ಮಾಲ್ಗಡ್ಯಾಂಚೆ ಸಂಪ್ರದಾಯ್
(ಮಾರ್ಕ್ 7:1-13)
15 1-2 ಉಪ್ರಾಂತ್ ಜೆರುಜಲೆಮಾ ಥಾವ್ನ್ ಥೊಡೆ ಫಾರಿಜೆವ್ ಆನಿ ಶಾಸ್ತ್ರಿ ಜೆಜು ಸರ್ಶಿಂ ಯೇವ್ನ್ ತಾಕಾ ಸಾವಾಲ್ ಕರಿಲಾಗ್ಲೆ: " ತುಜೆ ಶಿಸ್ ಆಮ್ಚ್ಯಾ ಮಾಲ್ಗಡ್ಯಾಂ ಥಾವ್ನ್ ದೆಂವುನ್ ಆಯ್ ಲ್ಲಿ ರಿವಾಜ್ ಮೊಡ್ತಾತ್ ಕಿತ್ಯಾಕ್ ? ಜೆವ್ಚೇ ಆದಿಂ ತೆ ಆಪ್ಲೆ ಹಾತ್ ಧುಯ್ನಾತ್." 3 ತಾಣೆಂ ತಾಂಕಾಂ ಜಾಪ್ ದಿಲಿ: " ತರ್ ತುಮಿಯೀ ಕಿತ್ಯಾಕ್ ತುಮ್ಚ್ಯಾ ರಿವಾಜಿಂ ಪಾಸತ್ ದೆವಾಚೊ ಉಪದೆಸ್ ಮೊಡ್ತಾತ್ ? 4 ದೆವಾನ್ ಸಾಂಗ್ಲಾಂ : ‘ತುಜ್ಯಾ ಅವಯ್ ಬಾಪಾಯ್ಕ್ ಮಾನ್ ದಿ’ ಆನಿ ‘ ಜೊ ಕೊಣ್ ಆವಯ್ಕ್ ವಾ ಬಾಪಾಯ್ಕ್ ಶಿರಪ್ತಾ, ತಾಕಾ ಮರಣಾಚಿ ಶಿಕ್ಷಾ ಫಾವೊ.’ 5-6 ಪುಣ್ ತುಮಿ ಮ್ಹಣ್ತಾತ್: ‘ಕೊಣ್ ಯೀ ಬಾಪಾಯ್ಕ್ ವಾ ಆವಯ್ಕ್ ಮ್ಹಣತ್ : ‘ಹಾಂವೆಂ ತುಕಾ ದಿಂವ್ಚೆಂ ಆಸ್ಲೆಂ ತೆಂ ಹಾಂವೆಂ ದೆವಾಕ್ ದೀವ್ನ್ ಜಾಲಾಂ,’ ತಸಲ್ಯಾಕ್ ಆಪ್ಲ್ಯಾ ಆವಯ್ ಬಾಪಾಯ್ ಸವೆಂ ಆನಿಕ್ ಕಾಯ್ದೊ ನಾ. ’ ಆಶೆಂ ತುಮ್ಚೇ ಸಂಪ್ರದಾಯೇ ಪಾಸತ್ ದೆವಾಚೊ ಉಪದೆಚ್ ತುಮಿ ತಿರಸ್ಕಾರ್ ಕರ್ತಾತ್. 7 ಕಪಟ್ಯಾಂನೋ ! ಸಹಜ್ ತೆಂ ಇಸಾಯಿಯಾ ಪ್ರವಾದ್ಯಾನ್ ತುಮ್ಚೇ ವಿಶ್ಯಾಂತ್ ಸಾಂಗ್ ಲ್ಲೆಂ:
8 ‘ ಹಿ ಪರ್ಜಾ ಆಪ್ಲ್ಯಾ ಒಂಠಾಂನಿ ಮ್ಹಾಕಾ ಹೊಗ್ಳಾಪ್ ದಿತಾ,
ತರ್ ಯೀ ತಾಂಚೇ ಕಾಳಿಜ್ ಮ್ಹಜೇ ಥಾವ್ನ್ ಜಾಯ್ತೆಂ ಪಯ್ಸ್ ಆಸಾ.
