ರಾಜ್ಯಾಚ್ಯೊ ಒಪಾರಿ
(ಮಾರ್ಕ್ 4:1; ಲೂಕ್ 8:4)
13 1 ತ್ತಾಚ್ ದಿಸಾ ಜೆಜು ತ್ಯಾ ಘರಾಂತ್ಲೊ ಭಾಯ್ರ್ ಸರುನ್ ಸರೋವರಾಚೇ ವೆಳೇರ್ ವಚುನ್ ಬಸ್ಲೊ. 2 ಆಪ್ಣಾ ಭೊಂವ್ತಣಿಂ ಎಕ್ಟಾಂಯ್ ಜಾಲ್ಲೆಂ ಲೊಕಾಚೆ ಜಮೆ ಪಳೆವ್ನ್, ತೊ ಎಕ್ ದೊಣಿರ್ ಚಡ್ಲೊ. ಲೋಕ್ ಸಕ್ಕಡ್ ವೆಳೇರ್ ಉಬೊ ರಾವ್ಲೊ.
ಒಂಪಿಯಾಚಿ ಒಪಾರ್
(ಮಾರ್ಕ್ 4:2-9; ಲೂಕ್ 8:5-8)
3 ತವಳ್ ಜೆಜು ಒಪಾರಿಂನಿ ಸಬಾರ್ ಸಂಗ್ತಿ ತಾಂಚೇಲಾಗಿಂ ಉಲಯ್ಲೊ. ತಾಣೆಂ ಮ್ಹಳೆಂ : " ಏಕ್ ಒಂಪ್ಪಿ ಒಂಪುಕ್ ಭಾಯ್ರ್ ಸರ್ನ್ ಗೆಲೊ. 4 ತೊ ಒಂಪ್ತಾನಾ, ಥೊಡೆಂ ಬಿಂ ಮೆರೇರ್ ಪಡ್ಲೆಂ, ಆನಿ ಆಕಾಸಾಚ್ಯಾ ಸುಕ್ಣ್ಯಾಂನಿ ಯೇವ್ನ್ ತೆಂ ಖೆಲೆಂ. ಹೆರ್ ಥೊಡೆಂ ಚಡ್ ಮಾತಿ ನಾತ್ಲಲೇ ಖಡ್ಪಿ ಸುವಾತೆರ್ ಪಡ್ಲೆಂ. ಹಾಂಗಾ ಮಾತಿ ವಯ್ಲೆಬಾರ್ ಚ್ ಆಸ್ಲಲೇ ವರ್ವಿಂ ವೆಗಿಂಚ್ ತೆಂ ಕಿರ್ಲಲೆಂ. 6 ಪುಣ್ ಸುರ್ಯೊ ಉದೆವ್ನ್ ಯೆತಚ್ ತೆಂ ಸುಕೊನ್ ಗೆಲೆಂ.7 ಹೆರ್ ಥೊಡೆಂ ಕಾಂಟ್ಯಾಝಾಡಾಂ ಮಧೆಂ ಪಡ್ಲೆಲೆಂ ಆನಿ ಕಾಂಟ್ಯಾಝಾಡಾಂ ವಾಡ್ತಾನಾ ತಾಕಾ ತಾಂಣಿಂ ಚಿರ್ಡುನ್ ಮಾರ್ಲೆಂ. 8 ಆನಿ ಹೆರ್ ಥೊಡೆಂ ಬರೇ ಸುವಾತೆರ್ ಪಡ್ಲೆಂ ಆನಿ ಥಂಯ್ ವಾಡೊನ್ ಫೊಳ್ ದಿಂವ್ಕ್ ಪಾವ್ಲೆಂ: ಥೊಡೆಂ ಶೆಂಭರ್ ವಾಂಟೆ, ಥೊಡೆಂ ತೀಸ್. 9 ತುಮ್ಕಾಂ ಕಾನ್ ಆಸಾತ್ ಜಾಲ್ಯಾರ್ ಆಯ್ಕಾ! "
ಒಪಾರಿಚೊ ಶೆವಟ್
(ಮಾರ್ಕ್ 4:10-12; ಲೂಕ್ 8:9-10)
