ಕುಮ್ಗಾರಕ್ ತಯಾರಾಯ್
41. ಆಧಾರ್ ಮಾಗ್
ಏ ಮ್ಹಜ್ಯಾ ದೆವಾ ಹೊ ಕ್ರಿಸ್ತ್ - ಪ್ರಸಾದ್ ಹಾಂವೆಂ ಬರೊ ಕರ್ನ್ ಘೆಂವ್ಕ್ ತುಂ ಮ್ಹಕಾ ಕುಮಕ್ ಕರ್. ಮರಿಯೆ ಮ್ಹಜೆ ಮೊಗಳಿ ಮಾಯೆ ಮ್ಹಜೆ ಖಾತಿರ್ ಜೆಜು ಲಾಗಿಂ ಮಾಗ್. ತುಮಿ ಸಮೆಸ್ತ್ ಭೊಡ್ವ್ಯಾಂನೊ ಆನಿ ಭಕ್ತಾಂನೊ ಮ್ಹಜೆ ಪಾಸತ್ ವಿನತಿ ಕರಾ. ಮ್ಹಜ್ಯಾ ಮೊಗಾಚ್ಯಾ ರಾಕಣ್ ಭೊಡ್ವ್ಯಾ, ದೆವಾಚೆ ಆಲ್ತಾರಿ ಲಾಗಿಂ ಮ್ಹಕಾ ವ್ಹರ್.
42 ಭಾವಾರ್ಥಚೆಂ ವಿಧಾನ್
ಯೆ ಮ್ಹಜ್ಯಾ ಸೊಮ್ಯಾ ಜೆಜು ಹ್ಯಾ ಭೊವ್ ಪೊವಿತ್ರ್ ಸಾಕ್ರಾಮೆಂತಾಂತ್ ತುಂ ಖರೊಚ್ ಹಾಜರ್ ಆಸಾಯ್ ಮ್ಹಣ್ ಹಾಂವ್ ಸತ್ಮಾನ್ತಾಂ ಹಾಂಗಾ ಆಸಾ ತುಜಿ ಕೂಡ್ ಆನಿ ರಗತ್ ತುಜೊ ಅತ್ಮೊ ಆನಿ ದೇವ್ ಪಣ್ . ತುವೆಂ ಸಾಂಗ್ಲಾಂ ದೆಕುನ್ ಹಾಂವ್ ತೆಂ ಸತ್ಮಾನ್ತಾಂ. ಸೊಮ್ಯಾ, ಮ್ಹಜೊ ಭಾವಾರ್ಥ್ ಚಡಯ್.
43.ಆರಾಧಾನಾಚೆಂ ವಿಧಾನ್
ಸೊಮ್ಯಾ ತುಂ ಜಾವ್ನ್ ಆಸಾಯ್ ಮ್ಹಜೊ ರಸ್ನಾರ್ ಮ್ಹಜೊ ಸೊಡ್ವಣ್ದಾರ್ ಮ್ಹಜೊ ಸರ್ವ್ ಪದ್ವೆದಾರ್ ಧನಿ ತುಂ ಮ್ಹಜೆಂ ಅಧಿಕ್ ವ್ಹಡ್ ಆನಿ ಏಕ್ ಚ್ ಭಾಗ್. ಸೊಮ್ಯಾ ಹ್ಯಾ ಪವಿತ್ರ್ ಸಾಕ್ರಾಮೆಂತಾಂತ್ ಹಾಂವ್ ತುಕಾ ಆರಾಧನ್ ಕರ್ತಾಂ.
44 ಖಾಲ್ತ್ಯಾಪಣಾಚೆಂ ವಿಧಾನ್
ಯೆ ದೆವಾ ಹಾಂವ್ ಏಕ್ ನೊರ್ಭಾಗಿ ಪಾತ್ಕಿ ಜೆಜು ಕ್ರಿಸ್ತಾಚಿ ಕೂಡ್ ಆನಿ ರಗತ್ ಸೆಂವ್ಕ್ ಮ್ಹಜ್ಯಾ ಖೊಟೆಪಣಾ ವರ್ವಿಂ ಮ್ಹಕಾ ಫಾವೊ ನ್ಹಯ್. ಸೊಮ್ಯಾ ತುಂ ಮ್ಹಜೆ ಭಿತರ್ ಯೇಂವ್ಕ್ ಮ್ಹಕಾ ಫಾವೊ ನ್ಹಯ್ ಪೂಣ್ ಏಕ್ ಸಬ್ದ್ ಮಾತ್ರ್ ಉಚಾರ್ ಆನಿ ಮ್ಹಜ್ಯಾ ಅತ್ಮ್ಯಾಕ್ ಭಲಾಯ್ಕಿ ಮೆಳ್ತಲಿ.
