ದೆಂವ್ಚಾರ್ ಜೆಜುಕ್ ತಾಳ್ತಾ
(ಮಾರ್ಕ್ 1:12-13; ಲೂಕ್ 4:1-113)
4 1 ತಾಚೆ ಉಪ್ರಾಂತ್ ದೆಂವ್ಚಾರಾನ್ ತಾಳ್ಚೆ ಖಾತಿರ್ ಪವಿತ್ರ್ ಅತ್ಮೊ ಜೆಜುಕ್ ಅರಣ್ಯಾಕ್ ವ್ಹರ್ನ್ ಗೆಲೊ. 2ಥಂಯ್ ಚಾಳೀಸ್ ದೀಸ್ ಆನಿ ಚಾಳೀಸ್ ರಾತಿ ಉಪಾಸ್ ಕೆಲ್ಯಾ ಉಪ್ರಾಂತ್ ತೊ ಭುಕೆಲೊ. 3 ತೆದ್ವಾಂ ತಾಳ್ತಲೊ ತಾಚೆ ಸರ್ಶಿಂ ಯೇವ್ನ್ ಮ್ಹಣಾಲೊ : " ಜರ್ ತುಂ ದೆವಾಚೊ ಪೂತ್, ತರ್ ಹೆ ಫಾತರ್ ಉಂಡೆ ಜಾಂವ್ ಮ್ಹಣುನ್ ಫರ್ಮಾಯ್." 4 ಪುಣ್ ಜೆಜುನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ : " ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ:
‘ಮನಿಸ್ ಉಂಡ್ಯಾನ್ ಮಾತ್ರ್ ನ್ಹಯ್,
ಬಗರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ
ತ್ಯಾ ಹರ್ಯೆಕ್ ಉತ್ರಾನ್ ಜೆಯೆತಾ’."
5ಉಪ್ರಾಂತ್ ದೆಂವ್ಚಾರ್ ತಾಕಾ ಪವಿತ್ರ್ ಶಹರಾಕ್ ವ್ಹರ್ನ್ ಗೆಲೊ.ಥಂಯ್ ದೆವಾಳಾಚ್ಯಾ ಶಿಖರಾಚೆರ್ ತಾಕಾ ಉಬೊ ಕರ್ನ್ ಮ್ಹಣಾಲೊ: " ತುಂ ದೆವಾಚೊ ಪೂತ್ ಜಾಲ್ಯಾರ್ ಸಕ್ಲಾ ಉಡಿ ಮಾರ್; ಕಿತ್ಯಾಕ್ ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ:
6‘ದೇವ್ ಆಪ್ಲ್ಯಾ ದುತಾಂಕ್ ತುಜೆ ವಿಶ್ಯಾಂತ್ ತಾಕಿದ್ ದಿತಲೊ: ಆನಿ ತುಜೊ ಪಾಂಯ್ ಫಾತ್ರಾಕ್ ಆದಳ್ನಾಶೆಂ ಆಪ್ಲ್ಯಾ ಹಾತಾಂನಿ ತೆ ತುಕಾ ಸಾಂಬಾಳ್ನ್ ಧರ್ತಲೆ’."
7ಜೆಜುನ್ ತಾಕಾ ಜಾಪ್ ದಿಲಿ: "ಹೆಂಯೀ ಬರೊವ್ನ್ ಆಸಾ: ‘ಸರ್ವೆಸ್ಪರಾ ತುಜ್ಯಾ ದೆವಾಚಿ ಪರೀಕ್ಷಾ ಕರಿನಾಕಾ’."
8-9 ಉಪ್ರಾಂತ್ ದೆಂವ್ಚಾರ್ ಜೆಜುಕ್ ಏಕ್ ಭೋವ್ ಉಬಾರ್ ಪರ್ವತಾರ್ ವ್ಹರ್ನ್ ಗೆಲೊ ಆನಿ ಸಂಸಾರಾಚಿಂ ಸರ್ವ್ ರಾಜ್ಯಾಂ ತಾಂಚ್ಯಾ ವೈಭವಾ ಸಮೇತ್ ದಾಖೊವ್ನ್ ಮ್ಹಣಾಲೊ: "ಮ್ಹಜ್ಯಾ ಪಾಂಯಾಂಕ್ ಪಡುನ್ ಮ್ಹಾಕಾ ನಮಸ್ಕಾರ್ ಕರ್ಶಿ ಜಲ್ಯಾರ್ ಹಾಂವ್ ಹೆಂ ಸಗ್ಳೆಂ ತುಕಾ ದಿತಲೊಂ." 10 ತೆದ್ವಾಂ ಜೆಜುನ್ ಮ್ಹಳೆಂ: ಚಲ್ ಹಾಂಗಾಚೊ ಸೈತಾನಾ, ಪವಿತ್ರ್ ಪುಸ್ತಕಿಂ ಬರೊವ್ನ್ ಆಸಾ:
‘ಸರ್ವೆಸ್ಪರಾಕ್ , ತುಜ್ಯಾ ದೆವಾಕ್ ಆರಾಧನ್ ಕರ್,
ತಾಚಿ ಎಕ್ಲ್ಯಾಚಿ ಮಾತ್ರ್ ಸೆವಾ ಕರ್’."