10 ಉಪ್ರಾಂತ್ ಶಿಸ್ ಫುಡೆಂ ಯೇವ್ನ್ ಜೆಜುಲಾಗಿಂ ವಿಚಾರಿಲಾಗ್ಲೆ: " ತುಂ ತಾಂಚೇಲಾಗಿಂ ಒಪಾರಿಂನಿ ಕಿತ್ಯಾಕ್ ಉಲಯ್ತಾಯ್ ? " 11 ತಾಣೆಂ ತಾಂಕಾಂ ಜಾಪ್ ದಿಲಿ : " ಕಿತ್ಯಾಕ್ ಮ್ಹಳ್ಯಾರ್, ಸರ್ಗಿಂಚ್ಯಾ ರಾಜ್ಯಾಚೆ ಗುಟ್ ಸಮ್ಜುಂಕ್ ತುಮ್ಕಾಂ ಫಾವೊ ಜಾಲಾಂ. ತಾಂಕಾಂ ಫಾವೊ ಜಾಂವ್ಕ್ ನಾ. 12 ಜಾಚೇಲಾಗಿಂ ಆಸಾ, ತಾಕಾ ಭರೊನ್ ವೊಮ್ತಸರ್ ದಿತಲೆ ಆನಿ ಜಾಚೇಲಾಗಿಂ ಕಾಂಯ್ ನಾ. ತಾಚೇಲಾಗಿಂ ತಾಚೆಂ ಆಸ್ಲಲೆಂ ಸಯ್ತ್ ಕಾಡ್ನ್ ವ್ಹರ್ತಲೆ. ದೆಕುನ್ ಹಾಂವ್ ತಾಂಚೇಲಾಗಿಂ ಒಪಾರಿಂನಿ ಉಲಯ್ತಾಂ: ಕಿತ್ಯಾಕ್ ತೆ ಪಳೆತಾತ್, ತರ್ ಯೀ ತಾಂಕಾಂ ದಿಸಾನಾ; ಆನಿ ತೆ ಕಾನ್ ದಿತಾತ್, ತರ್ ಯೀ ತಾಂಕಾಂ ಆಯ್ಕನಾ ವಾ ಸಮ್ಜನಾ. 14 ಅಶೆಂ ತಾಂಚೇ ಥಂಯ್ ಸಿದ್ಧ್ ಜಾತಾ ಇಸಾಯಿಯಾಚೊ ಪ್ರವಾದ್ :
‘ತುಮಿ ಪರ್ತ್ಯಾನ್ ಪರ್ತ್ಯಾನ್ ಕಾನ್ ದಿತಲ್ಯಾತ್,
ತರ್ ಯೀ ತುಮ್ಕಾಂ ಸಮ್ಜೊಂಚೆಂನಾ,
ದೊಳೆ ಸೊಡ್ನ್ ಪಳೆತಲ್ಯಾತ್, ತರ್ ಯೀ ತುಮ್ಕಾಂ ದಿಸ್ಚೆಂನಾ.
15 ಕಾರಣ್, ಹೇ ಪರ್ಜೆಂಚೆಂ ಕಾಳಿಜ್ ದಾಡ್ಡೆಂ ಜಾಲಾಂ,
ತಾಂಚೆ ಕಾನ್ ಜಾಲ್ಯಾತ್ ದಾಟ್ ಆನಿ
ದೊಳ್ಯಾಂಕ್ ಪಡ್ಲಾಂ ಧಾಂಪಣ್.
ನಾ ತರ್ , ತಾಂಚ್ಯಾ ದೊಳ್ಯಾಂಕ್ ದಿಸ್ತೆಂ,
ತಾಂಚ್ಯಾ ಕಾನಾಂಕ್ ಆಯ್ಕತೆಂ, ತಾಂಚೇ ಮತಿಂಕ್ ಸಮ್ಜತೆಂ,
ಅಶೆಂ ಮ್ಹಜೇ ಥಂಯ್ ತೆ ಪಾಟಿಂ ಪರ್ತತೆ,
ಆನಿ ಹಾಂವ್ ತಾಂಕಾಂ ಗೂಣ್ ಕರ್ತೊಂ.’