45. ದುಖಿಚೆ ವಿಧಾನ್
ಯೆ ಮ್ಹಜ್ಯಾ ದೆವಾ, ಸಗ್ಳೆ ಜೆಣಿಯೆಚಿಂ ಸರ್ವ್ ಮ್ಹಜಿಂ ಪಾತ್ಕಾಂ ಹಾಂವ್ ಕಾಂಠಾಳ್ತಾಂ ತಾಂಚಿ ಹಾಂವ್ ದುಖ್ ಧರ್ತಾಂ ಕಿತ್ಯಾಕ್ ತುಕಾ, ಇತ್ಲ್ಯಾ ಬರ್ಯಾ ಮ್ಹಜ್ಯಾ ದೆವಾಕ್ ತಾಂಚೆ ವರ್ವಿಂ ಅಕ್ಮಾನ್ ಜಾಲಾ. ಹ್ಯಾ ಮುಖಾರ್ ಹಾಂವ್ ಕೆದಿಂಚ್ ಪಾತಕ್ ಕರ್ಚೊನಾಂ. ಮ್ಹಜ್ಯಾ ದೆವಾ, ಮ್ಹಜಿ ಬಿರ್ಮತ್ ಪಾವ್, ಮ್ಹಜಿ ಕಾಕುಳ್ತ್ ಕರ್. ಮ್ಹಕಾ ಭೊಗ್ಶಿ.
46 ಮೊಗಾಚೆಂ ಆನಿ ಅತ್ರೆಗಾಚೆಂ ವಿಧಾನ್
ಸ್ವಾದಿಕ್ ಜೆಜು ಹಾಂವ್ ತುಜೊ ಮೋಗ್ ಕರ್ತಾಂ ತುಂ ಮ್ಹಜೊ ದೇವ್ ತುಂ ಮ್ಹಜೊ ಸೊಡ್ವಣ್ದಾರ್. ಸಗ್ಳ್ಯಾ ಮ್ಹಜ್ಯಾ ಕಾಳ್ಜಾನ್ ಆನಿ ಸರ್ವ್ ವಸ್ತುಂ ಪ್ರಾಸ್ ಚಡ್ ಹಾಂವ್ ತುಜೊ ಮೋಗ್ ಕರ್ತಾಂ ಹ್ಯಾ ಸಾಕ್ರಾಮೆಂತಾಂತ್ ತುಕಾ ಸೆಂವ್ಕ್ ಹಾಂವ್ ಅತ್ರೆಗ್ತಾಂ. ಭೊವ್ ಸ್ವಾದಿಕ್ ಜೆಜು, ತುಂ ಮ್ಹಜ್ಯಾ ದುರ್ಬಳ್ಯಾ ಕಾಳ್ಜಾಂತ್ ಯೆ ಆನಿ ಮ್ಹಾಕಾ ತುಜೆಂ ಮಾಸ್ ಆನಿ ರಗತ್ ದಿ ಮ್ಹಾಕಾ ಸಗ್ಳೊಚ್ ದಿ ಕೂಡ್ ಆನಿ ರಗತ್, ಅತ್ಮೊ ಆನಿ ದೇವ್ ಪಣ್ ತುಜೆ ಸಾಂಗಾತಾ ಹಾಂವೆಂ ಸಾಸ್ಣಾಚ್ಯಾ ಸಾಸ್ಣಾಕ್ ಜಿಯೆಂವ್ಚ್ಯಾಕ್.
