ಸ್ನಾನ್ ದಾತಾರ್ ಜುವಾಂವ್
(ಮಾರ್ಕ್ 1:2-6; ಲೂಕ್ 3:1-6; ಜುವಾಂವ್ 1:19-23)
3. 1ತ್ಯಾ ದಿಸಾಂನಿ ಸ್ನಾನ್ ದಾತರ್ ಜುವಾಂವ್ ಜುದೆಯಾಚ್ಯಾ ಅರಣ್ಯಾಂತ್ ದಿಷ್ಟಿ ಪಡ್ಲೊ ಆನಿ ಅಶೆಂ ಪ್ರಸಂಗ್ ಕರಿಲಾಗ್ಲೊ: 2 " ತುಮ್ಚಿ ಪಾತ್ಕಿ ಜಿಣಿ ಬದಲಾ, ಕಿತ್ಯಾಕ್ ಸರ್ಗಿಂಚೆಂ ರಾಜ್ಯ್ ಲಾಗಿಂ ಪಾವ್ಲಾಂ." 3 ತಾಚೇಚ್ ವಿಶ್ಯಾಂತ್ ತೆಂ ಇಸಾಯಿಯಾ ಪ್ರವಾದ್ಯಾನ್ ಸಾಂಗ್ ಲ್ಲೆಂ:
ಅರಣ್ಯಾಂತ್ ಏಕ್ ತಾಳೊ ಬೋಬ್ ಮಾರ್ತಾ:
ಸೊಮಿಯಾಕ್ ಏಕ್ ವಾಟ್ ತಯರ್ ಕರಾ;
ತಾಚ್ಯಾ ಪಯ್ಣಾಕ್ ರಸ್ತೊ ನೀಟ್ ಕರಾ."
4 ಜುವಾಂವ್ ಕರ್ಯಾ ಲೊಂವೆಚೆಂ ವಸ್ತುರ್ ನ್ಹೆಸ್ ಲ್ಲೊ ಆನಿ ತಾಣೆಂ ಪೆಂಕ್ಟಾಕ್ ಚಾಮ್ಡ್ಯಾಚೊ ಪಾಟೊ ಬಾಂಧ್ ಲ್ಲೊ; ದೆಂಪೆ ಆನಿ ರಾನ್ ಮ್ಹೊಂವ್ ತಾಚೆಂ ಖಾಣ್. 5-6 ತವಳ್ ಜೆರುಜಲೆಮ್ ಶಹರಾಂತ್ಲೊ, ಜುದೆಯಾಚ್ಯಾ ಆಖ್ಯಾ ಪ್ರಾಂತಾಂತ್ಲೊ ಆನಿ ಯೊರ್ದಾನ್ ನ್ಹಂಯ್ ಬಗ್ಲೆಚ್ಯಾ ಸಗ್ಳ್ಯಾ ಬಯ್ಲಾಂತ್ಲೊ ಲೋಕ್ ತಾಚೆ ಸರ್ಶಿಂ ವೆತಾಲೊ ಆನಿ ಆಪ್ಲಿಂ ಪಾತ್ಕಾಂ ಉಚಾರ್ನ್ ಯೊರ್ದಾನ್ ನ್ಹಂಯ್ತ್ ತಾಚ್ಯಾ ಹಾತಾಂತ್ಲೆಂ ಸ್ನಾನ್ ಘೆತಾಲೊ.
ಜುವಾಂವ್ಚೊ ಜಿಣಿ ಬದ್ಲುಂಕ್ ಉಲೊ
(ಲೂಕ್ 3:7-9)
7ಫಾರಿಜೆವಾಂ ಆನಿ ಸಾದುಸೆವಾಂ ಮಧ್ಲೆ ಸಬಾರ್ ಜಣ್ ಸ್ನಾನ್ ಘೆಂವ್ಕ್ ಆಪ್ಣಾ ಸರ್ಶಿಂ ಯೆತಾಲೆ ತೆಂ ಪಳೆವ್ನ್ ಜುವಾಂವ್ನ್ ತಾಂಕಾಂ ಮ್ಹಳೆಂ : ಹತ್ತ್, ಆಗ್ಗ್ಯಾಚ್ಯಾ ಪಿಲಾಂನೋ, ಯೆಂವ್ಕ್ ಆಸಾ ತ್ಯಾ ಕ್ರೋಧಾ ಥವ್ನ್ ತುಮಿ ಚುಕೊವ್ನ್ ಘೆವ್ಯೆತ್ ಮ್ಹಣ್ ಕೊಣೆಂ ತುಮ್ಕಾಂ ಚತ್ರಾಯ್ ದಿಲಿ? 8 ತರ್ ತುಮ್ಚಿ ಪಾತ್ಕಿ ಜಿಣಿ ಬದಲ್ಲ್ಯಾ ಮ್ಹಣ್ ದಾಖೊವ್ನ್ ದಿತಾತ್ ತ್ಯೊ ಕರ್ನ್ಯೊ ಆಧಾರಾ.9 ‘ಆಮ್ಕಾಂ ಆಬ್ರಾಹಾಮ್ ಆಮ್ಚೊ ಬಾಪ್ ಆಸಾ’ ಮ್ಹಣುನ್ ತುಮ್ಚೇ ಇತ್ಲ್ಯಾಕ್ ಮ್ಹಣುಂಕ್ ಧೈರ್ ಘೆನಾಕಾತ್. ಹಾಂವ್ ತುಮ್ಕಾಂ ಸಾಂಗ್ತಾಂ: ಹ್ಯಾಚ್ ಫಾತ್ರಾಂ ಥಾವ್ನ್ ಆಬ್ರಾಹಾಮಾಕ್ ಸಂತತ್ ಉತ್ಪನ್ನ್ ಕರ್ಚಿ ದೆವಾಕ್ ಸಾಮರ್ಥಿ ಆಸಾ.10 ಇತ್ಲ್ಯಾ ಭಿತರ್ ಚ್ ರುಕಾಂಚ್ಯಾ ಮುಳಾಕ್ ಕುರಾಡ್ ದವರ್ನ್ ಜಾಲ್ಯಾ.