16 ಪುಣ್ ಭಾಗಿ ದೀಷ್ಟ್ ಆಸ್ಲಲೆ ತುಮ್ಚೆ ದೊಳೆ, ಆಯ್ಕುಂಕ್ ಸಕತ್ ಆಸ್ಲಲೆ ತುಮ್ಚೆ ಕಾನ್ ! 17 ಸತ್ ಚ್ ಹಾಂವ್ ತುಮ್ಕಾಂ ಸಾಂಗ್ತಾಂ : ಸಬಾರ್ ಪ್ರವಾದಿ ಆನಿ ಭಾಗೆವಂತ್ ತುಮಿ ಪಳೆತಾತ್ ತೆಂ ಪಳೆಂವ್ಕ್ ಆಶೆಲ್ಲೆ, ಪುಣ್ ತಾಂಕಾಂ ಪಳೆಂವ್ಕ್ ಮೆಳ್ಳೆಂನಾ, ಆನಿ ತುಮಿ ಆಯ್ಕಾತಾತ್ ತೆಂ ಆಯ್ಕುಂಕ್ ಆಶೆಲ್ಲೆ, ಪುಣ್ ತಾಂಕಾಂ ತೆಂ ಆಯ್ಕುಂಕ್ ಮೆಳ್ಳೆಂನಾ.
ಜೆಜು ಒಂಪ್ಪಿಯಾಚೇ ಒಪಾರಿಚೊ ಅರ್ಥ್ ಸಾಂಗ್ತಾ
(ಮಾರ್ಕ್ 4:13-20; ಲೂಕ್ 8:11-15)
18 " ತರ್, ಆಯ್ಕಾ ತುಮಿ, ಒಂಪ್ಪಿಯಾಚೇ ಒಪಾರಿಚೊ ವಿವರ್ : 19 ಜೊ ಕೊಣ್ ರಾಜ್ಯಾ ವಿಶ್ಯಾಂತ್ಲೆಂ ಉತರ್ ಆಯ್ಕತಾ ಪುಣ್ ತೆಂ ಮತಿಂತ್ ವ್ಹರಿನಾ, ತೊ ಮೆರೇರ್ ಪಡ್ಲಲ್ಯಾ ಬಿಯಾಬರಿ. ದೆಂವ್ಚಾರ್ ಯೆತಾ ಆನಿ ತಾಚ್ಯಾ ಕಾಳ್ಜಾಂತ್ ಒಂಪ್ಲಾಂ ತೆಂ ಕಾಡ್ನ್ ವ್ಹರ್ತಾ. 20 ಖಡ್ಪಿ ಸುವಾತೆರ್ ಪಡ್ಲಲೆಂ ಬಿಂ, ಉತರ್ ಆಯ್ಕಲ್ಲ್ಯಾಫರಾ ಸಾಂತೊಸಾನ್ ಘೆತಾ ತಾಕಾ ಸರಿ ಕರ್ಯೆತ್. 21 ಪುಣ್ ತಾಚೇ ಥಂಯ್ ಪಾಳ್ ರೊಂಬನಾತ್ ಲ್ಲೇ ವರ್ವಿಂ, ಥೊಡೊಚ್ ಕಾಳ್ ತೆಂ ಉರ್ತಾಂ; ಉತ್ರಾ ಪಾಸತ್ ಕಷ್ಟ್ ದಗ್ಧಣಿ ಉಠತ್ ಜಾಲ್ಯಾರ್, ತೊ ತೆಂ ಘಡಿಯೆನ್ ಸಾಂಡ್ತಾ. 22 ಜೊ ಕೊಣ್ ಉತರ್ ಆಯ್ಕತಾ, ಪುಣ್ ಹ್ಯಾ ಸಾಂಸಾರಾಚ್ಯಾ ರಾಟಾವಳಿಂನಿ ಆನಿ ಧನಾಚೇ ಭುಲಿನ್ ತೆಂ ಚಿರ್ಡಿತಾ ಆನಿ ಫಳಾವಿಣ್ ಕರ್ತಾ, ತೊ ಕಾಂಟ್ಯಾಝಾಟ್ಕುಟಾಂ ಮಧೆಂ ಪಡ್ಲಲ್ಯಾ ಬಿಯಾಬರಿ. 23 ಶೆಕಿಂ ಬರೇ ಸುವಾತೆರ್ ಪಡ್ಲಲೆಂ ಬೀಂ, ಉತರ್ ಆಯ್ಕುನ್ ಮತಿಂತ್ ವ್ಹರ್ತಲ್ಯಾಕ್ ಸರಿ ಕರ್ಯೆತ್. ತಸಲೊ ಫೊಳ್ ದಿತಾ, ಎಕ್ಲೊ ಶೆಂಭರ್, ಎಕ್ಲೊ ಸಾಟ್, ಆನ್ಯೆಕ್ಲೊ ತೀಸ್ ವಾಂಟ್ಯಾಂನಿ,"