ಕ್ರಿಸ್ತ್ - ಪ್ರಸಾದಾಚಿ ಘಡಿ ಯೆತಚ್, ಸವ್ಕಾಸ್ ಊಠ್, ಹಾತ್ ಜೊಡ್. ದೊಳೆ ಧರ್ಣಿಕ್ ಲಾವ್ನ್ ಆನಿ ಮನ್ ಸಗ್ಳೆಂ ದೆವಾಚೆರ್ ದವರ್ನ್ ಮಣ್ಸುಗೆನ್ ಆಲ್ತಾರಿ ಕಡೆ ವಚ್ . ತುಜ್ಯಾ ಮಾನಾ ಭಿತರ್ ಹೆ ಪರಿಂ ಮಾಗತ್ ರಾವ್:
ಏ, ಮ್ಹಜ್ಯಾ ಜೆಜು ಹಾಂವ್ ತುಜೊಚ್ ಹಾಂವ್ ತುಕಾ ಸತ್ಮನ್ತಾಂ ತುಜೆರ್ ಭರ್ವಸೊ ದವರ್ತಾಂ ಸಗ್ಳ್ಯಾ ಕಾಳ್ಜಾನ್, ಹಾಂವ್ ತುಜೊ ಮೋಗ್ ಕರ್ತಾಂ ತುಕಾ ಘೆಂವ್ಕ್ ಮ್ಹಕಾ ಫಾವೊ ನ್ಹಯ್. ಪೂಣ್ ತುಂ ಮ್ಹಜೊ ಮೋಗ್ ಕರ್ತಾಯ್ , ಏ ಜೆಜು, ಮ್ಹಜೆಂ ನಿರ್ಭಾಗ್ಪಣ್ ಪಳೆನಾಕಾ ಆಂಕ್ವಾರ್ ಮರಿಯೆ, ಮ್ಹಾಕಾ ಆಶಿರ್ವಾದ್ ದಿ.
ಕ್ರಿಸ್ತ್- ಪ್ರಸಾದ್ ಘೆವ್ನ್ ಜಾತಚ್, ತುಜ್ಯಾ ಸೊಡ್ವಣ್ದಾರಾ ಮುಖಾರ್, ಥೊಡೊ ವೇಳ್ ದಿಂಬಿ ಘಾಲ್ನ್ ರಾವ್. ತುಜ್ಯಾ ಕಾಳ್ಜಾಂತ್ ಥಾವ್ನ್ ಜೆಜು ಕಡೆ ಉಲಯ್. ತಾಕಾ ನಮಸ್ಕಾರ್ ಕರ್ , ಅರ್ಗಾಂ ದಿ, ಜಾಯ್ ಜಾಲ್ಲಿ ಕುರ್ಪಾ ಮಾಗ್. ಚಡ್ ಕರ್ನ್ ಸಮೆಸ್ತ್ ತುಜ್ಯಾ ಪಾತ್ಕಾಂಚೆಂ ಭೊಗ್ಸಣೆಂ, ತುಜ್ಯಾ ಮುಖೆಲ್ ವಾಯ್ಟ್ ವೊಡ್ನೆಚೆರ್ ಜಯ್ತ್ ವ್ಹರುಂಕ್ ಪ್ರತ್ಯೇಕ್ ಕುರ್ಪಾ ಮಾಗ್
ಕ್ರಿಸ್ತ್ -ಪ್ರಸಾದಾ ಉಪ್ರಾಂತ್ಲಿ ಹರೇಕ್ ಘಡಿ ಭಾಂಗಾರಾಚಿ, ತಾಚೆ ವರ್ನಿ ಚಡ್ ಮೊಲಾಧಿಕ್ ವೇಳ್ ಸಗ್ಳೆ ಆಮ್ಚೆ ಜೆಣಿಯೆಂತ್ ಮೆಳ್ಚೊನಾ. ದೆಕುನ್ ಆತಾಂ ಏಕ್ ಚ್ ಘಡಿ ಸಯ್ತ್ ಪಾಡ್ ಕರಿನಾಕಾ; ಏಕ್ ಕಾಲ್ದೆಂ ವರ್ ಪುಣ್ ಯೀ ಅರ್ಗಾಂ ದೀತ್ ರಾವ್