನಿಕ್ ಯೀ ತೊ ಉಲೊವ್ನ್ ಆಸ್ತಾನಾ, ತಾಚಿ ಆವಯ್ ಆನಿ ತಾಚೆ ಭಾವ್ ಥಂಯ್ಸರ್ ಯೇವ್ನ್ ಪಾವ್ಲಿಂ. ಆನಿ ತಾಚೇಲಾಗಿಂ ಉಲೊವ್ಕ್ ಮ್ಹಣ್ ಭಾಯ್ರ್ ರಾವ್ಲಿಂ. 47 ತವಳ್ ಕೊಣ್ ಎಕ್ಲ್ಯಾನ್ ತಾಕಾ ವಚುನ್ ಸಾಂಗ್ಲೆಂ: " ಅಳೆ , ತುಜಿ ಆವಯ್ ಆನಿ ತುಜೆ ಭಾವ್ ಬಾಯ್ರ್ ರಾವ್ಲ್ಯಾಂತ್, ತಾಂಕಾಂ ತುಜೇಲಾಗಿಂ ಉಲಯ್ಜಯ್ ಖಂಯ್." ಪುಣ್ ಜೆಜುನ್ ಆಪ್ಣಾಕ್ ಹಿ ಖಬರ್ ದಿಲ್ಲ್ಯಾಕ್ ಜಾಪ್ ದೀವ್ನ್ ಮ್ಹಳೆಂ: " ಮ್ಹಜಿ ಅವಯ್ ಕೊಣ್? ಆನಿ ಮ್ಹಜೆ ಭಾವ್ ಕೊಣ್? 49 ಆನಿ ಆಪ್ಲ್ಯಾ ಶಿಸಾಂಕ್ ಹಾತ್ ದಾಖೊವ್ನ್ ತೊ ಮ್ಹಣಾಲೊ: " ಹಾಂಗಾ ಆಸಾತ್ ಮ್ಹಜಿ ಆವಯ್ ಆನಿ ಮ್ಹಜೆ ಭಾವ್. ಜೊ ಕೊಣ್ ಸರ್ಗಿಂ ಆಸಾ ತ್ಯಾ ಮ್ಹಜ್ಯಾ ಬಾಪಾಚಿ ಖುಶಿ ಕರ್ತಾ, ತೊಚ್ ಮ್ಹಜೊ ಭಾವ್, ಮ್ಹಜಿ ಭಯ್ಣ್ ಆನಿ ಮ್ಹಜಿ ಆವಯ್ !"