9 ವ್ಯರ್ಥ್ ಪಣಿಂ ತೆ ಮ್ಹಜೆ ಭಜನ್ ಕರ್ತಾತ್,
ಖರಿ ಶಿಕೊವ್ಣ್ ಮ್ಹಣ್ ಸಾಂಗುನ್ , ಮನ್ಶಾನ್ ಕೆಲ್ಲೆ ಕಾಯ್ದೆ ದಿತಾತ್’ !"
ಮನ್ಶಾಕ್ ನಿಜಾಕ್ ಯೀ ಮ್ಹೆಳಯ್ತಾತ್ ತ್ಯೊ ವಸ್ತು
(ಮಾರ್ಕ್ 7:14-23)
10-11 ಉಪ್ರಾಂತ್ ಲೊಕಾ ಜಮ್ಯಾಕ್ ಆಪ್ಣಾಸರ್ಶಿಂ ಆಪೊವ್ಣ್ ತೊ ಸಾಂಗಿಲಾಗ್ಲೊ: " ಆಯ್ಕಾ ಆನಿ ಸಮ್ಜುನ್ ಘೆಯಾ! ತೊಂಡಾ ಭಿತರ್ ವೆತಾ ತೆಂ ಮನ್ಶಾಕ್ ಮ್ಹೆಳಯ್ನಾ, ಬಗರ್ ತೊಂಡಾಂತ್ಲ್ಯಾನ್ ಭಾಯ್ರ್ ಯೆತಾ ತೆಂ ಮನ್ಶಾಕ್ ಮ್ಹೆಳಯ್ತಾ." 12ತಿತ್ಲ್ಯಾರ್ ತಾಚೆ ಶಿಸ್ ಯೇವ್ನ್ ತಾಚೇಲಾಗಿಂ ವಿಚಾರಿಲಾಗ್ಲೆ : " ತುಜ್ಯಾ ಉತ್ರಾಂವರ್ವಿಂ ಫಾರಿಜೆವಾಂಚೆಂ ಮನ್ ಮೊಡ್ಲಾಂ ಮ್ಹಣ್ ತುಂ ಜಾಣಾಯ್ ಮೂ?" 13 ಜೆಜುನ್ ತಾಂಕಾಂ ಜಾಪ್ ದಿಲಿ: " ಮ್ಹಜ್ಯಾ ಸರ್ಗಿಂಚ್ಯಾ ಬಾಪಾನ್ ಲಾಂವ್ಕ್ ನಾತ್ ಲ್ಲೆಂ ಹರ್ಯೇಕ್ ಝಾಡ್ ಉಮ್ಟುನ್ ಕಾಡ್ತಲೆ. 14 ಸೊಡಾ ತಾಂಕಾಂ, ಕುರ್ಡೆ ತೆ, ಕುರ್ಡ್ಯಾಂಕ್ ವಾಟ್ ದಾಖೊವ್ಪಿ ಫುಡಾರಿ ! ಆನಿ ಕುರ್ಡೊ ಕುರ್ಡ್ಯಾಕ್ ವಾಟ್ ವ್ಹರಿತ್ ಜಲ್ಯಾರ್, ದೊಗ್ ಯೀ ಪಡ್ತಾತ್ ಫೊಂಡಾಂತ್."