ನೆರಾಚಿ ಒಪಾರ್
24 ಜೆಜುನ್ ತಾಂಕಾಂ ಆನ್ಯೇಕ್ ಒಪಾರ್ ಸಾಂಗ್ಲಿ: " ಸರ್ಗಿಂಚೆಂ ರಾಜ್ಯ್ ಅಶೆಂ ಮ್ಹಣ್ಯೆತ್ : ಎಕ್ಲ್ಯಾನ್ ಆಪ್ಲ್ಯಾ ಶೆತಾಂತ್ ಬರೆಂ ಬೀಂ ಒಂಪ್ಲೆಂ. 25 ಪುಣ್ ಸಕ್ಕಡ್ ನಿದೊನ್ ಆಸ್ತಾಂ ತಾಚೊ ದುಸ್ಮಾನ್ ಆಯ್ಲೊ ಆನಿ ಗೊಂವಾ ಮಧೆಂ ನೇರ್ ಒಂಪುನ್ ಗೆಲೊ. 26 ಪಾಲ್ವಿ ಫುಟೊನ್ ಕಣ್ಸಾಂ ಯೆತಾನಾ, ನೇರ್ ಯೀ ದಿಷ್ಟಿ ಪಡ್ಲೊ. 27 ತವಳ್ ಧನಿಯಾಚೆ ವಾವ್ರಾಡಿ ಯೇವ್ನ್ ತಾಚೇಲಾಗಿಂ ಮ್ಹಣಾಲೆ: ’ ಧನಿಯಾ, ತುಜ್ಯಾ ಶೆತಾಂತ್ ತುವೆಂ ಬರೆಂ ಬೀಂ ಒಂಪ್ ಲ್ಲೆಂ ನ್ಹಯ್? ತರ್ ತಾಂತುಂ ನೇರ್ ಖಂಯ್ ಥಾವ್ನ್ ಆಯ್ಲೊ?’ 28 ಧನಿಯಾನ್ ಜಾಪ್ ದಿಲಿ : ‘ಏಕ್ ದುಸ್ಮಾನಾಚೆಂ ಕಾಮ್ ಜಾಯ್ನಯ್ ಹೆಂ!’ ‘ ತರ್ ಆಮಿ ವಚುನ್ ತೊ ಹುಮ್ಟುನ್ ಕಾಡ್ನ್ ರಾಸ್ ಘಾಲುಂವೆ? ’ ಮ್ಹಣುನ್ ವಾವ್ರಾಡ್ಯಾಂನಿ ತಾಚೇಲಾಗಿಂ ವಿಚಾರ್ಲೆಂ. 29 ತೊ ಮ್ಹಣಾಲೊ: ‘ನಾಕಾ, ನೇರ್ ಬುಡ್ದಿತಾನಾ ಸಾಂಗಾತಾಚ್ ತುಮಿ ಗೋಂವ್ ಯೀ ಉಮ್ಟಿಶಾತ್. 30 ಲುವಾಣ್ ಪರ್ಯಾನ್ ದೋನ್ ಯೀ ಸಾಂಗಾತಾ ವಾಡೊಂಕ್ ಸೊಡಾ; ಲುಂವ್ಚೇ ವೆಳಾರ್ ಲುಂವ್ತಲ್ಯಾಂಕ್ ಹಾಂವ್ ಸಾಂಗ್ತಲೊಂ : ಪಯ್ಲೆಂ ನೇರ್ ಎಕ್ಟಾಂಯ್ ಕರಾ ಆನಿ ಉಜ್ಯಾಕ್ ಲಾಂವ್ಕ್ ಪೆಂಡಿಯೋ ಬಾಂಧಾ, ಉಪ್ರಾಂತ್ ಗೋಂವ್ ಮ್ಹಜ್ಯಾ ತುಪ್ಯಾಂತ್ ಭರಾ’."