ದೆಕುನ್ ಬರೊ ಫೊಳ್ ದೀನಾ ತೊ ಹರ್ಯೇಕ್ ರೂಕ್ ಕಾತರ್ತಲೆ ಆನಿ ಉಜ್ಯಾಂತ್ ಉಡಯ್ತಲೆ. 11 ದೆವಾ ಥಂಯ್ ತುಮ್ಚ್ಯಾಚ್ ಪಾಟಿಂ ಪರ್ತೊಣ್ಯಾಚೊ ಗುರ್ತ್ ಮ್ಹಣ್ ಹಾಂವ್ ತುಮ್ಕಾಂ ಉದ್ಕಾನ್ ಸ್ನಾನ್ ದಿತಾಂ. ಪುಣ್ ಮ್ಹಜ್ಯಾ ಪಾಟ್ಲ್ಯಾನ್ ಯೆತಾ ತೊ ಮ್ಹಜೇ
ಪ್ರಾಸ್ ಬಳಿಷ್ಠ್; ತಾಚ್ಯಾ ಪಾಂಯಾಂಚ್ಯೊ ವ್ಹಾಣೋ ವ್ಹಾವೊಂವ್ಕ್ ಸಯ್ತ್ ಹಾಂವ್ ಯೋಗ್ಯ್ ನ್ಹಯ್. ತೊ ತುಮ್ಕಾಂ ಪವಿತ್ರ್ ಅತ್ಮ್ಯಾನ್ ಆನಿ ಉಜ್ಯಾನ್ ಸ್ನಾನ್ ದಿತಲೊ.12 ಅಪ್ಲೆಂ ಸುಪ್ ತಾಣೆಂ ಆತಾಂ ಹಾತಾಂತ್ ಧರ್ಲಾಂ ಆನಿ ಆಪ್ಲಿ ಧಾನಿ ತೊ ಆಸುಡ್ನ್ ನಿತಳ್ ಕರ್ತಲೊ. ಆಪ್ಲೊ ಗೋಂವ್ ತೊ ಉಜ್ಯಾಂತ್ ಘಾಲ್ನ್ ಲಾಸ್ತಲೊ."
ಜೆಜು ಸ್ನಾನ್ ಘೆತಾ
(ಮಾರ್ಕ್ 1:9-11; ಲೂಕ್ 3:21 -22; ಜುವಾಂವ್ 1:29-34)
13 ತವಳ್ ಜೆಜು ಜುವಾಂವ್ ಲಾಗ್ಚೆಂ ಸ್ನಾನ್ ಘೆವ್ಚೇ ಖಾತಿರ್ ಗಾಲಿಲೆಯಾ ಥಾವ್ನ್ ಯೊರ್ದಾನ್ ನ್ಹಂಯ್ ತಡಿಕ್ ಆಯ್ಲೊ. 14 ಪುಣ್ ಜುವಾಂವ್ನ್ ತಾಕಾ ಆಡಾಂವ್ಕ್ ಪಳೆಲೆಂ. " ಹಾಂವೆಂ ತುಜೇ ಲಾಗ್ಚೆಂ ಸ್ನಾನ್ ಘೆಜಯ್ ಆಸ್ತಾಂ, ತುಂ ಮ್ಹಜೆ ಲಾಗಿಂ ಯೆತಾಯ್?" ಮ್ಹಳೆಂ ತಾಣೆಂ.15 ಪುಣ್ ಜೆಜುನ್ ತಾಕಾ ಜಾಪ್ ದಿಲಿ: " ಆತಾಂ ಸದ್ದ್ಯಾಕ್ ಹೆಂ ತಶೆಂಚ್ ಆಸುಂ ;ಕಿತ್ಯಾಕ್ ಹೇ ವರ್ವಿಂ ದೇವ್ ಖುಶಿ ವ್ಹರ್ತಾ ತೆಂ ಸಕ್ಕಡ್ ಆಮಿ ಜ್ಯಾರಿ ಕರುಂಕ್ ಫಾವೊ." ತಿತ್ಲ್ಯಾರ್ ಜುವಾಂವ್ ಕಬೂಲ್ ಜಾಲೊ.
16 ಜೆಜು ಸ್ನಾನ್ ಘೆವ್ನ್ ಉದ್ಕಾಂತ್ಲೊ ವಯ್ರ್ ಯೆತೆಚ್, ಆಕಾಚ್ ಉಗ್ತೊ ಜಾಲೊ ಆನಿ ದೆವಾಚೊ ಪವಿತ್ರ್ ಅತ್ಮೊ ಏಕ್ ಪಾರ್ವ್ಯಾಬರಿ ಯೆವ್ನ್ ಆಪ್ಣಾಚೆರ್ ರಾವ್ಲಲೊ ತಾಣೆಂ ದೆಖ್ಲೊ. ಆನಿ ತೆದ್ವಾಂ ಆಕಾಸಾ ಥಾವ್ನ್ ಏಕ್ ತಾಳೊಯೀ ಹೇ ಪರಿಂ ಆಯ್ಕಾಲೊ:
"ಹೊ ಮ್ಹಜೊ ಪೂತ್, ಮ್ಹಕಾ ಚಡ್ ಮೊಗಚೊ; ತೊ ಮ್ಹಕಾ ಮಾನ್ವಲಾ."