15 ತವಳ್ ಪೆದ್ರು ಜೆಜುಲಾಗಿಂ ಮ್ಹಣಾಲೊ : "ಹೇ ಒಪಾರಿಚೊ ಆರ್ಥ್ ಕಿತೆಂ ಮ್ಹಣ್ ಆಮ್ಕಾಂ ಸೊಡೊವ್ನ್ ಸಾಂಗ್ ." 16 ಜೆಜುನ್ ಮ್ಹಳೆಂ : " ತುಮಿ ಆನಿಕ್ ಯೀ ಹೆರಾಂಬರಿ ಸಮ್ಜನಾತ್ಲಲೆವೆ ? 17 ಮನ್ಶಾಚ್ಯಾ ತೊಂಡಾಂತ್ ರಿಗ್ತಾ ತೆಂ ಸಗ್ಳೆಂ ಪೊಟಾಕ್ ವೆತಾ ಆನಿ ಮಾಗಿರ್ ಭಾಯ್ರ್ ಚಲ್ತಾ ಮ್ಹಣ್ ತುಮ್ಕಾಂ ಸಮ್ಜಾನಾ ಕಿತೆಂ? 18 ಪುಣ್ ಮನ್ಶಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತೆಂ ಕಾಳ್ಜಾಂತ್ ಥಾವ್ನ್ ಉಬ್ಜಾತಾ ಆನಿ ಮನ್ಶಾಕ್ ತೆಂ ಮ್ಹೆಳಯ್ತಾ. 19 ಖೊಟಿಂ ಚಿಂತ್ನಾಂ, ಖೂನ್, ಪ್ರದ್ವಾರ್, ವ್ಯಭಿಚಾರ್, ಚೊರಿ, ಫಟ್ ಸಾಕ್ಸ್, ಸೊವೆಶಿರಾಪ್ - ಹಿಂ ಸರ್ವ್ ಮನ್ಶಾಚ್ಯಾ ಕಾಳ್ಜಾಂತ್ ಥಾವ್ನ್ ಭಾಯ್ರ್ ಸರ್ತಾತ್.20 ಹಿಂಚ್ ಮನ್ಶಾಕ್ ಮ್ಹೆಳಯ್ತಾತ್. ಪುಣ್ ಹಾತ್ ಧುಯ್ನಾಸ್ತಾನಾ ಜೆವ್ಲ್ಯಾರ್ ಮನಿಸ್ ಮ್ಹೆಳೊ ಜಾಯ್ನಾ."
ಖಾನಾಆನ್ ಗಾರ್ನ್ ಸ್ತ್ರಿಯೆಚೊ ಭಾವಾರ್ಥ್
(ಮಾರ್ಕ್ 7:24-30)
21 ಉಪ್ರಾಂತ್ ಜೆಜು ಥಂಯ್ಚೊ ಭಾಯ್ರ್ ಸರ್ನ್ ತೀರ್ ಆನಿ ಸಿದೊನ್ ಚ್ಯಾ ಪ್ರಾಂತಾಕ್ ಗೆಲೊ. 22 ತೆದ್ವಾಂ ತ್ಯಾ ಗಾಂವಾಂತ್ಲಿ ಎಕ್ಲಿ ಖಾನಾಆನ್ ಗಾರ್ನ್ ಸ್ತ್ರೀ ಮುಖಾರ್ ಆಯ್ಲಿ ಆನಿ ಬೊಬ್ ಮಾರ್ನ್ ತಾಚೇಲಾಗಿಂ ಮ್ಹಣಾಲಿ: "ಧನಿಯಾ, ದಾವಿದಾಚ್ಯಾಪುತಾ, ಮ್ಹಜಿ ಕಾಕುಳ್ತ್ ಕರ್ ! ಮ್ಹಜಿ ಧುವ್ ದೆಂವ್ಚಾರ್ ಲಾಗೊನ್ ಭೋವ್ ಚಡ್ ವೊಳ್ವಳ್ತಾ." 23 ಪುಣ್ ಜೆಜುನ್ ತಿಕಾ ಜಾಪ್ ದೀವ್ನ್ ಏಕ್ ಉತರ್ ಸಯ್ತ್ ಮ್ಹಳೆಂನಾ. ತೊಡ್ಯಾ ವೆಳಾನ್ ತಾಚೆ ಶಿಸ್ ಯೇವ್ನ್ ತಾಚೇಲಾಗಿಂ ಪರಾತುನ್ ಮ್ಹಣಾಲೆ: " ತಿಕಾ ಚಿಕ್ಕೆ ಧಾಡ್ನ್ ಸೊಡ್ ! ಆಮ್ಚ್ಯಾ ಪಾಟ್ಯ್ಲಾನ್ ತಿ ಬೊಬ್ ಮಾರಿತ್ ಯೆತಾ." 