11ತಿತ್ಲ್ಯಾರ್ ದೆಂವ್ಚಾರ್ ತಾಕಾ ಸೊಡ್ನ್ ಗೆಲೊ. ಆನಿ ತೊ ವೆತಚ್ ದೇವ್ ದೂತ್ ಯೇವ್ನ್ ತಾಚಿ ಸೆವಾ ಕರುಂಕ್ ಲಾಗ್ಲೆ.
ಗಾಲಿಲೆಯಾಂತ್ ಮ್ಹಣಿಯರ್ಪಣಾಸೊ ಆರಂಭ್
(ಮಾರ್ಕ್ 1:14-15; ಲೂಕ್ 4:14-15)
12 ಜುವಾಂವ್ಕ್ ಧರ್ನ್ ಬಂದೆಂತ್ ಘಾಲಾ ಮ್ಹಳ್ಳಿ ಖಬರ್ ಆಯ್ಕಲ್ಲ್ಯಾ ಉಪ್ರಾಂತ್ ಜೆಜು ಗಾಲಿಲೆಯಾಕ್ ಗೆಲೊ. 13 ತೊ ನಜರೆತಾಂತ್ ರಾವ್ಲೊನ್ ಬಗರ್ ಜಾಬುಲೂನ್ ಆನಿ ನಾಫ್ತಲಿಚೊ ಗಡಿ ಭಿತರ್ ಗಾಲಿಲೆಯಾ ಸರೋವರಾಚೆ ವೆಳೇರ್ ಆಸ್ಲಲ್ಯಾ ಕಫಾರ್ನಾಂವ್ ಶಹರಾಂತ್ ವಚುನ್ ರಾವ್ಲೊ. 14ಅಶೆಂ ಜ್ಯಾರಿ ಜಾಲೆಂ ಇಸಾಯಿಯಾ ಪ್ರವಾದ್ಯಾನ್ ಮ್ಹಳ್ಳೆಂ ತೆಂ :
15 " ಜಾಬುಲೂನಾಚೊ ಆನಿ ನಾಫ್ತಲಿಚೊ ಗಾಂವ್,
ದರ್ಯಾಕ್ ವೆಚೇ ವಾಟೇ ಸಾಮ್ಖಾಚೆ ಆನಿ ಯೊರ್ದಾನ್ ಪಲ್ತಡಿಚೆ ಗಾಂವ್,
ಆನ್ಭಾವಾರ್ಥ್ಯಾಚೆಂ ಗಾಲಿಲೆಯಾ!
16 ಕಾಳೊಕಾಂತ್ ಜಿಯೆಲ್ಲ್ಯಾ ಲೊಕಾನ್ ದೆಖ್ಲೊ ಏಕ್ ವ್ಹಡ್ ಉಜ್ವಾಡ್;
ಮರಣಾಚಿ ಸಾವ್ಳಿ ಪಡ್ ಲ್ಲ್ಯಾ ಗಾವಾಂತ್ ಜಿಯೆಲ್ಲ್ಯಾಂಚೆರ್ ಉದೆಲೊ ಏಕ್ ಪ್ರಕಾಸ್."
17 ತವಳ್ ಥಾವ್ನ್ ಜೆಜು ಅಶೆಂ ಪ್ರಸಂಗ್ ಕರುಂಕ್ ಲಾಗ್ಲೊ: "ಪಾತ್ಕಿ ಜಿಣಿ ಬದಲಾ; ಕಿತ್ಯಾಕ್ ಸರ್ಗಿಂಚೆಂ ರಾಜ್ಯ್ ಲಾಗಿಂ ಪಾವ್ಲಾಂ."