ಸಾಸ್ವಾಚ್ಯಾ ಬಿಯಾಚಿ ಒಪಾರ್
(ಮಾರ್ಕ್ 4:30-32; ಲೂಕ್ 13:18-19)
31 ಆನ್ಯೇಕ್ ಒಪಾರ್ ಜೆಜುನ್ ತಾಂಚೇ ಮುಖಾರ್ ಘಾಲಿ: " ಸರ್ಗಿಂಚೆಂ ರಾಜ್ಯ್ ಏಕ್ ಮನ್ಯಾನ್ ಆಪ್ಲ್ಯಾ ಶೆತಾಂತ್ ಒಂಪ್ಲಲ್ಯಾ ಏಕ್ ಸಾಸ್ವಾಬೆಯಾಬರಿ. 32 ನಿಜಾಕ್ ಯೀ ತೆಂ ಬೀಂ ಸರ್ವ್ ಬಿಯಾಂ ಪಯ್ಕಿ ಲ್ಹಾನ್ , ಪುಣ್ ವಾಡ್ತಚ್ ಸರ್ವ್ ಝಾಡಾಂ ಪ್ರಾಸ್ ತೆಂ ವ್ಹಡ್ ಜಾತಾ ಆನಿ ರೂಕ್ ಜಾತಾನಾ ಅಂತ್ರಾಳಾಚಿಂ ಸುಕ್ಣಿಂ ಯೇವ್ನ್ ತಾಚ್ಯಾ ಖಾಂದಿಯಾಂನಿ ಘೊಂಟೆರ್ ಬಾಂಧ್ತಾತ್ ."
ಖಮಿರಾಚಿ ಒಪಾರ್
(ಲೂಕ್ 13:20-21)
33 ಜೆಜುನ್ ತಾಂಕಾಂ ಆನ್ಯೇಕ್ ಒಪಾರ್ ಸಾಂಗ್ಲಿ: " ಸರ್ಗಿಂಚೆಂ ರಾಜ್ಯ್ ಏಕ್ ಸ್ತ್ರಿಯೆನ್ ತೀನ್ ಕಳ್ಶೊ ಪಿಟಾಂತ್ ಭರ್ಶಿಲ್ಲ್ಯಾ ಖಮಿರಾಬರಿ. ಕ್ರಮೇಣ್ ತೆಂ ಪೀಟ್ ಸಗ್ಳೆಂ ಫುಗ್ಲೆಂ."
ಜೆಜುನ್ ಕಿತ್ಯಾಕ್ ಒಪಾರಿ ವಾಪರ್ಲ್ಯೊ ?
(ಮಾರ್ಕ್ 4:33-34)
34 ಹ್ಯೊ ಸರ್ವ್ ಸಂಗ್ತಿ ಜೆಜು ಒಪಾರಿಂನಿ ಲೊಕಾಲಾಗಿಂ ಉಲಯ್ಲೊ; ಒಪಾರಿವಿಣೆಂ ತಾಂಚೇಲಾಗಿಂ ತೊ ಉಲಯ್ನಾತ್ ಲ್ಲೊ. 35 ಅಶೆಂ ಪೂರ್ಣ್ ಜಾಲೆಂ ಪ್ರವಾದ್ಯಾ ಮಾರಿಫತ್ ಸಾಂಗ್ ಲ್ಲೆಂ ತೆಂ:
‘ ಒಪಾರಿ ವಾಪರುನ್ ಹಾಂವ್ ಉಲಯ್ತಲೊಂ,
ಸಂಸಾರಾಚೇ ಸ್ಥಾಪನೇ ಥಾವ್ನ್ ಗುಪಿತ್ ಆಸ್ ಲ್ಲ್ಯೊ ಸಂಗ್ತಿ ಹಾಂವ್ ಪರ್ಗಟ್ ಕರ್ತಲೊಂ.’
