ಲಗ್ನಾಬಾಂಧಾ ವಿಶ್ಯಾಂತ್ಲಿ ಶಿಕೊವ್ಣ್ (ಸಾ೦ ಮಾತೆವ್ 19:3-12.)
ತವಳ್ ಥೊಡೆ ಫಾರಿಜೆವ್ ಜೆಜು ಸರ್ಶಿಂ ಯೇವ್ನ್, ತಾಕಾ ಪಾರ್ಕುಂಚ್ಯಾ ಇರಾದ್ಯಾನ್ ಅಶೆಂ ಸವಾಲ್ ಕರಿಲಾಗ್ಲೆ: "ಖಂಯ್ಚ್ಯಾಯ್ ಕಾರಣಾ ಖಾತಿರ್ ಏಕ್ ಮನ್ಶಾನ್ ಆಪ್ಲೇ ಬಾಯ್ಲೆಕ್ ಸೊಡ್ಯೆತ್‌ಗೀ?" ಜೆಜುನ್ ತಾಂಕಾಂ ಜಾಪ್ ದಿಲಿ: "ಆರಂಭಾರ್‌ಚ್ ರಚ್ನಾರಾನ್ ‘ತಾಂಕಾಂ ದಾದ್ಲೊ ಆನಿ ಬಾಯ್ಲ್ ಕರ್ನ್ ರಚ್ಲಿಂ’ - ಅಶೆಂ ಮ್ಹಳ್ಳೆಂ ತುಮಿ ವಾಚ್ಲಾಂ ನ್ಹಯ್? ಆನಿ ಹ್ಯಾ ಕಾರಣಾ ಪಾಸತ್, ಏಕ್ ಮನಿಸ್ ಆಪ್ಲ್ಯಾ ಬಾಪಾಯ್ಕ್ ಆನಿ ಆವಯ್ಕ್ ಸೊಡ್ತಲೊ ಆನಿ ಆಪ್ಲೇ ಬಾಯ್ಲೆಕ್ ಎಕ್ವಟ್ತಲೊ. ತಿಂ ದೊಗಾಂಯೀ ಏಕ್ ಜೀವ್ ಜಾತಲಿಂ. ದೆಕುನ್ ಹ್ಯಾ ಫುಡೆಂ ತಿಂ ದೊಗಾಂ ನ್ಹಯ್, ಬಗರ್ ಎಕ್‌ಚ್. ತ್ಯಾ ಪಾಸತ್ ದೆವಾನ್ ಜೊಡಿ ಕೆಲಾಂ ತೆಂ ಮನಿಸ್ ಮೊಡಿನಾ ಜಾಂವ್." ತೆ ತಾಕಾ ಮ್ಹಣಾಲೆ: "ತಶೆಂ ಜಾಲ್ಯಾರ್, ಏಕ್ ದಾದ್ಲ್ಯಾನ್ ವೆಗ್ಳಾಚಾರಾಚಿ ಏಕ್ ಚೀಟ್ ಬರೊವ್ನ್ ಆಪ್ಲೇ ಬಾಯ್ಲೆಕ್ ಸೊಡ್ಯೆತ್ ಮ್ಹಣ್ ಮೊಯ್ಜೆನ್ ಕಾಯ್ದ್ಯಾನಿಶಿಂ ಪರ್ವಣ್ಗಿ ದಿಲ್ಲಿ ಕಿತ್ಯಾಕ್?" ಜೆಜುನ್ ತಾಂಕಾಂ ಜಾಪ್ ದಿಲಿ: "ವ್ಹಯ್, ತುಮಿ ತುಮ್ಚೇಚ್ ಖುಶೆಚೆ ದೆಕುನ್ ಮೊಯ್ಜೆನ್ ತುಮ್ಚ್ಯಾ ಬಾಯ್ಲಾಂಕ್ ಸೊಡುಂಕ್ ತುಮ್ಕಾಂ ರಜಾ ದಿಲ್ಲಿ. ಪುಣ್ ಆರಂಭಾ ಥಾವ್ನ್ ಅಶೆಂ ನಾತ್‌ಲ್ಲೆಂ. ಹಾಂವ್ ತುಮ್ಕಾಂ ಸಾಂಗ್ತಾಂ : ಜೊ ಕೊಣ್ ವ್ಯಭಿಚಾರಾಚ್ಯಾ ಎಕಚ್ ಏಕ್ ಕಾರಣಾ ಶಿವಾಯ್ ಆಪ್ಲೇ ಬಾಯ್ಲೆಕ್ ಸೊಡ್ತಾ ಆನಿ ದುಸ್ರೇಕಡೆ ಲಗ್ನ್ ಜಾತಾ, ತೊ ಪ್ರದ್ವಾರ್ ಆಧಾರ್ತಾ."
ಲಗ್ನ್ ಆನಿ ಆಂಕ್ವಾರ್‌ಪಣ್
ತಾಕಾ ಶಿಸ್ ಮ್ಹಣಾಲೆ: "ದಾದ್ಲ್ಯಾ ಬಾಯ್ಲೇ ಮಧ್ಲಿ ಗಜಾಲ್ ಅಶಿಂ ಜಾಲ್ಯಾರ್, ಕಾಜಾರ್ ಜಾಯ್ನಾತ್‌ಲ್ಲೆಂಚ್ ಬರೆಂ." ತಾಣೆಂ ತಾಂಕಾಂ ಜಾಪ್ ದೀವ್ನ್ ಮ್ಹಳೆಂ: "ಹೆಂ ಉತರ್ ಸಕ್ಕಡ್‌ಯೀ ಮಾನುನ್ ಘೆಶೆನಾತ್; ಜಾಂಕಾಂ ತೆಂ ದೆಣೆಂ ಮೆಳ್ಳಾಂ, ತೆ ಮಾತ್ರ್ ತೆಂ ಘೆತಿತ್. ಆಸಾತ್ ಥೊಡೆ ಹಿಜ್ಡೆ, ಜಲ್ಮಾ ಥಾವ್ನ್‌ಚ್ ಅಶೆ; ಆನಿ ಥೊಡ್ಯಾಂಕ್ ಮನ್ಶಾಂನಿ ಹಿಜ್ಡೆ ಕೆಲ್ಯಾತ್; ಆನಿ ಥೊಡ್ಯಾಂನಿ ಸರ್ಗಿಂಚ್ಯಾ ರಾಜ್ಯಾ ಪಾಸತ್ ಆಪ್ಣಾಂಕ್‌ಚ್ ಹಿಜ್ಡೆ ಕರ್ನ್ ಘೆತ್ಲ್ಯಾತ್. ಜೊ ಕೊಣ್ ಹೆಂ ಉತರ್ ಮಾನುನ್ ಘೆಂವ್ಕ್ ಸಕ್ತಾ, ತೊ ತೆಂ ಘೆಂವ್.