ಚೊವ್ಗ್ ಶಿಸಾಂಚೆಂ ಆಪೊವ್ಣೆಂ
(ಮಾರ್ಕ್ 1:16-20; ಲೂಕ್ 5:1-11)
18 ಏಕ್ ದೀಸ್ ಜೆಜು ಸರೋವರಾಚೇ ವೆಳೆನ್ ಪಾಶಾರ್ ಜಾತಾನಾ ದೋಗ್ ಭಾವಾಂಕ್- ಪೆದ್ರು ಮ್ಹಣ್ತಾತ್ ತ್ಯಾ ಸಿಮಾಂವ್ಕ್ ಆನಿ ತಾಚ್ಯಾ ಭಾವಾ ಆಂದ್ರೆಕ್ - ತಾಣೆಂ ದೆಖ್ಲೆ. ಸರೋವರಾಂತ್ ತೆ ಜಾಳ್ ಉಡಯ್ತಲೆ ; ಕಿತ್ಯಾಕ್ ತೆ ಪಾಗಿ ಜಾವ್ನಾಸ್ಲೆ. 19 ಆನಿ ತಾಣೆಂ ತಾಂಕಾಂ ಮ್ಹಳೆಂ: ಯೆಯಾ ಮ್ಹಜ್ಯಾ ಪಾಟ್ಲ್ಯಾನ್ ಆನಿ ಹಾಂವ್ ತುಮ್ಕಾಂ ಮನ್ಶಾಂಚೆ ಪಾಗಿ ಕರ್ತಲೊ." 20 ತಕ್ಷಣ್ ಚ್ ಆಪ್ಲಿಂ ಜಾಳಾಂ ಸೊಡ್ನ್ ತೆ ತಾಚ್ಯಾ ಪಾಟ್ಲ್ಯಾನ್ ಗೆಲೆ.21 ಥಂಯ್ ಥಾವ್ನ್ ಮುಖಾರ್ ವೆತಾನಾ ತಾಕಾ ದಿಸ್ಲೆ ಆನಿಕ್ ದುಸ್ರೆ ದೋಗ್ ಭಾಭಾವ್ - ಜಾಕೊಬ್ ಆನಿ ಜುವಾಂವ್, ಜೆಬೆದೆವಾಚೆ ಪೂತ್. ಆಪ್ಲ್ಯಾ ಬಾಪಾಯಾ ಜೆಬೆದೆವಾ ಸಾಂಗಾತಾ ಏಕ್ ಮಚ್ಚ್ಯಾರ್ ತೆ ಆಪ್ಲಿಂ ಜಾಳಾಂ ಸಮ ಕರ್ತಾಲೆ. ತಾಂಕಾಂ ತಾಣೆಂ ಆಪಯ್ಲೆ. 22 ತಕ್ಷಣ್ ಚ್ ಮಚ್ವೊ ಆನಿ ಆಪ್ಲ್ಯಾ ಬಾಪಾಯ್ಕ್ ಸಾಂಡುನ್ ತೆ ತಾಚ್ಯಾ ಪಾಟ್ಲ್ಯಾನ್ ಗೆಲೆ.
ಜೆಜು ಲೊಕಾಕ್ ಶಿಕಯ್ತಾ ಆನಿ ಪಿಡೆಸ್ತಾಂಕ್ ಗೂಣ್ ಕರ್ತಾ
(ಮಾರ್ಕ್ 1:39; ಲೂಕ್ 4:44; 6:17-19)
23 ಉಪ್ರಾಂತ್ ಜೆಜು ತಾಂಚ್ಯಾ ಸಿನಾಗೊಗಾಂನಿ ಶಿಕಯ್ತ್, ರಾಜ್ಯಚಿ ಬರಿ ಖಬರ್ ಗಾಜಯ್ತ್ ಆನಿ ಲೊಕಾ ಮಧ್ಲಿ ಸರ್ವ್ ಥರಾಂಚಿ ಪಿಡಾಶಿಡಾ ಗೂಣ್ ಕರಿತ್ ಆಖ್ಯಾ ಗಾಲಿಲೆಯಾಂತ್ಲ್ಯಾನ್ ಭೊಂವ್ಲೊ.24 ತಾಚಿ ಕೀರ್ತ್ ಸಗ್ಳ್ಯಾ ಸೀರಿಯಾಂತ್ ಗಾಜ್ಲಿ; ಆನಿ ಥರಾವಳ್ ಪಿಡಾಂನಿ ಕಷ್ಟತಲ್ಯಾಂಕ ಆನಿ ದುಕಿನ್ ವಳ್ವಳ್ತಲ್ಯಾಂಕ್, ದೆಂವ್ಚಾರ್ ಲಾಗ್ ಲ್ಲ್ಯಾಂಕ್, ಮೊರ್ಲುಕ್ ಆಸಲ್ಲ್ಯಾಂಕ್ ಆನಿ ಆರ್ ಮಾರ್ ಲ್ಲ್ಯಾಂಕ್ ಲೊಕಾನ್ ತಾಚೆ ಸರ್ಶಿಂ ಹಾಡ್ಲಿಂ ಆನಿ ತಾಣೆಂ ತಾಂಕಾಂ ಗೂಣ್ ಕೆಲಿಂ.25 ಗಾಲಿಲೆಯಾ, ದೆಕಾಪೊಲಿ ಶಹರಾಂ, ಜೆರೊಜಲೆಮ್, ಜುದೇಯಾ ಆನಿ ಯೊರ್ದಾನ್ ನ್ಹಂಯ್ ಪಲ್ತಡಿ ಹೆಣೆಂಚೊ ಲೋಕ್ ಹಾರಿಂ ಹಾರಿಂನಿ ತಾಚ್ಯಾ ಪಾಟ್ಲ್ಯಾನ್ ವೆತಾಲೊ.