ಜೆಜು ನೆರಾಚೇ ಒಪಾರಿಚೊ ಅರ್ಥ್ ಸಾಂಗ್ತಾ
36 ತಿತ್ಲ್ಯಾರ್ ಲೊಕಾಕ್ ಧಾಡ್ತಚ್ ಜೆಜುಯೀ ಆಪ್ಲ್ಯಾ ಘರಾ ಗೆಲೊ. ತವಳ್ ತಾಚೆ ಶಿಸ್ ತಾಚೇ ಸರ್ಶಿಂ ಯೇವ್ನ್: ಶೆತಾಂತ್ಲ್ಯಾ ನೆರಾಚಿ ಒಪಾರ್ ಆಮ್ಕಾಂ ಸೊಡೊವ್ನ್ ಸಾಂಗ್" ಮ್ಹಣುನ್ ವಿಚಾರಿಲಾಗ್ಲೆ. 37 ಜೆಜು ತಾಂಕಾಂ ಜಾಪ್ ದೀವ್ನ್ ಮ್ಹಣಲೊ : " ಬರೆಂ ಬೀಂ ಒಂಪ್ತಾ ತೊ ಮನ್ಶಾಪೂತ್. 38 ಶೆತ್ ಮ್ಹಳ್ಯಾರ್ ಹೊ ಸಂಸಾರ್. ಬರೆಂ ಬೀಂ ಮ್ಹಳ್ಯಾರ್ ರಾಜ್ಯಚಿಂ ಭುರ್ಗಿಂ ಆನಿ ನೇರ್ ಮ್ಹಳ್ಯಾರ್ ಸೈತಾನಾಚಿ ಪಿಳ್ಗಿ; 39 ನೇರ್ ಒಂಪ್ಲಲೊ ದುಸ್ಮಾನ್ ದೆಂವ್ಚಾರ್. ಲುಂವಣ್ ಮ್ಹಳ್ಯಾರ್ ಸಂಸಾರಾಚೊ ಅಂತ್; ಆನಿ ಲುಂವ್ತಲೆಚ್ ದೇವ್ ದೂತ್. 40 ದೆಕುನ್ ಜಶೆಂ ನೇರ್ ಎಕ್ಟಾಂಯ್ ಕರ್ನ್ ಉಜ್ಯಾಂತ್ ಲಾಸ್ತಾತ್, ತಶೆಂಸ್ ಘಡ್ತಲೆಂ ಸಂಸಾರಾಚ್ಯಾ ಅಂತ್ ಕಾಳಾರ್. 41-42 ಮನ್ಶಾಪೂತ್ ಆಪ್ಲ್ಯಾ ದುತಾಂಕ್ ಧಾಡ್ತಲೊ ಆನಿ ತೆ ತಾಚ್ಯಾ ರಾಜ್ಯಾಂತ್ ಪಾತ್ಕಾಕ್ ವೊಡ್ತಲ್ಯಾ ಸಕ್ಟಾಂಕ್ ಆನಿ ಖೋಟೆಪಣ್ ಆಧಾರ್ತಲ್ಯಾ ಸಮೆಸ್ತಾಂಕ್ ಎಕ್ಟಾಂಯ್ ಕರ್ತಲೆ ಆನಿ ಉಜ್ಯಾಚ್ಯಾ ಆಗ್ಟ್ಯಾಂತ್ ಉಡಯ್ತಲೆ. 43 ತವಳ್ ನಿತಿವಂತ್ ಆಪ್ಲ್ಯಾ ಬಾಪಾಚ್ಯಾ ರಾಜ್ಯಾಂತ್ ಸುರ್ಯಾಬರಿ ಪರ್ಜಳ್ತಲೆ. ತುಮ್ಕಾಂ ಕಾನ್ ಆಸಾತ್ ಜಾಲ್ಯಾರ್ ಆಯ್ಕಾ !