24 ಜೆಜುನ್ ಜಾಪ್ ದಿಲಿ: " ಇಸ್ರಾಯೆಲ್ ಘರಾಣ್ಯಾಂತ್ಲ್ಯಾ ಹುಕೊನ್ ಗೆಲ್ಲ್ಯಾ ಬಕ್ರ್ಯಾಂಕ್ ಮ್ಹಣ್ ಮಾತ್ರ್ ಮ್ಹಾಕಾ ಧಾಡ್ಲಾ." 25 ತಿ ತಾಚೇ ಮುಖಾರ್ ಯೇವ್ನ್ ಸರ್ಪಡುನ್ ಮ್ಹಣಾಲಿ: " ಸಾಯ್ಬಾ, ಮ್ಹಾಕಾ ಪಾವ್." 26 ಪುಣ್ ಜೆಜುನ್ ತಿಕಾ ಜಾಪ್ ದಿಲಿ: " ಘರ್ಚ್ಯಾ ಭುರ್ಗ್ಯಾಂಚೊ ಉಂಡೊ ಕಾಡ್ನ್ ಸುಣ್ಯಾಂಕ್ ದಿಂವ್ಚೊ ಸಮ ನ್ಹಯ್." 27 ತಿ ಮ್ಹಣಾಲಿ: " ತೆಂ ನೀಜ್, ಧನಿಯಾ, ತರಿಪುಣ್ ಸುಣಿಂ ಆಪ್ಲ್ಯಾ ಧನಿಯಾಚ್ಯಾ ಮೆಜಾರ್ ಥಾವ್ನ್ ಪಡ್ಲಲೆ ಉಂಡ್ಯಾಕುಡ್ಕೆ ಖಾತಾತ್ ನ್ಹಯ್ ? " 28 ಹೆಂ ಆಯ್ಕುನ್ ಜೆಜು ತಿಕಾ ಜಾಪ ದೀವ್ನ್ ಮ್ಹಣಾಲೊ : " ಬಾಯೇ , ವರ್ತೊ ತುಜೊ ಭಾವಾರ್ಥ್ ! ತುಜೇ ಅಪೇಕ್ಷೆ ಪರ್ಮಾಣೆಂ ತುಕಾ ಜಾಂವ್." ಆನಿ ತೇಚ್ ಘಡಿಯೇ ತಿಚಿ ಧುವ್ ಬರಿ ಜಾಲಿ.
ಜೆಜು ಸಬಾರ್ ಜಾಣಾಂಕ್ ಬರಿಂ ಕರ್ತಾ
(ಮಾರ್ಕ್ 7:31)
29-30 ಥಂಯ್ಚೊ ಭಾಯ್ರ್ ಸರ್ನ್ ಜೆಜು ಗಾಲಿಲೆಯಾ ಸಾರೋವರಾಚೇ ತಡಿಚಿ ವಾಟ್ ಧರ್ನ್ ಫುಡೆಂ ಗೆಲೊ. ಉಪ್ರಾಂತ್ ತೊ ದೊಂಗ್ರಾರ್ ಚಡುನ್ ಬಸ್ಲೊ ತೆದ್ನಾ ಲೊಕಾಜಮೆ ಮೊನ್ಯಾಂಕ್, ಕುರ್ಡ್ಯಾಂಕ್, ಥೊಂಟ್ಯಾಂಕ್ ,ಪಾಂಗ್ಳ್ಯಾಂಕ್ ಆನಿ ಹೆರ್ ಪಿಡೆಸ್ತಾಂಕ್ ಘೆವ್ನ್ ತಾಚೇ ಸರ್ಶಿಂ ಆಯ್ಲೆ. ಆನಿ ತಾಂಣಿಂ ತಾಂಕಾಂ ತಾಚ್ಯಾ ಪಾಂಯಾಂ ಸರ್ಶಿಂ ದವರ್ಲಿಂ ; ಆನಿ ತಾಂಕಾಂ ಸಕ್ಟಾಂಕ್ ತಾಣೆಂ ಗೂಣ್ ಕೆಲಿಂ. 31 ಮೊನೆ ಉಲಯ್ಲಲೆ, ಥೊಂಟೆ ಚಲ್ಲಲೆ, ಕುರ್ಡ್ಯಾಂಕ್ ದೀಷ್ಟ್ ಮೆಳ್ಳಲಿ - ಹೆ ಸಗ್ಳೆಂ ಪಳೆವ್ನ್ ಲೋಕ್ ವಿಜ್ಮಿತ್ ಜಾಲೊ ಆನಿ ಇಸ್ರಾಯೆಲಾಚ್ಯಾ ದೆವಾಕ್ ನಾಂವಾಡುಂಕ್ ಲಾಗ್ಲೊ
ಚಾರ್ ಹಜಾರ್ ಲೊಕಾಕ್ ಜೆವಣ್
(ಮಾರ್ಕ್ 8:1-10)
32 ತವಳ್ ಜೆಜುನ್ ಆಪ್ಲ್ಯಾ ಶಿಸಾಂಕ್ ಸರ್ಶಿಂ ಆಪಯ್ಲೆ ಆನಿ ಮ್ಹಳೆಂ : "ಹ್ಯಾ ಲೊಕಾಚೆ ಮ್ಹಾಕಾ ಚುರ್ಚುರೆ ಭೊಗ್ತಾತ್. ತೀನ್ ದೀಸ್ ಥಾವ್ನ್ ಮ್ಹಜೇ ಸಾಂಗಾತಾ ತಿಂ ರಾವ್ಲ್ಯಾಂತ್ , ಖಾಂವ್ಕ್ ಜೆಂವ್ಕ್ ತಾಂಚೇಲಾಗಿಂ ಕಾಂಯ್ಚ್ ನಾ. ತಾಂಕಾಂ ಉಪಶಿಂ ಘರಾ ಧಾಡುಂಕ್ ಯೀ ಮ್ಹಾಕಾ ಖುಶಿ ನಾ; ವೆತಾನಾ ವಾಟೇರ್ ತಿಂ ತಂಗ್ ಜಾತಿತ್." 33 ತೆದ್ವಾಂ ಶಿಸಾಂನಿ ತಾಚೇಲಾಗಿಂ ಮ್ಹಳೆಂ : " ಎದ್ಯಾ ವ್ಹಡ್ಲ್ಯಾ ಜಮ್ಯಾಕ್ ವಾಡುಂಕ್ ಜಾಯ್ ಪುರ್ತೆ ಉಂಡೆ ಹೇ ಎಕ್ಸುರೇ ಸುವಾತೆರ್ ಆಮ್ಕಾಂ ಖಂಯ್ ಮೆಳ್ತಿತ್? " 34 ಜೆಜುನ್ ವಿಚಾರ್ಲೆಂ : " ತುಮ್ಚೇಲಾಗಿಂ ಕಿತ್ಲೆ ಉಂಡೆ ಆಸಾತ್?" ತಾಣಿಂ ಜಾಪ್ ದಿಲಿ: " ಸಾತ್ ಉಂಡೆ ಆನಿ ಥೊಡ್ಯೊ ಲ್ಹಾನ್ ಮಾಸ್ಳ್ಯೊ." 35 ತವಳ್ ಲೊಕಾಕ್ ತಾಣೆಂ ಧರ್ಣಿರ್ ಬಸೊಂಕ್ ತಾಕಿದ್ ದಿಲಿ. 36 ಉಪ್ರಾಂತ್ ತೆ ಸಾತ್ ಉಂಡೆ ಆನಿ ತ್ಯೊ ಮಾಸ್ಳ್ಯೊ ಘೆವ್ನ್ ಅರ್ಗಾಂ ದೀವ್ನ್ ತಾಣೆಂ ತೆ ಮೊಡ್ಲೆ ಆನಿ ಆಪ್ಲ್ಯಾ ಶಿಸಾಂಕ್ ದಿಲೆ; ಶಿಸಾಂನಿ ತೆ ಲೊಕಾಕ್ ವಾಂಟ್ಲೆ.37 ತಿಂ ಸಮೆಸ್ತ್ ಜೆವ್ಲಿಂ ಆನಿ ಧಾದೊಶಿ ಜಾಲಿಂ. ಆನಿ ಖಾವ್ನ್ ಉರ್ಲಲೆ ಕುಡ್ಕೆ ಸಾತ್ ದಲಿಂಭರ್ ತಾಂಣಿಂ ಎಕ್ಟಾಂಯ್ ಕೆಲೆ. 38 ಸ್ತ್ರಿಯಾಂಕ್ ಆನಿ ಭುರ್ಗ್ಯಾಂಕ್ ಸೊಡ್ಲ್ಯಾರ್ ಜೆವ್ಲಲೆ ದಾದ್ಲೆಚ್ ಚಾರ್ ಹಜಾರ್. 39 ಉಪ್ರಾಂತ್ ಲೊಕಾಕ್ ಧಾಡ್ನ್ ತೊ ಏಕ್ ದೊಣಿರ್ ಚಡ್ಲೊ ಆನಿ ಮಾಗದಾನ್ ನಾಂವಾಚ್ಯಾ ಪ್ರಾಂತಾಕ್ ಯೇವ್ನ್ ಪಾವ್ಲೊ.