ಪೂರ್ನ್ ದವರ್ ಲ್ಲ್ಯಾ ದಿರ್ವ್ಯಾಚಿ ಒಪಾರ್
44 " ಸರ್ಗಿಂಚೆ ರಾಜ್ಯ್ ಮ್ಹಳ್ಯಾರ್ ಶೆತಾಂತ್ ಪೂರ್ನ್ ದವರ್ ಲ್ಲ್ಯಾ ಏಕ್ ದಿರ್ವ್ಯಾಬರಿ. ಕೊಣ್ ಎಕ್ಲ್ಯಾಕ್ ತೆಂ ಮೆಳ್ತಾ ಆನಿ ತೊ ಪರ್ತ್ಯಾನ್ ತೆಂ ಲಿಪಯ್ತಾ. ಉಪ್ರಾಂತ್ ಸಂತೊಸಾನ್ ವಚುನ್ ತೊ ಆಪ್ಲೆಂ ಆಸ್ತ್ ಬದಿಕ್ ಸಗ್ಳೆಂ ವಿಕ್ತಾ ಆನಿ ತೆಂ ಮೊಲಾಕ್ ಘೆತಾ.
ಮೊತಿಯಾಚಿ ಒಪಾರ್
45 " ಸರ್ಗಿಂಚೆಂ ರಾಜ್ಯ್ ಮ್ಹಳ್ಯಾರ್ ಬರಿಂ ಮೊತಿಯಾಂ ಸೊಧುನ್ ವೆತಲ್ಯಾ ಏಕ್ ಸಾವ್ಕಾರಾಬರಿ. 46 ಚಡ್ ಮೊಲಾಚೆಂ ಏಕ್ ಮೊತಿಂ ತಾಕಾ ಮೆಳ್ತಚ್ ತೊ ವೆತಾ ಆನಿ ಆಪ್ಣಾಚೆಂ ಆಸ್ತ್ ಬದಿಕ್ ಸಗ್ಳೆಂ ವಿಕುನ್ ತೆಂ ಮೊತಿಂ ತೊ ಮೊಲಾಕ್ ಘೆತಾ.
ಜಾಳಾಚಿ ಒಪಾರ್
47" ಪರ್ತ್ಯಾ, ಸರ್ಗಿಂಚೆಂ ರಾಜ್ಯ್ ಏಕ್ ಜಾಳಾಬರಿ. ತೆಂ ದರ್ಯಾಂತ್ ಉಡಯ್ತಚ್ ಸರ್ವ್ ಜಿನ್ಸಾಂಚಿ ಮಾಸ್ಳಿ ತಾಂತುಂ ಸಾಂಪಡ್ತಾ. 48 ಜಾಳ್ ಭರ್ಲ್ಯಾ ಉಪ್ರಾಂತ್ ತೆಂ ವೊಡ್ತಾತ್ ಆನಿ ವೆಳೇರ್ ಬಸೊನ್ ಮಾಸ್ಳಿ ವಿಂಚ್ತಾತ್. ಬರಿ ಮಾಸ್ಳಿ ಭಾಟಿಯಾಂನಿ ಭರ್ತಾತ್ ಆನಿ ನಾಕಾರಿ ಭಾಯ್ರ್ ಉಡಯ್ತಾತ್. 49-50 ತೇ ಪರಿಂ ಘಡ್ತಲೆಂ ಸಂಸಾರಾಚ್ಯಾ ಅಂತ್ ಕಾಳಾರ್; ದೇವ್ ದೂತ್ ವೆತಲೆ ಆನಿ ಖೊಟ್ಯಾಂಕ್ ಬರ್ಯಾಂ ಥಾವ್ನ್ ವೆಗ್ಳೆ ಕರ್ನ್ ಉಜ್ಯಾಚ್ಯಾ ಆಗ್ಟ್ಯಾಂತ್ ಉಡಯ್ತಲೆ. ಥಂಯ್ ಜಾತಲೊ ವಿಳಾಪ್ ಆನಿ ದಾಂತ್ ಖಿರ್ಲೊಣಿ."
ನವಿಂ ಆನಿ ಪರ್ನಿಂ ದಿರ್ವಿಂ
51 " ಹೆಂ ಸಗ್ಳೆಂ ತುಮ್ಕಾಂ ಸಮ್ಜಲೆಂಮೂ? " ವಿಚರ್ಲೆಂ ಜೆಜುನ್. "ವ್ಹಯ್" ಜಾಪ್ ದಿಲಿ ತಾಂಣಿಂ. 52 ತೊ ತಾಂಕಾಂ ಮ್ಹಣಲೊ: " ತಶೆಂ ಮ್ಹಳ್ಯಾರ್ ಸರ್ಗಿಂಚ್ಯಾ ರಾಜ್ಯಾ ವಿಶ್ಯಾಂತ್ ಶಿಕೊವ್ಣ್ ಘೆತಲೊ ಹರ್ಯೇಕ್ ಧರ್ಮ್ ಶಾಸ್ತ್ರಿ ಏಕ್ ಘರ್ ಧನಿಯಾಬರಿ, ಜೊ ಆಪ್ಲ್ಯಾ ಭಂಡಾರಾಂತ್ಲೆಂ ನವೆಂ ಆನಿ ಪರ್ನೆಂ ಭಾಯ್ರ್ ಹಾಡ್ತಾ."
ನಜರೆತಾಂತ್ ಜುಜುಕ್ ಮೆಳ್ ಲ್ಲಿ ನಿರಾಕರ್ಣಿ
(ಮಾರ್ಕ್ 6:1-6; ಲೂಕ್ 4:16-24)
53-54 ಹ್ಯೊ ಒಪಾರಿ ಸಾಂಗುನ್ ಜಾತಚ್, ಜೆಜು ಥಂಯ್ಚೊ ಭಾಯ್ರ್ ಸರ್ನ್ ಗೆಲೊ ಆನಿ ಆಪ್ಲ್ಯಾ ಮಾಯ್ ಶಹರಾಕ್ ಪಾಟಿಂ ಆಯ್ಲೊ. ಥಂಯ್ ತಾಂಚ್ಯಾ ಸಿನಾಗೊಗಾಂತ್ ತಾಣೆಂ ದಿಲ್ಲಿ ಶಿಕೊವ್ಣ್ ಆಯ್ಕುನ್ ವಿಜ್ಮಿತ್ ಜಾಲ್ಲೊ ಲೋಕ್ ಮ್ಹಣ್ತಾಲೊ " ಖಂಯ್ ಥಾವ್ನ್ ಹಾಕಾ ಹಿ ಜಾಣ್ವಾಯ್ ಆನಿ ಅಚರ್ಯಾಂ ಕರ್ಚಿ ಹಿ ಪದ್ವಿ? 55 ಹೊ ಸುತಾರಾಚೊ ಪೂತ್ ನ್ಹಯ್? ಮರಿ ಮ್ಹಣ್ತಾತ್ ತಿ ಹಾಚಿ ಆವಯ್ ನ್ಹಯ್ ? 56 ಆನಿ ಜಾಕೊಬ್, ಜುಜೆ,ಸಿಮಾಂವ್ ಆನಿ ಜೂದ್ ಹಾಚೆ ಭಾವ್ ನ್ಹಯ್ ? 57 ಹಾಚ್ಯೊ ಭಯ್ಣಿ ಸಕ್ಕಡ್ ಆಮ್ಚೇ ಮಧೆಂ ಆಸಾತ್ ನ್ಹಯ್ ? ತರ್ ಹಾಕಾ ಹೆಂ ಸಕ್ಕಡ್ ಖಂಯ್ಚೆಂ ಆಯ್ಲೆಂ? ಆಶೆಂ ತಾಕಾ ತಾಂಣಿಂ ನಾಕಾರ್ಲೊ ದೆಕುನ್ ಜೆಜುನ್ ತಾಂಕಾಂ ಸಾಂಗ್ಲೆಂ : " ಪ್ರವಾದ್ಯಾಕ್ ಖಂಯ್ ಜಾಲ್ಯಾರ್ ಯೀ ಸನ್ಮಾನ್ ಚುಕನಾ; ಆಪ್ಲ್ಯಾ ಮಾಯ್ ಗಾಂವಾಂತ್ ಆನಿ ಕಾಶ್ಯಾ ಕುಟ್ಮಾಂತ್ ಮಾತ್ರ್ ತಾಕಾ ತೊ ಮೆಳನಾ". 58 ಆನಿ ತಾಂಕಾಂ ಭಾವರ್ಥ್ ನಾತ್ಲೊ ದೆಕುನ್ ತಾಂಚೇ ಮಧೆಂ ತಾಣೆಂ ಚಡ್ ಅಚರ್ಯಾಂ ಕೆಲಿಂನಾತ್.